ការថែទាំ និង ការថ្លែងទីបន្ទាល់របស់បងប្អូន ។
ខ្ញុំសូមអញ្ជើញបងប្អូនឲ្យរកឱកាសថ្លែងទីបន្ទាល់របស់បងប្អូនទាំងដោយពាក្យសម្ដី និង ទង្វើ ។
សេចក្ដីផ្ដើម
ដំណើរជីវិតផ្លាស់ប្តូរកើតឡើងជាញឹកញាប់ និងមិនរំពឹងទុក ទោះជាបងប្អូននៅក្មេងក៏ដោយ ។ ខ្ញុំសូមចែកចាយរឿងមួយ អំពីសិស្សថ្នាក់វិទ្យាល័យម្នាក់ឈ្មោះ ខេវិន ដែលបានជ្រើសរើសធ្វើដំណើរចេញពីរដ្ឋ ទៅចូលរួមព្រឹត្តិការណ៍អ្នកដឹកនាំសិស្ស ដែលគាត់បានរៀបរាប់ដោយផ្ទាល់ ។
« ពេលដល់វេនខ្ញុំ អ្នកចុះឈ្មោះបានសួរឈ្មោះខ្ញុំ ។ គាត់បានមើលក្នុងបញ្ជីហើយនិយាយថា ‹ អញ្ចឹង ប្អូនជាយុវជនមកពីរដ្ឋ យូថាហ៍ › ។
ខ្ញុំបានសួរថា « ‹ បងចង់ប្រាប់ថា មានតែខ្ញុំទេឬ ? ›
« ‹ មែនហើយ មានតែប្អូនម្នាក់គត់ › ។ គាត់បានហុចស្លាកឈ្មោះឲ្យខ្ញុំ ដែលវាមានសរសេរពាក្យ ‹ យូថាហ៍ › នៅខាងក្រោមឈ្មោះរបស់ខ្ញុំ ។ នៅពេលខ្ញុំពាក់ស្លាកឈ្មោះ ខ្ញុំមានអារម្មណ៍ថាគេដាក់ងារឲ្យខ្ញុំ ។
« ខ្ញុំប្រជ្រៀតចូលជណ្តើរយន្តសណ្ឋាគារជាមួយសិស្សវិទ្យាល័យប្រាំនាក់ទៀតដែលមានស្លាកឈ្មោះដែរ ។ មានសិស្សម្នាក់បានសួរខ្ញុំថា ‹ សួស្តី តើឯងមកពីរដ្ឋយូថាហ៍មែនទេ ។ តើឯងជាមរមនមែនទេ ?
« ខ្ញុំមានអារម្មណ៍មិនល្អចំពោះអ្នកដឹកនាំសិស្សមកពីគ្រប់ប្រទេសផ្សេងទៀតសោះ ។ ‹ បាទ › ខ្ញុំឆ្លើយដោយស្ទាក់ស្ទើរ ។
« ‹ ឯងគឺជាមនុស្សដែលជឿលើ យ៉ូសែប ស្ម៊ីធ ដែលបាននិយាយថា គាត់បានឃើញទេវតានោះមែនទេ ។ ឯងមិនបានជឿរឿងនោះពិតទេ ? ›
« ខ្ញុំមិនដឹងត្រូវឆ្លើយបែបណានោះទេ ។ សិស្សនៅក្នុងជណ្ដើរយន្តទាំងអស់សម្លឹងមកខ្ញុំ ។ ខ្ញុំទើបតែមកដល់ ហើយគ្រប់គ្នាគិតថាខ្ញុំខុសគេ ។ ខ្ញុំចាប់ផ្តើមការពារខ្លួនបន្តិច ប៉ុន្តែក្រោយមកក៏បានឆ្លើយថា ខ្ញុំដឹងថា យ៉ូសែប ស៊្មីធ គឺជាព្យាការីរបស់ព្រះ › ។
«‹ តើពាក្យទាំងនោះចេញមកពីណា ?› ខ្ញុំឆ្ងល់ ។ ខ្ញុំពុំដឹងថា ខ្ញុំមានពាក្យនោះក្នុងខ្លួនខ្ញុំទេ ។ ប៉ុន្តែពាក្យនោះជាពាក្យពិត ។
គាត់បាននិយាយថា « ‹ មែនហើយ ខ្ញុំឮគេនិយាយថា ពួកឯងកាន់សាសនាល្ងីល្ងើ › ។
