Potutusi
Usiusitai

“Usiusitai,” Autu ma Fesili (2023)

Ata
tamaitai talavou ataata

Taiala mo le Suesueina o le Talalelei

Usiusitai

Mulimuli i le Atua ma se loto malie

Ua iloa e matua le taua o le aoaoina o fanau laiti e aloese mai le pa’i atu i se ogaumu vevela po o le tamoe atu i le auala i luma o taavale. Afai e usiusitai tamaiti, pe latou te malamalama pe leai pe aisea e tatau ai ona usiusitai, o le a latou olioli i le saogalemu ma le puipuiga sili atu.

I lo tatou muai olaga, sa tautino mai ai e le Alii e faapea o le sauniaina o fanau a le Atua i se aafiaga faaletino i le lalolagi sa tatau ai ina ia “faamaonia ai i latou … e vaai pe latou te faia mea uma o soo se mea e poloaiina ai i latou e le Alii lo latou Atua” (Aperaamo 3:25). E finagalo le Atua ia tatou aoao taitoatasi e mulimuli ia te Ia ma usitai i Ana poloaiga. A tatou faia lea mea, o le a tatou maua le faamanuiaga o le ola faatasi ma Ia i “se tulaga o le fiafia e lē gata” (Mosaea 2:41). O le faaaogaina o lo tatou faitalia ma le taitaiga a le Agaga, e mafai ai ona tatou amata vaai pe aisea ua tuuina mai ai e le Atua ia i tatou tulafono ia usitaia. Ua folafola mai e le Tama Faalelagi le fiafia ma faamanuiaga ia i latou uma o e gauai atu i Ana afioga ma tausia ma le loto i ai Ana poloaiga.

O Le A le Usiusitai?

I le talalelei a Iesu Keriso, o le usiusitai e malamalama i ai o le faia o le finagalo o le Atua ma le tausia o Ana poloaiga. E aofia ai le faaaogaina o lo tatou faitalia, po o le saolotoga i filifiliga, ia mulimuli i le Atua ma se loto malie. Tatou te faaalia lo tatou alolofa mo le Atua pe a tatou filifili e faatuatuaina ma gauai atu i Lona finagalo.

Vaaiga aoao i autu: Usiusitai

Taiala fesootai mo le suesueina o le talalelei: Poloaiga, Salamo, Feagaiga ma Sauniga, Ola i le Talalelei a Iesu Keriso

Vaega 1

Sa Usitai Iesu Keriso i le Atua le Tama i Mea Uma

Ata
O Iesu i Ketesemane

Sa Ia fetalai mai, “Aua ou te le’i alu ifo mai le lagi e fai lo’u lava loto, ao le finagalo o Le ua auina mai a’u” (Ioane 6:38). I Lona soifuaga atoa faaletino, sa faaalia ai e Iesu le usiusitai i tulafono ma poloaiga uma a Lona Tama. Na Ia fetalai, “Ou te faia pea lava o mea e lelei ia te ia” (Ioane 8:29).

I le faatoaga i Ketesemane, na tatalo ai Iesu, “Tama, a e finagalo i ai, ia e ave ese lenei ipu ia te au; a e aua le faia lo’u loto, a o lou finagalo” (Luka 22:42). Ina ua uma ona puapuagatia i Ketesemane, sa Ia gauai atu ma le lotomaualalo i le finagalo o Lona Tama ma sa faasatauroina, ma faia o Ia lava ma taulaga e togiola i tatou uma (tagai Mosaea 15:7). Ona sa usiusitai Iesu Keriso i Lona Tama i mea uma, o lea na Ia faia ai le faaolataga ma le faaeaga ia i ai mo fanau a le Atua.

I o tatou aso, ua fetalai mai le Alii ia i tatou ia mulimuli i Ona tulagaaao ma “ola i afioga uma e tulei mai le fofoga o le Atua” (Mataupu Faavae ma Feagaiga 98:11; tagai foi Teuteronome 8:3). Sa faamanino mai e Iesu Keriso le mafuaaga sili ona taua mo i tatou e usitai ai i le Atua ina ua Ia tuuina mai le valaaulia tuusao ma le faigofie “Afai tou te alolofa mai ia te au, ia outou tausi mai i au poloaiga” (Ioane14:15).

Mea e mafaufau i ai

  • Sa soifua Iesu Keriso i se olaga e leai se agasala ma paia. Ua Ia valaaulia i tatou ia mulimuli atu ia te Ia. Faitau le 1 Nifae 31:7–10. O le a le mea e manaomia mai ia i latou o e mananao e mulimuli ia Iesu Keriso?

  • Na folafola mai e le Atua o Lana galuega ma Lona mamalu ia “aumaia le tino ola pea ma le ola faavavau o le tagata” (Mose 1:39). Faitau le Mataupu Faavae ma Feagaiga 11:20 ma mafaufau po o a mea ua faailoa mai e le Alii o “lau galuega.”

