“Pa’ū o Atamu ma Eva,” Autu ma Fesili (2023)
Taiala mo le Suesueina o le Talalelei
O Le Pa’ū o Atamu ma Eva
Ona o le solitulafono a Atamu ma Eva, na oo mai ai le agasala ma le oti i le lalolagi
E ui o le tala faatusi paia ia Atamu ma Eva ua masani ai le toatele o tagata, ae e tele lava ina malamalama sese i ai. O upumoni faaletusitusiga paia na toefuatai mai i o tatou aso e fesoasoani tatou te malamalama atili ai i tulaga i le Faatoaga o Etena ma le filifiliga na faia e o tatou uluai matua lea na iu ai ina tuliesea i la’ua mai le faatoaga. O lena aafiaga ua lauiloa o le Pa’ū ma aumaia ai taunuuga na aafia ai fanau uma a le Atua.
O le Pa’ū o Atamu ma Eva sa le o se mea na faateia ai le Tama Faalelagi. O le Pa’ū o se vaega taua o le fuafuaga a le Atua mo le faaolataga ma le faaeaga o Ana fanau. Ina ua mavae le Pa’ū, na avea Atamu ma Eva ma tagata faaletino ma maua ai le gafatia e maua ai ni fanau, ae sa oo foi ina la oo i le agasala ma le oti.
Ona o le Pa’ū, o mea ola uma e oo i faigata, ma’i, ma le oti. O lenei faafeagai o se vaega o le fuafuaga a le Atua mo i tatou, ma e saofagā i lo tatou aoaoina, tuputupu ae, ma le tomai e maua ai le olioli. Ina ia togiolaina i tatou mai aafiaga o le Pa’ū, na saunia ai e le Tama Faalelagi se Faaola—o Iesu Keriso lea. Ua ia Keriso le mana e togiola ai le lalolagi ma tagata uma o i ai mai aafiaga o le Pa’ū.
O Le A le Paʼū o Atamu ma Eva?
O le Pa’ū o Atamu ma Eva e faasino i le filifiliga na la faia e solia ai le tulafono a le Atua, lea na mafai ai ona la oo i le oti ma vavaeese ai i laʼua mai Lona afioaga. O le Pa’ū na oo mai ai le oti faaletino ma le oti faaleagaga i le lalolagi O se vaega e alagatatau ai o le fuafuaga a le Tama Faalelagi ona faatoa mafai e Atamu ma Eva ona maua ni fanau ina ua mae’a le Paʼū. O le mea lea o le Pa’ū ua mafai ai e le Atua ona “aumaia le tino ola pea ma le ola faavavau o le tagata” (Mose 1:39).
Aotelega Autu: Pa’ū o Atamu ma Eva
Taiala fesootai mo le suesueina o le talalelei: Faitalia, Togiola a Iesu Keriso, Foafoaga, Olaga Faitino, Ata o le Faaolataga
Vaega 1
Ua Faaaoga e Atamu ma Eva le Faitalia
O Atamu ma Eva o uluai fanau ia a le Atua na o mai i le lalolagi. Sa la’ua nonofo i se tulaga o le mama i le Faatoaga o Etena, o lona uiga sa leai ni a la’ua fanau ma sa lei lagonaina le olioli po o le faanoanoa (tagai i le 2 Nifae 2:23). E lua laau i le faatoaga sa sili ona taua—o le laau o le ola ma le laau e iloa ai le lelei ma le leaga (tagai Mose 3:9). Na poloaiina e le Atua ia Atamu ma Eva e aua nei aai i le fua mai le laau e iloa ai le lelei ma le leaga (tagai Mose 3:17). Afai la te usiusitai i le poloaiga, e mafai ona la’ua tumau ai pea i le faatoaga. Afai la te aai i le fua, o le a la oo i le oti.
