’A feruri na i te hāmani maita’i ’e te rahi o te Atua

I te roara’a o te tau, ’oia ato’a ’e i te mau taime fifi iho ā ra, ’ua fa’aitoito te mau peropheta ia tātou ’ia ha’amana’o i te rahi o te Atua ’e ’ia feruri i te mau mea tāna i rave nō tātou, ’ei ta’ata hō’ē, ’ei ’utuāfare ’e ’ei nūna’a.¹ E ’itehia teie arata’ira’a i te roara’a o te mau pāpa’ira’a mo’a, e mea faufa’a roa atu rā te reira i roto i te Buka a Moromona. Tē fa’ata’a ra te ’api upo’o parau ē, hō’ē o te mau fā o te Buka a Moromona o te « fa’a’itera’a ïa i te toe’a o te ’utuāfare o ’Īsera’ela i te mau mea rarahi tā te Fatu i rave nō tō rātou mau huimetua ».² ’Ua fa’aoti te Buka a Moromona nā roto i te pi’ira’a a Moroni ē : « Inaha, tē a’o atu nei au ia ’outou ē, ’ia tai’ohia teie nei mau parau e ’outou… ’ia ha’amana’o ’outou i tō te Atua aroha i te tamari’i a te ta’ata nei… ’e ’ia feruri tō ’outou ’ā’au i te reira ».³

E mea pūai te mau tāparura’a pāpū a te mau peropheta ’ia feruri i te hāmani maita’i o te Atua.⁴ Tē hina’aro nei tō tātou Metua i te ao ra ’ia ha’amana’o tātou i tōna hāmani maita’i ’e i tō tāna tamaiti here, ’eiaha nō tō rāua iho māuruurura’a, nō te fa’aurura’a rā tā te reira ha’amana’ora’a e fa’atupu i ni’a iho ia tātou. Nā roto i te ferurira’a i tō rāua maita’i, ’e ’ā’ano atu ā tō tātou hi’ora’a ātea ’e te hāro’aro’ara’a. Nā roto i te ferurira’a i tō rāua aroha, e rahi atu ā tō tātou ha’eha’a, te pure ’e te ’āueue ’ore.

Nā te hō’ē ’ohipa pe’ape’a tei tupu i ni’a i te hō’ē ta’ata ma’i e fa’a’ite mai e nāhea te ’ā’au mēhara nō te maita’i ’e te aroha e nehenehe e taui ia tātou. I te matahiti 1987, ’ua mātau vau ia Thomas Nielson, e ta’ata fa’ahiahia ’o tē tītau ra i te hō’ē māfatu ’āpī. E 63 matahiti tōna ’e tē ora ra ’oia i Logan, Utaha, i te Fenua Marite. I muri a’e i tāna tau fa’ehau i te tau nō te Tama’i Rahi 2 nō te ao nei, ’ua fa’aipoipo ’oia ia Donna Wilkes i roto i te hiero nō Logan Utaha. ’Ua riro mai ’oia ’ei ta’ata hāmani parpaing itoito ’e te manuia. I te mau matahiti i muri mai, ’ua fāna’o ’oia i te rave i te ’ohipa ’e tāna mo’otua matahiapo ’o Jonathan, ’ia tae i te mau pu’e tau fa’afa’aeara’a ha’api’ira’a. ’Ua tupu te hō’ē tā’amura’a ta’a ’ē i rotopū ia rāua, hō’ē tumu o te reira, nō te mea ïa ’ua ’ite ’o Tom i te hō’ē tueara’a rahi i roto iāna ’e ’o Jonathan.

’Ua hepohepo roa ’o Tom i te tīa’ira’a i te hō’ē ta’ata hōro’a māfatu. E ’ere ato’a ho’i ’oia i te hō’ē ta’ata fa’a’oroma’i roa. I te mau taime ato’a, ’ua ti’a iāna ’ia ha’amau ’e ’ia fa’aoti i te mau ’ōpuara’a maoti tōna itoito i roto i te ’ohipa, ’e tōna hina’aro tu’utu’u ’ore. ’A fa’aruru ai ’oia i teie fifi i te pae nō te māfatu ’e te pāpū ’ore o tōna ora, i te tahi taime e ani mai ’o Tom iā’u e aha tā’u e rave nō te ha’avitiviti i teie ’ohipa. Ma te parau ha’uti ri’i, e fa’a’ite mai ’oia i tē tahi mau rāve’a e ’ite-’oi’oi-hia ai te hō’ē ta’ata hōro’a māfatu nōna.

