តើការពិតជាអ្វី ?
ព្រះគឺជាប្រភពនៃរាល់សេចក្ដីពិតទាំងអស់ ។ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ឱបក្រសោបរាល់សេចក្ដីពិត ទាំងអស់ ដែលព្រះបានប្រទានដល់បុត្រាបុត្រីទ្រង់ ។
បងប្អូនប្រុសស្រីជាទីស្រឡាញ់ សូមអរគុណបងប្អូនទាំងអស់គ្នាសម្រាប់សម័យប្រជុំដ៏បំផុសគំនិតនេះ ! ចាប់តាំងពីសន្និសីទខែមេសាកន្លងមក យើងបានឃើញព្រឹត្តិការណ៍ជាច្រើននៅទូទាំងពិភពលោក រាប់ពីរឿងឈឺចាប់ទៅរឿងដ៏អស្ចារ្យបំផុត ។
យើងរីករាយដែលស្តាប់ឮរបាយការណ៍អំពីសន្និសីទយុវវ័យជាច្រើន បានធ្វើឡើងនៅជុំវិញពិភពលោក ។១ នៅក្នុងសន្និសីទទាំងនេះ យុវវ័យដ៏មានតម្លៃរបស់យើងកំពុងរៀនថា មិនថាមានអ្វីកើតឡើងនៅក្នុងជីវិតរបស់ពួកគេនោះទេ កម្លាំងដ៏មាំមួនបំផុតរបស់ពួកគេគឺបានមកពីព្រះអម្ចាស់ ។២
យើងអររីករាយដែលមានព្រះវិហារបរិសុទ្ធកាន់តែច្រើនបានសាងសង់នៅទូទាំងពិភពលោក ។ ពេលមានការឧទ្ទិសឆ្លងព្រះវិហារបរិសុទ្ធថ្មីនីមួយៗ នោះយើងមានអំណាចមកពីព្រះបន្ថែមទៀតមកកាន់ពិភពលោកនេះ ដើម្បីពង្រឹងយើង ហើយរារាំងដល់ការខំប្រឹងដ៏ខ្លាំងរបស់មារសត្រូវ ។
ការរំលោភបំពានបង្កើតឥទ្ធិពលរបស់មារសត្រូវ ។ វាគឺជាអំពើបាបដ៏ធ្ងន់ធ្ងរ ។៣ ក្នុងនាមជាប្រធានសាសនាចក្រ ខ្ញុំសូមបញ្ជាក់ពីការបង្រៀនរបស់ព្រះអម្ចាស់ព្រះយេស៊ូវគ្រីស្ទស្ដីពីបញ្ហានេះ ។ ខ្ញុំសូមបញ្ជាក់យ៉ាងច្បាស់ៗថា ការរំលោភបំពាន គ្រប់រូបភាព ទាំងទៅលើស្ដ្រី កុមារ ឬនរណាម្នាក់ គឺជាអំពើដ៏គួរឲ្យខ្ពើមឆ្អើមចំពោះព្រះអម្ចាស់ ។ ទ្រង់សោកសង្រេង ហើយ ខ្ញុំក៏សោកសង្រេង នៅពេលណាដែល នរណាម្នាក់ បានរងគ្រោះ ។ ទ្រង់ព្រះកន្សែង ហើយ យើងទាំងអស់គ្នាក៏ទួញយំសម្រាប់បុគ្គលគ្រប់រូបដែលក្លាយជាជនរងគ្រោះនៃការរំលោភបំពានគ្រប់ប្រភេទ ។ អស់អ្នកដែលប្រព្រឹត្តទង្វើដ៏គួរខ្ពើមឆ្អើមទាំងនេះ មិនត្រឹមតែទទួលខុសត្រូវចំពោះមុខច្បាប់របស់មនុស្សប៉ុណ្ណោះទេ ប៉ុន្ដែក៏នឹងប្រឈមនឹងសេចក្តីក្រោធរបស់ព្រះដ៏មានមហិទ្ធិឫទ្ធិផងដែរ ។
អស់រាប់ទសវត្សរ៍ហើយ រហូតមកដល់ពេលនេះសាសនាចក្របានចាត់វិធានការណ៍យ៉ាងទូលំទូលាយ—ជាពិសេស—ដើម្បីការពារកុមារ ពីការរំលោភបំពាន ។ មានជំនួយជាច្រើននៅលើគេហទំព័រសាសនាចក្រ ។ ខ្ញុំសូមការអញ្ជើញបងប្អូនឲ្យសិក្សាស្វែងយល់ ។៤ គោលការណ៍ណែនាំទាំងនេះគឺរៀបចំដើម្បីការពារដល់ជនស្លូតត្រង់ ។ ខ្ញុំសូមជំរុញឲ្យបងប្អូនម្នាក់ៗចាំប្រុងមើល ក្រែងនរណាម្នាក់អាចនឹងរងគ្រោះថ្នាក់ពីការរំលោភបំពាន ហើយសូមធ្វើសកម្មភាពភ្លាមៗដើម្បីការពារពួកគេ ។ ព្រះអង្គសង្គ្រោះនឹងមិនអត់ឱនឲ្យការរំលោភបំពានឡើយ ហើយក្នុងនាមជាសិស្សរបស់ទ្រង់ យើងក៏មិនអាចអត់ឱនឲ្យបានផងដែរ ។