Gaoioiga mo le aoao faatasi ma isi

  • Na aoao mai Elder Robert D. Hales, “Ona sa usiusitai lo tatou Faaola, sa Ia togiola ai mo a tatou agasala, ma mafai ai ona tatou toetutu ma saunia le ala mo i tatou e toe foi atu ai i lo tatou Tama Faalelagi.”1 Talanoaina po o a faamanuiaga tatou te olioli ai ona sa usiusitai atoatoa Iesu Keriso i le Atua le Tama. O le a se mea e finagalo le Atua tatou te faia e faaalia ai lo tatou lotofaafetai mo le tele o faamanuiaga tatou te maua?

Aoao atili

Vaega 2

O Lou Usiusitai i le Atua o le a Taitai atu ai i le Fiafia ma Faamanuiaga

Ata
o se aiga talavou o loo toē

Ua tatou aoao i le Tusi a Mamona e faapea, o i latou uma na faalogo i le lauga taua a le Tupu o Peniamina sa matuai liua lava ia Iesu Keriso. O le taunuuga, sa latou faaalia se naunautaiga e osifeagaiga e tausi poloaiga a le Atua (tagai Mosaea 5:1–7). O se tasi o tiutetauave o tagata o le Ekalesia a Keriso i o tatou aso o le tausia lea o poloaiga uma a le Atua (tagai Mataupu Faavae ma Feagaiga 42:78). Sa faamalamalama mai e Iosefa Samita le taua o lenei tiute ia te ia ina ua ia fai mai, “Sa ou faia lenei mea ma a’u tulafono: Pe a poloai mai le Alii, ia faia loa.”2

Ua faaalia mai e lo tatou Tama Faalelagi alofa le mataupu faavae e faavavau o loo pulea ai le ala e tuuina mai ai faamanuiaga: “A tatou maua se faamanuiaga mai le Atua, e maua i le usiusitai i lena tulafono ua faavae ai i luga” (tagai Mataupu Faavae ma Feagaiga 130:20–21). E i ai mafuaaga eseese e mafai ona tatou filifili ai e usitai i poloaiga a le Atua. E i ai taimi, tatou te ono faia ai ona o le fefe i le faasalaga. O nisi taimi atonu tatou te sailia ai le taui folafolaina. Ae o le mafuaaga sili ona taua e usiusitai ai o lo tatou alolofa lea i le Tama Faalelagi ma Iesu Keriso ma mananao e auauna atu ia i Laua. O le Atua “e manaomia le loto ma le mafaufau malie” (Mataupu Faavae ma Feagaiga 64:34)

Mea e mafaufau i ai

  • Mafaufau i auala uma na faaalia ai e le Tama Faalelagi Lona alofa mo oe. Faitau i le Mosaea 2:20–24. Aisea e na o le usiusitai e manaomia e le Atua mai ia i tatou? Faitau nei le Mosaea 2:41. E mafai faapefea ona e faamatalaina i se isi tagata le agaalofa o le Atua ia i latou o e saili ma le faamaoni e usitai i Ana poloaiga?

  • Sa feagai le aiga o Liae ma faigata maoae a o latou malaga i le vao mo ni nai tausaga. Ona sa latou saili e tausi poloaiga a le Atua, sa faamanuiaina i latou e le Alii. Faitau le 1 Nifae 17:1–4. E tusa ai ma le fuaiupu 3, o le a le mea ua saunia le Atua e fai mo i latou o e tausia Ana poloaiga?

  • O le a tatou le malamalama i taimi uma pe aisea ua tuuina mai ai e le Atua ni poloaiga faapitoa. Ae a tatou faaaogaina lo tatou faitalia ma filifili e faalagolago ma usitai i le Atua, e mafai ona tatou mautinoa o le a aoga mea uma mo lo tatou lelei (tagai i le Mataupu Faavae ma Feagaiga 100:15). Ua fetalai mai le Alii ia i tatou, “Afai tou te tausi a’u poloaiga ma tumau e oo i le iuga, o le a outou maua le ola e faavavau, o le meaalofa sili lea i meaalofa uma a le Atua” (Mataupu Faavae ma Feagaiga 14:7).

Gaoioiga mo le aoao faatasi ma isi

  • Na folafola mai e Peresitene Ezra Taft Benson, “Pe a tatou faamuamua le Atua, o le a taatitia mea uma i o latou tulaga e tatau ai pe aveesea foi mai o tatou olaga.”3 O le a le uiga ia te oe o le “faamuamua le Atua”? Fai atu i tagata o le vaega e talanoa e uiga i taimi na latou vaaia ai “o isi mea uma e pauu atu i o latou tulaga e tatau ai pe toulu ese mai o tatou olaga” pe a tatou faamuamua le Atua.

Aoao atili