I te hō’ē mahana ’oa’oa ’e te ri’ari’a rahi ato’a rā, ’ua ’itehia mai te hō’ē ta’ata hōro’a māfatu maita’i roa nō Tom. E tano maita’i te fāito ’e te huru o te toto, ’e e taure’are’a te ta’ata hōro’a, e 16 noa matahiti tōna. Te māfatu e hōro’ahia ra, nō Jonathan ïa, te mo’otua here a Tom. I taua mahana ra, ’ua pēpē ’ino roa ’o Jonathan i te taime ’a ūhia ai tōna pere’o’o e te hō’ē pere’o’o auahi.

I tō’u haerera’a e fārerei ia Tom ’e ia Dona i roto i te fare ma’i, ’ua pe’ape’a roa rāua. E mea fifi mau ’ia feruri i te mea tā rāua e fa’aruru ra, i te mea ho’i ē, e nehenehe te ora o Tom e roa fa’ahou ā nā roto i te fa’a’ohipara’a i te māfatu o tā rāua mo’otua. I te ha’amatara’a, ’ua pāto’i rāua i te māfatu o Jonathan i pūpūhia mai e nā metua ’oto, tā rāua tamāhine ’e te hunō’a. ’Ua ’ite ’o Tom ’e ’o Dona ē, ’ua pohe te roro ’o Jonathan, ’e ’ua māramarama rāua ē, e ’ere nā tā rāua mau pure nō te hō’ē ta’ata hōro’a māfatu nō Tom i fa’atupu i te ’ati purūmu ’o Jonathan. E ’ere, ’ua riro te māfatu ’o Jonathan ’ei ō ’o te nehenehene e ha’amaita’i ia Tom i roto i tōna fifi. ’Ua fāri’i rāua ē, e nehenehe hō’ē ’ohipa maita’i e tupu mai nā roto mai i teie ’ati, ’e ’ua fa’aoti a’era e rave.

’Ua tupu maita’i te tauira’a māfatu. I muri mai, e ta’ata ta’a ’ē ’o Tom. ’Ua hau roa atu te tauira’a i te maita’i noa o te ea ’aore rā i te ’ā’au mēhara ato’a. ’Ua parau mai ’oia iā’u ē, i te mau po’ipo’i ato’a, e feruri noa ’oia ia Jonathan, i tāna tamāhine ’e tāna huno’a, i te ō tāna i fāri’i, ’e i te mea tā te reira ō i fa’atupu. Noa atu ē, tē vai noa ra terā huru ’oa’oa tōna, ’e te itoito, ’ua hi’o vau ē, ’ua rahi a’e tōna huru hanahana, te feruri māite ’e te rahuora.

’Ua ora ’o Tom 13 matahiti hau i muri a’e i te tauira’a māfatu, ’o te ’ore roa e roa’a iāna ’āhiri ’aita te reira tauira’a. Tē fa’a’ite ra tōna parau pohera’a ē, ’ua riro teie mau matahiti ’ei taime ha’aputapūra’a nōna i te orara’a o tōna ’utuāfare ’e o vetahi ’ē ma te ’ā’au tae ’e te here. ’Ua riro ’oia ’ei ta’ata hāmani maita’i ’ite-’ore-hia, ’e ’ei hi’ora’a nō te mana’o ti’aturi ’e te hina’aro tu’utu’u ’ore.

Mai ia Tom, ’ua fāri’i tātou tāta’itahi i te mau ō e ’ore roa e ti’a ia tātou iho ’ia roa’a mai, e mau ō nā tō tātou Metua i te ao ra ’e tāna tamaiti here, tae noa atu i te fa’aorara’a nā roto i te tusia tāra’ehara a Iesu Mesia.⁵ ’Ua fāri’i tātou i te ora i roto i teie ao ; e fāri’i tātou i te ora tino ’a muri a’e, ’e te ora ’e te fa’aorara’a mure ’ore—mai te mea e mā’iti tātou i te reira—maoti tō tātou Metua i te ao ra ’e ’o Iesu Mesia.

I te mau taime ato’a e fa’a’ohipa tātou, e fāna’o ’aore rā, e feruri ato’a i te reira mau ō, e ti’a ia tātou ’ia feruri i te tusia, i te ’ā’au hōro’a ’e te aroha o te feiā tei hōro’a mai i te reira. Te aurarora’a i te feiā hōro’a, ’ua hau atu ïa i te fa’atupu noa i te ’ā’au māuruuru i roto ia tātou. E nehenehe te ferurira’a i tā rāua mau ō e taui ia tātou.

