ចម្លើយគឺព្រះយេស៊ូវ
មិនថាមានការប្រឈម នឹងការលំបាក ឬច្របូកច្របល់យ៉ាងណានោះទេ បងប្អូនអាចចងចាំជានិច្ចថា ចម្លើយគឺសាមញ្ញ ៖គឺព្រះយេស៊ូវជានិច្ច ។
វាជាកិត្តិយសណាស់ដែលបានថ្លែងទៅកាន់បងប្អូននៅក្នុងសម័យប្រជុំនៃសន្និសីទនេះ ។ ថ្ងៃនេះខ្ញុំសូមថ្លែងទៅកាន់បងប្អូនក្នុងនាមជាមិត្តភក្តិ ។ នៅក្នុងដំណឹងល្អរបស់យ៉ូហាន ព្រះអង្គសង្រ្គោះបានបង្រៀនថា យើងគឺជាសំឡាញ់របស់ទ្រង់ ប្រសិនបើយើងធ្វើអ្វីដែលទ្រង់បង្គាប់យើងឲ្យធ្វើ ។១
វាជាសេចក្ដីស្រឡាញ់រួម និងរបស់យើងម្នាក់ៗចំពោះព្រះអង្គសង្គ្រោះ ព្រមទាំងសេចក្ដីសញ្ញារបស់យើងជាមួយនឹងទ្រង់ ដែលចងភ្ជាប់យើងជាមួយគ្នា ។ ដូចដែលប្រធាន អាវរិង ប៊ី ហិនរី បានបង្រៀនថា៖ « ខ្ញុំចង់និយាយទៅកាន់បងប្អូនថា ព្រះអម្ចាស់ស្រឡាញ់ និងទុកព្រះទ័យលើបងប្អូនខ្លាំងណាស់ ។ ហើយលើសពីនេះទៀត ខ្ញុំចង់ប្រាប់បងប្អូនថា ទ្រង់ពឹងផ្អែកទៅលើបងប្អូនខ្លាំងណាស់ » ។២
ពេលប្រធាន រ័សុល អិម ណិលសុន ហៅខ្ញុំឲ្យធ្វើជាពួកអ្នកមានសិទ្ធអំណាចទូទៅ ខ្ញុំរំជួលចិត្តខ្លាំងណាស់ ។ វាលើសលប់ណាស់ ។ ភរិយារបស់ខ្ញុំ ជូលី និងខ្ញុំបានរង់ចាំសម័យប្រជុំរសៀលថ្ងៃសៅរ៍នៃសន្និសីទទូទៅដោយអន្ទះសា ។ ខ្ញុំមានចិត្តរាបសារដោយបានទទួលការគាំទ្រ ។ ខ្ញុំបានដើរទៅកាន់កន្លែងអង្គុយរបស់ខ្ញុំដោយប្រុងប្រយ័ត្ន ដើម្បីកុំឲ្យមានការភ្លាំងភ្លាត់ក្នុងកិច្ចការដំបូងរបស់ខ្ញុំ ។
នៅចុងបញ្ចប់នៃសម័យនោះមានរឿងមួយបានកើតឡើង ដែលមានឥទ្ធិពលយ៉ាងខ្លាំងមកលើរូបខ្ញុំ ។ សមាជិកកូរ៉ុមបានតម្រង់ជួរ និងស្វាគមន៍ដល់ពួកអ្នកមានសិទ្ធអំណាចទូទៅម្ដងម្នាក់ៗ ។ ពួកលោកម្នាក់ៗបានចែកចាយសេចក្ដីស្រឡាញ់ និងការគាំទ្ររបស់ពួកលោក ។ ជាមួយនឹង អាប្រាហ្សូ ដោយចេញពីចិត្តនោះពួកលោកបានថ្លែងថា « កុំបារម្ភអី—លោកមានចំណែកនៅទីនេះ » ។