មារសត្រូវមានកលល្បិចរំខានផ្សេងៗ ។ ក្នុងចំណោមកលល្បិចទាំងនោះ គឺវាខំប្រឹងធ្វើឲ្យព្រំដែនការពិត និងមិនពិតមានសភាពព្រាល ។ ព័ត៌មានដ៏សន្ធឹកនៅចង្អុលដៃរបស់យើង ធ្វើឲ្យកាន់តែពិបាកដើម្បីកំណត់ថាការពិតជាអ្វី ។
ឧបសគ្គនេះរំឭកខ្ញុំអំពីបទពិសោធន៍មួយដែលស៊ីស្ទើរ ណិលសុន និងខ្ញុំធ្លាប់មាន នៅពេលយើងទៅជួបអ្នកធំម្នាក់នៅក្នុងប្រទេសមួយ ដែលមានប្រជាជន ភាគតិចបំផុត ដែលធ្លាប់បានដឹងអំពីព្រះយេស៊ូវគ្រីស្ទ ។ មិត្តចាស់រូបនេះបានធ្លាក់ខ្លួនឈឺធ្ងន់នាពេលថ្មីៗនេះ ។ គាត់បានប្រាប់យើងថា អំឡុងពេលគាត់សម្រាកនៅលើគ្រែជាច្រើនថ្ងៃ គាត់បានសម្លឹងមើលទៅពិដានជារឿយៗ ហើយសួរថា « តើការពិតជាអ្វី ? »
មនុស្សជាច្រើននៅលើផែនដីនៅសព្វថ្ងៃនេះ « ត្រូវបានលាក់ពីសេចក្ដីពិត ពីព្រោះពួកគេមិនដឹងជាទៅរកសេចក្ដីពិតឯណាទេ » ។៥ អ្នកខ្លះព្យាយាមឲ្យយើងជឿថា សេចក្ដីពិតពុំមាននោះទេ—ថាបុគ្គលម្នាក់ៗគួរតែសម្រេចចិត្តដោយខ្លួនឯងថា ការពិតជាអ្វី ។ ជំនឿបែបនោះគឺជាការគិតចង់បានរបស់អស់អ្នកដែលគិតខុសថា ពួកគេនឹងមិនទទួលខុសត្រូវចំពោះព្រះឡើយ ។
បងប្អូនប្រុសស្រីជាទីស្រឡាញ់ ព្រះគឺជាប្រភពនៃរាល់សេចក្ដីពិតទាំងអស់ ។ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ឱបក្រសោបរាល់សេចក្ដីពិត ទាំងអស់ ដែលព្រះបានប្រទានដល់បុត្រាបុត្រីទ្រង់ មិនថាបានរៀននៅក្នុងបន្ទប់ពិសោធន៍ខាងវិទ្យាសាស្ដ្រ ឬបានទទួលតាមវិវរណៈមកពីទ្រង់ផ្ទាល់នោះទេ ។
បងប្អូននឹងបន្ដស្ដាប់ឮសេចក្ដីពិតចេញពីវេទិកានេះនៅថ្ងៃនេះ និងថ្ងៃស្អែក ។ សូមកត់ត្រាទុកយោបល់ណាដែលបងប្អូនចាប់អារម្មណ៍ និងយោបល់ណាដែលផុសឡើងក្នុងគំនិតនិងដក់ជាប់នៅក្នុងចិត្តរបស់បងប្អូន ។ ចូរទូលសូមព្រះអម្ចាស់ប្រកបដោយការអធិស្ឋាន ដើម្បីបញ្ជាក់ថា អ្វីដែលបងប្អូនបានស្ដាប់ឮគឺជាការពិត ។
បងប្អូនប្រុសស្រីជាទីស្រឡាញ់ ខ្ញុំស្រឡាញ់បងប្អូន ។ ខ្ញុំអធិស្ឋានសូមឲ្យ សន្និសីទនេះនឹងផ្ដល់អាហារខាងវិញ្ញាណដែលបងប្អូនកំពុងស្វែងរក ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