Nāhea te autahu’ara’a ’ia ha’amaita’i i te feiā ’āpī

E te mau taea’e ’e te mau tuahine, e ’oa’oa rahi tō’u ’ia paraparau atu ia ’outou i teie ahiahi fa’ahiahia nō ni’a i te hōro’a mo’a o te ’autahu’ara’a, ’e tōna mana nehenehe nō te ha’amaita’i i te feiā ’āpī i roto i teie tau tu’ura’a. Tē pure nei au ’ia tauturu mai te Vārua iā’u i te ha’api’ira’a i te parau mau, noa atu tō’u mau paruparu.

’Ua fa’aha’amana’o mai te Peresidenira’a Mātāmua i te feiā e mau nei i te autahu’ara’a a Aarona ē, « Tē ora nei ’outou i te hō’ē tau nō te mau rāve’a ’e te mau tītaura’a rarahi—hō’ē tau i reira i fa’aho’ihia mai ai te autahu’ara’a. ’Ua fāri’i ’outou i te mana nō te fa’atere i te mau ’ōro’a o te Autahu’ara’a a Aarona. ’A pure ai ’outou ’e ’a fa’a’ohipa ai ’outou ma te ti’amā i te reira mana, e ha’amaita’i rahi ’outou i te orara’a o te feiā e hā’ati nei ia ’outou » ¹ ’Ei feiā ’āpī tamāroa nō te ’Ēkālesia, ’ua fa’aha’amana’o-ato’a-hia ia tātou ē, « e mau [tamaiti] here tātou nā te Atua, ’e e ’ohipa tāna nā [tātou] ’ia rave », ² ’e e tauturu tātou i roto i tāna ’ohipa « te fa’atupura’a i te tāhuti ’ore ’e te ora mure ’ore o te ta’ata nei » (Mose 1:39).

Te autahu’ara’a ’o te mana ïa nō te fa’atere i te mau ’ōro’a ’e te mau fafaura’a o te ’evanelia a te Fa’aora i te feiā o tei ti’amā nō te fāri’i i te reira. Nā roto i teie mau ’ōro’a o te autahu’ara’a ’e teie mau fafaura’a mo’a e tae mai ai te ’īra’a o te mau ha’amaita’ira’a o te tāra’ehara a te Fa’aora, ’o tē tauturu ia tātou ’ia fa’atupu i tō tātou haere’a hanahana.

E tamaiti ’āpī o Iosepha Semita tei pi’ihia e te Atua nō te fa’aho’i fa’ahou mai i te ’evanelia a Iesu Mesia, ’e, nō te reira ’ōpuara’a, ’ua hōro’ahia iāna te autahu’ara’a tāna i fa’a’ohipa nō te ha’amaita’i i te mau ta’ata ato’a. Tē fa’a’ite nei Te Parau Ha’api’ira’a ’e te mau Parau Fafau 135 e rave rahi mau ha’amaita’ira’a tā Iosepha i hōro’a i te feiā ’āpī i teie tau tu’ura’a ’Evanelia. Tē tai’o nei tātou : « ‘Ua rahi a’e tā Iosepha Semita… i rave, maori rā ia lesu ana’e, nō te fa’aorara’a i te ta’ata nei i roto i teie nei ao, i tei ravehia e te hō’ē ta’ata ’ē atu o tei ora na i ni’a iho i te reira. ’Ua ’āfa’i mai ’oia i te Buka a Moromona […] ’ua hāpono atura ho’i ’oia i te ’īra’a nō te ’evanelia mure ’ore […] i nā tufa’a e maha nō te ao nei ; ’ua tu’u mai ho’i i te mau heheura’a ’e te mau fa’auera’a o tei roto i teie nei buka nō Te Parau Ha’api’ira’a ’e te mau Parau Fafau […] ’ua ha’aputuputu mai nā ho’i i nā tauatinira’a o te Feiā Mo’a i te mau Mahana Hope’a nei e rave rahi […] ’e ’ua vaiiho atura i te hō’ē ro’o ’e te i’oa ho’i o te ’ore roa e ti’a ’ia fa’a’orehia atu » (Te Parau Ha’api’ira’a ’e te mau Parau Fafau 135:3).

