Ɔfã 17
Nyikyerɛ a wɔnam Joseph Smith Nkɔnhyɛnyi no do dze maa Oliver Cowdery, David Whitmer, na Martin Harris, wɔ Fayette, New York, Ɔbiradzi 1829, ansaana wɔrehwɛ mprɛtse a woekrukye Mormon Nwoma mu nsɛm wɔ do no. Joseph na ne kyerɛwfo ehu wɔ Mormon Nwoma a wɔrekyerɛ ase no mu dɛ wobeyi adasefo soronko baasa bi a wɔbɛgye ho dase (hwɛ Ether 5:2–4; 2 Nephi 11:3; 27:12). Oliver Cowdery, David Whitmer na Martin Harris nyaa nkenyan bi wɔ hɔn mu ma wonyaa pɛ dɛ wɔbɛyɛ dɛm adasegyefo soronko no. Nkɔnhyɛnyi no bisaa Ewuradze wɔ ho, na nyikyerɛ yi nye mbuae a wɔnam Urim na Thummim no do dze mae.
1–4, Adasegyefo Baasa no nam gyedzi do bohu mprɛtse no nye ndzɛmba krɔnkrɔn binom so; 5–9, Christ gye dase dɛ Mormon Nwoma no fi Nyame hɔ.
1 Hwɛ, mese hom dɛ, hom ntwer m’asɛm, na sɛ hom dze hom akoma nyina yɛ iyi a, hom bɔhwɛ mprɛtse no, nye akatabo no, Laban ne nkrantsee no, Urim na Thummim no a wɔdze maa Jared no nuabanyin no wɔ bepɔw no do no, wɔ ber a ɔnye Ewuradze kasaa enyim na enyim no, nye akyerɛakwan nwanwa no a wɔdze maa Lehi ber a nna ɔwɔ sar no do, wɔ Po Memen n’egya no.
2 Na ɔnam hom gyedzi do na hom bɔhwɛ ndzɛmba yinom, gyedzi a ɔtse dɛ dza tsetse nkɔnhyɛfo no mpo nyae no.
3 Na ber a hom enya gyedzi ekyir no na hom dze hom enyi ehu dɛm ndzɛmba yinom no, hom nam Nyame no tum do bɛgye ho dase.
4 Na iyi na hom bɛyɛ amma wɔaannsɛɛ m’akowaa Joseph Smith, Kakraba, ama menam dɛm dwumadzi yi do dze me nhyehyɛɛ tsenenee aba adasamba mu.
5 Na hom bɛgye dase dɛ hom ehu dɛm ndzɛmba yinom, dɛ mbrɛ m’akowaa Joseph Smith, Kakraba so ehu no; na ɔnam mo tum do hunii, osiandɛ ɔwɔ gyedzi.
6 Nna ɔakyerɛ nwoma no ase, dɛm afã no mpo a mehyɛɛ no no, na dɛ mbrɛ hom Ewuradze na hom Nyankopɔn tse ase yi, ɔyɛ nokwar.
7 Dɛm ntsi, hom nsa akã tum kor noara, na gyedzi kor noara, nye akyɛdze kor noara tse dɛ ma ɔwɔ no.
8 Na sɛ hom dzi me mbrasɛm a odzi ewiei yinom do, dza medze ama hom no do a, hɛl mbobow no nnkenya tum wɔ hom do; osiandɛ m’adom dɔɔ sõ ma hom, na wɔbɛma hom do wɔ da a odzi ewiei no mu.
9 Na emi, Jesus Christ, hom Ewuradze na hom Nyankopɔn no na makasa akyerɛ hom no, ama medze me nhyehyɛɛ tsenenee aaba adasamba mu. Amen.