Tē hō’ē tauira’a fa’ahiahia roa ’o tō Alama tamaiti ïa. Nō reira « tē haere noa ra [Alama] i te pāto’ira’a atu i te Atua »,⁶ fā mai ra te hō’ē melahi. Ma « te reo o te pātiri »,⁷ ’ua fa’autu’a te melahi ia Alama i te hāmani-’ino-ra’a i te ’Ēkālesia ’e te « ’eiāra’a i te ā’au o te mau ta’ata ra ».⁸ ’Ua tu’u atu te melahi i teie fa’aarara’a : « ’A haere na, e ha’amana’o i te tītīra’a o tō mau metua… e ha’amana’o ho’i i te mau mea rarahi [tā te Atua] i rave nō rātou ra ».⁹ Nō te mau parau a’o ato’a e vaira, ’o teie te mea tā te melahi i fa’atumu.

’Ua tātarahapa Alama ’e ’ua ha’amana’o. I muri iho, ’ua fa’a’ite ’oia i te fa’aarara’a a te melahi i tāna tamaiti ia Helamana. ’Ua a’o atu o Alama, « ’ua hina’aro vau ’ia ha’amana’o ’oe mai tā’u ho’i i ha’amana’o i te tītīra’a o tō tātou hui tupuna ra ; tei roto ho’i rātou i te tītīra’a ra, e ’aore e ta’ata i ti’a iāna ’ia fa’aora ia rātou, maori ra o te Atua nō Aberahama… nō Isaaka ’e… nō Iakoba ra : ’e nāna ho’i rātou i fa’aora i tō rātou mau ’ati ».¹⁰ ’Ua parau ’ōhie Alama« tē ti’aturi māite noa ra vau iāna ».¹¹ ’Ua ta’a maita’i ia Alama ē nā roto i te ha’amana’ora’a i te fa’aorara’a i te tītīra’a ’e te pāturura’a i roto i te « mau tāmatara’a ’e te mau pe’ape’a e rave rau », e ha’api’i mai tātou i te mātau maita’i i te Atua ’e te pāpūra’a i tāna mau fafaura’a.¹²

E mea iti o tātou tei fāri’i i te hō’ē ’itera’a fifi mai tō Alama, e nehenehe rā tō tātou tauira’a e riro ’ei mea hōhonu mau. ’Ua fafau te Fa’aora i tahito ra ē :

« ʼEi ʼāʼau ʼāpī tāʼu e hō atu ia ʼoutou na, e vārua ʼāpī tāʼu e tuʼu i roto ia ʼoutou ; e nāʼu e ʼīriti i te ʼāʼau ’ōfaʼi i roto ia ʼoutou na, e nāʼu e hōroʼa i te ʼāʼau marū.

« ’E nā’u e tu’u i tā’u vārua i roto ia ’outou…

« ’E… ʼei taʼata ʼoutou nōʼu, ʼe ʼei Atua hoʼi au nō ʼoutou ».¹³

’Ua parau te Fa’aora tei ti’afa’ahou i te ’āti Nephi e nāhea teie tauira’a i te ha’amata. ’Ua fa’a’ite ’oia i te hō’ē ’ohipa faufa’a i roto i te fa’anahora’a a te Metua i te ao ra ’a parau ai ’oia ē :

« I tono mai tā’u Metua iā’u ’ia fa’ateiteihia vau i ni’a i te sātauro; ’e ’ia oti tā’u fa’ateiteira’ahia i ni’a i te sātauro ra, ’ia ’ume mai au i te mau ta’ata ato’a ra iā’u…

« ’E teie ïa te tumu i fa’ateiteihia ai au ; nō reira, i te au i te mana o te Metua, e ume au i te mau ta’ata ato’a ra iā’u ».¹⁴

E aha tē tītauhia ia ’outou e hutihia ai ’outou i te Fa’aora ra ? ’A feruri i te aurarora’a ’o Iesu Mesia i te hina’aro o tōna Metua, tōna rēra’a i ni’a i te pohe, tōna ravera’a i ni’a iāna iho i tā ’outou mau hara ’e mau hape, tōna fāri’ira’a i te mana o te Metua ’ia riro ’ei ārai nō ’outou, ’e tāna fa’aorara’a hope’a ia ’outou ?¹⁵ ’Aita ānei teie mau mea e nava’i nō te huti ia ’outou iāna ra ? ’Ua riro te reira nō’u. Tē ti’a nei Iesu Mesia « ma te rima mahora, ma te ti’aturi ’e ma te hina’aro e fa’aora, e fa’a’ore i te hara, e tāmā, e ha’apūai, ’e e ha’amo’a [ia ’outou] ».¹⁶