នៅក្នុងទំនាក់ទំនងរបស់យើងជាមួយព្រះអង្គសង្គ្រោះ នោះទ្រង់ទតមើលទៅដួងចិត្ត ហើយមិនរើសមុខអ្នកណាទេ » ។៣ សូមពិចារណាពីរបៀបដែលទ្រង់ជ្រើសរើសពួកសាវករបស់ទ្រង់ ។ ទ្រង់មិនបានផ្ដោតព្រះទ័យទៅលើឋានៈ ឬទ្រព្យសម្បត្តិឡើយ ។ ទ្រង់អញ្ជើញយើងឲ្យដើរតាមទ្រង់ ហើយខ្ញុំជឿថាទ្រង់ ធានាដល់យើងថាយើងជារបស់ផងទ្រង់ ។
សារនេះអនុវត្តជាពិសេសចំពោះយុវវ័យនៃសាសនាចក្រផងដែរ ។ ខ្ញុំមើលឃើញនៅក្នុងខ្លួនប្អូននូវអ្វីដែលប្រធានណិលសុន ឃើញនៅក្នុងខ្លួនប្អូនដែរ ។ លោកបានមានប្រសាសន៍ថា « មានអ្វីមួយពិសេសដែល មិនអាចបដិសេធបានអំពីយុវវ័យជំនាន់នេះ ។ ព្រះវរបិតាសួគ៌របស់ប្អូនច្បាស់ជាមានទំនុកចិត្តយ៉ាង ខ្លាំងទៅលើប្អូនរហូតបញ្ជូនប្អូនមកកាន់ផែនដីនៅ ពេលនេះ ។ ប្អូនបានកើតមកសម្រាប់ភាពអស្ចារ្យ ! »៤
ខ្ញុំមានអំណរគុណចំពោះអ្វីដែលខ្ញុំបានរៀនមកពីយុវវ័យ ។ ខ្ញុំមានអំណរគុណចំពោះអ្វីៗដែលកូនៗរបស់ខ្ញុំបង្រៀនខ្ញុំ ចំពោះអ្វីៗដែលពួកអ្នកផ្សព្វផ្សាយសាសនារបស់យើងបង្រៀនខ្ញុំ និងចំពោះអ្វីៗដែលក្មួយស្រី និងក្មួយប្រុសរបស់ខ្ញុំបង្រៀនខ្ញុំ ។
ថ្មីៗនេះខ្ញុំបានធ្វើការនៅក្នុងកសិដ្ឋានរបស់យើងជាមួយក្មួយប្រុសរបស់ខ្ញុំឈ្មោះ ណាស ។ គាត់មានអាយុប្រាំមួយឆ្នាំ ហើយមានចិត្តបរិសុទ្ធ ។ គាត់គឺជាក្មួយប្រុសដែលខ្ញុំចូលចិត្តឈ្មោះ ណាស ហើយខ្ញុំជឿថា ខ្ញុំជាពូដែលគាត់ចូលចិត្តកំពុងនិយាយនៅក្នុង សន្និសីទថ្ងៃនេះ ។
នៅពេលគាត់បានជួយខ្ញុំរកឃើញដំណោះស្រាយសម្រាប់គម្រោងរបស់យើង ខ្ញុំបាននិយាយថា « ណាស គំនិតនោះល្អណាស់ ។ ហេតុអ្វីក្មួយឆ្លាតម្ល៉េះ ? គាត់បានមើលមកខ្ញុំ ដោយសួរថា « ពូ រ៉ាយអាន ម៉េចក៏ពូមិនដឹងពីចម្លើយចំពោះសំណួរនេះ ? »
គាត់គ្រាន់តែញាក់ស្មា ញញឹម ហើយនិយាយដោយមានទំនុកចិត្តថា គឺ « ព្រះយេស៊ូវ » ។
ណាស បានរំឭកខ្ញុំនៅថ្ងៃនោះអំពីការបង្រៀនដ៏សាមញ្ញ ប៉ុន្តែមានអត្ថន័យជ្រាលជ្រៅមួយ ។ ចម្លើយចំពោះសំណួរសាមញ្ញបំផុត និងបញ្ហាស្មុគស្មាញបំផុត គឺតែងតែដូចគ្នា ។ ចម្លើយគឺព្រះយេស៊ូវគ្រីស្ទ ។ ទ្រង់គឺជាដំណោះស្រាយចំពោះបញ្ហាគ្រប់យ៉ាង ។
