Lalolagi o Agaga

O nofoaga e nonofo ai agaga i le va o lo tatou oti ma le toetutu

Pe na e mafaufau ea po o le a le mea e tupu pe a mavae le oti? Ua aoao manino mai e le talalelei a Iesu Keriso e faapea, o le olaga i le lalolagi e le na o le pau lea o le mea o loo i ai. Sa i ai o tatou tino agaga ae tatou te lei fananau mai ma o le a faaauau pea ona ola pe a mavae le oti. A mavae le oti, tatou te o atu i le lalolagi o agaga e faatalitali lo tatou toetutu. O le talalelei a Iesu Keriso o loo aoaoina foi i le lalolagi o agaga. Talu ai e taua agaga uma i le Atua, o lea ua saunia ai e Iesu Keriso se ala i le faaolataga mo i latou o e maliliu e aunoa ma se avanoa e talia ai le talalelei.

O Le A le Lalolagi o Agaga?

O le lalolagi o agaga o le nofoaga lea e nonofo ai agaga o e ua maliliu mo se taimi le tumau a o latou faatalitali mo le toetutu. O le lalolagi o agaga e i ai uma le parataiso ma le falepuipui o agaga. Ua folafola atu le talalelei a Iesu Keriso i na tagata e lei maua se avanoa i le olaga faitino e talia ai le talalelei ma maua sauniga o le faaolataga ma le faaeaga.

Vaaiga Aoao i autu: Lalolagi o Agaga

O taiala fesootai mo le suesueina o le talalelei: Ata o le Faaolataga, Toetu, Sauniga Sui mo e ua Maliliu, Auai i Galuega o le Malumalu ma Talafaasolopito o Aiga

Vaega 1

E I Ai se Olaga pe a mavae le Oti

Ata

Teineitiiti o loo folaina fugalaau i luga o le tuugamau

O le maliu o se uo po o se e pele e oo mai faatasi ma le tiga ma le faanoanoa. E ui o le faavauvau i le toesea o isi o se vaega o lo tatou aafiaga faaletino, ua faasilasila mai e tusitusiga paia na aveesea e Iesu Keriso “le tui o le oti” e ala i Lona Toetu mai le oti (Mosaea 16:8; Alema 22:14; Mamona 7:5). Ona sa motusia e Iesu Keriso noataga o le oti, o le a tatou toe ola uma ai (tagai le Alema 11:42–43). Pe a tatou oti, e tuueseeseina o tatou tino faaletino ma o tatou tino faaleagaga. O o tatou tino agaga “ua tofia [i le taimi lena] i se nofoaga e tusa ai ma a tatou galuega ma e amiotonu po o e amioletonu, o loo faatalitali mai iina mo le toetutu.”¹ (Tagai i le Alema 40:12–14.)

Mea e mafaufau i ai

Na matauina e Elder Weatherford T. Clayton e faapea: “E vaai le lalolagi i le fanau mai ma le oti o le amataga ma le gataaga. Ae ona o le fuafuaga paia a le Atua, ua tatou iloa ai o le fanau mai ma le oti ua na o ni taimi iloga ia o la tatou malaga i le ola e faavavau e faatasi ma lo tatou Tama Faalelagi.”² E mafai faapefea e lenei vaaiga ona saunia oe mo le taimi e maliu ai se tasi e te alofa i ai?
Faitau le 1 Korinito 15:51-55, 57. Toe mafaufau i se taimi na maliu ai se tasi e te alofa i ai. Na faapefea e le malamalamaaga faapea na faatoilalo e Iesu Keriso le oti ona fesoasoani ia te oe? E mafai faapefea ona e faaaogaina lena malamalamaaga e faamalosia ai isi o loo i ai ni fesili e uiga i le maliu ma le oti?

Gaoioiga mo le aoao faatasi ma isi

Ina ia fesoasoani ia i latou e le masani i le manatu faavae o tino agaga, e mafai ona e faaaogaina se totigilima e faatusa i le tino faaletino ma lou lima e fai ma faatusa o se agaga. Tuu lou lima i le totinilima ma ta’u i ai o le totinilima e faato’a “ola” pe a i ai le lima. Ona toe aveese lea i fafo lou lima ma faamatala atu o loo faaauau pea ona ola le lima e tusa lava po o le a le mea e tupu i le totinilima. Ona mafai lea ona e toe tuuina i luga le totigilima ma faamatala atu a uma ona tatou toetutu, o le a le toe tuueseeseina lava o tatou agaga ma o tatou tino. (Tagai Alema 11:45.)

Aoao atili

2 Nifae 9:4–13; Mataupu Faavae ma Feagaiga 138:11, 24
Paul V. Johnson, “Ma E Le Toe Iai Se Oti,” Liahona, Me 2016, 121-23

Vaega 2

O Le A Le Mea ua Tatou Iloa e uiga i le Lalolagi o Agaga?

Ata

Tuugamau avanoa

E o atu o tatou agaga i le lalolagi o agaga pe a mavae le oti. O iina, o agaga o e amiotonu “e talia i se nofoaga o le fiafia, lea ua taua o le parataiso, o se nofoaga e malolo ai, o se nofoaga o le filemu o le a latou malolo ai mai i o latou faalavelave uma ma mai le popole uma, ma le faanoanoa” (Alema 40:12). “O i latou o e … na oti ia latou agasala, e aunoa ma se malamalama i le upumoni, po o le solitulafono, ua latou teena perofeta,” o agaga ia i le falepuipui (Mataupu Faavae ma Feagaiga 138:32; tagai foi 1 Peteru 3:18–20).

