Ɔfã 106
Nyikyerɛ a wɔnam Joseph Smith Nkɔnhyɛnyi no do dze mae wɔ Kirtland, Ohio, Ɔberɛfɛw 25, 1834. Nyikyerɛ yi fa Warren A. Cowdery a, ɔyɛ Oliver Cowdery no nua panyin no ho.
1–3, Wɔfrɛ Warren A. Cowdery dɛ ɔnhwɛ asɔr a ɔwɔ apaamu hɔ no do; 4–5, Mbae a Otsĩa Ebien no remmba kan mba no do dɛ owifo; 6–8, Nhyira kɛse bedzi hɔn a wɔsom nokwar mu wɔ asɔr no mu no hɔn ekyir.
1 Ɔyɛ me pɛ dɛ wobeyi m’akowaa Warren A. Cowdery na wɔahyɛ no sɔfopanyin ma ɔahwɛ m’asɔr a ɔwɔ Fahodzi asaase do no nye mantɔw a etwa ho ehyia no do.
2 Na ɔnkã m’asɛmpa a ɔwɔ hɔ daapem no, ɔmma ne ndze do mbɔ nkorɔfo kɔkɔ, nnyɛ nankasa ne mbew do nko, na mbom wɔ amansin a etwa ho ehyia no so mu;
3 Na ɔmfa ne mber nyina nyɛ ɔfrɛ krɔnkrɔn a ɔkrɔn yi, dza emi medze ama no sesei yi, na onsi nketse nhwehwɛ sor ahenman no na no mu ndzeyɛtsenenee no, na wɔdze ndzɛmba nyina a ohia bɛkã no ho; osiandɛ odwumayɛnyi n’apaadze sɛ no.
4 Na bio, nokwar, mese hom dɛ, Ewuradze ne mbae no abɛn, na ɔbɛfa wiadze mprase dɛ anago owifo—
5 Dɛm ntsi, hom mbɔ hom asen do, ama hom aayɛ kan mba, na dɛm da no nnkɛfa hom mprase dɛ owifo.
6 Na bio, nokwar, mese hom dɛ, sor dzii dɛw ber a m’akowaa Warren bɔɔ no mu adze ma m’ahempoma no, na ɔtwẽe noho fii nyimpa ne ndzeyɛbɔn ho no.
7 Dɛm ntsi, nhyira akã m’akowaa Warren, na mubohu no mbɔbɔr; na ɔmmfa ho dɛ ndzɛmba hun ahyɛ n’akoma mu mã, susuampaara dɛ ɔbɛbrɛ noho adze wɔ m’enyim no, mebɛma no do.
8 Na mebɛma no adom na awerɛhyɛmu wɔ beebiara a obegyina; na sɛ ɔkɔ do yɛ dasegyefo nokwafo na ɔyɛ kan dze ma asɔr no a, mesiesie ahenkyɛw ato hɔ ama no wɔ m’Egya fie mu. Ɔnyɛ hɔ dɛm. Amen.