នៅក្នុងដំណឹងល្អរបស់យ៉ូហាន ព្រះអង្គសង្គ្រោះបានមាន បន្ទូលទៅពួកសិស្សរបស់ទ្រង់ថា ទ្រង់នឹងរៀបចំកន្លែង មួយសម្រាប់ពួកគេ ។ ថូម៉ាស បានងឿងឆ្ងល់ ហើយបានទូលសួរព្រះអង្គសង្គ្រោះថា ៖
« ព្រះអម្ចាស់អើយ យើងខ្ញុំមិនដឹងជាទ្រង់យាងទៅឯណាទេ ដូច្នេះធ្វើដូចម្តេចឲ្យយើងខ្ញុំស្គាល់ផ្លូវទៅបាន ។
« ព្រះយេស៊ូវមានព្រះបន្ទូលទៅគាត់ថាខ្ញុំជាផ្លូវជាសេចក្តីពិត ហើយជាជីវិត បើមិនមកតាមខ្ញុំ នោះគ្មានអ្នកណាទៅឯព្រះវរបិតាបានឡើយ » ។៥
ព្រះអង្គសង្គ្រោះបានបង្រៀនពួកសិស្សទ្រង់ថា ទ្រង់ជាផ្លូវ សេចក្ដីពិត ហើយជាជីវិត » ។ ទ្រង់គឺជាចម្លើយចំពោះសំណួរអំពីរបៀបទៅរកព្រះ វរបិតាសួគ៌ ។ ការទទួលបានទីបន្ទាល់អំពីតួនាទីដ៏ទេវភាពរបស់ទ្រង់ ក្នុងជីវិតរបស់យើង គឺជាអ្វីមួយដែលខ្ញុំបានរៀនកាលក្មេង ។
ខណៈខ្ញុំកំពុងបម្រើជាអ្នកផ្សព្វផ្សាយសាសនានៅប្រទេស អាហ្សង់ទីន ប្រធានហាវើដ ដបុលយូ ហិនធើរបានអញើញយើងឲ្យធ្វើរឿងមួយដែលមានឥទ្ធិពលយ៉ាងខ្លាំងមកលើជីវិតខ្ញុំ ។ លោកបានមានប្រសាសន៍ថា « យើងត្រូវតែស្គាល់ព្រះគ្រីស្ទឲ្យបានច្បាស់ជាងគ្រាន់តែយើងស្គាល់ទ្រង់ យើងត្រូវចងចាំដល់ទ្រង់ឲ្យបានញឹកញាប់ជាងគ្រាន់តែយើងចងចាំដល់ទ្រង់ យើងត្រូវតែបម្រើទ្រង់ឲ្យបានក្លៀវក្លាជាងគ្រាន់តែយើងបម្រើទ្រង់ » ។៦
នៅពេលនោះខ្ញុំមានកង្វល់អំពីរបៀបធ្វើជាអ្នក ផ្សព្វផ្សាយសាសនាដ៏ល្អប្រសើរម្នាក់ ។ នេះជាចម្លើយ ៖ ត្រូវស្គាល់ព្រះគ្រីស្ទ ត្រូវចងចាំទ្រង់ ហើយត្រូវបម្រើទ្រង់ ។ ពួកអ្នកផ្សព្វផ្សាយសាសនាជុំវិញពិភពលោកបានរួបរួមគ្នានៅក្នុងគោលបំណងនេះ ៖« អញ្ជើញដល់មនុស្សដទៃមកកាន់ព្រះគ្រីស្ទ ដោយការជួយពួកគេឲ្យទទួលយកដំណឹងល្អដែលបានស្ដារឡើងវិញ តាមរយៈសេចក្ដីជំនឿទៅលើ[ ទ្រង់ ] និងដង្វាយធួនរបស់ទ្រង់ » ហើយតាមរយៈ« ការប្រែចិត្ត ពិធីបុណ្យជ្រមុជទឹក