« ពាក្យនោះធ្វើឲ្យខ្ញុំបានទ្រឹងទាំងមិនស្រណុកចិត្តពេលជណ្តើរយន្តបើកទ្វារ ។ ពេលយើងយកវ៉ាលីរបស់យើង គាត់បានដើរចេញទៅដោយសើចចំអក ។
« បន្ទាប់មក មានសំឡេងសួរពីក្រោយខ្នងខ្ញុំថា ‹ សួស្តី ! តើពួកមរមនមានព្រះគម្ពីរប៊ីបមួយទៀតមែនទេ ? ›
« អូ៎ អត់ទេ ។ កុំកើតឡើងទៀតអី ។ ខ្ញុំបានងាកទៅមើលសិស្សម្នាក់ទៀត ដែលនៅក្នុងជណ្តើរយន្តជាមួយខ្ញុំ ឈ្មោះ គ្រីស្តូហ្វឺ ។
ខ្ញុំចង់បញ្ចប់ការសន្យានោះដោយនិយាយថា « ‹ វាគឺព្រះគម្ពីរមរមន › ។ ខ្ញុំលើកវ៉ាលីខ្ញុំដើរចេញទៅ ។
គាត់បានសួរថា « ‹ តើគម្ពីរនោះ យ៉ូសែប ស្ម៊ីធបានបកប្រែមែនដែរទេ ? ›
ខ្ញុំបានឆ្លើយថា « ‹ មែន ត្រូវហើយ › ខ្ញុំបន្តដើរទៅមុខ ចង់គេចពីភាពអាម៉ាស់នោះ ។
« ‹ មែនហើយ តើឯងដឹងថាខ្ញុំអាចទទួលបានព្រះគម្ពីរនោះដោយរបៀបណាទេ ? ›
« រំពេចនោះខគម្ពីរមួយដែលខ្ញុំបានរៀននៅក្នុងថ្នាក់សិក្ខាសាលា បានផុសក្នុងចិត្តខ្ញុំ ។ ‹ ដ្បិតខ្ញុំគ្មានសេចក្តីខ្មាសចំពោះដំណឹងល្អនៃព្រះគ្រីស្ទទេ › ។១ ពេលខ្ញុំគិតដល់ខគម្ពីរនោះ ខ្ញុំខ្មាសដែលខ្ញុំមានសេចក្តីអាម៉ាស ។
« ខ្ញុំចាំពីខគម្ពីរនោះអស់ពេលមួយសប្តាហ៍ ។ ខ្ញុំបានឆ្លើយសំណួរជាច្រើនអំពីសាសនាចក្រដោយអស់ពីសមត្ថភាពខ្ញុំ ហើយខ្ញុំបានរាប់អានមិត្តភក្ដិជាច្រើន ។
« ខ្ញុំយល់ឃើញថា ខ្ញុំមានមោទនភាពចំពោះសាសនារបស់ខ្ញុំខ្លាំងណាស់ ។
« ខ្ញុំបានឲ្យព្រះគម្ពីរមរមនទៅ គ្រីស្តូហ្វឺ មួយក្បាល ។ ក្រោយមកគាត់បានសរសេរ ប្រាប់ខ្ញុំថា គាត់បានអញ្ជើញអ្នកពួកអ្នកផ្សព្វផ្សាយសាសនាទៅផ្ទះគាត់ ។
« ខ្ញុំបានរៀនថា មិនត្រូវខ្មាសអៀនក្នុងការចែកចាយទីបន្ទាល់របស់ខ្ញុំទេ ។២
ខ្ញុំបានទទួលការបំផុសគំនិតដោយភាពក្លាហានរបស់ ខេវិន ក្នុងការចែកចាយទីបន្ទាល់របស់គាត់ ។ វាគឺជាភាពក្លាហានរបស់សមាជិកដ៏ស្មោះត្រង់នៃសាសនាចក្រទូទាំងពិភពលោក ដែលបានធ្វើម្តងហើយម្តងទៀតជារៀងរាល់ថ្ងៃ ។ កាលខ្ញុំចែកចាយគំនិតរបស់ខ្ញុំ សូមអញ្ជើញបងប្អូនឲ្យគិតអំពីសំណួរទាំងបួននេះ ៖
-
តើខ្ញុំដឹង និងយល់ថា ទីបន្ទាល់ជាអ្វីដែរឬទេ ?
