Tupura’a o te parau tohu
E rave rahi mau parau tohu tei tupu nā roto i te fa’aho’i-fa’ahou-ra’a mai o te ’īra’a o te ’evanelia a Iesu Mesia.
E au mau taea’e ’e e au mau tuahine here, tē ’oa’oa nei au ’ia paraparau atu i roto i teie ’āmuira’a rahi tu’iro’o nō te fa’ahanahana i te ’ōrama mātāmua a Iosepha Semita nō te Atua te Metua ’e tāna Tamaiti, o Iesu Mesia, i roto i te uru rā’au mo’a, ma te uira’a ’ore. ’Ua riro taua ’ōrama ra ’ei ha’amatara’a nehenehe o te fa’aho’i-fa’ahou-ra’a mai o te ’evanelia ’e te mau mea ato’a i tupu, mai te Buka a Moromona ’e tae atu i te fa’aho’ira’ahia mai te mana ’e te mau tāviri o te autahu’ara’a, te fa’anahonahora’a o te ’Ēkālesia mau a te Fatu, te mau hiero o te Atua, ’e te mau peropheta ’e te mau ’āpōsetolo e fa’atere nei i te ’ohipa i teie mau mahana hope’a nei.
Nā roto i te fa’auera’a hanahana, ma te tūra’ihia rātou e te Vārua Maita’i , ’ua tohu te mau peropheta tahito a te Atua i te fa’aho’i-fa’ahou-ra’a mai, ’e te mea o tē tupu mai i tō tātou nei ’anotau, te tau tu’ura’a hope’a ’e te ’īra’a o te mau tau. « ’Ua fa’a’ama taua ’ohipa ra i te mau vārua » o te mau hi’o mātāmua.1 I te roara’a o te mau u’i o te tau, ’ua tohu rātou, ’ua moemoeā, ’ua feruri, ’e ’ua tohu i te ananahi o te bāsileia o te Atua i ni’a i te fenua nei, ’o tā Isaia i parau ra ē, « hō’ē ’ohipa ūmerehia ’e te māerehia ».2
E rave rahi mau parau tohu tei tupu nā roto i te fa’aho’i-fa’ahou-ra’a mai o te ’īra’a o te ’evanelia a Iesu Mesia, tae noa atu i Te ’Ēkālesia a Iesu Mesia i te Feiā Mo’a i te mau Mahana Hope’a nei. Terā rā, i teie mahana, e ha’apāpū atu vau i te tahi noa o tā’u i au roa. ’Ua ha’api’ihia mai te reira iā’u nā tō’u mau ’orometua ha’api’i nō te Paraimere ’e i te turi o tō’u metua vahine melahi.
Daniela, tei tīahi i te mau liona nā roto i tōna fa’aro’o i te Fatu ia Iesu Mesia ’e i te tauturu a te mau melahi a te Atua, ’oia tei ’ite i tō tātou nei tau i roto i te hō’ē ’ōrama. ’A tātara ai ’oia i te hō’ē tā’oto nō te ari’i babulonia ’o Nebukaneka, ’ua tohu ’o Daniela ē, e ti’a mai te ’Ēkālesia a te Fatu i roto i te mau mahana hope’a mai te hō’ē ’ōfa’i « e ’ō’otihia mai nō roto mai i te mou’a ra ’aore e rima ».3 « ’Aore e rima », te aura’a ra, nā roto i te ravera’a hanahana, e tupu te ’Ēkālesia a te Fatu i te rahi ’e e fa’a’ī ’oia i te fenua tā’āto’a « e ’ore roa e mou … e vai [rā] e a muri noa atu ».4
’A māta’ita’i ai ’e ’a fa’aro’o ai te mau melo e rave rahi o te ’Ēkālesia, nā te ao ato’a nei, i te ’āmuira’a i teie mahana, ’ua riro ïa te reira ’ei fa’a’itera’a pāpū rahi ē, te tupu nei te mau parau a Daniela.