ពិធីទទួលអំណោយព្រះវិញ្ញាណបរិសុទ្ធ និងស៊ូទ្រាំដរាបដល់ចុងបំផុត » ។៧ ចំពោះមិត្តរបស់យើងដែលកំពុងស្ដាប់ពួកអ្នកផ្សព្វផ្សាយ សាសនា ខ្ញុំសូមបន្ថែមការអញ្ជើញរបស់ខ្ញុំឲ្យមករកព្រះគ្រីស្ទ ។ ពួកយើង នឹងព្យាយាមស្គាល់ទ្រង់ ចងចាំទ្រង់ ហើយបម្រើទ្រង់ទាំងអស់គ្នា ។
ការបម្រើបេសកកម្មគឺជាគ្រាដ៏ពិសិដ្ឋមួយក្នុងជីវិតខ្ញុំ ។ នៅក្នុងការសម្ភាសន៍ចុងក្រោយរបស់ខ្ញុំជាមួយគាត់ ក្នុង នាមជាអ្នកផ្សព្វផ្សាយសាសនាពេញម៉ោង ប្រធាន ប្លៀ ភីនខក់ បាននិយាយអំពីការផ្លាស់ប្តូរនាពេលខាងមុខនេះនៅក្នុងថ្នាក់ដឹកនាំបេសកកម្មដោយសារគាត់ និងភរិយារបស់គាត់ក៏ជិតបញ្ចប់ការបម្រើរបស់ពួកគាត់ផងដែរ ។ យើងទាំងពីរនាក់មានចិត្តសោកសៅដោយសារត្រូវ ចាកចេញពីអ្វីដែលយើងស្រឡាញ់ខ្លាំងបំផុត ។ គាត់អាចមើលដឹងថា ខ្ញុំមានបញ្ហាដោយសារគំនិត ខ្ញុំមិនមែនជាអ្នកផ្សព្វផ្សាយសាសនាពេញម៉ោងទៀតឡើយ ។ គាត់គឺជាបុរសម្នាក់ដែលមានសេចក្ដីជំនឿដ៏អស្ចារ្យ ហើយបានបង្រៀនខ្ញុំដោយសេចក្ដីស្រឡាញ់ដូចដែលគាត់បានធ្វើអស់រយៈពេលពីរឆ្នាំមកហើយ ។ គាត់បានចង្អុលទៅរូបភាពរបស់ព្រះយេស៊ូវគ្រីស្ទនៅលើតុរបស់គាត់ ហើយបានថ្លែងថា « អែលឌើរ អូលសិន វាមិនអីទេ ពីព្រោះវាជាកិច្ចការរបស់ទ្រង់ » ។ ខ្ញុំបានទទួលអារម្មណ៍នូវការធានាអះអាងដោយដឹងថា ព្រះអង្គសង្គ្រោះនឹងជួយយើងមិនត្រឹមតែនៅពេលយើងកំពុងបម្រើប៉ុណ្ណោះទេ ប៉ុន្តែទ្រង់នឹងជួយយើងជានិច្ច—ប្រសិនបើយើងនឹងអនុញ្ញាតឲ្យទ្រង់ធ្វើដូច្នោះ ។
ស៊ីស្ទើរ ភីនខក់បានបង្រៀនយើងចេញពីជម្រៅបេះដូងរបស់គាត់នូវឃ្លាសាមញ្ញៗបំផុតនៃភាសាអេស្ប៉ាញ ។ នៅពេលគាត់និយាយថា « Jesucristo vive » ខ្ញុំដឹងថាវាជាការពិត ហើយទ្រង់មានព្រះជន្មរស់ ។ នៅពេលគាត់និយាយថា « អែលឌើរ វាយ ហឺម៉ាណេស ឡេស អាម៉ូ » ខ្ញុំដឹងថា គាត់ស្រឡាញ់យើង ហើយចង់ឲ្យយើងធ្វើតាមព្រះអង្គសង្រ្គោះជានិច្ច ។
