Potutusi
O Le Galuega Faaletino a Iesu Keriso

“O Le Galuega Faaletino a Iesu Keriso,” Autu ma Fesili (2023)

Ata
Keriso o loo aoaoina tagata

Taiala mo le Suesueina o le Talalelei

O Le Galuega Faaletino a Iesu Keriso

“Ma o le a taua o ia o Iesu Keriso, o le Alo o le Atua” (Mosaea 3:8)

O le fanau agaga silisili a le Tama Faalelagi o Lona Alo Ulumatua, o Iesu Keriso. A o lei soifua mai o Ia i le tino, sa lauiloa Iesu i le tele o faalagiga, e pei o le Ieova Silisili ma le Alii Pule Aoao. Na auina mai e le Atua le Tama Lona Alo e soifua i le lalolagi ma ofoina mai o Ia lava o se taulaga togiola e le iu ina ia mafai ai ona maua le togiola mo fanau uma a le Atua. I le taimi o Lona soifuaga faaletino, sa aoao atu ai e Iesu Keriso Lana talalelei, faia vavega tetele, ma faatuina Lana Ekalesia. Mai tala faatusi paia o Lona soifuaga, ua tatou aoao ai sa usiusitai atoatoa o Ia i Lona Tama. Sa faamalolo e Iesu Keriso e mama’i ma puapuagatia, ofo atu le faamoemoe ia i latou o e na mafatia, aoao atu le taua o le salamo, ma ia mafai le faamagaloga. Ua faatuina e Lona soifuaga faaletino se faataitaiga atoatoa mo fanau uma a le Tama Faalelagi e mulimuli ai.

O Le A le Galuega Faaletino a Iesu Keriso?

Na auina mai e le Tama Lona Alo Pele, o Iesu Keriso, i le lalolagi e avea ma Faaola ma Togiola o le lalolagi. E ala mai i Ona aafiaga i le olaga nei ma Lana taulaga togiola, na Ia silafia ai ma malamalama atoatoa i aafiaga o i tatou taitoatasi iinei i le lalolagi. Na faia e Iesu Keriso se faataitaiga atoatoa mo i tatou e mulimuli ai.

Vaaiga aoao i autu: Iesu Keriso

O taiala fesootai mo le suesueina o le talalelei: Togiola a Iesu Keriso, Soifua Mai o Iesu Keriso, Iesu Keriso, Toetu

Vaega 1

Sa Faia Pea e Iesu Keriso le Finagalo o Lona Tama

Ata
O Iesu o loo aoao atu i le malumalu

O mea ofoofogia na tutupu o loo siomia ai le soifua mai o Iesu Keriso o loo faamaumauina lelei i tusitusiga paia (tagai, mo se faataitaiga, Luka 2:1–19). E faatatau i Lona tulaga faatamaitiiti, e na o le pau le mea o loo faasoa mai ai e tusitusiga paia e faapea “ua tupu le tama, ma ua malosi lona loto, ua tumu i le poto: ua ia te ia foi le alofa tunoa o le Atua” ma “ua tupu le poto ma le tino o Iesu, ua alofagia o ia e le Atua atoa ma tagata” (Luka 2:40, 52).

Ina ua 12 tausaga o Iesu, sa malaga faatasi o Ia ma Lona aiga i Ierusalema e faamanatu le Tausamiga o le Paseka. A o latou agai atu i le fale i Nasareta, sa iloa ai e Maria ma Iosefa e le o faatasi Iesu ma tagata o le aiga na malaga faatasi ma i latou. Sa iu ina la maua o Ia i le malumalu i Ierusalema, o aoao atu tagata ma tali a latou fesili (tagai Faaliliuga a Iosefa Samita, Luka 2:46 [i le Luka 2:46, vaefaamatalagai]). Ina ua faaalia e Maria le popole i Lona toesea ai, sa fetalai Iesu, “Se a le mea na oulua saili mai ia te au? lua te le iloa ea e tatau ona ou i le fale o lo’u Tama?” (Luka 2:49). E oo foi i lona talavou, sa taulai atu Iesu i le faia o le galuega a Lona Tama.

I Lona soifuaga atoa faaletino, sa alofa ma auauna atu Iesu i le Atua le Tama. Sa Ia fetalai mai, “Aua ou te le’i alu ifo mai le lagi e fai lo’u lava loto, ao le finagalo o le ua auina mai a’u” (Ioane 6:38). E finagalo Iesu Keriso ia tatou taitasi ma faia foi faapea. Sa Ia folafola mai “o le na te faia le finagalo o lo’u Tama o i le lagi” o le tagata lea o le a ulu atu i le malo o le Atua (Mataio 7:21).

