Ɔfã 94
Nyikyerɛ a wɔnam Joseph Smith Nkɔnhyɛnyi no do dze mae, wɔ Kirtland, Ohio, Dzifuu 2, 1833. Woyii Hyrum Smith, Reynolds Cahoon, na Jared Carter dɛ wɔnyɛ Asɔrdan ne nsii ho apamfo kuw.
1–9, Ewuradze ma mbrasɛm a ɔfa dan a wobesi ama President na n’Apamfo Kuw no ma woedzi hɔn dwuma wɔ mu; 10–12, Wobesi dan a wobetsintsim nwoma wɔ mu; 13–17, Wɔkyɛɛ egyapadze bi dze mae.
1 Na bio, nokwar mese hom, am’anyɛnkofo, mbrasɛm a medze rema hom nye dɛ, hom nhyɛ ase mboaboa homho ntow Zion bstake kuropɔn ne fapem wɔ Kirtland asaase do ha, wɔnhyɛ ase wɔ me fie.
2 Na hwɛ, hom nyɛ no dɛ mbrɛ anhwɛdo a medze ama hom no tse.
3 Na hom ntu asaase a odzi kan no a ɔda anaafo afamu hɔ no nsi hɔ dɛ wobesi dan wɔ do dze ama President na n’Apamfo no do, wonsi mma president na n’apamfo no ma wɔnyɛ edwuma wɔ mu, na wonnya nyikyerɛ wɔ mu; na apresident na n’apamfo no hɔn somdwumadzi no wɔ mu, ndzɛmba nyina a ɔfa asɔr na ahenman no ho.
4 Nokwar, mese hom dɛ, wonsi ma ne tɛtɛr nyɛ anamɔn eduonum enum na ne tsentsen so nyɛ anamɔn eduosia enum wɔ ne paado.
5 Ɔwɔ dɛ wonya ase pia na sor pia kɛse wɔ no mu, dɛ mbrɛ nhwɛdo a wɔdze bɛma hom ekyir no tse.
6 Na wobotu fapem no ahyɛ Ewuradze nsa, dɛ mbrɛ asɔfodzi ne nhyehyɛɛ no tse, dɛ mbrɛ nhwɛdo no a wɔdze bɛma hom ekyir no tse.
7 Na wobotu ne nyinara ahyɛ Ewuradze nsa ama president na n’apamfo no hɔn dwumadzi ntsi.
8 Na ɔnnsɛ dɛ wɔma aadze biara a ho nntsew ba mu; na bm’enyimnyam bɛba hɔ, na wobohu m’enyim wɔ hɔ.
9 Mbom sɛ aadze biara a ho nntsew ba mu a, m’enyimnyam remmba hɔ, na merennda m’enyim edzi wɔ mu.
10 Na bio, nokwar, mese hom dɛ, asaase a otsĩa ebien wɔ anaafo afamu no wobotu esi hɔ ama me na woesi dan wɔ do dze ama me, na awoetsintsim me kyerɛwsɛm a bwɔrekyerɛ ase no wɔ mu, nye ndzɛmba nyinara a mebɛhyɛ hom no.
11 Na ne tɛtɛr bɛyɛ anamɔn eduonum enum na ne tsentsen so ayɛ anamɔn eduosia enum wɔ no mu, kor wɔ ase na kor so wɔ sor.
12 Na wobotu dɛm dan no nyina fi ne fapem ahyɛ Ewuradze nsa, dze ayɛ bea a wobetsintsim nwoma, nye ndzɛmba nyina so a mebɛhyɛ hom, hom mma ɔnyɛ krɔnkrɔn na, mma wonngu ho fĩ dɛ mbrɛ nhwɛdo wɔ ndzɛmba nyinara a wɔdze bɛma hom ho no.
13 Na asaase a otsĩa ebiasa no na m’akowaa Hyrum Smith mfa nyɛ n’egyapadze.
14 Na nsaase a odzi kan nye dza otsĩa ebien no a ɔwɔ etsifi afamu no, mo nkowaa Reynolds Cahoon na Jared Carter mfa nyɛ hɔn egyapadze—
15 Ama woeetum aayɛ edwuma a medze ama hɔn no, dɛ wɔnyɛ apamfo kuw a wobesisi m’adan, dɛ mbrɛ mbrasɛm a Emi, Ewuradze Nyankopɔn, dze ama hom no tse.
16 Adan ebien yinom, mma wonnsi kesi dɛ medze mbrasɛm bɛma hom wɔ ho.
17 Na afei, merennkã nsɛm pii nnkyerɛ hom wɔ dɛm aber yi mu. Amen.