នឹមរបស់ទ្រង់ងាយ ហើយបន្ទុករបស់ទ្រង់ក៏ស្រាល
ចូរយើងទាំងអស់គ្នាចាំថាបុគ្គលម្នាក់ៗនៅលើផែនដីនេះ គឺជាកូនរបស់ព្រះ ហើយទ្រង់ស្រឡាញ់មនុស្សគ្រប់រូប ។
មានដំណាលរឿងអំពីបុរសម្នាក់ឈ្មោះ ចាក ដែលមានឆ្កែប្រមាញ់សំណព្វមួយក្បាលឈ្មោះ ខេស៊ី ។ ចាក មានមោទនភាពចំពោះ ខេស៊ី ណាស់ គាត់តែងតែនិយាយអួតអំពីឆ្កែដ៏ជំនាញរបស់គាត់ជារឿយៗ ។ ដើម្បីបង្ហាញពីរឿងនេះ ចាក បានអញ្ជើញមិត្តមួយចំនួនឲ្យមកមើល ខេស៊ី សម្តែង ។ ក្រោយពីទៅដល់ខ្លឹបបរបាញ់សត្វ ចាក ឲ្យខេស៊ី រត់លេងនៅខាងក្រៅ ខណៈដែលគាត់ចូលទៅចុះឈ្មោះ ។
នៅពេលដល់ម៉ោងចាប់ផ្តើម ចាក អន្ទះសារចង់បង្ហាញជំនាញពិសេសរបស់ ខេស៊ី ។ ប៉ុន្តែ ខេស៊ី ធ្វើអ្វីប្លែកៗទៅវិញ ។ ខេស៊ី មិនស្តាប់ ចាក ដែលជាធម្មតាវាស្តាប់ណាស់ ។ អ្វីដែលវាចង់ធ្វើ គឺចង់នៅក្បែរចាក ។
ចាក ខកចិត្ត ខ្មាសអៀន ហើយខឹង ខេស៊ី ភ្លាមនោះ គាត់ក៏សូមឲ្យមិត្តត្រឡប់ទៅវិញ ។ ខេស៊ី ពុំហានលោតចូលខាងក្រោយឡានទេ ចាក បានចាប់វាបោះឡើង ហើយរុញ ខេស៊ី ចូលទៅក្នុងទ្រុង ។ ចាក ខឹងនឹងអ្នកទាំងអស់នោះដែលបានសើចចំអកដល់ឆ្កែគាត់ នៅតាមផ្លូវរហូតដល់ផ្ទះ ។ ចាក មិនយល់ថា ហេតុអ្វី ខេស៊ី មានសភាពមិនល្អបែបនោះទេ ។ ខេស៊ី បានហ្វឹកហាត់យ៉ាងល្អ ហើយវាចង់ផ្គាប់ចិត្ត និងបម្រើដល់ ចាក ។
ពេលមកដល់ផ្ទះវិញ ចាក បានមើល ខេស៊ី បើមានរបួស មុតបន្លា ឬមានចៃឬទេ ដូចដែលគាត់ធ្លាប់ធ្វើពីមុន ។ នៅពេលគាត់ដាក់ដៃទៅលើទ្រូងវា គាត់មានអារម្មណ៏ថាសើម ហើយក៏មើលដៃមានប្រលាក់ឈាម ។ គាត់រន្ធត់ចិត្ត ពេលបានឃើញថា ខេស៊ី មានស្នាមមុតយ៉ាងវែង ត្រង់ឆ្អឹងទ្រូង ។ គាត់បានរកឃើញស្នាមមុតមួយទៀតនៅលើជើងមុខខាងស្តាំ វាមុតដល់ឆ្អឹងផងដែរ ។
ចាក បានឱប ខេស៊ី យំ ។ គាត់ខ្មាសណាស់ដែលគាត់បានវាយតម្លៃខុស និងធ្វើខុសចំពោះខេស៊ី ។ ខេស៊ី មានអាការៈមិនល្អកាលពីថ្ងៃមុន ព្រោះវាមានរបួស ។ អាការៈរបស់វាដូច្នោះ ព្រោះមកពីការឈឺចាប់ ការរងទុក្ខ និងស្នាមរបួសរបស់វា ។ វាពុំមែនមិនស្តាប់បង្គាប់ ចាក ឬអត់ស្រឡាញ់គាត់នោះទេ ។១
ខ្ញុំឮរឿងនេះអស់ច្រើនឆ្នាំមកហើយ ចាំមិនភ្លេចទេ ។ តើមានអ្នករងរបួសប៉ុន្មាននាក់នៅក្នុងចំណោមពួកយើង ? តើយើងវិនិច្ឆ័យអ្នកដទៃតាមរូបរាងខាងក្រៅ និងទង្វើ ឬកង្វះសកម្មភាពញឹកញាប់ប៉ុណ្ណាបើនៅពេលយើងយល់ច្បាស់ យើងនឹងមានប្រតិកម្មដោយក្តីមេត្តា ហើយមានបំណងចង់ជួយ ជាជាងវិនិច្ឆ័យបន្ថែមទៅលើបន្ទុករបស់ពួកគេ ?