’Ua fa’ata’a mai te ’āpōsetolo ha’apa’o o Petero « i te tau e ti’a ai te mau mea ato’a nei … mai te mātāmua mai ā o teie nei ao ».5 ’Ua pāpa’i te ’āpōsetolo Paulo ē, i roto i te ’īra’a o te mau tau, « e ’āmui ai [te Atua] i te mau mea ato’a i te Mesia ra »,6 « ’o Iesu Mesia iho te tihi rahi ».7 ’Ua putapū roa tō’u ’ā’au i te reira mau parau tohu ’a haere ai au i te ha’amo’ara’a o te hiero nō Roma, Italia. Tei reira te tā’āto’ara’a o te mau peropheta ’e te mau ’āpōsetolo i te fa’a’itera’a i te ’itera’a pāpū nō Iesu Mesia, te tāra’ehara o te ao nei, mai ia Petero ’e ’o Paulo i nā reira. ’Ua riro te ’Ēkālesia nei ’ei hi’ora’a ora nō taua fa’aho’ira’a ra, e te mau taea’e ’e te mau tuahine, ’e ’ua riro tō tātou mau melo ’ei mau ’ite nō taua mau parau tohu hanahana ra e rā ’ē te tau.
’Ua tohu ’o Iosepha nō Aiphiti ē, i te mau mahana hope’a : « E fa’atupu te Fatu, tō’u Atua, i te hō’ē hi’o, ’e e riro ’oia ’ei hi’o maita’i nō te huā’ai o tō’u ra tau’upu ».8 « Nō te mea e rave ’oia i te ’ohipa [nā te Fatu] ».9 ’O Iosepha Semita, te peropheta nō te Fa’aho’i-fa’ahou-ra’a mai, taua hi’o ra.
’Ua tohu ’o Ioane te heheu parau o te hō’ē melahi nā te Manahope tei hōpoi mai i te mau mea faufa’a nō te Fa’aho’i-fa’ahou-ra’a mai nā roto i teie mau parau : « Hi’o atura vau i te hō’ē melahi i te ma’uera’a nā rōpū i te reva nei, ma te ’evanelia e ti’a i te vaira’a ra ’ei porora’a atu i te feiā e pārahi i te ao nei ra, i te mau fenua ato’a, ’e te mau ’ōpu ato’a, ’e te mau reo ato’a ’e te mau nūna’a ato’a ».10 ’O Moroni taua melahi ra. ’Ua ’ite ’oia i tō tātou ’anotau mai tei pāpa’ihia i roto i te Buka a Moromona. Nā roto i te mau fāra’a e rave rahi, ’ua fa’aineine ’oia ia Iosepha Semita nō tāna tāvinira’a, tae noa atu i te ’īritira’a i te Buka a Moromona : Tē tahi fa’ahou ’ite nō Iesu Mesia.
’Ua tohu te tahi atu mau peropheta nō tō tātou nei ’anotau. ’Ua parau ’o Malaki nō Elia i te fa’afāriura’a « i te ’ā’au o te mau metua i te mau tamari’i, ’e te ’ā’au ’o te tamari’i i tō rātou mau metua ».11 ’Ua haere mai ’o Elia, ’e ’ei hope’ara’a i teie mahana, e 168 hiero tā tātou nā te ao nei. Tē tāvini nei te hiero tāta’itahi i te mau melo ti’amā ’o tē rave nei i te mau fafaura’a mo’a ’e ’o tē fāri’i nei i te mau ’ōro’a ha’amaita’ihia nō rātou iho ’e nō tō rātou mau tupuna i pohe. ’Ua riro teie ’ohipa mo’a tei fa’ata’ahia mai e Malaki ’ei « pū nō te fa’anahora’a a te Rahu Nui nō te hope’ara’a mure ’ore o tāna mau tamari’i ».12
Tē ora nei tātou i roto i taua taime i tohuhia ra ; ’o tātou te nūna’a i fa’auehia nō te ’ōmua i te Tae-piti-ra’a mai o Iesu Mesia; e ti’a ia tātou ’ia ha’aputuputu i te mau tamari’i a te Atua, ’o rātou ’o tē fa’aro’o ’e ’o tē fāri’i i te mau parau mau, te mau fafaura’a ’e te mau parau fafau o te ’evanelia mure ’ore. ’Ua parau te peresideni Nelson i te reira « te tītaura’a rahi roa a’e te ’ōpuara’a rahi roa a’e ’e te ’ohipa rahi roa a’e i ni’a i te fenua nei ».13 Tē fa’a’ite pāpū nei au nō taua temeio ra.