Sa faamamafa mai foi e le Atua sa ia i la’ua le faitalia, po o le mana e filifili ai (tagai Mose 3:16–17). Na sau Satani ma faaosooso Atamu ma Eva e aai i le fua. Sa ia ta’u atu ia i la’ua o le a la le feoti ae o le a atamamai e pei o le Tama Faalelagi (tagai Mose 4:10–11). Ina ua filifili Atamu ma Eva e aai i le fua, sa pupula o laua mata ma sa la maua le malamalama, ae sa la oo foi i le oti faaleagaga, na iu ai ina tuliesea mai le afioaga a le Alii (tagai i le Mataupu Faavae ma Feagaiga 29:40–41). Sa avea foi i la’ua ma tagata faaletino, ua oo i ai le tiga, ma’i, oti, ma isi aafiaga o lenei lalolagi pa’ū.
Mea e mafaufau i ai
-
Faitau le 2 Nifae 2:15–16. O le a se mea ua e aoaoina e uiga i le faitalia e ala i le malamalama atili e uiga i tulaga o le Pa’ū? O le a se mea ua e aoaoina e uiga i le taua o lo tatou manaomia ona filifili le lelei mo i tatou lava e faasaga i le leaga? Matau le faaaogaina e Liae o le upu “faatosina” i nei fuaiupu. O faapefea ona faatosinaina i tatou e le lelei ma le leaga i aso nei? O le a se mea ua aoao mai e lenei mea ia te oe e uiga i lo tatou manaomia o se Faaola?
Gaoioiga mo le aoao faatasi ma isi
-
Na saunoa Peresitene Dallin H. Oaks:
Sa aoao mai le Tama o Liae a na faapea e le tupu le pa’ū, “semanu e tumau pea Atamu ma Eva i le tulaga o le le sala, e aunoa ma se olioli, ona sa laua le iloa se pagatia” (2 Nifae 2:23). A aunoa ma le aafiaga o le faafeagai i le olaga faaletino, ‘e tatau ai ona tuufaatasi o mea uma o se mea e tasi,’ lea o le a leai ai se fiafia po o se faanoanoa (fuaiupu 11). …
“‘Na pa’ū Atamu ina ia i ai tagata; ma ua i ai tagata, ina ia latou maua le olioli’ [fuaiupu 25].”1
O le a se mea ua e aoaoina mai aoaoga a Peresitene Oaks ma Liae i le Tusi a Mamona e uiga i le manaomia o le faafeagai?
Aoao atili
-
Dallin H. Oaks, “O Le Fuafuaga Sili o le Fiafia,” Liahona, Nov. 1993, 72– 75
-
“O Le Pa’ū o Atamu ma Eva ma le Meaalofa o le Faitalia,” Anomea a le Faiaoga o Aoaoga ma Aoaoga Faavae o le Tusi a Mamona (2021), 32–38
Vaega 2
Ua faatoilaloina e Iesu Keriso ia aafiaga o le Pa’ū
O le Pa’ū o Atamu ma Eva na fatuina ai se tuueseesega i lo latou va ma le Atua, ua ta’ua o le oti faaleagaga. Talu ai o o la’ua tino na avea ma tino faaletino, o lea sa oo foi i laua i le oti faaletino ma tuu ai i se tulaga o le faafeagai i lenei lalolagi, lea o le a mafai ai ona agasala. O le oti faaleagaga ma le faaletino ma le agasala mulimuli ane o le a taofia uma ai Atamu ma Eva ma le la fanau mai le toe foi atu i le afioaga o le Atua.
I Lona alofa e le iu mo Lana fanau, na saunia ai e le Tama Faalelagi se Faaola, o lē na mafai ai e Atamu ma Eva—ma i tatou uma—ona salamo mai agasala. O le a totogiina e Iesu le tau mo a tatou agasala. O le a mafatia foi o Ia i tiga o alii, tamaitai, ma tamaiti uma o e o le a ola, e aofia ai le tiga o a tatou agasala, manu’aga, ma’i, ma le oti. O le a maliu o Ia ma toetu mai ina ia mafai ai ona tatou toe ola. E ala i le meaalofa lē mafaatusalia o Iesu Keriso, na fai ai e le Atua ia mafai ona tatou salamo i agasala, aoao, alualu i luma, ma iu ai ina toe foi atu e mau faatasi ma Ia.