ខ្ញុំខុសក្នុងរឿងនេះជាច្រើនដងក្នុងជីវិតខ្ញុំ ប៉ុន្តែព្រះអម្ចាស់បានបង្រៀនខ្ញុំដោយអត់ធ្មត់ តាមរយៈបទពិសោធន៍ផ្ទាល់ខ្លួន និងពេលដែលខ្ញុំស្តាប់បទពិសោធន៍ជីវិតអ្នកផ្សេងជាច្រើនទៀត ។ ខ្ញុំមានអំណរគុណកាន់តែខ្លាំងចំពោះគំរូរបស់ព្រះអង្គសង្គ្រោះជាទីស្រឡាញ់របស់យើង នៅពេលទ្រង់បានចំណាយពេលរបស់ទ្រង់ ជាច្រើនបម្រើដល់អ្នកដទៃដោយសេចក្ដីស្រឡាញ់ ។
បទពិសោធន៍ជីវិតកូនស្រីពៅខ្ញុំ មាននូវបញ្ហាសុខភាពផ្លូវចិត្តចាប់តាំងពីនាងនៅតូច ។ មានពេលជាច្រើនដងនៅក្នុងជីវិតរបស់នាង នាងមានអារម្មណ៍ថា នាងមិនអាចបន្តទៅមុខទៀតទេ ។ យើងនឹងដឹងគុណរហូតចំពោះអស់អ្នកដែលបាននៅទីនោះក្នុងគ្រាទាំងនោះ ៖ ដោយអង្គុយជាមួយនាង ស្តាប់នាង យំជាមួយនាង និងការចែករំលែកអំណោយទានពិសេសជាមួយគ្នា ការយល់ដឹងខាងវិញ្ញាណ និងទំនាក់ទំនងនៃសេចក្តីស្រឡាញ់ទៅវិញទៅមក ។ នៅក្នុងស្ថានភាពដ៏គួរឲ្យស្រឡាញ់បែបនេះ ជាញឹកញាប់ បន្ទុកនានាត្រូវបានសម្រាលទាំងសងខាង ។
អែលឌើរ យ៉ូសែប ប៊ី វ៉ឺតលីន ដកស្រង់ពីកូរិនថូស ទី ១ ដែលចែងថា ៖ « ទោះបើខ្ញុំចេះនិយាយ ជាភាសារបស់មនុស្សជាតិទាំងប៉ុន្មាន និងភាសារបស់ពួកទេវតាផង តែគ្មានសេចក្តីស្រឡាញ់ នោះខ្ញុំបានត្រឡប់ដូចជាលង្ហិនដែលឮខ្ទរ ឬដូចជាឈឹង ដែលឮទ្រហឹងប៉ុណ្ណោះ » ។២
លោកបានបន្តថា ៖
« សាររបស់ប៉ុលចំពោះរូបកាយនៃពួកបរិសុទ្ធថ្មីនេះគឺសាមញ្ញ និងចំៗថា ៖ គ្មានអ្វីដែលអ្នកធ្វើមានភាពខុសប្លែកខ្លាំងនោះទេ បើអ្នកគ្មានសេចក្ដីសប្បុរសទេនោះ ។ បងប្អូនអាចនិយាយភាសាដទៃ មានអំណោយទាននៃការព្យាករណ៍ យល់ពីអាថ៌កំបាំងទាំងអស់ … ហើយមានចំណេះដឹងទាំងអស់ ទោះបីជាបងប្អូនមានជំនឿរើភ្នំបានក៏ដោយ បើគ្មានសេចក្ដីសប្បុរសទេ វាមិនចំណេញអ្វីដល់បងប្អូនទាល់តែសោះឡើយ ។
« ‹ សេចក្តីសប្បុរសគឺជាសេចក្ដីស្រឡាញ់ដ៏សុទ្ធសាធនៃព្រះគ្រីស្ទ › [ មរ៉ូណៃ ៧:៤៧ ] ។ ព្រះអង្គសង្គ្រោះបានធ្វើជាគំរូដល់សេចក្ដីស្រឡាញ់នោះ » ។៣
នៅក្នុងគម្ពីរយ៉ូហាន យើងអាន « គេនឹងដឹងថា អ្នករាល់គ្នាជាសិស្សរបស់ខ្ញុំ ដោយសារ សេចក្តីនេះឯង គឺដោយអ្នករាល់គ្នាមានសេចក្តីស្រឡាញ់ដល់គ្នាទៅវិញទៅមក » ។៤
