Parau poro’i ’īritira’a

E au mau taea’e, ’e e au mau tuahine here, ’a mānava atu ai mātou ia ’outou i teie ’āmuira’a rahi fa’ahiahia nō ’Ēperēra 2020 a te ’Ēkālesia a Iesu Mesia i te Feiā Mo’a i te mau Mahana Hope’a nei, nō te mau tumu tā ’outou i ’ite, tē ti’a nei au i mua ia ’outou i roto i te hō’ē piha rahi ta’ata ’ore !

I te taime ’a fafau atu ai au ia ’outou i roto i te ’āmuira’a rahi nō ’Ātopa 2019 ē, e riro teie ’āmuira’a nō ’Ēperēra ’ei ’āmuira’a « fa’ahiahia roa » ’e « e ’ore e mo’ehia », ’aita roa atu ïa vau i ’ite ē, te paraparaura’a i mua i te hō’ē naho’a ta’ata ’ite-mata-hia i raro mai i te 10 ta’ata, e fa’ariro ïa te reira i teie ’āmuira’a ’ei ’āmuira’a fa’ahiahia ’e e ’ore e mo’ehia nō’u ! Terā rā, nō tō’u ’ite ē, tē ’āmui mai nei ’outou nā roto i te rāve’a ha’apararera’a uira, ’e nō te nehenehe ho’i o te hīmene a te pupu hīmene « It is well with my soul [Nō te maita’i o tō’u vārua] », ’ua riro te reira ’ei tāmāhanahanara’a nō tō’u vārua.

Mai tā ’outou e ’ite nei, ’ua fa’aiti-roa-hia te ta’ata e haere mai i teie ’āmuira’a, nō tō tātou hina’aro ’ia riro tātou ’ei mau tino huira’atira maita’i nā te ao nei, ’e ’ia rave i te mau rāve’a ato’a nō te fa’aiti i te pararera’a o te COVID-19. E ’ohipa rahi tā teie tirotiro e fa’atupu nei ’ati a’e te ao nei. ’Ua ha’afifi ato’a te reira i tā tātou mau putuputura’a, te ’ohipa misiōnare, ’e tae noa atu i te ’ohipa hiero nō te hō’ē tau poto.

’O te hō’ē tirotiro fifi te tumu o te mau ’ōpanira’a o teie taime, ’āre’a tō tātou iho mau fifi nō te orara’a nei, tē parare nei ïa te reira i’ō roa atu i teie ma’i pe’e. E nehenehe te mau fifi nō ananahi e tupu mai nā roto i te hō’ē ’ati, te hō’ē ’ati nātura, ’aore rā, te hō’ē mana’o pe’ape’a mana’o-’ore-hia.

Nāhea e ti’a ai ia tātou ’ia fa’a’oroma’i i te reira mau tāmatara’a ? ’Ua parau te Fatu ia tātou ē, « mai te mea rā ’ua vai ineine noa ’outou e ’ore ’outou e mata’u ».¹ ’Oia mau, e nehenehe tātou e ha’aputu i tā tātou iho mau mā’a, te pape ’e te moni. Terā rā, hō’ē ā huru te faufa’a rahi o tō tātou hina’aro ’ia fa’a’ī i tā tātou iho fare ha’aputura’a pae vārua i te fa’aro’o, te parau mau ’e te ’itera’a pāpū.

Tā tātou tītaura’a hope’a i roto i te orara’a nei, ’o te fa’aineinera’a ïa ’ia fārerei i te Rahu nui. E rave tātou i te reira nā roto i te tūtavara’a i te mau mahana ato’a ’ia hau atu te rirora’a tātou mai tō tātou Fa’aora, ’o Iesu Mesia.² ’E e rave tātou i te reira nā roto i te tātarahapara’a tātou i te mau mahana ato’a ’e te fāri’ira’a i tāna tāmāra’a, tāna fa’aorara’a, ’e tōna mana ha’apūai. I reira ïa tātou e ’ite ai i te hō’ē hau ’e te hō’ē ’oa’oa vai maoro, tae noa ato’a atu i roto i te taime ’āehuehu. Teie mau te tumu i ti’aoro mai ai te Fatu ia tātou ’ia ti’a noa i te mau vāhi mo’a ra ’e « ’eiaha ’ia fa’anu’u-’ē-hia atu ».³

