Ɔfã 6
Nyikyerɛ a wɔdze maa Joseph Smith Nkɔnhyɛnyi no na Oliver Cowdery, wɔ Harmony, Pennsylvania, Ebɔbira, 1829. Oliver Cowdery hyɛɛ no dwumadzi ase dɛ ɔkyerɛwfo wɔ Mormon Nwoma ne nkyerɛase no ase, Ebɔbira 7, 1829. Nna Nyame ada no edzi akyerɛ no dada ma oehu nokwar a ɔwɔ Nkɔnhyɛnyi ne dasegye a ɔfa mprɛtse no a woekrukye Mormon Nwoma n’abakɔsɛm wɔ do no ho. Nkɔnhyɛnyi no nam Urim na Thummim no do bisaa Ewuradze na onyaa dɛm mbuae yi.
1–6, Edwumayɛfo a wɔwɔ Ewuradze ne haban mu no nya nkwagye; 7–13, Akyɛdze biara nnyi hɔ a, ɔkyɛn nkwagye akyɛdze no; 14–27, Wɔnam Sunsum no tum do nya nokwar no ho dase; 28–37, Hom nhwɛ Christ, na hom nyɛ papa daa nyina.
1 Dwumadzi a ɔsõ na ɔyɛ ahobow bi rubopue adasamba mu.
2 Hwɛ, emi nye Nyame; hom ntsie m’asɛm, a nkwa na tum wɔ mu no, ɔyɛ ndam sen nkrantsee anofanu, na ohwira mu kodu dɛ ɔpaapaa akwaa nye ehuon mu; dɛm ntsi hom ntsie me nsɛm.
3 Hwɛ, haban no ahoa na twaber no asõ; dɛm ntsi, obiara a ɔpɛ dɛ otwa no, ɔmfa n’ahoɔdzen ntow ne kantankrankye na ontwa, wɔ ber a adzekyee wɔ do yi, aama ɔakora ne kra ama nkwagye a ɔwɔ hɔ daapem wɔ Nyame n’ahenman mu.
4 Nyew, obiara a ɔbɔtow ne kantankrankye na oetwa no, ɔnoara na Nyame afrɛ.
5 Dɛm ntsi, sɛ ibisa me a wo nsa bɛkã; sɛ ebɔ mu a wobobue ama wo.
6 Afei, ber a hom ebisa yi, hwɛ, mese hom dɛ, hom ndzi me mbrasɛm do, na hom mper dɛ hom bɛkyekyer Zion na wɔdze epue;
7 Mma hom nnhwehwɛ ahonya, na mbom hom nhwehwɛ nyansa, na hwɛ, wɔbɛda Nyame n’esumadze edzi akyerɛ hom, na nkyii wɔbɛyɛ hom ahonyafo. Hwɛ, nyia ɔwɔ onnyiewiei nkwa no yɛ ɔhonyanyi.
8 Nokwar, nokwar, mese wo dɛ, dza epɛ dɛ inya fi mo hɔ no ɔno na wo nsa bɛkã; na sɛ epɛ a, wobodua wo do ayɛ papa pii wɔ dɛm ebusuasantsen yi mu.
9 Mma nnkã hwee na mbom nnuho nko na kã kyerɛ ebusuasantsen yi; dzi me mbrasɛm do, na boa ma wɔnyɛ m’edwuma, dɛ mbrɛ me mbrasɛm kyerɛ, na wobehyira wo.
10 Hwɛ ewɔ akyɛdze, na nhyira akã wo osian w’akyɛdze no ntsi. Kaa dɛ ɔyɛ krɔnkrɔn na ofi sor bae—
11 Na sɛ ibisa a, ibohu esumasɛm a ɔsõ na ɔyɛ ahobow; dɛm ntsi fa w’akyɛdze no yɛ edwuma, ama eehu esumasɛm, na eetum ama ɔdodow ebohu nokwar no, nyew, ama woeehu mfom a ɔwɔ hɔn akwan mu.
12 Mma nnda w’akyɛdze no edzi nnkyerɛ obiara, gyedɛ hɔn a wɔwɔ wo gyedzi no mu no bi nko. Mma mmfa ndzɛmba a ɔyɛ krɔnkrɔn no nndzi agor.
13 Sɛ eyɛ papa, nyew, na idzi nokwar kɔ ewiei a, wɔbɛgye wo nkwa wɔ Nyame n’ahenman no mu, iyi nye dza ɔsõ kɛsenara wɔ Nyame n’akyɛdze nyinara mu; osiandɛ akyɛdze biara nnsõ nnkyɛn nkwagye akyɛdze.
14 Nokwar, nokwar, mese wo dɛ, nhyira akã wo wɔ dza ayɛ ho; osiandɛ ebisa me, na hwɛ, mber dodow biara a ibisae no, inyaa nkyerɛkyerɛ fii mo Sunsum nkyɛn. Sɛ ɔnntse dɛm a, nkyɛ ammba bea a ewɔ do dɛm aber yi.