មានសុន្ទរកថាជាច្រើនដែលបានថ្លែងដោយថ្នាក់ដឹកនាំសាសនាចក្រយើងអំពី សេចក្តីសប្បុរស ការរួបរួមគ្នា សេចក្តីស្រឡាញ់ សន្ដានចិត្តល្អ សេចក្តីអាណិតអាសូរ ការអភ័យទោស និងសេចក្តីមេត្តាករុណា ។ ខ្ញុំជឿថាព្រះអង្គសង្រ្គោះកំពុងអញ្ជើញយើងឲ្យរស់នៅតាមរបៀបដែលកាន់តែខ្ពស់ និងកាន់តែបរិសុទ្ធមួយ៥ជារបៀបនៃសេចក្តីស្រឡាញ់ របស់ទ្រង់ដែលមនុស្សទាំងអស់អាចមានអារម្មណ៍ថា ពួកគេពិតជាមានចំណែក និងត្រូវការ ។
ពួកយើងត្រូវបានបង្គាប់ឲ្យស្រឡាញ់អ្នកដទៃ៦មិនត្រូវវិនិច្ឆ័យពួកគេឡើយ ។៧ ចូរយើងឈប់វិនិច្ឆ័យអ្នកដទៃ វាពុំមែនជាតួនាទីរបស់យើងនោះទេ ។៨ ផ្ទុយទៅវិញ យើងអាចរើសយកនឹមនៃសេចក្ដីស្រឡាញ់ និងសេចក្ដីមេត្តារបស់ព្រះអង្គសង្គ្រោះវិញ ។
« អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក ។
« ចូរទទួលនឹមខ្ញុំ ហើយរៀននឹងខ្ញុំចុះ …
ពីព្រោះនឹមខ្ញុំងាយទេ ហើយបន្ទុករបស់ខ្ញុំក៏ស្រាល » ។៩
ព្រះអង្គសង្គ្រោះពុំអត់ទោសអំពើបាបឡើយ ប៉ុន្តែបានប្រទានឲ្យយើងនូវសេចក្តីស្រឡាញ់និង ការអភ័យទោសនៅពេលយើងប្រែចិត្ត ។ ចំពោះស្ត្រីដែលប្រព្រឹត្តិអំពើផិតក្បត់ ទ្រង់បានមានបន្ទូលថា « ខ្ញុំក៏មិនកាត់ទោសនាងដែរ អញ្ជើញទៅចុះ តែ កុំធ្វើបាបទៀតឡើយ »១០ អស់អ្នកដែលទ្រង់បានជួប បានទទួលអារម្មណ៍ពីសេចក្តីស្រឡាញ់របស់ទ្រង់ ហើយសេចក្តីស្រឡាញ់នោះបានព្យាបាល ហើយផ្លាស់ប្តូរពួកគេ ។ សេចក្តីស្រឡាញ់របស់ទ្រង់បានបំផុសគំនិតពួកគេឲ្យ មានបំណងផ្លាស់ប្តូរជីវិត ។ ការរស់នៅតាមរបៀប របស់ទ្រង់នាំមកនូវអំណរ និងភាពសុខសាន្ត ហើយទ្រង់ បានអញ្ជើញអ្នកដទៃមករស់នៅតាមរបៀបទន់ភ្លន់ សន្តានចិត្តល្អ និងសេចក្តីស្រឡាញ់ ។
អែលឌើរ ហ្គែរី អ៊ី ស្ទីវ៉ែនសុន បានមានប្រសាសន៍ថា « នៅពេលយើងជួបនឹងព្យុះភ្លៀងជីវិត ជំងឺ និងគ្រោះថ្នាក់នានា នោះព្រះអម្ចាស់—អ្នកគង្វាល អ្នកមើលថែរបស់យើង—នឹងបីបាច់យើងដោយក្តីស្រឡាញ់ និងចិត្តសប្បុរស ។ ទ្រង់នឹងព្យាបាលដួងចិត្ត ហើយស្តារព្រលឹងយើងឡើងវិញ ។១១ ក្នុងនាមជាអ្នកដើរតាមព្រះយេស៊ូវគ្រីស្ទ តើយើងគួរដើរតាមទ្រង់ដែរទេឬ ?
