’Īritira’a i te mau ra’i nō te fāri’i i te tauturu
E fa’a’ohipa ana’e i tō tātou fa’aro’o i te Fatu ia Iesu Mesia !
’Auē ïa te ta’a ’ē ’e te nehenehe teie tuha’a purera’a ! Māuruuru e Laudy ’e e Enzo. ’Ua fa’ahōho’a maita’i mai ’ōrua ma te nehenehe i te feiā ’āpī tamāhine ’e te feiā ’āpī tamāroa o te ’Ēkālesia.
E au mau taea’e ’e e au mau tuahine here, e rave rahi te mau parau tā tātou i fa’aro’o i teie mahana nō ni’a i te fa’aho’i-fa’ahou-ra’a-hia mai te ’Ēkālesia—te ’Ēkālesia iho tā tō tātou Fa’aora o Iesu Mesia i ha’amau i te tau o tāna tāvinira’a i te fenua nei. ’Ua ha’amata taua fa’aho’i-fa’ahou-ra’a mai a 200 matahiti i teienei i te reira pu’e tau fa’atupura’a rā’au, ’a fā mai ai te Atua te Metua ’e tāna Tamaiti o Iesu Mesia, i te tamaiti ’āpī ra o Iosepha Semita.
’Ahuru matahiti i muri a’e i teie ’ōrama fa’ahiahia, ’ua pi’ihia te peropheta Iosepha Semita ’e e pae ta’ata ’ē atu ’ei mau melo ha’amau o te ’Ēkālesia a te Fatu i fa’aho’i-fa’ahou-hia mai.
Nā roto mai i taua pupu iti na’ina’i ra tei putuputu i te 6 nō ’Ēperēra 1830, ’ua ti’a mai te hō’ē fa’anahora’a nā te ao ato’a nei hau atu i te 16 mirioni melo. Te maita’i tā teie ’Ēkālesia e rave nei ’ati a’e te ao nei nō te ha’amāmā i te māuiui o te ta’ata ’e nō te hōro’a i te fa’ateiteira’a i te ta’ata nei, ’ua ’ite-rahi-hia te reira. Terā rā, tāna ’ōpuara’a tumu o te tauturura’a ïa i te mau tāne ’e te mau vahine ’e te mau ’utuāfare ’ia pe’e i te Fatu ia Iesu Mesia, ’ia ha’apa’o i tāna mau fa’auera’a, ’e ’ia ti’a nō te fāri’i i te ha’amaita’ira’a rahi a’e o te mau ha’amaita’ira’a ato’a—’oia ho’i te ora mure ’ore i pīha’i iho i te Atua ’e tei herehia e rātou.1
’A fa’ahanahana ai tātou i te ’ohipa tei tupu tei ’īriti i te Fa’aho’i-fa’ahou-ra’a mai, e mea faufa’a roa ’ia ha’amana’o ē, ’a fa’atura ai tātou ia Iosepha Semita ’ei peropheta nā te Atua, e ’ere nā Iosepha Semita teie ’Ēkālesia, e ’ere ato’a te ’Ēkālesia nā Moromona. E ’Ēkālesia teie nā Iesu Mesia. ’Ua fa’aoti pāpū maita’i ’oia i te i’oa e pi’i o tāna ’Ēkālesia : « Nō te mea o teie te i’oa e topahia i ni’a i tā’u ’Ēkālesia i te mau mahana hope’a nei, ’oia Te ’Ēkālesia a Iesu Mesia i te Feiā Mo’a i te mau Mahana Hope’a nei ».2
’Ua paraparau atu na vau i ma’iri a’e nei nō ni’a i te tītaura’a ’ia fa’atītī’aifaro i te huru nō te fa’ahitira’a tātou i te i’oa o te ’Ēkālesia.3 Mai taua taime ra, e ’ohipa rahi tei ravehia nō te fa’aoti i teie fa’atītī’aifarora’a. Tē māururu nei au i te peresideni M. Russell Ballard ’e i te tā’āto’a o te Pupu nō te Tino ’Ahuru ma Piti ’āpōsetolo, tei rave i te ’ohipa rahi nō te fa’atere i teie mau tauto’ora’a ’e tae noa atu i te mau tauto’ora’a nō ni’a i te tahi fa’aotira’a o tā’u e fa’aara atu i teie pō.