Nā roto i te fa’auera’a a te peresideni Russell M. Nelson, i te ’āva’e Fepuare nō teie matahiti, ’ua ha’amo’a vau i te hiero nō Durban ’Āfirita Apato’a. E mahana teie tā’u e ha’amana’o noa i te tā’āto’ara’a o tō’u orara’a. ’Ua pārahi au i rotopū i te mau melo tei haere mai i te ’evanelia mai ia Ieremia i tohu ātea ra—« tātā’i hō’ē tā’u e rave i tō te ’oire hō’ē, ’e tātā’i piti ho’i i tō te ’ōpū hō’ē ».14 E tāhō’ē te ha’api’ira’a tumu a Iesu Mesia ia tātou pā’āto’a—’ati a’e te ao nei—’ei mau tamaiti ’e ’ei mau tamāhine nā te Atua, ’ei mau taea’e ’e ’ei mau tuahine i roto i te ’evanelia. Noa atu tō tātou huru ’aore rā, tō tātou fāito ’ahu, hō’ē nūna’a tātou ’e hō’ē Metua i te ao ra tei fa’anaho mai te ha’amatara’a mai, e ’āmui i tōna ’utuāfare nā roto i te ravera’a ’e te fa’aturara’a i te mau fafaura’a mo’a o te hiero.
I te hō’ē putuputura’a na’ina’i o te mau taea’e o te autahu’ara’a i roto i te hō’ē fare ha’api’ira’a i Kirtland, Ohio, i te matahiti 1834, ’ua tohu te peropheta Iosepha, « hō’ē noa ’apu rima taea’e o te autahu’ara’a tā ’outou e ’ite nei i teie pō i’ō nei, terā rā, e fa’a’ī teie ’Ēkālesia ia Amerika apato’erau ’e apato’a—e fa’a’ī ’oia i te ao nei ».15
I roto i te mau matahiti i ma’iri a’e nei, ’ua rātere au nā te ao nei nō te fārerei i te mau melo o te ’Ēkālesia. ’Ua fāri’i ato’a tō’u mau taea’e i roto i te Tino ’Ahuru Ma Piti i te reira huru fa’auera’a ’ohipa. Terā rā, ’o vai tē nehenehe e pe’e i te tārena a tō tātou peropheta here, te peresideni Nelson, tei rātere i roto i nā matahiti mātāmua e piti ’ei peresideni nō te ’Ēkālesia tei ti’a iāna ’ia fārerei i te feiā mo’a i roto e 32 fenua ’e te mau tuha’a fenua nō Marite »16 nō te fa’a’ite pāpū i te Mesia ora.