ព្រះអង្គសង្រ្គោះបានបង្គាប់យើងឲ្យរៀននឹងទ្រង់១២ ហើយធ្វើកិច្ចការដែលយើងឃើញទ្រង់ ។១៣ ទ្រង់គឺជាតំណាងនៃសេចក្តីសប្បុរស សេចក្តីស្រឡាញ់ដ៏បរិសុទ្ធ ។ នៅពេលយើងរៀនធ្វើបន្ដបន្ទាប់តាមអ្វីដែលទ្រង់បានសុំឲ្យធ្វើ—ពុំមែនព្រោះតែកាតព្វកិច្ច ឬដើម្បីទទួលបានពរជ័យដែលយើងអាចទទួល ប៉ុន្តែដោយក្តីស្រឡាញ់ដ៏បរិសុទ្ធចំពោះទ្រង់ និងព្រះវរបិតាសួគ៌របស់យើង១១៤—នោះសេចក្តីស្រឡាញ់របស់ទ្រង់នឹងបង្ហាញតាមរយៈយើង ហើយមិនត្រឹមតែអាចធ្វើឲ្យអ្វីៗដែលទ្រង់បង្គាប់ប៉ុណ្ណោះទេ ប៉ុន្តែនៅទីបំផុត វាកាន់តែងាយស្រួល និងស្រាលជាងមុន១៥ ហើយរីករាយជាងដែលយើងនឹកស្មានដល់ ។ សម្រាប់ខ្ញុំ ការណ៍ធ្វើតាមអ្វីដែលទ្រង់បង្គាប់ ទាមទារឲ្យមានការអនុវត្តជាច្រើនឆ្នាំ ប៉ុន្តែនៅពេលយើងចង់មានសេចក្ដីស្រឡាញ់ជាកម្លាំងជំរុញចិត្តរបស់យើង នោះទ្រង់អាចទទួលយក បំណងប្រាថ្នា គ្រាប់ពូជនោះ១៦ ហើយទីបំផុត វាប្រែទៅជាដើមឈើដ៏ស្អាត ដែលមានផ្លែដ៏ផ្អែមបំផុត ។១៧
យើងច្រៀងទំនុកតម្កើងដែលយើងចូលចិត្ត « តើខ្ញុំថ្កោលទោសអ្នកផ្សេងម្ដេចទៅ បើខ្ញុំមិនបានល្អខ្ចោះផង ? ក្នុងដួងចិត្តលាក់កំបាំងដ៏ស្ងប់ស្ងាត់ ទុក្ខព្រួយដែលភ្នែកមិនអាចឃើញ » ។១៨ តើអ្នកណាក្នុងចំណោម ពួកយើង ដែលមានទុក្ខព្រួយ ដែលយើងមើលមិនឃើញ ? ក្មេងជំទង់ និងកុមាររដែលបះបោរ កុមារក្នុងគ្រួសារបែកបាក់គ្នា ម្តាយ ឬឪពុកទោល អ្នកដែលមានបញ្ហាសុខភាពផ្លូវកាយ ឬផ្លូវចិត្ត អ្នកដែលសង្ស័យជំនឿខ្លួនឯង អ្នកដែលជួបការរើសអើងពូជសាសន៍ ឬវប្បធម៌ អ្នកឯកោ អ្នកដែលចង់រៀបការ អ្នកញៀន និងមនុស្សជាច្រើនទៀតដែលកំពុងប្រឈមនឹងបទពិសោធន៍បញ្ហាជីវិតដ៏លំបាកៗ—ជារឿយៗ សូម្បីតែអ្នកដែលមើលទៅថាមានជីវិតល្អឥតខ្ចោះក្ដី ។
គ្មាននរណាម្នាក់មានជីវិត ឬគ្រួសារល្អឥតខ្ចោះនោះទេ ខ្ញុំជឿថាពុំមានទេ ។ នៅពេលយើងស្វែងយល់ចិត្តអ្នកដទៃដែលជួបឧបសគ្គ និងមិនល្អឥតខ្ចោះដែរនោះ វាអាចជួយពួកគេដឹងថាពួកគេពុំឯកោនៅក្នុងបញ្ហា របស់ពួកគេនោះទេ ។ មនុស្សគ្រប់រូប ចាំបាច់ត្រូវដឹងថាពួកគេ ពិតជា មានចំណែក ហើយ ត្រូវការ នៅក្នុងតួអង្គនៃព្រះគ្រីស្ទ ។១៩ ក្ដីប្រាថ្នាដ៏ធំបំផុតរបស់សាតាំង គឺដើម្បីបំបែកបុត្រាបុត្រីរបស់ព្រះ ហើយវាទទួលជោគជ័យខ្លាំងណាស់ ប៉ុន្តែការរួបរួមគ្នាមានអំណាចដ៏អស្ចារ្យ ។២០ ហើយយើងពិតជាត្រូវធ្វើការរួមគ្នា ជួយគាំទ្រគ្នាក្នុងដំណើរដ៏លំបាកនៃជីវិតរមែងស្លាប់នេះ !