E nehenehe teie mau parau mau e hōro’a ia tātou i te hō’ē ’ā’au ’āpī ’e e tūra’i ia tātou ’ia mā’iti ’ia pe’e i te Metua i te ao ra ’e ia Iesu Mesia. Terā rā, e nehenehe ato’a te mau māfatu ’āpī « e hina’aro ’ōvere haere… e hina’aro e fa’aru’e i te Atua tā tātou e here nei ».¹⁷ Nō te pāto’i i teie mana’o, e ti’a ia tātou ’ia feruri i te mau mahana ato’a i te mau ō ’o tā tātou i fāri’i ’e i te mea tā te reira e fa’atupu. ’Ua a’o mai te Ari’i Beniamina ē, « ’ua hina’aro vau ’ia ha’amana’o māite ’e ’ia tāpe’a tāmau ho’i i te mana’ora’a i te rahi o te Atua ra… ’e tōna ra hāmani maita’i ’e te fa’a’oroma’i-roa-ra’a ia ’outou ».¹⁸ Mai te mea e nā reira tātou, e fa’afana’o tātou ia tātou iho i te mau ha’amaita’ira’a fa’ahiahia o te ra’i.

Te ferurira’a i te hāmani maita’i ’e te aroha o te Atua, e tauturu te reira ia tātou ’ia rahi atu te fāri’ira’a i te pae vārua. ’Āre’a rā te hāro’aro’ara’a i te pae vārua, e tauturu te reira ia tātou ’ia ’ite i te parau mau i te mau mea ato’a nā roto i te mana o te Vārua Maita’i.¹⁹ Tei roto i te reira te ’itera’a pāpū nō ni’a i te parau mau o te Buka a Moromona, te ’itera’a ē, o Iesu te Mesia, tō tātou iho Fa’aora ’e te tāra’ehara, ’e te fāri’ira’a ē, ’ua fa’aho’ihia mai tāna ’evanelia i teie mau mahana hope’a nei.²⁰

Mai te mea ē, e ha’amana’o tātou i te rahi o tō tātou Metua i te ao ra ’e ’o Iesu Mesia, ’e i te mau mea tā rāua i rave nō tātou, e’ita ïa tātou e ha’afaufa’a ’ore i te reira, mai ia Tom tei ’ore i ha’afaufa’a ’ore i te māfatu ’o Jonathan. Ma te ’oa’oa ’e te fa’atura, ’ua ha’amana’o ’o Tom i te mau mahana ato’a i te ’ati tei fa’aroa i tōna ora. I roto i te ’oa’oa rahi o te ’itera’a ē, e nehenehe tātou e fa’aorahia ’e e fa’ateiteihia, e ti’a ia tātou ’ia ha’amana’o ē, e ho’o rahi tō te fa’aorara’a ’e tō te fa’ateiteira’a.²¹ E nehenehe tātou e ’oa’oa ma te fa’atura, ma te ’ite ē, ’āhiri ’aita Iesu Mesia, ’ua pohe tātou, nā roto rā iāna, e nehenehe tātou e fāri’i i te ō nehenehe roa a’e tā te Metua i te ao ra e nehenehe e hōro’a.²² ’Oia ïa, maoti te reira fa’atura i fāna’o ai tātou i te parau fafau « o te ora mure ’ore i roto i teie nei ao » ’e i te pae hope’a, ’ia fāri’i i « te ora mure ’ore […] ’oia te hanahana tāhuti ’ore » i roto i te ao ’a muri a’e.²³

’Ia feruri ana’e tātou i te hāmani maita’i ’o tō tātou Metua i te ao ra ’e ’o Iesu Mesia, e rahi atu tō tātou ti’aturi ia rāua. E taui tā tātou mau pure nō te mea ’ua ’ite tātou ē, ’o te Atua tō tātou Metua ’e ’o tātou tāna mau tamari’i. ’Aita tātou e ’imi ’ia taui i tōna hina’aro, ’ia fa’a’āfaro rā tātou i tō tātou hina’aro i ni’a i tōna ’e ’ia pāpū nō tātou i te mau ha’amaita’ira’a tāna e hina’aro e hōro’a mai, mai te mea e ani tātou.²⁴ E hia’ai tātou ’ia hau atu te marū, ’ia hau atu te vi’ivi’i ’ore, ’ia hau atu te pāpū, ’ia hau atu te rirora’a mai te Mesia.²⁵ Nā teie mau tauira’a e fa’afāna’o ia tātou i te mau ha’amaita’ira’a hau atu nō te ra’i ra.