15 Hwɛ, inyim dɛ ibisaa me na mubuee w’adwen mu; na sesei mekã wo dɛm nsɛm yinom ama eehu dɛ Sunsum nokwafo no na obuee w’adwen mu;
16 Nyew, mekã kyerɛ wo, ama eehu dɛ obiara nnyi hɔ bio, gyedɛ Nyame nko na onyim w’adwendwen nye w’akoma mu nsusui.
17 Mekã wo dɛm nsɛm yinom ama aayɛ dasegye ama wo—dɛ nsɛm anaadɛ edwuma a erekyerɛw yi yɛ nokwar.
18 Dɛm ntsi bɔ mbɔdzen; gyina m’akowaa Joseph n’afã nokwar mu, ama ɔhaw biara mu no, ɔnam asɛm no ntsi oeegyina.
19 Tu no fo wɔ no mfom mu, na wo so gye afotu fi no hɔ. Sie abotar; nya enyidahɔ; nya ahohyɛdo, nya abotar, gyedzi, enyidado na ayamuyie.
20 Hwɛ, ɔwo nye Oliver, na maakasa akyerɛ wo osian w’apɛdze ntsi; dɛm ntsi kora dɛm nsɛm yi do wɔ w’akoma mu. Dzi nokwar, na bɔ mbɔdzen dzi Nyame ne mbrasɛm do, na medze mo dɔ abasa no botwa wo ho ehyia.
21 Hwɛ, emi nye Jesus Christ, Nyame ne Ba no. Emi na mebaa mankasa medze nkyɛn, na mankasa medze anngye me. Emi nye kan a ɔhyerɛn sum mu, na sum no annkyer no.
22 Nokwar, nokwar, mese wo dɛ, sɛ epɛ dɛ inya dasegye bi so a, tow w’adwen to anago no a isui wɔ w’akoma mu frɛɛ me dɛ ibohu nokwar a ɔfa iyinom ho no.
23 Ana mammfa asomdwee ho asɛm annhyɛ w’adwen mu a ɔfa dɛm asɛm no ho? Ebɛn dasegye kɛse na ibotum enya akyɛn dza ofi Nyame hɔ?
24 Na afei, hwɛ, enya dasegye; na sɛ makã ndzɛmba a ɔdasanyi biara nnyim akyerɛ wo a, nna innyaa dasegye?
25 Na, hwɛ, sɛ erohwehwɛ efi mo hɔ, dze akyerɛ ase, tse dɛ m’akowaa Joseph mpo a, medze akyɛdze no ma wo.
26 Nokwar, nokwar, mese wo dɛ, abakɔsɛm bi wɔ hɔ a m’asɛmpa pii wɔ mu a, osian nkorɔfo no hɔn emumuyɛdze ntsi wɔatwe asan;
27 Na afei, mehyɛ wo dɛ, sɛ inya pɛpa—pɛ a edze besie akoradze ama woho wɔ sor a—nna fa w’akyɛdze boa ma wɔmfa ntwe me kyerɛwsɛm no a osian emumuyɛdze ntsi wɔdze esuma no mpue kan mu.
28 Na afei, hwɛ, medze dɛm akyɛdze yi ne nsaafee a hom bodua do dze ɔsomdwumadzi yi epue kan mu no, ma ɔwo nye m’akowaa Joseph so; na adasefo beenu anaa baasa anomu na wɔmfa do nsi asɛm ngyinae.
29 Nokwar, nokwar, mese hom dɛ, sɛ wɔpow me nsɛm, nye dɛm asɛmpa yi nye ɔsomdwuma n’afã bi yi a, nhyira akã hom, osiandɛ wonnkotum ayɛ hom biribi a ɔbor do kyɛn emi.
30 Mbom sɛ wɔyɛ hom dɛ mbrɛ wɔdze ayɛ me no mpo a, nhyira akã hom, osiandɛ hom nye me bɛtsena enyimnyam mu.
31 Na sɛ wɔammpow me nsɛm a, wɔnam dasegye a wɔdze bɛma no do esi no egyinae a, nhyira akã hɔn, na ɔno na hom bedzi dɛw wɔ aba a hom nsaano edwuma asow no ho.
32 Nokwar, nokwar, mese hom dɛ, dɛ mbrɛ mekãa kyerɛɛ m’esuafo no, beebiara a beenu anaa baasa edzi ehyia wɔ me dzin mu, wɔ adwensaa kor ho no, hwɛ, hɔ na mowɔ hɔn finimfin—dɛmara so mpo na mowɔ hom finimfin.
33 Mma hom nnsuro dɛ hom bɛyɛ papa, me mbabanyin, osiandɛ dza hom bodua no, ɔnoara so na hom bobu; dɛm ntsi, sɛ hom dua papa a hom bobu papa so ayɛ hom akatua.
34 Dɛm ntsi, mma hom nnsuro, nguambaakuw; hom nyɛ papa; ma asaase nye hɛl nyina mbɔmu ntsia hom, na sɛ hom si wɔ mo botan do a, wonnkotum edzi hom do konyim.
35 Hwɛ, mummbu hom fɔ; hom nkɔ hom kwan na mma hom nnyɛ bɔn bio; hom mfa ahobrɛadze nyɛ hom edwuma a mahyɛ hom no.
36 Hom nhwɛ me wɔ hom adwendwen biribiara mu; mma hom nngye kyim, mma hom nnsuro.
37 Hom nhwɛ me mfẽ mu epirakur, nye mprɛgow ananmu wɔ me nsa nye m’anan mu; hom ndzi nokwar, hom ndzi me mbrasɛm do, na hom benya ɔsor ahenman no edzi. Amen.