ព្យាការីរបស់យើង ប្រធាន រ័សុល អិម ណិលសុន បានមានប្រសាសន៍ថា ៖« ការរំលោភបំពាន ឬ ការរើសអើង ណាមួយចំពោះគ្នា ដោយសារតែសញ្ជាតិ ពូជសាសន៍ ទំនោរផ្លូវភេទ ភេទ សញ្ញាបត្រសិក្សា វប្បធម៌ ឬអត្តសញ្ញាណសំខាន់ៗផ្សេងទៀត គឺជាការប្រមាថដល់អង្គបង្កបង្កើតរបស់យើង ! ការធ្វើបាបបែបនេះបណ្ដាលឲ្យយើងរស់នៅពុំសមនឹងឋានៈយើងក្នុងនាមជាបុត្រាបុត្រីនៃសេចក្ដីសញ្ញារបស់ទ្រង់ឡើយ ! »២១
ខណៈប្រធាន រ័សុល អិម ណិលសុនបានអញ្ជើញយើងឲ្យមក និងបន្តដើរនៅលើផ្លូវនៃសេចក្តីសញ្ញាដែលនាំត្រឡប់ទៅរកព្រះអង្គសង្រ្គោះ និងព្រះវរបិតានៅឯស្ថានសួគ៌ លោកក៏បានផ្តល់ការប្រឹក្សាដូចតទៅថា ៖ « បើមិត្តភក្តិ និងគ្រួសារ … ចាកចេញពីសាសនាចក្រ សូមបន្តស្រឡាញ់ពួកគេ ។ ពេលបងប្អូនកាត់ក្ដីការជ្រើសរើសរបស់មនុស្សម្នាក់ នោះវាដូចគ្នានឹងកាលដែលបងប្អូនត្រូវគេរិះគន់ចំពោះការបន្តនៅស្មោះត្រង់ដូច្នោះដែរ » ។២២
មិត្តជាទីស្រឡាញ់ ចូរយើងទាំងចាំថាបុគ្គលម្នាក់ៗនៅលើផែនដីនេះ គឺជាបុត្ររបស់ព្រះ២៣ ហើយទ្រង់ស្រឡាញ់យើងគ្រប់ៗគ្នា ។២៤ តើមាននរណាតាមផ្លូវ បងប្អូន ដែលបងប្អូនចង់កាត់ក្ដីដែរឬទេ ? បើមាន សូមចាំថា នេះគឺជាឱកាសដ៏អស្ចារ្យដើម្បីយើង អនុវត្ត ការស្រឡាញ់ឲ្យដូចជាព្រះអង្គសង្គ្រោះ ។២៥ នៅពេលយើងធ្វើតាមគំរូ របស់ទ្រង់ យើងអាចទឹមនឹមជាមួយនឹង ទ្រង់ ហើយជួយបីបាច់អារម្មណ៍នៃសេចក្ដីស្រឡាញ់ និងការមានចំណែកនៅក្នុងដួងចិត្តរបស់បុត្រាបុត្រីនៃព្រះវរបិតាយើង ។
« យើងស្រឡាញ់ទ្រង់ ពីព្រោះទ្រង់បានស្រឡាញ់យើងជាមុន » ។២៦ នៅពេលយើងពោរពេញទៅដោយសេចក្តីស្រឡាញ់របស់ព្រះអង្គសង្រ្គោះ នោះនឹមរបស់ទ្រង់ពិត ជាងាយ ហើយបន្ទុករបស់ទ្រង់ ស្រាល២៧ ខ្ញុំសូមថ្លែងទីបន្ទាល់អំពីការណ៍នេះ ក្នុងព្រះនាមព្រះយេស៊ូវគ្រីស្ទ អាម៉ែន ៕