Mea e mafaufau i ai

  • Faitau le Ioane 8:25–30, lea na faamalamalama mai ai e Iesu Keriso, “Ou te faia pea lava o mea lelei [i le Tama]” (fuaiupu 29). O le a se mea e mafai ona e faia ia malamalama atili ai ma mulimuli i le finagalo o le Tama i lou olaga?

Gaoioiga mo le aoao faatasi ma isi

  • Valaaulia tagata o lau vaega e faitau ma manatunatu i fesili na tuuina mai e Peresitene Russell M. Nelson i le faamatalaga lenei:

    “Pe ua e loto e faamuamua le Atua i lou olaga? O e loto e avea le Atua ma faatosinaga sili ona taua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi? Pe o le a e faatagaina Lona siufofoga ia faamuamua i lo se isi lava leo? O e loto e faataga soo se mea o finagalo o Ia e te faia ia faamuamua i lo isi faamoemoega uma? O e loto e tofatumoanaina lou loto i Lona finagalo?”1

    E mafai faapefea e au tali i nei fesili ona taitai atu ai oe e mulimuli i le faataitaiga a le Faaola o le faia pea o le finagalo o le Tama?

Aoao atili

Vaega 2

O Le Soifuaga Atoatoa o Iesu Keriso o se Faataitaiga mo Tagata Uma

Ata
O Ioane le Papatiso o loo papatisoina Iesu Keriso

Ina ua lata i le amataga o Lana galuega i nofoaga faitele, sa afio mai Iesu ia Ioane le Papatiso ma sa papatisoina i le Vaitafe o Ioritana. E ui e lei agasala lava o Ia, ae sa faamalamalama atu e Iesu e tatau ona papatisoina o Ia “e faataunuu ai mea tonu uma.” Ina ua afio ae Iesu i fafo mai le vai, sa faalogoina le siufofoga o le Atua le Tama, o fetalai mai, “O lo’u Atalii pele lena, ua ou fiafia lava ia te ia.” Sa oo ina afio ifo le Agaga Paia ia Iesu, e pei ona faaali mai i le faailoga o le lupe. (Tagai i le Mataio 3:13–17.)

Sa soifua Iesu Keriso i se olaga e atoatoa. Ina ua mavae Lona papatisoga, sa anapogi o Ia mo aso e 40 ma po e 40 e talanoa ai ma le Atua (tagai Faaliliuga a Iosefa Samita, Mataio 4:2 [i le Mataio 4:2, vaefaamatalaga i]). Mulimuli ane, sa faaosoosoina o Ia e Satani. Ae sa tumau mausali le tetee atu o Iesu Keriso i faaosoosoga. O Lona soifuaga e leai se agasala na saunia ai Iesu Keriso e faia o Ia lava ma taulaga mo agasala uma a fanau a le Atua. I le avea ai ma tagata atoatoa e toatasi i fanau a le Atua, o Iesu Keriso o le faataitaiga sili lea mo i tatou taitoatasi i a tatou taumafaiga e mulimuli i le Atua (tagai 1 Peteru 2:21–22).

Mea e mafaufau i ai

  • Faitau le Mataio 4:1–11, e aofia ai vaefaamatalaga o le Faaliliuga a Iosefa Samita, lea e faamatala ai le mea na tupu ina ua taumafai Satani e faaosooso Iesu. O le a se mea e mafai ona e aoao mai le faataitaiga a Keriso mo le taulimaina o faaosoosoga? O a ni auala e mafai ai e le anapogi, tatalo, ma se malamalama i tusitusiga paia ona saunia ai oe e faatoilalo faaosoosoga?

  • Na aoao atu e Iesu Keriso toetu le au soo sa Nifaē e toasefululua e uiga i la latou matafaioi o ni faamasino o tagata. Faitau le 3 Nifae 27:27 e vaai ai i le poloaiga na tuu atu e Iesu Keriso i Ona soo. Aisea e tāua ai mo soo o Iesu Keriso ona faapei o Ia?

Gaoioiga mo le aoao faatasi ma isi

  • Fai atu i tagata o lau vaega e mafaufau pe aisea na tatau ai mo Iesu Keriso ona oo i faaosoosoga. Valaaulia i latou e vaavaai mo tali i le Eperu 2:17–18; 4:15–16. E taua i se a mo i tatou le malamalama e faapea, na oo foi Iesu Keriso i ia ituaiga o faaosoosoga o loo tatou feagai i nei aso?

Aoao atili

Vaega 3

Na Aoao i Tatou e Iesu ia Alolofa ma Auauna Atu i le Tasi ma le Isi

Ata
Ua faamaloloina e Iesu se alii

Na aoao mai Iesu Keriso e faapea e lua poloaiga sili. O le poloaiga muamua o nei poloaiga o le alofa lea i le Atua ma o tatou loto atoa, agaga, ma mafaufau atoa. O le lona lua o le alofa atu i isi e pei ona tatou alolofa ia i tatou lava. (Tagai Mataio 22:36–39.) Sa aoao soo atu e Iesu nei upumoni i lauga ma faataoto (mo se faataitaiga, tagai Mataio 25:31–46; Luka 10:25–37).