Ina ua tuua le Faatoaga o Etena, sa usiusitai Atamu ma Eva i poloaiga a le Alii, e aofia ai le ofoina atu o ulumatua o a laua lafu manu i le Alii e fai ma taulaga. Na la’ua iloa mulimuli ane o le faamoemoega o lenei taulaga o le fesoasoani lea ia i la’ua ia manatua o le a tuuina mai e Iesu Keriso Lona soifua o se taulaga mo i tatou uma. (Tagai i le Mose 5:4–8.)
Mea e mafaufau i ai
-
Faitau le Mose 5:11. I le fuaiupu lenei, sa aotele ai e Eva mea sa ia aoaoina mai lo la’ua aafiaga i le Pa’ū. E ui e masani ona tatou vaai i le Pa’ū o se faatomuaga o tiga ma mafatiaga i le lalolagi, ae e le o ta’ua e ia nei mea. Aisea e te manatu ai na filifili Eva e talanoa e uiga i le Pa’ū i le ala sa ia faia ai? O le a se mea e mafai ona tatou aoao mai ia Eva e uiga i faamoemoega o o tatou olaga?
Na aoao mai Peresitene Russell M. Nelson:
“Ona sa manumalo Iesu Keriso i lenei lalolagi pa’ū, ma talu ai sa Ia togiolaina i tatou taitoatasi, o lea e mafai ai foi e outou ona faatoilaloina lenei lalolagi tumu i le agasala, manatu faapitoa, ma e masani ona vaivai.
“Ona sa togiola e le Faaola, e ala i Lana Togiola le i’u, i tatou taitoatasi mai vaivaiga, mea sese, ma le agasala, ma ona sa Ia oo i tiga uma, popole, ma avega e te le’i oo lava i ai, ona oo lea pe a e salamo moni ma saili Lana fesoasoani, e mafai ona e manumalo i lenei lalolagi le mautonu.”2
E mafai faapefea ona tatou faatoilaloina lenei lalolagi pa’ū? O anafea na e iloaina ai le fesoasoani a le Faaola e faatoilalo ai le lalolagi?
Gaoioiga mo le aoao faatasi ma isi
-
Faitau le Ioane 3:16 o se vaega, ona valaaulia lea o tagata o le vaega e faasoa mai o latou manatu i le uiga o lenei fuaiupu. Ona faitau lea Mose 5:9, lea o loo faamatala ai le matafaioi a Iesu Keriso o lo tatou Togiola. Valaaulia tagata o le vaega e faasoa mai mea na latou aoaoina mai nei fuaiupu e uiga i le alofa o le Atua ma le meaalofa o le taulaga ma le Toetu o Keriso, lea e mafai ai ona tatou faatoilaloina aafiaga o le Pa’ū.
-
Faitau le Alema 7:11–13 o se vaega, matau upu taitasi o loo faamatalaina ai se mea tatou te oo i ai i lenei lalolagi pa’ū. Mo se faataitaiga, atonu e te matauina ia upu “faaosoosoga” ma “ma’i.” Fai se lisi o upu nei mo tagata o le vaega e vaai i ai. Ona toe faitau lea o le fuaitau, o le taimi lea ia gauai atu i upu e faamatala ai mea na faia e Keriso mo i tatou. Tusi upu nei i se lisi lona lua i talaane o le lisi muamua. O le a se mea ua aoao mai e lenei gaoioiga ia te oe e uiga i le sootaga i le va o le Pa’ū o Atamu ma Eva ma le matafaioi a Iesu Keriso i le avea ai ma o tatou Faaola?
Aoao atili
-
Jeffrey R. Holland, “Pe a Faatasia le Faamasino Tonu, Alofa ma Alofa Mutimutivale,” Liahona, Me 2015, 104-6
-
Robert D. Hales, “O le Fuafuaga o le Faaolataga: O Se Oa Paia o le Malamalama e Taialaina i Tatou,” Liahona, Oke. 2015, 24–31
Vaega 3
O le Pa’ū o Atamu ma Eva Sa o se Vaega Alagatatau o le Fuafuaga a le Atua
Ona o le Pa’ū o Atamu ma Eva, ua tatou maua uma ai le avanoa e maua ai se tino faaletino ma iloa ai le olioli ma faigata o le olaga faaletino. Ua tatou maua ai foi avanoa i aso uma e faaaoga ai lo tatou faitalia. Ona ua vavaeeseina i tatou mai le Atua e aunoa ma se manatuaina o lo tatou muai olaga, e tatau ona tatou aoao ma tuputupu a’e e ala i le faatuatua ia Iesu Keriso ma e ala i o tatou lava aafiaga.
