Ɔfã 96
Nyikyerɛ a wɔdze maa Joseph Smith Nkɔnhyɛnyi no a, ɔkyerɛ nhyehyɛɛ a ɔwɔ kuropɔn no anaa Zion stake a ɔwɔ Kirtland, Ohio ho, Obiradzi 4, 1833 dɛ ɔyɛ mfatoho ma Ahotseweefo no a wɔwɔ Kirtland. Dɛm aber no yɛ asɔfompanyin hɔn ehyiadzi, na asɛntsitsir a nna wɔrodwendwen ho nye nsaase bi a, wɔfrɛ no French kwã a, ɔyɛ Asɔr nedze a ɔbɛn Kirtland, nna wɔpɛ dɛ wɔdze ma binom. Ɔnam dɛ nna ehyiadzi no ase no, wonnhu nyia wɔmfa dɛm kwã no nhyɛ ne nsa ntsi, hɔn nyina yɛɛ adwen kor dɛ wobebisa Ewuradze wɔ dɛm asɛm no ho.
1, Ɔwɔ dɛ wɔhyɛ Kirtland Stake a ɔwɔ Zion no dzen; 2–5, Ɔwɔ dɛ bishop no kyekyɛ egyapadze no ma Ahotseweefo no; 6–9, Ɔwɔ dɛ wɔgye John Johnson to nkabɔmu nhyehyɛɛ no mu.
1 Hwɛ, mese hom dɛ, nyansa nye yi, ama hom eetum ehu dza hom bɛyɛ wɔ asɛm yi ho, osiandɛ ohia ma me dɛ wɔhyɛ astake yi a makyekyer esi hɔ dɛ Zion n’ahoɔdzen no dzen.
2 Dɛm ntsi, hom mma m’akowaa Newel K. Whitney nhwɛ bea no a wɔato no dzin wɔ hom mu no a mahyehyɛ dɛ mibesi me fi krɔnkrɔn wɔ do no do.
3 Na bio, hom nkyekyɛmu kumaa pii wɔ nyansa kwan do mma hɔn a wɔrohwehwɛ egyapadze, dɛ mbrɛ abaguafo a wɔwɔ hom mu bɛkyerɛ.
4 Dɛm ntsi, hom mbɔ mbɔdzen nhwɛ dɛm asɛm yi, na bea a obeye ama me anhyehyɛɛ no, ama hom eetum dze m’asɛm no aabrɛ adasamba.
5 Na hwɛ, nokwar, mese hom dɛ, iyi nye dza ohia me tsitsir, dɛ m’asɛm no bɔkɔ adasamba hɔ, ama wɔaabrɛ adasamba hɔn akoma adze dze ama hom yieyɛ. Ɔnyɛ hɔ dɛm. Amen.
6 Na bio, nokwar, mese hom dɛ, ɔyɛ me nyansaa na ohia ma me dɛ m’akowaa John Johnson no a magye n’afɔrbɔdze na matse ne mpaabɔ no, susuampaara dɛ odzi me mbrasɛm do ofi mber yi kɔ a, medze onnyiewiei nkwa bɔ no anohoba—
7 Osiandɛ ɔyɛ aJoseph n’asenyi, na ɔyɛ fafafo wɔ nhyira a wɔdze bɔɔ n’egyanom anohoba no mu—
8 Nokwar, mese hom dɛ, ohia ma me dɛ wɔbɛma ɔabɛkã kuw no ho ama ɔaaboa ma wɔdze m’asɛm no aabrɛ adasamba.
9 Dɛm ntsi, hom nhyɛ no sɔfo wɔ dɛm nhyira yi mu, na ɔbɔbɔ mbɔdzen enyiberdo eyi asodzi biara a ɔda fie a wɔato no dzin wɔ hom mu no, ama oeetum atsena mu. Ɔnyɛ hɔ dɛm. Amen.