Tē ha’amana’o nei au i te taime ’a fāri’i ai au i tā’u pi’ira’a nō te misiōni ’ei taure’are’a. ’Ua hina’aro vau e tāvini i te fenua Purutia, mai tō’u metua tāne, tō’u taea’e ’e tō’u tao’ete. Ma te tīa’i ’ore i te hō’ē ta’ata nō te ho’i i te fare, ’ua horo vau i te ’āfata rata ’e ’ua ’īriti i te pi’ira’a. ’Ua tai’o i te reira ē, ’ua pi’ihia vau i te Misioni nō te mau tuha’a fenua hiti’a o te rā, tei New York te pū fa’aterera’a. ’Ua ’ino’ino ri’i au, nō reira, ’ua haere au i roto ’e ’ua ’īriti i tā’u pāpa’ira’a mo’a nō te tāmāhanahana. ’Ua ha’amata vau i te tai’o i roto i Te Parau Ha’api’ira’a ’e te mau Parau Fafau : « Inaha, ’e ’a hi’o na, e rave rahi tā’u mau ta’ata i teie vāhi nei, ’e i roto ho’i i te mau fenua e ’ati noa a’e ; ’e e ha’amamahia mai te ’ōpani manuia i te mau fenua fātata mai i roto i teie fenua i te hiti’a o te rā nei ».17 ’Ua riro taua parau tohu ra, tei hōro’ahia i te peropheta Iosepha Semita i te matahiti 1833, ’ei heheura’a nō’u. ’Ua ’ite a’era vau ē, ’ua pi’ihia vau i te misiōni mau tā te Fatu i hina’aro ’ia tāvini au. ’Ua ha’api’i au i te Fa’aho’i-fa’ahou-ra’a mai ’e tōna ha’amatara’a māere, ’a paraparau mai ai tō tātou Metua i te ao ra ia Iosepha Semita i te nā-’ō-ra’a ē, « ’O tā’u tamaiti here teie. ’A fa’aro’o iāna ! »18
E faufa’a rahi tō te parau tohu a Isaia nō te ’Ēkālesia tā’āto’a, hau atu i te 700 matahiti hou te fānaura’a o Iesu Mesia : « E riro ’ia tae i te mau mahana hope’a ra, e fa’ati’ahia te mou’a ra o te fare o Iehova i ni’a i te tupua’i mou’a… e ta’iruru ato’a mai te mau etene ato’a ra i reira ».19
I roto i tō’u ferurira’a i teie mahana, tē feruri nei au i te rahira’a mirioni o tō tātou mau melo ’e te mau hoa tei tū’atihia i teie mau fa’anahora’a nā roto i te mātini uira, te ’āfata teata, te natirara ’aore rā, tē tahi atu mau rāve’a. Tē pārahi nei tātou mai te huru ē, ’ua ’āmuihia tātou « i ni’a i te tupua’i mou’a ».20 ’O Brigham Young tei fa’ahiti i te mau parau tohu ra « Teie te vāhi ti’a ».21 ’Ua ha’a te feiā mo’a, tē tahi pae o rātou e mau tupuna pionie nō’u, nō te ha’amau ia Ziona i roto i te mau mou’a ’ōfa’i « ’ia au i te hina’aro ’e i te ’oa’oa ’o ’ōna e tītau nei i te mau nūna’a o te fenua nei ».22
Tē ti’a nei au i teie mahana i ni’a i te fenua mo’a tei huti mai e rave rahi mirioni rātere. I te matahiti 2002, ’ua fāri’i ’o Roto Miti i te ha’utira’a tū’aro nui nō te pue tau to’eto’e. ’Ua hīmene te pupu hīmene o te fare menemene i roto i te mau ’ōro’a ’īritira’a, ’e ’ua fa’atupu te ’Ēkālesia i te mau hīmenera’a ’e te mau fa’anahora’a nō te mau manihini ’e te mau mā’ona nō te mau fenua e rave rahi. E ha’amana’o tāmau noa vau i te ’itera’a i te hiero ’ei hōho’a nō muri, i roto i te ha’apūrorora’a parau ’āpī i te pō nā te ao ato’a nei.