O nei mea uma e alagatatau i le fuafuaga a le Atua mo lo tatou fiafia e faavavau. Ina ia toe foi atu ia te Ia ma avea e pei o Ia, e tatau ai ona tatou faaaogaina lo tatou faitalia e filifili ai le lelei nai lo le leaga. A o tatou faia lenei faagasologa o le aoaoina, tatou te faia ni mea sese. Ae o Iesu Keriso ma Lana Togiola ua mafai ai e i tatou ona faatoilalo a tatou agasala ma faamagaloina ma faamamaina, ma faatagaina ai i tatou e toe foi atu i se aso i le afioaga o le Atua ma avea e faapei o Ia.
Mea e mafaufau i ai
-
Faitau le 2 Nifae 2:11, 15, ma gauai atu i le matafaioi a le faafeagai i le fuafuaga a le Atua. O a ni mea ua e aoao mai i nei fuaiupu e uiga i le manaomia o le faafeagai? E faapefea e le malamalama i le faamoemoega o le faafeagai ona aafia ai le ala e te mafaufau ai e uiga i ou tofotofoga?
-
O le Pa’ū na aumaia uma ai i le lalolagi le puapuaga ma le olioli. Faitau le 1 Korinito 15:21–22 ma le 2 Nifae 2:19–25, ma vaavaai mo faamanuiaga na avanoa mo tagata uma ina ua mavae le Pa’ū. O a mea ua e aoao mai nei mau e uiga i le faamoemoega o le olaga?
Gaoioiga mo le aoao faatasi ma isi
-
Ua tatou iloa mai tusitusiga paia o ona po nei ia lagona o Atamu ma Eva e uiga i le la solitulafono. Faitau faatasi le Mose 5:10–11 o se vaega. Atonu e aoga le filifili o se alii e faitau le fuaiupu 10 ma se tamaitai e faitau le fuaiupu 11, e fesoasoani i tagata o le vaega e vaai faalemafaufau ai ia Atamu ma Eva o saunoa. Faasoa atu ou lagona e uiga i nei fuaiupu i lau vaega. Na mafai faapefea e le faatuatua o Atamu ma Eva ia Iesu Keriso ona fesoasoani ia i laua e vaai atu ai i la laua solitulafono i le ala na la faia ai?
-
O le a se mea e aumaia ia oe le olioli? Valaaulia tagata o le vaega e faasoa mai a latou tali e uiga i lenei fesili. Ona faitau faatasi lea o le 2 Nifae 2:25 . Aisea e te manatu ai na aoao atu e Liae lona atalii e faapea “ua i ai tagata, ina ia latou maua le olioli”? O le a le mea e fai e le Pa’ū o Atamu ma Eva i le olioli? Valaaulia tagata o le vaega e faasoa mai o latou manatu.
Aoao atili
-
Kenese 2–4; 2 Nifae 2:15–26; 9:6–21; Mosaea 3:11–16; Alema 12:21–35; 22:12–14; 42:2–15; Mataupu Faavae ma Feagaiga 29:34–44; Mose 3–5; 5:9–13
-
Dallin H. Oaks, “O Le Fuafuaga Tele o le Fiafia,” Ensign, Nov. 1993, 72–75
-
Jeffrey R. Holland, “Pe a Faatasia le Faamasino Tonu, Alofa ma Alofa Mutimutivale,” Liahona, Me 2015, 104– 6
-
“O Le Atoaga o le Talalelei: O le Paʼū o Atamu ma Eva,” Ensign, Iuni 2006, 48-49
O isi Punavai e uiga i le Paʼū o Atamu ma Eva