-
តើខ្ញុំដឹងពីរបៀបថ្លែងទីបន្ទាល់របស់ខ្ញុំដែរឬទេ ?
-
តើមានឧបសគ្គអ្វីខ្លះក្នុងការចែកចាយទីបន្ទាល់របស់ខ្ញុំ ?
-
តើខ្ញុំថែរក្សាទីបន្ទាល់របស់ខ្ញុំដោយរបៀបណា ?
តើខ្ញុំដឹង និងយល់ថា ទីបន្ទាល់គឺជាអ្វីដែរឬទេ ?
ទីបន្ទាល់របស់បងប្អូនគឺជាសម្បត្តិដ៏មានតម្លៃបំផុត ដែលជាញឹកញាប់ទាក់ទងនឹងអារម្មណ៍ខាងវិញ្ញាណ ។ អារម្មណ៍ទាំងនេះជាធម្មតាត្រូវបានទំនាក់ទំនងដោយស្ងប់ស្ងាត់ ដែលហៅថា« សំឡេងតូចរហៀង » ។៣ វាគឺជាជំនឿ ឬចំណេះដឹងរបស់បងប្អូនអំពីសេចក្ដីពិត ដែលបានផ្ដល់ជាសាក្សីខាងវិញ្ញាណ តាមរយៈឥទ្ធិពលនៃព្រះវិញ្ញាណបរិសុទ្ធ ។ ការទទួលបានសាក្សីនេះនឹងផ្លាស់ប្តូរការនិយាយ និងរបៀបដែលបងប្អូនប្រព្រឹត្ត ។ ធាតុសំខាន់ៗនៃទីបន្ទាល់របស់បងប្អូន ដែលបានបញ្ជាក់ដោយព្រះវិញ្ញាណបរិសុទ្ធ រួមមាន ៖
-
ព្រះជាព្រះវរបិតាជាទីស្រឡាញ់របស់បងប្អូន បងប្អូនគឺជាបុត្ររបស់ទ្រង់ ។ ទ្រង់ស្រឡាញ់បងប្អូន ។
-
ព្រះយេស៊ូវគ្រីស្ទមានព្រះជន្មរស់ ។ ទ្រង់គឺជាព្រះរាជបុត្រានៃព្រះដ៏មានព្រះជន្មរស់ ហើយទ្រង់គឺជាព្រះអង្គសង្គ្រោះ និងព្រះប្រោសលោះរបស់បងប្អូន ។
-
យ៉ូសែប ស៊្មីធ គឺជាព្យាការីរបស់ព្រះដែលបានហៅឲ្យស្ដារសាសនាចក្រនៃព្រះយេស៊ូវគ្រីស្ទឡើងវិញ ។
-
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺជាសាសនាចក្រដែលព្រះបានស្តារឡើងវិញ ។
-
សាសនាចក្រនៃព្រះយេស៊ូវគ្រីស្ទដែលបានស្ដារឡើងវិញត្រូវបានដឹកនាំដោយព្យាការីនៅរស់សព្វថ្ងៃនេះ ។
តើខ្ញុំដឹងពីរបៀបថ្លែងទីបន្ទាល់របស់ខ្ញុំដែរឬទេ ?