ថ្មីៗនេះភរិយាខ្ញុំ និងខ្ញុំមានពរណាស់ដែលបានបម្រើជាប្រធានបេសកកម្មដើម្បីធ្វើការជាមួយនឹងពួកអ្នកផ្សព្វផ្សាយសាសនាដ៏អស្ចារ្យនៅក្នុងប្រទេស អ៊ុយរ៉ាហ្គាយ ។ ខ្ញុំអាចនិយាយថា ពួកគេគឺជាអ្នកផ្សព្វផ្សាយសាសនាដ៏ល្អបំផុតនៅក្នុងពិភពលោក ហើយខ្ញុំជឿជាក់ថា អ្នកដឹកនាំបេសកកម្ម គ្រប់រូបមានអារម្មណ៍ដូច្នោះដែរ ។ ពួកសិស្សទាំងនេះបានង្រៀនយើងរាល់ថ្ងៃអំពីការធ្វើតាមព្រះអង្គសង្រ្គោះ ។
អំឡុងការសម្ភាសន៍ជាប្រចាំ អ្នកផ្សព្វផ្សាយជាស៊ីស្ទើរម្នាក់បានដើរចូលការិយាល័យ ។ នាងគឺជាអ្នកផ្សព្វផ្សាយសាសនាដ៏ចំណាន ជាអ្នកបំពាក់បំប៉នដ៏ពូកែ និងជាអ្នកដឹកនាំម្នាក់ដែលមានការលះបង់ខ្ពស់ ។ ដៃគូរបស់នាងបានយកគំរូតាម ហើយមនុស្សជាច្រើនស្រឡាញ់នាង ។ នាងគោរពប្រតិបត្តិ បន្ទាបខ្លួន និងមានទំនុកចិត្ត ។ ការចុះទស្សនកិច្ចរបស់យើងពីមុនបានផ្តោតលើតំបន់របស់នាង និងមនុស្សដែលនាងកំពុងបង្រៀន ។ ការចុះទស្សនិច្ចលើកនេះគឺខុសគ្នា ។ ពេលខ្ញុំសួរសុខទុក្ខនាង ខ្ញុំអាចដឹងបានថា នាងកំពុងជួបបញ្ហា ។ នាងបាននិយាយថា « ប្រធាន អូលសិន ខ្ញុំមិនប្រាកដថា ខ្ញុំអាចធ្វើការណ៍នេះបានទេ ។ ខ្ញុំមិនច្បាស់ថា ខ្ញុំនឹងល្អគ្រប់គ្រាន់ដែរឬទេ ។ ខ្ញុំមិនច្បាស់ថា តើខ្ញុំអាចធ្វើជាអ្នកផ្សព្វផ្សាយសាសនាដែលព្រះអម្ចាស់តម្រូវឲ្យខ្ញុំធ្វើឬអត់ទេ » ។
នាងជាអ្នកផ្សព្វផ្សាយសាសនាដ៏អស្ចារ្យ ។ ល្អគ្រប់យ៉ាង ។ ជាសុបិនដែលប្រធានបេសកកម្មចង់បាន ។ ខ្ញុំមិនដែលបារម្ភអំពីសមត្ថភាពរបស់នាងជាអ្នកផ្សព្វផ្សាយសាសនានោះទេ ។
ពេលខ្ញុំស្តាប់នាង ខ្ញុំស្មុគស្មាញមិនដឹងនិយាយអ្វី ។ ខ្ញុំបានអធិស្ឋានដោយស្ងប់ស្ងាត់ « ព្រះវរបិតាសួគ៌ នេះគឺជាអ្នកផ្សព្វផ្សាយសាសនាដ៏អស្ចារ្យ ។ នាងជារបស់ទ្រង់ ។ នាងកំពុងធ្វើអ្វីគ្រប់យ៉ាងត្រឹមត្រូវ ។ ទូលបង្គំមិនចង់និយាយខុសនោះទេ ។ សូមជួយទូលបង្គំឲ្យដឹងពីអ្វីដែលត្រូវនិយាយផង » ។
