Ɔfã 119
Nyikyerɛ a wɔnam Joseph Smith Nkɔnhyɛnyi no do dze mae, wɔ Far West, Missouri, Ayɛwoho 8, 1838 ɔyɛ mbuae a wonyae wɔ hɔn ebisadze: “O Ewuradze! Kyerɛ wo nkowaa ahodze dodow a Epɛ dɛ wɔdze tua hɔn ebupɛn du.” Wɔammfa ebupɛn du mbra dɛ mbrɛ yɛtse ase ndɛ da yi amma Asɔr no dada ansaana nyikyerɛ yi reba. Dɛm Kasafua ebupɛn du yi a ɔwɔ mpaabɔ a wɔaserɛ akã sesei nye dza ɔwɔ nyikyerɛ a nsa akã dada (64:23; 85:3; 97:11) no mu no nnkyerɛ nkyɛmu du no mu kor ara, na mbom ɔkyerɛ afɔrbɔdze nyinara a ofi akoma mu, anaadɛ tow a yetua dze to Asɔr no foto mu. Nna Ewuradze na ɔama Asɔr no mu mba etuhoakyɛ mbra dɛ na ahodze ho mbra dɛ wɔmfa mma (nkanka elderfo a wodzi bano no), wodzii ho ahyɛmu a nkyɛ ɔbɛtsena hɔ daapem. Na ɔnam dɛ hɔn mu dodowara enntum enndzi ahyɛmu no do ntsi, Ewuradze yii fii hɔ mber kakra na mbom ɔdze ebupɛn du mbra no hyɛɛ ananmu dze maa Asɔrtɔw no nyina. Nkɔnhyɛnyi no bisaa Ewuradze dɛ ɔnkyerɛ hɔn ahodze dodow a Ɔrohwehwɛ ma wɔdze edzi botae krɔnkrɔn no. Dɛm nyikyerɛ yi nye no ho mbuae.
1–5, Ɔwɔ dɛ Ahotseweefo no dze hɔn ahodze a ɔabor do no ma, na nkyii mfaso a wobenya wɔ hɔn dwuma a wobedzi wɔ afe no mu no, wɔkyɛ mu du, na wɔdze kor etua hɔn ebupɛn du; 6–7, Dɛm nyɛe yi bɛtsew Zion asaase ho.
1 Nokwar, dɛm na Ewuradze se, mepɛ dɛ hom dze hom ahodze a aabor hom do nyina hyɛ bishop a ɔwɔ m’asɔr mu wɔ Zion ne nsa,
2 Ma wɔdze si me afi, na wɔdze atow Zion ne fapem na wɔdze ama asɔfodzi no, na wɔdze etua President a Odzi Kan na n’Apamfo a wɔwɔ m’asɔr mu no hɔn akaw.
3 Na iyi bɛyɛ mo nkorɔfo hɔn aebupɛn du n’ahyɛse.
4 Na iyi ekyir no, hɔn a woetua ebupɛn du no botua hɔn mfaso no mu nkyɛmu du no mu kor afrenhyia biara; na iyi bɛyɛ mbra a ɔbɔwɔ hɔ ama hɔn afebɔɔ, dze ama m’asɔfodzi krɔnkrɔn no, Ewuradze na ɔse.
5 Nokwar, mese hom dɛ, ɔbɛba dɛ hɔn a wɔaboa ano wɔ aZion asaase do nyinara dze dza abor hɔn ahodze do no bɛyɛ hɔn ebupɛn du etua, na ɔwɔ dɛ wodzi dɛm mbra yi do, ɔnntse dɛm a, wonndzi mu a ɔsɛ dɛ wɔtsena hom mu.
6 Na mese hom dɛ, sɛ mo nkorɔfo enndzi dɛm mbra yi do, na woennsie no krɔnkrɔn, na woenndua dɛm mbra yi do ammfa anntsew aZion asaase ho amma me, ama me nhyehyɛɛ na m’atsɛmbu enntsim, aama hɔ ayɛ krɔnkrɔn mapã, hwɛ, nokwar, mese hom dɛ ɔrennyɛ Zion asaase mma hom.
7 Na iyi bɛyɛ mfatoho ama astake a wɔwɔ Zion nyinara. Ɔnyɛ hɔ dɛm. Amen.