បងប្អូនថ្លែងទីបន្ទាល់ នៅពេលបងប្អូនចែកចាយអារម្មណ៍ខាងវិញ្ញាណជាមួយអ្នកដទៃ ។ ក្នុងនាមជាសមាជិកនៃសាសនាចក្រ បងប្អូនមានឱកាសថ្លែងទីបន្ទាល់របស់បងប្អូននៅក្នុងកិច្ចប្រជុំជាផ្លូវការរបស់សាសនាចក្រ ឬនៅក្នុងការសន្ទនាក្រៅផ្លូវការជាមួយក្រុមគ្រួសារ មិត្តភក្តិ និងអ្នកដទៃទៀត ។
វិធីមួយទៀតដែលបងប្អូនអាចចែកចាយទីបន្ទាល់របស់បងប្អូនគឺតាមរយៈអាកប្បកិរិយាសុចរិត ។ ទីបន្ទាល់របស់បងប្អូននៅក្នុងព្រះយេស៊ូវគ្រីស្ទមិនគ្រាន់តែជាអ្វីដែលបងប្អូននិយាយនោះទេ—វាបញ្ជាក់ថាបងប្អូនជានរណា ។
រាល់ពេលដែលបងប្អូនថ្លែងជាសាក្សីផ្ទាល់មាត់ ឬបង្ហាញតាមរយៈសកម្មភាព ឬការប្តេជ្ញាចិត្តធ្វើតាមព្រះយេស៊ូវគ្រីស្ទរបស់បងប្អូន នោះបងប្អូនអញ្ជើញអ្នកដទៃឲ្យ « ចូលមករកព្រះគ្រីស្ទ » ។៤
សមាជិកនៃសាសនាចក្រ ឈរជាសាក្សីដល់ព្រះ នៅគ្រប់ពេល និង គ្រប់សេចក្ដី និង គ្រប់ទីកន្លែង ។៥ ឱកាសដើម្បីធ្វើការណ៍នេះនៅក្នុងប្រព័ន្ធឌីជីថលសកលដោយប្រើមាតិកាបំផុសគំនិតរបស់យើងផ្ទាល់ ឬចែកចាយមាតិកាលើកទឹកចិត្ត ដែលរៀបចំដោយអ្នកដទៃគឺគ្មានទីបញ្ចប់ឡើយ ។ យើងថ្លែងទីបន្ទាល់ នៅពេលយើងស្រឡាញ់ចែកចាយ និងអញ្ជើញទោះបីតាមអនឡាញក៏ដោយ ។ វីតធ័រ សារផ្ទាល់ និងការបង្ហោះរបស់បងប្អូននឹងធ្វើឡើងក្នុងគោលបំណងដ៏វិសុទ្ធ និងខ្ពស់ជាង នៅពេលដែលបងប្អូនប្រើប្រព័ន្ធផ្សព្វផ្សាយសង្គម ដើម្បីបង្ហាញពីរបៀបដែលដំណឹងល្អនៃព្រះយេស៊ូវគ្រីស្ទកំណត់ជីវិតរបស់បងប្អូនផងដែរ ។
តើមានឧបសគ្គអ្វីខ្លះក្នុងការចែកចាយទីបន្ទាល់របស់ខ្ញុំ ?