ពាក្យពេចន៍បានផុសឡើង ។ ខ្ញុំបាននិយាយថា « ហឺម៉ាណា ខ្ញុំសោកស្តាយណាស់ដែលប្អូនមានអារម្មណ៍បែបនេះ ។ ខ្ញុំសូមសួរប្អូនសំណួរមួយ ។ ប្រសិនបើប្អូនមានមិត្តភក្តិម្នាក់ដែលប្អូនកំពុងបង្រៀនមានអារម្មណ៍បែបនេះ តើប្អូននឹងនិយាយអ្វីទៅគាត់ ? »
នាងមើលមកខ្ញុំ ហើយញញឹម ។ ជាមួយនឹងស្មារតី និងការជឿជាក់របស់អ្នកផ្សព្វផ្សាយសាសនាដ៏ពិសេសនោះ នាងបានឆ្លើយថា « ប្រធានវាងាយស្រួលណាស់ ។ ខ្ញុំនឹងប្រាប់គាត់ថា ព្រះអង្គសង្រ្គោះស្គាល់បងយ៉ាងច្បាស់ ។ ខ្ញុំនឹងប្រាប់គាត់ថា ទ្រង់មានព្រះជន្មរស់ ។ ទ្រង់ស្រឡាញ់បង ។ បងល្អគ្រប់គ្រាន់ ហើយបងនឹងទទួលបានជោគជ័យលើការងារនេះ ! »
ដោយមានសំណើចបន្តិចបន្តួច នាងបាននិយាយថា « ខ្ញុំគិតថា បើវាអនុវត្តចំពោះមិត្តភក្តិរបស់យើង អ៊ីចឹងវាក៏អនុវត្តចំពោះខ្ញុំដែរ » ។
នៅពេលយើងមានសំណួរ ឬការសង្ស័យ យើងអាចគិតថា ដំណោះស្រាយនោះស្មុគស្មាញពេក ឬថាការស្វែងរកចម្លើយគឺធ្វើឲ្យភាន់ច្រឡំណាស់ ។ សូមឲ្យយើងចងចាំថា មារសត្រូវរបស់យើង សូម្បីតែបិតានៃសេចក្ដីកុហក គឺជាស្ថាបនិកនៃភាពច្របូកច្របល់ ។៨
ព្រះអង្គសង្រ្គោះគឺជាលោកចៅហ្វាយនៃភាពសាមញ្ញ ។
ប្រធាន ណិលសុន បានថ្លែងថា ៖
« ពួកមារសត្រូវឆ្លាតវៃណាស់ ។ សម្រាប់សហសវត្សរ៍ វាធ្វើឲ្យសេចក្ដីល្អមើលទៅជាអាក្រក់ ហើយសេចក្ដីអាក្រក់ទៅជាល្អ ។ សាររបស់វាកាន់តែឮខ្លាំង មុតមាំ និងអំនួត ។
« ទោះជាយ៉ាងណា សារលិខិតមកពីព្រះវរបិតាសួគ៌យើង គឺខុសគ្នាខ្លាំង ។ ទ្រង់ទំនាក់ទំនងដោយសាមញ្ញ ស្ងប់ស្ងាត់ និងច្បាស់លាស់ ដែលយើងមិនអាចយល់ខុសអំពីទ្រង់បានទេ » ។៩
យើងមានអំណរគុណណាស់ដែលព្រះស្រឡាញ់យើងយ៉ាងខ្លាំង ដែលទ្រង់បានបញ្ជូនបុត្រាទ្រង់មក ។ ទ្រង់គឺជាចម្លើយ ។
ប្រធាន ណិលសុន បានមានប្រសាសន៍ថ្មីៗនេះថា ៖
« បងប្អូនប្រុសស្រី ដំណឹងល្អនៃព្រះយេស៊ូវគ្រីស្ទពិតជាត្រូវការខ្លាំងណាស់នៅសព្វថ្ងៃនេះ ។ …