Te feiā fa’atere o te ’Ēkālesia ’e te mau aupupu, te mau pupu, ’e te mau melo e rave rahi mirioni—’e vetahi ’ē atu—tē fa’a’ohipa nei rātou i teienei i te i’oa ti’a o te ’Ēkālesia. ’Ua fa’atanohia te arata’ira’a mana a te ’Ēkālesia. Teie te tahua ’ītenati tumu a te ’Ēkālesia i teienei ChurchofJesusChrist.org. ’Ua fa’a’āpīhia te mau i’oa o te rata uira, te mau i’oa o te tahua ’ītenati ’e te mau rāve’a tūreiara’a tōtiare. E parauhia tā tātou pupu hīmene here i teienei Te Pupu hīmene nō te Fare Menemene i Temple Square.
’Ua rave tātou i teie mau tauto’ora’a fa’ahiahia i te mea ē, ’ia ’īriti ana’e tātou i te i’oa o te Fatu i rāpae i te i’oa o tāna ’Ēkālesia, tē ’īriti ra ïa tātou iāna, ma te mana’o ’ore, i rāpae i te fa’atumura’a nō tā tātou ha’amorira’a ’e nō tō tātou orara’a. ’Ia rave ana’e tātou i te i’oa o te Fa’aora i ni’a ia tātou i te bāpetizora’a, e fafau tātou ’ia fa’a’ite, nā roto i tā tātou mau parau, mau mana’o, ’e mau ’ohipa ē, o Iesu te Mesia.4
« Tē fafau atu nei au ia ’outou ē, mai te mea e rave tātou mai te maita’i roa nō te fa’aho’i i te i’oa ti’a o te ’Ēkālesia a te Fatu, te ta’ata nāna teie ’Ēkālesia, e nīni’i mai ’oia i tōna mana ’e te mau ha’amaita’ira’a i ni’a i te upo’o o te feiā mo’a i te mau mahana hope’a nei, i te fāito ’aore ā tātou i ’ite a’e nei ».5 Te fa’a’āpī nei au i te reira fafaura’a i teie mahana.
Nō te tauturu ia tātou ’ia ha’amana’o iāna ’e nō te fa’a’ite i Te ’Ēkālesia a Iesu Mesia i te Feiā Mo’a i te mau Mahana Hope’a nei ’ei ’Ēkālesia nā te Fatu, tē ’oa’oa nei mātou ’ia fa’a’ite atu i te hō’ē taipe ’o tē ha’apāpū i te ti’ara’a tumu o Iesu Mesia i roto i tāna ’Ēkālesia.
I roto i teie taipe tē vai ra te i’oa o te ’Ēkālesia i roto i te ’ōfa’i tihi. ʼO Iesu Mesia te ’ōfa’i tihi rahi.6
I rōpū i te taipe tē vai ra hō’ē fa’ahōho’ara’a nō te ti’i maramora a Thorvaldsen, te Mesia. Tē fa’a’ite ra te reira i te Fatu ora tei ti’afa’ahou, tē fa’atoro ra i te rima nō te fāri’i i te mau ta’ata ato’a e haere mai iāna ra.
‘Ia au i te taipe, tē ti’a ra Iesu Mesia i raro a’e i te hō’ē fana. Tē fa’aha’amana’o nei te fana ia tātou i te Fa’aora tei ti’afa’ahou e haere mai ra i rāpae i te mēnema i te toru o te mahana i muri a’e i tōna fa’asātaurora’ahia.