ឧបសគ្គក្នុងការចែកចាយទីបន្ទាល់របស់បងប្អូន អាចរួមមានភាពមិនប្រាកដអំពីអ្វីដែលត្រូវនិយាយ ។ ម៉ាត់ធ្យូ ខៅលី ដែលជាសាវកជំនាន់មុនម្នាក់ បានចែកចាយបទពិសោធន៍នេះ នៅពេលលោកបានចេញដំណើរទៅបម្រើបេសកកម្មរយៈពេលប្រាំឆ្នាំ ទៅកាន់ប្រទេសនូវែលសេឡង់ នៅអាយុ ១៧ ឆ្នាំ ៖
« ខ្ញុំនឹងមិនភ្លេចពីការអធិស្ឋានរបស់ឪពុកខ្ញុំនៅថ្ងៃដែលខ្ញុំបានចាកចេញនោះទេ ។ ខ្ញុំមិនដែលបានឮពរជ័យដ៏ស្រស់ស្អាតជាងនេះទេក្នុងមួយជីវិតរបស់ខ្ញុំ » ។ បន្ទាប់មកពាក្យចុងក្រោយរបស់គាត់និយាយមកកាន់ខ្ញុំនៅស្ថានីយ៍រថភ្លើងថា ‹ កូនប្រុសរបស់ឪពុក កូននឹងចេញទៅបំពេញបេសកកម្ម កូននឹងសិក្សា កូននឹងព្យាយាមរៀបចំទេសនកថារបស់កូន ហើយពេលខ្លះ នៅពេលកូនត្រូវបានហៅ កូននឹងគិតថាកូនបានរៀបចំខ្លួនបានល្អហើយ ប៉ុន្តែនៅពេលកូនត្រូវឈរធ្វើជាសាក្សី កូននឹងនឹកមិនឃើញអ្វីសោះ › ។ ខ្ញុំមានបទពិសោធន៍នោះច្រើនជាងម្តង ។
« ខ្ញុំបាននិយាយថា ‹ តើពុកធ្វើដូចម្តេច នៅពេលដែលពុកភ្លេចអ្វីគ្រប់យ៉ាង ? ›
« គាត់ប្រាប់ថា ‹ កូនឈរនៅទីនោះ ដោយភាពក្លៀវក្លាអស់ពីព្រលឹងរបស់កូន កូនធ្វើជាសាក្សីថា យ៉ូសែប ស្ម៊ីធ គឺជាព្យាការីរបស់ព្រះដែលមានព្រះជន្មរស់ ហើយពេលនោះគំនិតផ្សេងៗនឹងហូរចូលក្នុងគំនិតកូន ហើយពាក្យពេចយ៉ាងច្រើន នឹងមកបំពេញក្នុងមាត់កូន…ចាក់ចូលដល់ក្រអៅបេះដូងអ្នកដែលស្តាប់កូន › ។ ដូច្នេះហើយ ពេលខ្ញុំភ្លេចអ្វីគ្រប់យ៉ាង ក្នុងអំឡុងពេលបម្រើ…បេសកកម្ម … វាជាឱកាសដើម្បីឲ្យខ្ញុំថ្លែងទីបន្ទាល់ចំពោះព្រឹត្តិការណ៍ដ៏អស្ចារ្យបំផុតនៅក្នុងប្រវត្តិសាស្រ្តនៃពិភពលោក ចាប់តាំងពីការឆ្កាងរបស់លោកចៅហ្វាយ ។ យុវជន យុវនារីទាំងឡាយ ពេលណាមួយ សូមសាកល្បងវា ។ ប្រសិនបើក្មួយគ្មានអ្វីត្រូវនិយាយ សូមថ្លែងទីបន្ទាល់ថា យ៉ូសែប ស្ម៊ីធ គឺជាព្យាការីរបស់ព្រះ ពេលនោះប្រវត្តិសាស្ត្រទាំងមូលនៃសាសនាចក្រនឹងចាក់ស្រោចក្នុងគំនិតរបស់ក្មួយៗ » ។៦
ដូចគ្នានេះដែរ ប្រធាន ដាល្លិន អេក អូក បានចែកចាយថា « ពេលខ្លះ យើងទទួលបានទីបន្ទាល់ ពេលកំពុងថ្លែងទីបន្ទាល់ ល្អជាងពេលលុតជង្គង់អធិស្ឋានទូលសូមទីបន្ទាល់ » ។៧ ព្រះវិញ្ញាណថ្លែងបន្ទាល់ទៅកាន់អ្នកនិយាយ និងអ្នកស្តាប់ដូចគ្នា ។
ឧបសគ្គមួយទៀត ដូចរឿងរបស់ ខេវិន បានបញ្ជាក់នោះ គឺការភ័យខ្លាច ។ ដូចប៉ុលបានសរសេរទៅកាន់ ធីម៉ូថេ ៖
« ដ្បិតព្រះទ្រង់មិនបានប្រទានឲ្យយើងមានវិញ្ញាណ ដែលតែងតែខ្លាចឡើយ គឺឲ្យមានវិញ្ញាណ ដ៏មានអំណាច និងសេចក្តីស្រឡាញ់វិញ… ។
« ដូច្នេះមិនត្រូវឲ្យអ្នកមានសេចក្ដីខ្មាសចំពោះការធ្វើបន្ទាល់ពីព្រះអម្ចាស់នៃយើងនោះឡើយ » ។៨
អារម្មណ៍នៃការភ័យខ្លាចពុំមែនមកពីព្រះអម្ចាស់ទេ ប៉ុន្តែជាញឹកញាប់បំផុតគឺវាមកពីមារសត្រូវ ។ ការមានជំនឿដូច ខេវិន នឹងអនុញ្ញាតឲ្យបងប្អូនយកឈ្នះលើអារម្មណ៍ទាំងនេះ ហើយអាចចែកចាយអ្វីដែលមានក្នុងចិត្តដោយសេរី ។
តើខ្ញុំថែរក្សាទីបន្ទាល់ដោយរបៀបណា ?
