O Le Foafoaga

I lalo o le taitaiga a le Tama Faalelagi, na foafoaina ai e Iesu Keriso ia lagi ma le lalolagi (tagai i le Mosaea 3:8; Mose 2:1). Mai tusitusiga paia na faaalia mai e ala mai i le Perofeta o Iosefa Samita, ua tatou iloa ai, i le galuega o le Foafoaga, sa faatulagaina ai e le Alii elemene na uma ona i ai (tagai i le Aperaamo 3:24). Na te le’i foafoaina le lalolagi “mai i le leai o se mea,” e pei ona talitonu ai nisi o tagata.

Ua aoao mai foi tusitusiga paia e faapea, o Atamu “o le uluai tagata o tagata uma” (Mose 1:34). Na foafoaina e le Atua ia Atamu ma Eva i Lona lava faatusa ma i le faatusa o Lona Alo e Toatasi na Fanaua (tagai i le Mose 2:26–27).

O le Foafoaga o se vaega taua o le ata o le faaolataga a le Tama Faalelagi. Ua tuuina mai ai ia i tatou taitoatasi le avanoa e o mai ai i le lalolagi, lea tatou te maua ai se tino faaletino ma faaaoga lo tatou faitalia. I le Fono a Atua i le muai olaga, sa faia ai le folafolaga lenei: “O le a tatou o i lalō, ona o loo i ai se avanoa iina, ma o le a tatou ave mai mea nei, ma o le a tatou faia se lalolagi e nonofo ai i latou nei; ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua” (Aperaamo 3:24–25).

Tusifaamaumau Ou Lagona Uunai