Faamasinoina o Isi

O le faamasino o se faaaogaaga taua lea o lo tatou faitalia ma e manaomia ai se faaeteetega tele, aemaise pe a tatou faia ni faamasinoga e uiga i isi tagata. O a tatou faamasinoga uma lava e tatau ona taialaina i tulaga faatauaina o le amiotonu. E na o le Atua, o le silafia loto o tagata taitoatasi, e mafai ona faia faamasinoga mulimuli o tagata taitoatasi.

O nisi taimi e manatu ai nisi tagata e sese le faamasino atu o isi i soo se itu. E ui e moni e le tatau ona tatou ta’usalaina isi pe faamasinoina foi i latou ma le lē tonu, ae o le a manaomia ona tatou faamasinoina manatu, tulaga, ma tagata i le gasologa o o tatou olaga. Ua tuuina mai e le Alii le tele o poloaiga e le mafai ona tatou tausia e aunoa ma le faia o se faamasinoga. Mo se faataitaiga, sa Ia fetalai: “Ia outou faaeteete i perofeta pepelo. … Tatou te iloa i latou i o latou fua” (Mataio 7:15–16) ma “Ia outou o ese atu i fafo mai totonu o e ua amioleaga” (Mataupu Faavae ma Feagaiga 38:42). E manaomia ona tatou faia faamasinoga o tagata i le tele o a tatou faaiuga taua, e pei o le filifiliga o uo, palotaga o taitai o malo, ma le filifiliga o se toalua.

Sa tuuina mai e le Alii se lapataiga e taitai ai i tatou i a tatou faamasinoga o isi: “Aua o le faamasino tou te faamasino atu ai, o le a faamasinoina ai outou; ma o le fua tou te fua atu, o le a toe fua mai ia te outou. Ma aisea e te vaai ai i le fasi laau lena o loo i le mata o lou uso, ae le manatu ifo i le utupoto lena o loo i lou lava mata? Pe e faapefea ona e fai atu i lou uso: Tuu mai ia te au sei ou eu esea le fasi laau mai lou mata—ae faauta, o loo i ai se utupoto i lou lava mata? O oe na le pepelo, ia muamua aveese i fafo le utupoto mai lou lava mata; ona manino lelei ai lea o lau vaai e aveese ai i fafo le fasi laau mai le mata o lou uso” (3 Nifae 14:2–5).

I le mau lenei o loo aoao mai ai e le Alii o se sese tatou te vaaia i se isi tagata e masani ona pei o se togi itiiti i le mata o lena tagata, e faatusa i o tatou lava sese, ia ua pei o se laau faalava telē i totonu o o tatou mata. O nisi taimi a tatou taulai atu ai i sese o isi ae nai lo o lena, e tatau ona tatou galulue e faaleleia i tatou lava.

O a tatou faamasinoga tonu e uiga i isi e mafai ona tuuina atu ai se taitaiga mo i latou ma, i nisi o tulaga, se puipuiga mo i tatou ma o tatou aiga. E tatau ona tatou taulimaina soo se faamasinoga faapena ma le alofa ma le agalelei. I le tele tatou te mafai ai, e tatau ona tatou faamasino ia tulaga o tagata ae le o le faamasinoina o tagata lava latou. Soo se taimi e mafai ai, e tatau ona tatou aloese mai le faia o faamasinoga sei vagana ua lava se silafia i mea moni. Ma e tatau ona tatou nofouta e le aunoa i le Agaga Paia, o lē e mafai ona taialaina a tatou faaiuga. O le fautuaga a Alema i lona atalii o Korianetona o se faamanatu aoga lea: “Vaai ia e alofa mutimutivale i ou uso; fai mea tonu, faamasino ma le amiotonu, ma fai mea lelei e le aunoa” (Alema 41:14).

Tusifaamaumau Ou Lagona Uunai

Savali Faaopoopo