Nō te tāvini pāpū mai tā Iosepha i rave, e mea ti’a ia tātou ’ia ti’amā nō te fa’a’ohipa i te mana autahu’ara’a o te Fatu. ’A ’īriti ai rāua i te Buka a Moromona, ’ua hina’aro o Iosepha ’e o Oliver Cowdery ’ia bāpetizohia rāua, terā rā, ’aita rāua i fāri’i i te mana i tītauhia. I te 15 nō Mē 1829, ’ua tūturi rāua nō te pure ’e ’ua fā mai o Ioane Bāpetizo, ’e ’ua hōro’a mai ia rāua te mau tāviri ’e te mana o te autahu’ara’a a Aarona, ma te parau mai ē, « I ni’a iho ia ’ōrua e tā’u nā tāvini taea’e nei, i te i’oa o te Mesia ra, tē hōro’a atu nei au i te autahu’ara’a a Aarona ra, ’o tei mau i te mau tāviri nō te utuutura’a o te mau melahi, ’e nō te ’evanelia nō te tātarahapa, ’e nō te bāpetizo nā roto i te utuhira’a nō te ha’amatarara’a i te hara » (Te Parau Ha’api’ira’a ’e te mau Parau Fafau 13:1).

’Ua hōro’ahia mai ia tātou te rāve’a nō te utuutu mai te mau melahi, nō te poro i te ’evanelia i roto i te mau fenua ato’a, ’e nō te tauturu i te mau vārua ’ia haere mai i te Mesia ra. Nā teie tāvinira’a e tu’u ia tātou i roto i te ’ohipara’a ’āmui ’e ’o Ioane Bāpetizo, ’o Moroni, ’o Iosepha Semita, ’o peresideni Russell M. Nelson, ’e tē tahi atu mau tāvini ha’apa’o a te Fatu.

E ha’a’āmui mai tā tātou tāvinira’a i roto ’e e tāna autahu’ara’a i te feiā e pūpū nei e pe’e ’e e ora i te mau ha’api’ira’a a te Fatu ma te ’āfaro, o tā’u iho i ’ite ē, e mea fifi roa, ’a fārerei ai tātou i te mau fifi o te feiā ’āpī. Terā rā, mai te mea e tāhō’ē atu tātou i teie mau tāvini o te Fatu i roto i te ravera’a i tāna ’ohipa, e tauturu te reira i te ha’apūai ia tātou i mua i te mau tāmatara’a ’e te mau fa’ahemara’a a te ’enemi. E nehenehe ’outou e riro ’ei fare mōrī nō te mau ta’ata ato’a ’aita i pāpū roa ia rātou iho. Nō te ’ana’ana pūai o te mori e vai ra i roto ia ’outou, ’ei reira te mau ta’ata ato’a e ’ohipa ’e o ’outou e ha’amaita’ihia ai nā roto noa i tō rātou vaira’a i pīha’i iho ia ’outou. I tē tahi taime e mea fifi ’ia ’ite i tō tātou mau hoa vārua, terā rā, tē māuruuru nei au ’ia ’ite ē, e melo vau nō te hō’ē pupu autahu’ara’a ha’apa’o, i reira ho’i au e nehenehe ai e rave i te ’ohipa nō te ha’afātata atu i te Mesia.

Ma tō tātou mau hoa ’e tō tātou ’utuāfare, ’ua riro te Vārua Maita’i ’ei hō’ē o tō tātou mau hoa ha’apa’o roa a’e ’e te pāpū. Terā rā, nō te ani i tōna auhoara’a tāmau, e ti’a ia tātou ’ia tu’u ia tātou iho i roto i te mau tupura’a ’e te mau vāhi i reira ’oia e hina’aro ai e vai. E henehenehe te reira e ha’amata i roto i tō tātou iho fare, ’a ha’a ai tātou nō te fa’ariro i tō tātou fare ’ei vāhi mo’a nā roto i te ’āmuira’a i roto i te tai’ora’a i te mau pāpa’ira’a mo’a i te mau mahana ato’a, ’e te purera’a ’ei ’utuāfare ’e, hau atu i te faufa’a, ’ia tuatāpapa tātou iho i te mau pāpa’ira’a mo’a ’e te purera’a tātou iho.