ខ្ញុំជឿថាទីបន្ទាល់គឺជាផ្នែកមួយយ៉ាងសំខាន់នៅក្នុងខ្លួនយើង ប៉ុន្តែដើម្បីរក្សាវា និងអភិវឌ្ឍន៍វាឲ្យកាន់តែពេញលេញ អាលម៉ាបានបង្រៀនថា យើងត្រូវតែ « ថែទាំទីបន្ទាល់របស់យើងដោយថ្នាក់ថ្នម ។៩ កាលយើងធ្វើដូច្នេះ« វាអាចដុះប្ញសដើម្បីវាអាចដុះឡើង ហើយនឹងផ្តល់ផ្លែផ្កា » ។១០ បើមិនដូច្នេះទេ « វានឹងក្រៀមស្ងួតទៅ » ។១១
សមាជិកនៃគណៈប្រធានទីមួយជាទីស្រឡាញ់ម្នាក់ៗ បានផ្ដល់ការណែនាំដល់យើងអំពីរបៀបរក្សាទីបន្ទាល់របស់យើង ។
ប្រធាន ហិនរី ប៊ី អាវរិង បានបង្រៀនដោយក្តីស្រឡាញ់ថា « ការខ្ជាប់ខ្ជួនទៅនឹងព្រះបន្ទូលនៃព្រះ ការអធិស្ឋានដោយអស់ពីចិត្ត និងការគោរពតាមព្រះបញ្ញត្តិទាំងឡាយនៃព្រះអម្ចាស់ ត្រូវតែអនុវត្តជាចាំបាច់ និងបន្ដឥតដាច់ ដើម្បីឲ្យទីបន្ទាល់របស់អ្នកបានធំធាត់ និងរីកចម្រើន » ។១២
ប្រធាន ដាល្លិន អេក អូក បានរំព្ញកយើងថា ដើម្បីថែរក្សាទីបន្ទាល់របស់យើង « យើងត្រូវទទួលទានសាក្រាម៉ង់រៀងរាល់សប្តាហ៍ » ( សូមមើល គ&ស ៥៩:៩ ) ដើម្បីស័ក្តិសមនឹងការសន្យាដ៏មានតម្លៃថា យើងនឹង ‹ មានព្រះវិញ្ញាណរបស់ទ្រង់គង់នៅជាមួយនឹង [ យើង ] ជាដរាប › ( គ&ស ២០:៧៧ ) ។១៣
ហើយកាលពីពេលថ្មីៗនេះ ប្រធាន រ័សុល អិម ណិលសុន បានផ្តល់ដំបូន្មានដ៏ល្អ ៖
« ចិញ្ចឹម[ ទីបន្ទាល់របស់ក្មួយៗ ] ដោយសេចក្ដីពិត ។
« … សូមចិញ្ចឹមបីបាច់ខ្លួនក្មួយដោយប្រសាសន៍របស់ព្យាការីសម័យបុរាណ និងសម័យថ្មី ។ ទូលសូមព្រះអម្ចាស់ឲ្យបង្រៀនក្មួយអំពីរបៀបស្ដាប់ឮទ្រង់ឲ្យកាន់តែល្អប្រសើរ ។ សូមចំណាយពេលឲ្យច្រើននៅក្នុងព្រះវិហារបរិសុទ្ធ និងកិច្ចការពង្សប្រវត្តិ ។
« …សូមដាក់ទីបន្ទាល់ជាអាទិភាពដ៏ខ្ពស់បំផុតរបស់ក្មួយ » ។ ១៤
សរុបសេចក្តី
