Ɔfã 53
Nyikyerɛ a wɔnam Joseph Smith Nkɔnhyɛnyi no do dze maa Algernon Sidney Gilbert, wɔ Kirtland, Ohio, Obiradzi 8, 1831. Ɔnam Sidney Gilbert n’ebisadze no ntsi, Nkɔnhyɛnyi no bisaa Ewuradze dza ɔfa Onuabanyin Sidney Gilbert n’edwuma na ɔfrɛ ho wɔ Asɔr no mu.
1–3, Sidney Gilbert ne frɛ na dzibew wɔ Asɔr no mu nye wɔbɛhyɛ no elder; 4–7, Ɔnsom dɛ bishop n’ananmusinyi so.
1 Hwɛ, mese ɔwo, m’akowaa Sidney Gilbert dɛ, matse wo mpaabɔ; na ase me dɛ Ewuradze wo Nyankopɔn nda dza ɔfa wo frɛ na ansanmuyi wɔ asɔr no mu, dza emi, Ewuradze maakyekyer wɔ nda a odzi ekyir yi mu no edzi nkyerɛ wo.
2 Hwɛ, emi Ewuradze a awɔbɔɔ me mbeamudua mu dze maa wiadze bɔn no, dze mbrasɛm yi ma wo dɛ, ɔwɔ dɛ bepow wiadze.
3 Gye m’asɔfodzi to wo do, elder dzibew no mpo, ama akã gyedzi nye nnuho nye abɔnfakyɛ ho asɛm, dɛ mbrɛ m’asɛm, nye bnsa a wɔdze gu do ma nsa kã Sunsum Krɔnkrɔn no se;
4 Na aayɛ aananmusinyi so ama asɔr no wɔ beebi a bishop no bɛkyerɛ, dɛ mbrɛ mbrasɛm a wɔdze bɛma ekyir yi se.
5 Na bio, nokwar, mese wo dɛ, enye mo nkowaa Joseph Smith, Kakraba, nye Sidney Rigdon botu wo kwan no.
6 Hwɛ, iyinom nye ayɛdze a odzi kan a wo nsa bɛkã na mber bi bɛba a wɔbɛma ehu nkaa no so, dɛ mbrɛ wo dwumadzi tse wɔ wo wenyin ture mu.
7 Na bio, mepɛ dɛ ibohu dɛ nyia aotsim kodu ewiei no na wɔbɛgye no nkwa. Ɔnyɛ hɔ dɛm. Amen.