« … ការណ៍នេះគូសបញ្ជាក់អំពីតម្រូវការបន្ទាន់សម្រាប់យើងទាំងអស់គ្នាដើម្បីធ្វើតាមការបង្រៀនរបស់ព្រះអម្ចាស់ទៅកាន់ពួកសិស្សរបស់ទ្រង់ឲ្យ‹ … ទៅពេញសព្វក្នុងក្នុងលោកិយ ទាំងមូលហើយផ្សាយដំណឹងល្អទូទៅដល់ គ្រប់មនុស្សទាំងអស់ចុះ › » ។១០
ចំពោះបងប្អូនដែលជ្រើសរើសបម្រើ ខ្ញុំអាចបញ្ជាក់ពីពរជ័យដែលនឹងទទួលបានកាលបងប្អូនស្តាប់តាមការអំពាវនាវរបស់ព្យាការី ។ ការបម្រើគឺមិនគិតពីខ្លួនឯង វាគិតអំពីព្រះអង្គសង្រ្គោះ ។ បងប្អូននឹងត្រូវបានហៅឲ្យទៅកន្លែងមួយ ប៉ុន្តែអ្វីដែលសំខាន់បំផុតនោះ បងប្អូននឹងត្រូវបានហៅឲ្យបម្រើដល់ប្រជាជន ។ បងប្អូននឹងមានទំនួលខុសត្រូវដ៏ធំ និងពរជ័យនៃការជួយដល់មិត្តភក្តិថ្មីឲ្យយល់ថា ចម្លើយគឺជាព្រះយេស៊ូវ ។
នេះគឺជាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ហើយសាសនាចក្រនេះដែលយើងមានចំណែក ។ អ្វីៗដែលប្រធាន ណិលសុន លើកទឹកចិត្តយើងឲ្យធ្វើដោយក្តីស្រឡាញ់នឹងនាំឲ្យយើងខិតទៅកាន់តែជិតនឹងព្រះអង្គសង្រ្គោះ ។
យុវវ័យដ៏អស្ចារ្យរបស់យើង—រួមទាំង ណាស ជាក្មួយប្រុសរបស់ខ្ញុំ—នៅពេញមួយជីវិតរបស់ប្អូនៗ មិនថាមានការប្រឈមនឹងការលំបាក ឬច្របូកច្របល់យ៉ាងណានោះទេ ប្អូនៗអាចចងចាំជានិច្ចថា ចម្លើយគឺសាមញ្ញ ចម្លើយគឺព្រះយេស៊ូវជានិច្ច ។
កាលដែលខ្ញុំបានស្តាប់ដល់អស់អ្នកដែលយើងតែងតាំងជាព្យាការី ជាអ្នកមើលឆុត និងជាអ្នកទទួលវិវរណៈទាំងឡាយមានប្រសាសន៍នៅឱកាសជាច្រើន ខ្ញុំក៏សូមនិយាយដែរថា ពួកយើងស្រឡាញ់ប្អូនៗ ពួកយើងសូមអរគុណដល់ប្អូនៗ ហើយពួកយើងត្រូវការប្អូនៗ ។ នេះជាកន្លែងដែលប្អូនៗមានចំណែក ។
ខ្ញុំស្រឡាញ់ព្រះអង្គសង្រ្គោះ ។ ខ្ញុំសូមថ្លែងទីបន្ទាល់ពីព្រះនាមរបស់ទ្រង់ គឺព្រះយេស៊ូវគ្រីស្ទ ។ ខ្ញុំសូមថ្លែងទីបន្ទាល់ថា ទ្រង់គឺជា « មេផ្តើម ហើយជាមេសម្រេចនៃសេចក្តីជំនឿរបស់យើង »១១ហើយទ្រង់គឺជាលោកចៅហ្វាយនៃភាពសាមញ្ញ ។ ចម្លើយគឺព្រះយេស៊ូវ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