បងប្អូនជាទីស្រឡាញ់ ខ្ញុំសូមសន្យាថា នៅពេលបងប្អូនយល់កាន់តែច្បាស់ថាទីបន្ទាល់គឺជាអ្វី ហើយពេលបងប្អូនចែកចាយវា នោះបងប្អូននឹងយកឈ្នះលើឧបសគ្គនៃភាពមិនច្បាស់លាស់ និងការភ័យខ្លាច ហើយបងប្អូនអាចចិញ្ចឹមបីបាច់ និងថែរក្សាសម្បត្តិដ៏មានតម្លៃបំផុតនេះ គឺជាទីបន្ទាល់របស់បងប្អូន ។
យើងមានពរជ័យដែលមានគំរូរាប់មិនអស់មកពីព្យាការីពីបុរាណ និងសម័យទំនើប ដែលពួកលោកបានថ្លែងទីបន្ទាល់ដោយក្លៀវក្លា ។
ក្រោយការសុគតរបស់ព្រះគ្រីស្ទ ពេត្រុសបានក្រោកឈរថ្លែងទីបន្ទាល់ថា ៖
« នោះសូមឲ្យលោករាល់គ្នាជ្រាប …គឺដោយសារព្រះនាមនៃព្រះយេស៊ូវគ្រីស្ទពីស្រុកណាសារ៉ែត ដែលលោករាល់គ្នាបានឆ្កាងទ្រង់ តែព្រះបានប្រោសឲ្យមានព្រះជន្មរស់ពីស្លាប់ឡើងវិញ …តើបុរសនេះឈរនៅចំពោះមុខបងប្អូនឬ …
« …ដ្បិតនៅក្រោមមេឃគ្មាននាម ឈ្មោះណាទៀត បានប្រទានមកមនុស្សលោក ឲ្យយើងរាល់គ្នាបានសង្គ្រោះនោះឡើយ » ។១៥
អាមូលេក ធ្វើតាមទេសនកថារបស់អាលម៉ាអំពីសេចក្ដីជំនឿ ដែលបានថ្លែងដោយព្រះចេស្តារថា ៖ « ហើយឥឡូវនេះ មើលចុះខ្ញុំនឹងធ្វើបន្ទាល់ដល់អ្នករាល់គ្នាដោយខ្លួនខ្ញុំផ្ទាល់ថា រឿងទាំងនេះពិត ។ មើលចុះ ខ្ញុំសូមប្រាប់អ្នកថាខ្ញុំដឹងថា ព្រះគ្រីស្ទនឹងយាងមកក្នុងចំណោមកូនចៅមនុស្ស …ហើយថាទ្រង់នឹងធ្វើឲ្យធួននឹងអំពើបាបទាំងឡាយនៃមនុស្សលោក ព្រោះព្រះអម្ចាស់ដ៏ជាព្រះ ទ្រង់មានព្រះបន្ទូលថាដូច្នោះ » ។១៦
យ៉ូសែប ស៊្មីធ និង ស៊ីឌនី រិកដុន នៅពេលធ្វើជាសាក្សីចំពោះការនិមិត្តដ៏រុងរឿងរបស់ព្រះអង្គសង្គ្រោះ ដែលមានព្រះជ្មនរស់ឡើងវិញ បានថ្លែងទីបន្ទាល់ថា ៖
« ហើយឥឡូវនេះ បន្ទាប់ពីទីបន្ទាល់ជាច្រើនដែលបានថ្លែងអំពីទ្រង់ នេះគឺជាទីបន្ទាល់ចុងក្រោយបង្អស់ ដែលយើងថ្លែងអំពីទ្រង់ថា ៖គឺទ្រង់មានព្រះជន្មរស់នៅ !