Mea e mafaufau i ai

O agaga o loo i le falepuipui e mafai ona maua aoaoga o le talalelei a Iesu Keriso. Ae o le tulaga o nisi o agaga i le falepuipui e faasino i ai i nisi taimi i tusitusiga paia o “seoli,” po o le nofoaga le tumau lea e mafatia ai e le faamaoni ma i latou o e o le a le taliaina le talalelei seia oo i lo latou toetutu (tagai Mataupu Faavae ma Feagaiga 76:81–85). O tagata taitoatasi o e filifili e le salamo ia latou agasala pe talia le talalelei a Iesu Keriso o le a puapuagatia mo a latou lava agasala a o lei faaolaina i se malo o le mamalu i le faavavau (tagai Mataupu Faavae ma Feagaiga 19:16–18). E mafai faapefea e lenei fuaitau ona fesoasoani ia te oe e malamalama atili ai i aafiaga o i latou i le falepuipui o agaga?
O agaga i le parataiso o agaga o e amiotonu o e “e talia i se nofoaga o le fiafia, … o se nofoaga e malolo ai, o se nofoaga o le filemu o le a latou malolo ai mai i o latou faalavelave uma ma mai le popole uma, ma le faanoanoa” (Alema 40:12). E faapefea e lenei upumoni ona faateleina lou manao e tausi poloaiga a le Atua ma ola amiotonu?

Gaoioiga mo le aoao faatasi ma isi

Ina ia aoao i mea o loo aoao mai e tusitusiga paia e uiga i le lalolagi o agaga, fai ni koluma se lua i luga o pepa ma faaigoa le tasi itu o le “Amiotonu” ma le isi “Amioleaga.” Ona suesue lea i le Alema 40:6–14 ma le Mataupu Faavae ma Feagaiga 138:12–14, 20–22. Talanoaina mea na e mauaina i nei fuaitau o mau.

Aoao atili

Alema 34:32–34
“O Le Lalolagi o Agaga,” Aoaoga a Peresitene o le Ekalesia: Polika Iaga (1997), 279–84

Vaega 3

Ua Talai Atu le Talalelei i le Lalolagi o Agaga

Ata

tamaitai talavou

Pe ua e mafaufau i le mea e tupu i tagata o e maliliu e aunoa ma le faalogo i le talalelei a Iesu Keriso pe e aunoa ma le mauaina o le avanoa e maua ai sauniga o le faaolataga ma le faaeaga? Ua saunia e se Tama Faalelagi atamai ma agaalofa se ala mo Ana fanau uma e toe foi atu ai ma nonofo faatasi ma Ia pe a latou filifili e fai. Sa folafola atu e le Perofeta o Iosefa Samita i tagata o le Ekalesia, “Tuu atu i e ua oti e tautala mai i viiga e faavavau i le Tupu o Emanuelu, o le na faauuina, ae lei i ai le lalolagi, le mea e mafai ai e i tatou ona togiolaina i latou i fafo mai lo latou falepuipui; ona o le a faasaolotoina pagota” (Mataupu Faavae ma Feagaiga 128:22).

I le 1918, na vaai ai Peresitene Iosefa F. Samita i se faaaliga faalelagi o le lalolagi o agaga. O faamatalaga auiliili o lena faaaliga, o loo tusia i le Mataupu Faavae ma Feagaiga 138, o loo faamanino mai ai lo tatou malamalama i le ala na faia ai e Iesu Keriso ia mafai e i latou i le nofopologa i le falepuipui o agaga ona aoao i le talalelei, salamo, ma maua sauniga taua o le perisitua.

Mea e mafaufau i ai

Faitau le Mataupu Faavae ma Feagaiga 138:16–19, 50 - 52. E tusa ai ma nei fuaiupu, e faapefea ona pei le lalolagi atoa o agaga o se falepuipui e oo lava i agaga amiotonu? (tagai foi 1 Peteru 3:18–20; 4:6). O a lagona na oo i na tagata i le parataiso i le maliu o Iesu Keriso ma Lona faaali atu i le lalolagi o agaga?
Faitau le Mataupu Faavae ma Feagaiga 138:29–37, 57–59, ma vaavaai pe faapefea ona avanoa faamanuiaga o le talalelei i tagata o e maliliu e aunoa ma le mauaina o le talalelei i lenei olaga. O le a le uiga ia te oe o le mafai ona faaolaina ou tuaa ona o le mea na faia e Iesu Keriso?

Gaoioiga mo le aoao faatasi ma isi

Na saunoa mai Peresitene Russell M. Nelson: “Soo se taimi e te faia ai soo se mea e fesoasoani ai i soo se tasi i itu uma o le veli—fai se laasaga agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani e faapotopoto Isaraelu.”³ Ia talanoaina ni auala e mafai ona e fesoasoani ai ia i latou o e ua maliliu ina ia togiolaina ma maua sauniga e tatau ai. Valaaulia tagata o le vaega o e na auai i lena galuega e faasoa mai o latou lava aafiaga.

Aoao atili

Ioane 5:25–29; 1 Peteru 3:18–22; 4:6; Mataupu Faavae ma Feagaiga 138:53–56
Dale G. Renlund, “Galuega o Talafaasolopito o Aiga ma le Malumalu: Faamauga ma le Faamalologa,” Liahona, Me 2018, 46-49
“Togiolaina O Tatou Tagata Oti e ala i Auaunaga o le Malumalu,” Aoaoga a Peresitene o le Ekalesia: Iosefa F. Samita (2011), 407-15