6. Feituʻu Fonua Moʻungaʻia ʻo Siuteá

ʻOku kilomita nai ʻe 56 hono lōloa ʻo e feituʻu fonua moʻungaʻia ʻo Siuteá, pea kilomita ʻe 27 hono maokupú. ʻOku makamakaʻia ʻa e konga lahi ʻo e feituʻu fonua ko ʻení pea ʻoku siʻisiʻi ha meʻa ʻe lava ʻo tupu ai. ʻOku hanga ʻe ha ngaahi teleʻa ʻo vahevahe ʻa e ngaahi moʻungá, pea ʻoku kelekele moʻui ʻa e feituʻu fonua ko iá. Naʻe nofoʻi ʻa e ʻotu moʻunga ko ʻení ʻe he kakai ʻIsilelí ʻi he kuonga muʻá, ʻo nau ngāue ʻaki ʻa e ngaahi moʻungá ke hoko ko honau maluʻi mei ha kakai ʻe ʻoho mai kiate kinautolu. ʻOku tuʻu ʻa Selūsalema ʻi he feituʻu fonua ko ʻení.

Ngaahi Meʻa Mahuʻinga naʻe Hoko aí: Naʻe talaʻofa ʻe he ʻEikí ʻa e fonua ko ʻení kia ʻĒpalahame mo hono hakó (Sēnesi 13:14–18; 17:8). Naʻe tanu ʻa Sela mo ʻĒpalahame ʻi he ʻana ko Makipilá, ʻi Hepeloni (Sēnesi 23:19; 25:9). Naʻe kapa ʻe Tēvita ʻa Selūsalema mei he kakai Sēpusí (2 Sam. 5:4–9). ʻOku lahi ange ʻa e ngaahi meʻa ʻoku tohi ʻi he Fuakava Motuʻá naʻe hoko ʻi he ngaahi feituʻu moʻunga ko ʻení ʻi he ngaahi meʻa naʻe hoko ʻi ha toe feituʻu kehe.