O Iesu Keriso o se faataitaiga i taimi uma o le auala e mulimuli ai i le Atua ma alofa i isi. Sa Ia faaalia patino Lona alofa ma le agaalofa mo isi a o Ia auauna atu ma le mana tele i fanau a le Atua, faamaloloina o e mamai ma faia vavega maoae e tele (tagai Mataio 11:4–5; Mosaea 3:5–6).

O se vaega taua o le galuega a Keriso i le olaga nei o le faatuina lea o Lana Ekalesia. O le faia o lea mea, sa Ia valaauina ai soo e toasefululua, faatagaina i latou e talai atu le talalelei, ma tuu atu ia i latou le mana e faamalolo ai e mamai (tagai Mataio 10:1–8). Sa tauaveina e nei soo le galuega a le Alii ina ua mavae Lona maliu ma le Toetu ina ua latou aoao atu le salamo ma valaaulia isi ina ia papatisoina ma maua le meaalofa o le Agaga Paia (tagai Galuega 2:22–24, 37–47). O le faaaogaina o le mana o le perisitua e faamalolo ai, sa latou auauna atu ai i isi ma fatuina ni avanoa e talai atu ai le talalelei a Iesu Keriso (tagai Galuega 3:1–11).

Mea e mafaufau i ai

  • O le poloaiga sili lona lua o le alofa atu i lou tuaoi. Na aoao mai Peresitene Russell M. Nelson: “I le avea ai o ni soo o Iesu Keriso, e tatau ona avea i tatou o faaa’oa’o o le ala e fegalegalea’i ai ma isi—aemaise pe a i ai ni eseesega o o tatou manatu. O se tasi o ala aupito faigofie e faailoa ai se soo moni o Iesu Keriso o le ala e taulima ai ma le agaalofa e lena tagata isi tagata.”1 E mafai faapefea e le manatuaina o le faataitaiga a Iesu Keriso ona fesoasoani ia te oe pe a faigata ona alofa atu i isi?

Gaoioiga mo le aoao faatasi ma isi

  • Faitau i le saunoga lenei a Elder Neil L. Andersen:

    “Aua le fiu—po o le a lava le loloto o manu’a o lou agaga, po o le a lava lo latou mafuaaga, po o fea ae po o le a foi le taimi e tupu ai, ma po o le a lava le puupuu po o le umi e tumau ai, e le o faamoemoeina oe ina ia fano faaleagaga. Ua faamoemoeina oe ina ia e sao mai faaleagaga ma fua mai i lou faatuatua ma faalagolago i le Atua.

    “E le’i foafoaina e le Atua o tatou agaga ina ia ola e aunoa ma Ia. O lo tatou Faaola ma le Alii, o Iesu Keriso, e ala i le meaalofa e lē mafaamatalaina o Lana Togiola, e le gata ina ia laveai ai i tatou mai le oti ma ofo mai ai ia i tatou, e ala i le salamo, faamagaloga mo a tatou agasala, ae ua tu saunia foi o Ia e laveai i tatou mai faanoanoaga ma tiga o ō tatou agaga ua faamanu’alia.”2

    Talanoa i le mana o loo avanoa mo i tatou ona o le gafatia e le Faaola ona faamalolo. Valaaulia tagata o le vaega e mafaufau e faasoa mai ni aafiaga, pe a talafeagai ai, i se taimi na latou lagonaina ai le mana faamalolo o Iesu Keriso i o latou olaga.

Aoao atili

Vaega 4

Na Tuuina Mai e Iesu Keriso Lona Soifua e Togiola ai Fanau a le Atua

Ata
Iesu o loo tootuli

Na valoia e le perofeta o le Tusi a Mamona o Apinati o le a afio mai Iesu Keriso i lalo mai le lagi ma tauemuina, sasa, tuliesea, faasatauroina, ma fasiotia—i mea uma ina ia mafai ona Ia togiolaina Lona nuu (tagai Mosaea 15:1–7). O le manaoga silisili i le lalolagi i aso nei e mo tagata uma ia aoao ma malamalama i le misiona faaletino a lo tatou Alii o Iesu Keriso, le ala na Ia puapuagatia ai ma totogi le tau mo a tatou agasala ina ia mafai ai ona faaolaina i tatou.