Nā roto i te ’itera’a ē, nō ’ō mai ia Iesu Mesia ra te mau mea maita’i ato’a, e fa’a’ite maita’i atu ā tātou i tō tātou fa’aro’o ia vetahi ’ē.²⁶ E roa’a ia tātou te itoito nō te fa’aruru atu i te mau ’ohipa ’e te mau huru fifi e vai ra.²⁷ E pūai atu ā tō tātou hina’aro tu’utu’u ’ore ’ia ha’apa’o i te mau fafaura’a ’o tā tātou i rave nō te pe’e i te Fa’aora.²⁸ E ’ī tātou i te here o te Atua, e hina’aro tātou e tauturu i te feiā e hina’aro i te reira, ma te ha’avā ’ore ia rātou, e here i tā tātou mau tamari’i ’e e ’atu’atu ia rātou i roto i te parauti’a, e tāpe’a māite i te matarara’a o tā tātou mau hara ’e ’ia vai ’oa’oa noa tātou.²⁹ Teie te mau hotu fa’ahiahia o te ha’amana’ora’a i te hāmani maita’i ’e te aroha o te Atua.

Ta’a ’ē atu rā i te reira, ’ua fa’aara mai te Fa’aora ē, « e ’aore roa te ta’ata nei e fa’a’ino i te Atua i te hō’ē mea, ’e ’aore rā ’aita roa tōna riri i hotu i ni’a i te hō’ē ta’ata, maori rā ’o rātou ’o tei ’ore i fa’i mai i tōna rima ra i roto i te mau mea ato’a ».³⁰ ’Aita vau e mana’o nei ē, ’ua fa’a’inohia te Atua ’ia ha’amo’e ana’e tātou iāna. Tē feruri nei rā vau ē, e pe’ape’a roa ’oia. ’Ua ’ite ’oia ē, ’ua fa’a’ere tātou ia tātou iho i te rāve’a ’ia ha’afātata atu iāna nā roto i te ha’amana’ora’a iāna ’e i tāna hāmani maita’i. I reira tātou e ’ere ai iāna ’ia ha’afātata mai ia tātou ’e i te mau ha’amaita’ira’a ta’a ’ē tāna i fafau mai.³¹

Tē ani nei au ia ’outou ’ia ha’amana’o i te mau mahana ato’a i te rahi ’o te Metua i te ao ra ’e ’o Iesu Mesia ’e i te mea tā rāua i rave nō tātou. ’A vaiiho i tō ’outou ferurira’a nō tō rāua hāmani maita’i ’ia tā’amu pāpū a’e i tō ’outou ’ā’au ’ōvere i ni’a ia rāua.³² ’A feruri hōhonu i tō rāua aroha, ’ei reira ’outou e ha’amaita’ihia ai i te hāro’aro’ara’a pae vārua rahi atu ’e ’ia riro hau atu mai te Mesia te huru. Mai te mea e hi’o māite ’outou i tō rāua maita’i, e tauturu te reira ia ’outou « ’ia ha’apa’o maita’i ē tae noa atu i te hope’a ra », ē tae noa atu e « fāri’ihia rātou i te ra’i ra » nō te « pārahi ’e te Atua ato’a i roto i te ’oa’oa hope ’ore ra ».³³

’Ua parau tō tātou Metua i te ao ra, nō ni’a i tāna tamaiti here, « ’a fa’aro’o iāna ! »³⁴ Mai te mea e fa’a’ohipa ’outou i teie mau parau ’e e fa’aro’o ’outou iāna, ’a ha’amana’o ma te ’oa’oa ’e te fa’atura ē, e mea au nā te Fa’aora ’ia fa’aho’i mai i te mea e’ita e ti’a ia ’outou ’ia fa’aho’i mai, e mea au nāna ’ia fa’aora i te mau pēpē e’ita e ora ia ’outou, e mea au nāna ’ia tātā’i i te mea i ’ōfatihia ;³⁵ e fa’aho’i ’oia i te mau ’ohipa ti’a ’ore ato’a i ravehia i ni’a ia ’outou ;³⁶ ’e e mea au nāna ’ia tātā’i tāmau i te mau māfatu ’oto.³⁷

’A feruri ai au i te mau ō a tō tātou Metua i te ao ra ’e a Iesu Mesia, ’ua ha’api’i mai au i tō rāua here hope ’ore ’e tō rāua aroha fāito ’ore nō te mau tamari’i ato’a a tō tātou Metua i te ao ra.³⁸ ’Ua taui teie ’itera’a iā’u, ’e e taui ato’a te reira ia ’outou. Nā roto i te i’oa o Iesu Mesia, ’āmene.