1 Woana nye ^aJesse ne Dusin no a wɔakã ho asɛm wɔ Isaiah Tsir 11, nkyekyɛmu a otsĩa 1, 2, 3, 4 na 5 no?

2 Nokwar, dɛm na Ewuradze se: Ɔno nye Jesus Christ.

3 Ebɛnadze nye odubaa no a wɔakã ho asɛm wɔ Isaiah Tsir a otsĩa 11, ne nkyekyɛmu a odzi kan no mu dɛ obefi Jesse ne Dusin no mu aba no?

4 Hwɛ, dɛm na Ewuradze se: Ɔyɛ akowaa a ɔwɔ Christ ne nsamu, ne fã bi yɛ Jesse n’asenyi, na ne fã bi so yɛ ^aEphraim n’asenyi, anaadɛ ofi Joseph fie, ɔno na wɔdze ^btum kɛse ama no.

5 Ebɛnadze nye Jesse no ndwow a wɔakã ho asɛm wɔ Tsir a otsĩa 11 ne nkyekyɛmu a otsĩa 10 no?

6 Hwɛ, dɛm na Ewuradze se, ɔyɛ Jesse n’asenyi, nna ɔyɛ Joseph so n’asenyi, na ɔno na asɔfodzi nye ^aahenman ne nsaafee no a ɔyɛ ^bfrankaa a wɔdze ^cbɔboaboa mo nkorɔfo ano wɔ nda a odzi ekyir no mu no dzi wɔ.

7 Elias Higbee ne nsɛmbisa: Nhyɛ kasa a wɔakã wɔ Isaiah Tsir a otsĩa 52, nkyekyɛmu 1 no a ɔse: Zion, fa w’ahoɔdzen no fura no n’asekyerɛ nye dɛn—na ebɛn nkorɔfo so na Isaiah kyerɛ?

8 Ɔrekyerɛ hɔn a Nyankopɔn bɛfrɛ wɔ nda a odzi ekyir mu no, hɔn a wobokura asɔfodzi no tum no dze ^aZion aba bio no; na Israel no mponee; na ɔmfa ^bn’ahoɔdzen no nfura no nye dɛ ɔmfa asɔfodzi tumdzi no nfura, dza ^codzi wɔ ɔno Zion, wɔ ebusuasantsen mu no; na ɔnsan so nkɛfa tum a ɔyeew no no.

9 Zion esiansian no ho efi no kɔn nkyehoma mu no a ɔwɔ nkyekyɛmu a otsĩa 2 no, yɛntse ase dɛn?

10 Ɔsɛ dɛ yɛtse ase dɛ worutu hɔn a ^awɔabɔ hɔn apetse ma wɔaka ase no fo dɛ wɔnsoɛr mfi bea a wɔahwe ase no na ^bwɔnsan mbra Ewuradze nkyɛn; na sɛ wɔyɛ dɛm a, anohoba a Ewuradze dze bɔ hɔn nye dɛ ɔbɛkasa akyerɛ hɔn, anaadɛ ɔbɛma hɔn nyikyerɛ. Hwɛ nkyekyɛmu a otsĩa 6, 7 na 8. No kɔn mu nkyehoma no nye Nyame no ndom a ɔdze dom no no, anaadɛ Israel n’asefo no a wɔabɔ hɔn apetse Amanamamfo mu no.