’Aita i maoro a’e nei i teie matahiti, ’ua fāna’o vau i te hō’ē ’ohipa fa’ahiahia roa te ha’eha’a rā i te tauturura’a i tō’u teina tuahine, ’o Océane, ’ia haere i mua i ni’a i te ’ē’a nō te fafaura’a ma te fāri’ira’a i te anira’a ’ia bāpetizohia ’e ’ia fa’atupu i te hō’ē o te mau tītaura’a nō te tomo i roto i te bāsileia tīrētiēra. ’Ua fa’ataime ’oia i tōna bāpetizora’a hō’ē ’āva’e, ’ia fa’atōro’ahia vau ’ei tahu’a, nō te hōro’a iā’u i te ha’amaita’ira’a ’ia rave i te reira ’ōro’a, ’e tē tahi atu mau tuahine tō’u, ’ua fana’o ato’a rātou ’ia ’ohipa i raro a’e i te fa’auera’a a te autahu’ara’a ’e ’ia riro ’ei mau ’ite. ’A ti’a ai māua, i te hiti fa’ari’i bāpetizora’a, te ta’ata i tōna pae, ma te ineine nō te pou i roto i te pape, ’ua ’ite au i tōna ’oa’oa, mai tō’u ato’a ho’i. ’E ’ua fāri’i i te hō’ēra’a e ’ōna, te ’itera’a ē ’ua rave ’oia i te fa’aotira’a tano. Nā teie rāve’a ’ia fa’a’ohipa i te autahu’ara’a i tītau iā’u, ’ia ara maita’i a’e ’e ’ia ha’apa’o maita’i a’e i roto i tō’u orara’a i te ’evanelia. Nō te fa’aineine iā’u, ’ua haere au i te hiero i te mau mahana ato’a i taua hepetoma ra, ma te tauturuhia mai e tō’u māmā, tō’u māmā rū’au, ’e te tuahine, nō te rave i te mau bāpetizora’a nō te feiā pohe.

Nā teie ’ohipa i ha’api’i mai iā’u nō ni’a i te autahu’ara’a ’e nāhea e nehenehe ai iā’u ’ia fa’a’ohipa i te reira ma te ti’amā. ’Ua ’ite au ē, e nehenehe te mau ta’ata ato’a e mau nei i te autahu’ara’a e fāri’i ato’a i te mau mea tā’u i fāri’i mai te mea ē, e pe’e tātou i te hi’ora’a o Nephi ’ia « haere ’e ’ia rave » (hi’o 1 Nephi 3:7). E’ita tā tātou e nehenehe e fa’aea noa ’a tīa’i noa ai ’ia fa’a’ohipa te Fatu ia tātou i roto i tāna ’ohipa rahi. ’Eiaha tātou e tīa’i i te mau ta’ata e hina’aro ra i tā tātou tauturu ’ia ’imi mai rātou ia tātou; tātou tei mau i te autahu’ara’a, e hōpoi’a nā tātou ’ia fa’a’ite i te hi’ora’a ’e ’ia ti’a ’ei mau ’ite nō te Atua. Mai te mea ē, tē rave nei tātou i te mau fa’aotira’a o te tāpe’a i tō tātou tupura’a mure ’ore, e mea ti’a ia tātou ’ia taui i teienei. E ’imi ’o Sātane i te mau rāve’a ato’a ’ia tāpe’a noa ia tātou i roto i tō tātou huru ta’ata nei, i te ’imira’a i te mau ’oa’oa ’ōhie, ’Ua ’ite rā vau ē, mai te mea e tūtava tātou, ’ia ’ite mai ia rātou ’o te pāturu mai ia tātou, ’e e tātarahapa i te mau mahana ato’a, i te hope’a e mea fa’ahiahia mau te mau ha’amaita’ira’a ’e e taui tō tātou orara’a ē ’a muri noa atu, ’a haere ai tātou i mua i ni’a i te ’ē’a nō te fafaura’a.

’Ua ’ite au ē, teie te ’Ēkālesia a Iesu Mesia, ’o tō tātou Fa’aora ’e ’o tei hōro’a mai i te mau tāviri nō te autahu’ara’a i tāna mau ’āpōtetolo, tei fa’a’ohipa i te reira nō te arata’i ia tātou, i roto iho ā ra i teie mau mahana fifi ’e nō te fa’aineine i te ao nei nō tōna ho’ira’a mai.

’Ua ’ite au ē, e peropheta ’o Iosepha Semita nō te fa’aho’i-fa’ahou-ra’a mai ’e te peresideni Nelson ’o tō tātou peropheta ora ïa i teie mahana. Tē ani nei au ia tātou pā’āto’a ’ia tuatāpapa i te orara’a o teie mau ta’ata rahi tei mau i te autahu’ara’a ’e tē ’imi nei ’ia ha’amaita’i ia tātou iho i te mau mahana ato’a, ’ia ineine ho’i tātou nō te fārerei i tō tātou Rahu Nui. I te i’oa ’o Iesu Mesia, ’āmene.