E nehenehe teie taipe e riro ’ei taipe mātauhia e te mau ta’ata e rave rahi, i te mea ē, e tau roa tō tātou fa’a’itera’a i te ’evanelia i fa’aho’i-fa’ahou-hia mai ’e te Mesia ora tei ti’afa’ahou.
I teie nei, e fa’a’ohipahia te taipe ’ei fa’a’itera’a ’ite-mata-hia nō te mau pāpa’ira’a mana, te mau parau ’āpī, ’e te mau ’ohipa a te ’Ēkālesia.7 E fa’aha’amana’o te reira i te mau ta’ata ato’a ē, nā te Fa’aora teie ’Ēkālesia, ’e te mau mea ato’a tā tātou e rave nei ’ei mau melo nō tāna ’Ēkālesia, ’ua fa’atumuhia ïa i ni’a ia Iesu Mesia ’e tāna ’evanelia.
I teienei, e au mau taea‘e ’e e au mau tuahine here, ananahi e sābati ïa nō te mau ’āma’a, mai tā te taea’e Gong i ha’api’i ma te fa’ahiahia mau. I muri iho, e tomo atu tātou i roto i te hepetoma ta’a ’ē o tē fa’atae atu i te pāsa. ’Ei mau pipi nā Iesu Mesia, ’a ora ai tātou i roto i te hō’ē taime ’ārepurepura’a o te ma’i pe’e COVID-19 nā te ao nei, ’eiaha tātou e paraparau noa nō te Mesia ’aore rā, ’e poro noa nō te Mesia ’aore rā, e fa’a’ohipa noa i te hō’ē taipe fa’ahōho’ara’a i te Mesia.
E fa’a’ohipa ana’e i tō tātou fa’aro’o i te Fatu ia Iesu Mesia !
Mai tā ’outou i ’ite, tē ha’apa’o nei te mau melo o te ’Ēkālesia i te ture nō te ha’apaera’a mā’a hō’ē mahana i te ’āva’e tāta’itahi.
Mai tahito mai te parau tumu nō te ha’apaera’a mā’a. ’Ua ha’apa’ohia te reira nā te mau ’aito nō te Bibilia i te mātāmua ra. ’O Mose, ’o Davida, ’o Ezera, ’o Nehemia, ’o Esetera, ’o Isaia, ’o Daniela, ’o Ioela, ’e e rave rahi atu ā, ’ua ha’apae rātou i te mā’a ’e ’ua ha’api’i i te parau nō te ha’apaera’a mā’a.8 Nā roto ia Isaia, ’ua parau te Fatu ē : « E ’ere ānei teie i te nesete ’ia hinaaro nā’u ra ? ’Ia tātara i te ruru ra о te ’ino ; ’ia ha’ama’iri i te hōpoi’a teiaha ra ; ’ia tu’uhia tei nene’ihia ’e tē hāmani ’ino ra » ?9
’Ua a’o o Paulo i te feiā mo’a i Korinetia « ’ia rave ’ōrua i te ha’apaera’a mā’a ’e te pure ».10 Te Fa’aora iho tei parau ē, e’ita te tahi mau mea « e tae noa i rāpae, maori rā i te pure ’e te ha’apaera’a mā’a ».11
I parau a’e nei au ’aita i maoro a’e nei i roto i te hō’ē video i ni’a i te mau tūreiara’a tōtiare ē, « ’ei taote ’e ’ei taote tāpū, e fa’ahiahia rahi tō’u i te mau ta’ata utuutu ma’i, te mau ’aivāna’a, ’e te fēiā ato’a e ha’a nei ma te tu’utu’u ’ore nō te ārai i te pararera’a o te COVID-19 ».12
I teienei, ’ei peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei ’e ’ei ’Āpōsetolo nā Iesu Mesia, ’ua ’ite au ē, tei te Atua ho’i « te mana hope, ’e te pa’ari ato’a, ’e te ’ite ato’a ; tē hāro’aro’a ra ’oia i te mau mea ato’a ra, o te Atua aroha ’oia, ’e tae noa atu i te fa’aorara’a ia rātou ’o tē tatarahapa ’e ’o tē fa’aro’o i tōna ra i’oa ».13
Nō reira, i roto i te mau taime ahoaho rahi, mai te taime ’a ta’ahuri ai te ma’i i roto i te fāito o te ma’i pe’e, te ’ohipa mātāmua roa nō tātou ’ia rave o te ti’aorora’a ïa i tō tātou Metua i te ao ra ’e i tāna Tamaiti—te Fatu fa’aora—’ia fa’a’ite mai i tō rāua mana fa’ahiahia nō te ha’amaita’i i te nūna’a o te fenua nei.