« ដ្បិតយើងខ្ញុំបានឃើញទ្រង់គង់នៅខាងស្តាំព្រះហស្តនៃព្រះ ហើយយើងខ្ញុំបានឮសំឡេងដែលថ្លែងទីបន្ទាល់ថា ទ្រង់គឺជាបុត្រាបង្កើតតែមួយនៃព្រះវរបិតា » ។១៧
បងប្អូនប្រុសស្រី ខ្ញុំសូមអញ្ជើញបងប្អូនឲ្យរកឱកាសថ្លែងទីបន្ទាល់របស់បងប្អូន ទាំងដោយពាក្យសម្ដី និង ទង្វើ ។ នាពេលថ្មីនេះខ្ញុំមានឱកាសបែបនេះ នៅចុងបញ្ចប់នៃកិច្ចប្រជុំជាមួយអភិបាលក្រុងនៃរដ្ឋមួយនៅអាមេរិកខាងត្បូង នៅក្នុងសភារបស់លោកជាមួយនឹងមន្ត្រីខុទ្ទកាល័យមួយចំនួន ។ នៅពេលយើងបានបញ្ចប់កិច្ចប្រជុំដ៏ស្និទ្ធស្នាល នោះ ខ្ញុំមានការស្ទាក់ស្ទើរក្នុងការចែកចាយទីបន្ទាល់របស់ខ្ញុំ ។ បន្ទាប់ពីធ្វើតាមការបំផុសគំនិត ខ្ញុំបានថ្លែងជាសាក្សីថា ព្រះយេស៊ូវគ្រីស្ទគឺជាព្រះរាជបុត្រានៃព្រះដ៏មានព្រះជន្មរស់ និងជាព្រះអង្គសង្គ្រោះនៃពិភពលោក ។ អ្វីគ្រប់ៗយ៉ាងបានផ្លាស់ប្តូរនៅពេលនោះ ។ ព្រះវិញ្ញាណសណ្ឋិតនៅក្នុងបន្ទប់នោះ ដែលពុំអាចបដិសេធបាន ។ វាហាក់ដូចគ្រប់គ្នាបានទទួលអារម្មណ៍ពីព្រះវិញ្ញាណ ។ « ត្បិតមើលចុះ ព្រះដ៏ជាជំនួយ… ធ្វើទីបន្ទាល់ពីព្រះវរបិតា និងពីព្រះរាជបុត្រា » ។១៨ ខ្ញុំមានអំណរគុណណាស់ដែលខ្ញុំត្រូវបានដាស់តឿនឲ្យក្លាហានដើម្បីថ្លែងទីបន្ទាល់របស់ខ្ញុំ ។
នៅពេលពេលវេលាបែបនេះមកដល់ នោះចូរអោបក្រសោបវាទុក ។ បងប្អូននឹងទទួលបានអារម្មណ៍កក់ក្ដៅនៃអង្គលួងលោមនៅក្នុងខ្លួនរបស់បងប្អូន ពេលបងប្អូនធ្វើដូច្នោះ ។
ខ្ញុំសូមថ្លែងទីបន្ទាល់ និង ធ្វើសាក្សីដល់បងប្អូន—ថា ព្រះជាព្រះវរបិតាសួគ៌របស់យើង ព្រះយេស៊ូវគ្រីស្ទមានព្រះជន្មរស់ ហើយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាសាសនាចក្ររបស់ព្រះនៅលើផែនដីនាសព្វថ្ងៃនេះ ដែលដឹកនាំដោយព្យាការីជាទីស្រឡាញ់របស់យើងគឺ ប្រធាន រ័សុល អិម ណិលសុន ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