O nisi o mea aupito taua na tutupu i le talafaasolopito o le lalolagi na tutupu i toe itula o le soifuaga o le Alii. A o latalata mai le taimi o le Paseka faaIutaia, sa ave e Iesu Ona soo i Ketesemane, o se faatoaga o laau olive i luga po o talaane o le Mauga o Olive i fafo tonu lava o papuipui o Ierusalema. O iinei na tatalo ai Iesu Keriso ma amata ona tauave i Ona lava luga mea uma sa poloaiina ai mo lo tatou togiolaina. Sa vavalo mai le Tupu o Peniamina e faapea, sa lagona e Iesu Keriso le “tiga o le tino, ma le fiaai, ma le fia inu, ma le lailoa, ma le “tele naua o lona mafatia mo le amioleaga ma mea inosia a ona tagata”(Mosaea 3:7). E le mafai ona tatou malamalama i le malosi ma le tele o Lona puapuaga i Ketesemane, ae o le tiga na afutoto ai Iesu “ua pei o alualu toto ua pau ifo i le eleele” (Luka 22:44; tagai foi Mataupu Faavae ma Feagaiga 19:18).

Ona faalataina ai lea o Iesu e se tasi o Ona soo, pue faapagotaina, tauemuina, ma molia pepelo e taitai faalelotu Iutaia. Sa aveina o Ia, suesueina, ma sasaina e tagata Roma. (Tagai Mataio 26:47–68; 27:1–31.) Sa ave e fitafita Iesu Keriso ma faasatauroina o Ia, o lona uiga o Ona lima ma vae sa tutu’i i se satauro (tagai Luka 23:33–38). A o sii a’e o Ia i luga ma tautau i luga o le satauro, sa faaauau pea le tiga ma puapuaga mo a tatou agasala. O le Togiola a Iesu Keriso e aofia ai le totogi na Ia faia i Ketesemane ma luga o le satauro e faatoilalo ai aafiaga o le agasala mo i latou uma o e salamo ia latou agasala (tagai Alema 5:48; 3 Nifae 9:22; Mataupu Faavae ma Feagaiga 19:17).

Ina ua maliu o Ia, sa tuuina Lona tino i se tuugamau (tagai Ioane 19:38–42). I le aso lona tolu ina ua mavae Lona Faasatauroga, na toe ulu ai le agaga o Keriso i Lona tino, ma ua avea ai o Ia ma tagata muamua ua toetu mai (tagai Mataio 28:1–8). E toatele tagata na molimauina le Alii toetu ma molimau atu i le tala fiafia mamalu. Ona sa toetu Iesu Keriso, o fanau uma a le Atua o le a toe faatasia o latou agaga ma o latou tino ma maua le faamanuiaga o le tino ola pea (tagai 1 Korinito 15:21–22; Alema 11:44–45). O mea uma na onosaia e Iesu Keriso i le taimi o Lona soifuaga faaletino sa faia ona o Lona alofa mo fanau uma a le Tama Faalelagi (tagai i le 1 Nifae 19:9; Mataupu Faavae ma Feagaiga 34:3).

Mea e mafaufau i ai

  • A o lei afio i Ketesemane, sa folasia atu e Iesu Keriso le sauniga o le faamanatuga i Ona soo. Faitau le Mataio 26:26–30. O le a se mea e mafai ona e faia e toe manatunatu atili ai i le soifuaga ma le Togiola a Iesu Keriso pe a e ai ma inu i le faamanatuga? E mafai faapefea e lou aafiaga o le ai ma inu i le faamanatuga ona faateleina lou alofa mo Iesu Keriso?

Gaoioiga mo le aoao faatasi ma isi

  • Faitau faatasi le saunoaga lenei a Peresitene Russell M. Nelson:

    “I le tuua ai o Lona mamalu ma afio mai i le lalolagi o le Alo e Toatasi na Fanaua e le Tama i la le tino, sa inosia, tauemuina, tuufeanu i ai, ma sasaina ma le le alofa o Ia. I le Faatoaga i Ketesemane, sa ave ai e lo tatou Faaola i Ona lava luga tiga uma , agasala uma ma mafatiaga ma puapuaga uma ua outou oo ma ou oo i ai faapea ai ma tagata uma ua soifua ma o le a soifua mai. I lalo o le mamafa o lena avega tiga matuitui, na maligi ai Lona toto mai pu ninii uma. O nei mafatiaga uma sa matua faateteleina a o faasatauroina ma le le alofa o Ia i luga o le satauro i Kalevaria.

    “E ala i nei aafiaga matuitui tiga ma Lona Toetu na sosoo ai—Lana Togiola Lē I’u—sa Ia aumaia ai le tino ola pea i tagata uma ma togiolaina ai tatou uma taitoatasi mai aafiaga o le agasala i tuutuuga o lo tatou salamo.”3

    Talanoa ma le vaega pe aisea e taua ai le aoao e uiga i mafatiaga o Iesu Keriso i Ketesemane ma luga o le satauro, Lona maliu, ma Lona Toetu. E mafai faapefea e le malamalama atili i mea na oo ia Iesu Keriso ona faalatalata atili atu ai oe ia te Ia?

Aoao atili