I teie matahiti, tē fa’ahanahana nei tātou i te 200ra’a o te matahiti nō te hō’ē o te mau ’ohipa faufa’a roa a’e i roto i te ’ā’amu o te ao nei—’oia ho’i, tē fāra’a mai te Atua te Metua ’e tāna tamaiti here, ’o Iesu Mesia, ia Iosepha Semita. I roto i taua ’ōrama ta’a ’ē ra, ’ua fa’atoro te Atua te Metua i ni’a ia Iesu Mesia ’e ’ua nā ’ō a’era : « Tā’u tamaiti here teie. ’A fa’aro’o iāna ! »⁴

Nō tātou tāta’itahi teie fa’aarara’a ia Iosepha. Tītauhia ia tātou ’ia ’imi, nā roto i te mau rāve’a ato’a, ’ia fa’aro’o ia Iesu Mesia, ’o tē paraparau mai nei ia tātou nā roto i te mana ’e te aupurura’a a te Vārua Maita’i.

Te tumu nō teie ’āmuira’a rahi ’e nō te mau ’āmuira’a ato’a, nō te tauturu ïa ia tātou ’ia fa’aro’o iāna. ’Ua pure mātou, ’e tē ani atu nei mātou ia ’outou ’ia pure, ’ia vai rahi mai te Vārua o te Fatu i pīha’i iho ia tātou, ’ia ti’a ia ’outou ’ia fa’aro’o i te mau parau poro’i a te Fa’aora nō ’outou—e mau parau poro’i ’o te hōpoi mai i te hau i tō ’outou vārua. E mau parau poro’i o te fa’aora i tō ’outou ’ā’au ’oto. E mau parau poro’i o te tūrama i tō ’outou ferurira’a. E mau parau poro’i o te tauturu ia ’outou ’ia ’ite e aha te ’ohipa e rave ’a haere ai ’outou i mua i roto i teie mau pu’e tau ’ārepurepu ’e te fifi.

Tē pure nei mātou ’ia riro teie ’āmuira’a ’ei ’ohipa ha’amana’o-māite-hia, e ’ore roa e mo’ehia, maoti te mau parau poro’i tā ’outou e fa’aro’o, te mau fa’aarara’a ta’a ’ē o te hōro’ahia atu, ’e te mau ’ohipa ’o tē anihia ia ’outou ’ia ’āmui atu i roto.

’Ei hi’ora’a, i te hope’a o te tuha’a purera’a nō Sābati po’ipo’i, e tītau mātou i te hō’ē ’āmuira’a hanahana nā te ao ato’a nei, ’e e arata’i atu vau ia ’outou i roto i te tuōra’a Hosana mo’a. Tē pure nei mātou ’ia riro teie ’ei taime faufa’a i te pae vārua nō ’outou, ’a fa’a’ite ai tātou ma te tāhō’ē nā te ao ato’a nei, i tō tātou māuruuru rahi i te Atua te Metua ’e tāna tamaiti here nā roto i te ’āruera’a ia rāua nā roto i teie rāve’a ta’a ’ē.

E fa’a’ohipa tātou i te mau horoi ’uo’uo mā nō teie ’ohipa mo’a. Mai te mea ē, ’aita tō ’outou e horoi, e nehenehe ’outou e tāhirihiri noa i tō ’outou rima. ’Ia hope te tuōra’a Hosana, e ’āmui mai te ’āmuira’a i te pupu hīmene nō te hīmene « ’Auē te vārua o te Atua ».⁵

E au mau taea’e, e au mau tuahine here, e riro teie ’āmuira’a ’ei ’āmuira’a nehenehe. E riro teie matahiti ’ei matahiti fa’ahiahia nā roto i tō tātou fa’atumu-maita’i-ra’a i ni’a i te Fa’aora ’e i tāna ’evanelia i fa’aho’i-fa’ahou-hia mai. E tupu te mau ’ohipa vai maoro faufa’a rahi o teie ’āmuira’a fa’ahiahia ’a taui marū noa ai tō tātou ’ā’au ’e ’a ha’amata ai tātou i te ’imi tāmau ’ia fa’aro’o iāna.

Maeva i te ’āmuira’a rahi nō ’Ēperēra 2020 ! ’Ua ’ite au ē, tē tau’a mai nei te Atua tō tātou Metua i te ao ra ’e tāna tamaiti ’o Iesu Mesia, ia tātou. E vai rāua i pīha’i iho ia tātou i te roara’a o te mau terera’a ’ohipa o teie nā mahana hanahana e piti, ’a ’imi ai tātou ’ia tāpiri atu i pīha’i iho ia rāua ’e ’ia fa’ahanahana ia rāua. Nā roto i te i’oa mo’a o Iesu Mesia, ’āmene.