I roto i te video nō tā’u parau poro’i, ’ua ani au i te mau ta’ata ato’a ’ia ’āmui mai i roto i te ha’apaera’a mā’a i te Sābati 29 nō Māti 2020. E rave rahi o ’outou o tei hi’o i te video ’e o tei ’āmui mai i roto i te ha’apaera’a. ’Aita paha te tahi pae. I teienei tē vai noa nei ā tō tātou hina’aro i te tauturu nō te ra’i mai.
Nō reira, i teie pō, e au mau taea’e ’e e au mau tuahine here, i roto i te vārua o te mau tamaiti a Mosia, tei tu’u ia rātou iho i roto i te ha’apaera’a mā’a rahi ’e te pure,14 ’e ’ei tuha’a nō tā tātou ’āmuira’a rahi nō ’Ēperēra 2020, tē ti’aoro nei au nō te tahi atu ha’apaera’a mā’a nā te ao ato’a nei. Nō te feiā ato’a e’ita te reira e ha’afifi i tō rātou ea, e ha’apae ana’e tātou i te mā’a, e pure, ’e e tāhō’ē fa’ahou ana’e tātou i tō tātou fa’aro’o. E tāparu ana’e tātou nā roto i te pure nō te fāri’i i te fa’aorara’a i teie ma’i pe’e nā te ao ato’a nei.
Tē ani nei au i te mau ta’ata ato’a, tae noa atu i te feiā e ’ere i tā tātou ha’apa’ora’a, ’ia ha’apae i te mā’a ’e ’ia pure i te mahana pae mo’a 10 nō ’Ēperēra, ’ia roa’a teie ma’i pe’e i te araihia, ’ia pāruruhia te feiā utuutu ma’i, ’ia ha’apūaihia te fa’arava’ira’a faufa’a, ’e ’ia ho’i fa’ahou te orara’a i tōna ra huru mau.
Nāhea tātou ’ia ha’apae i te mā’a ? ’Ua mātarohia e piti tāmā’ara’a ’aore rā, hō’ē area taime e 24 hora te maoro. Nā ’outou rā e fa’aoti i te mea e riro ’ei tusia nō ’outou, inaha, tē ha’amana’o ra ’outou i te tusia rahi tā te Fa’aora i rave nō ’outou. E tāhō’ē ana’e tātou nō te tāparu i te fa’aorara’a nā te ao ato’a nei.
E riro te Farairē mo’a ’ei mahana maita’i roa ’ia fa’aro’o mai tō tātou Metua i te ao ra ’e tāna tamaiti ia tātou !
E au mau taea’e, e au mau tuahine here, tē fa’a’ite atu nei au i tō’u here rahi ia ’outou, e tae noa atu i tō’u ’itera’a pāpū nō te hanahana o te ’ohipa tā tātou e rave nei. Teie Te ’Ēkālesia a Iesu Mesia i te Feiā Mo’a i te mau Mahana Hope’a nei. Tē ti’a nei ’oia i te upo’o o te ’Ēkālesia ’e tē fa’atere nei i te mau mea ato’a tā tātou e rave nei. ’Ua ’ite au ē, e pāhono mai ’oia i te mau tāparura’a a tōna nūna’a. Tē fa’a’ite pāpū nei au i te reira i te i’oa mo’a o Iesu Mesia, ’āmene.