I te roara’a o te mau matahiti, ’ua haere mai te mau peresideni o te mau Hau ’āmui nō Marite, te mau ari’i, te mau ha’avā, te mau fa’aterehau mātāmua, te mau ti’a hau, ’e te mau ti’a fa’atere nō te mau fenua e rave rahi, i Roto Miti ’e ’ua fārerei i tō tātou mau ti’a fa’atere. ’Ua fāri’i te peresideni Nelson i te mau ti’a fa’atere nō te Tā’atira’a nō te Nu’ura’a i mua o te mau ta’ata ’ere’ere, e fa’anahora’a teie e ha’a nei nō te mau ti’ara’a ’aifāito, ma te ’ore e hi’o ’ē i te taura ta’ata. Tē ha’amana’o nei au i tō’u ti’ara’a i pīha’i iho roa i teie mau hoa ’e mau ti’a fa’atere, ’a ’āmui ai te peresideni Nelson ia rātou nō te ti’aoro i te hō’ē peu maita’i ’e te au-māite-ra’a i rotopū i te mau nūna’a i roto i te ao nei ».23
E rave rahi mau ta’ata tei haere mai i Temple Square ’e ’ua fārerei i te feiā fa’atere o te ’Ēkālesia i roto i te hō’ē ’āpo’ora’a. ’Ei hi’ora’a, nō te fa’ahiti i te tahi ri’i noa, ’ua fāri’i mātou i te 68ra’a o te ’āmuira’a a te Taiete Tīvira nō te mau Hau ’āmui, e putuputura’a teie nā te ao ato’a nei, ’e o te taime mātāmua teie ’a tupu ai te reira i rāpae i te ’oire nō New York. ’Ua putuputu mātou ’e te Tōmite Anami nō te mau ’ohipa fa’aro’o, e mau ti’a hau nō Cuba, nō Firipino, nō Raparata, nō Romania, nō Sudan, nō Qatar, ’e nō Saudi Arabia. ’Ua fāri’i poupou ato’a mātou i te pāpa’i parau rahi o te Taiete Mahometa nō te ao nei.
Te mea tā’u ’e fa’ata’a atu nei o te tupura’a ïa o te parau tohu a Isaia, ’oia ho’i, ’ia tae i te mau mahana hope’a ra,e ta’iruru mai te mau nūna’a i « te mou’a га о te fare о Iehova ».24 E ti’a te hiero rahi nō Roto Miti i rōpū i taua nehenehe ra ’e te hanahana.
E ’ere nā te hōho’a o te fenua i huti mai i te ta’ata, noa atu te nehenehe o tō tātou vāhi ; nā te faufa’a tumu o te ha’apa’ora’a fa’aro’o vi’ivi’i ’ore tei fa’a’itehia i roto i te vārua, te tupura’a, te maita’i, ’e te ’ā’au hōro’a o te ’Ēkālesia a Iesu Mesia i te Feiā Mo’a i te mau Mahana Hope’a nei ; tō tātou here mai te Atua e here nei ’e tā tātou fafaura’a nō te hō’ē ’ohipa teitei a’e, tā Iosepha Semita i parau ē, « te ’ohipa a te Mesia ».25
’Aita tātou i ’ite ē, a hea te Fa’aora e ho’i mai ai, ’ua ’ite rā tātou ē, e ho’i mai ’oia. ’Ia ineine tātou i roto i te ’ā’au ’e i te ferurira’a e ti’a ai, ’e ’ia ti’amā nō te fāri’i iāna, ’e ’ia hanahana nō te riro ’ei tuha’a nō te mau mea ato’a i tohuhia e rā ’ē te tau.
Tē fa’a’ite pāpū nei au ē, te peresideni Russell M. Nelson, e peropheta ïa nā te Fatu i ni’a i te fenua nei, ’e i pīha’i iho iāna tē vai ra te mau ’āpōsetolo tei pi’ihia e te Atua, tei pāturuhia ’ei mau peropheta, ’ei mau hi’o, ’e ’ei mau heheu parau. ’E, e au mau taea’e, e au mau tuahine here, tē tāmau noa nei te Fa’aho’i-fa’ahou-ra’a mai.
E ’ōpani au nā roto i te parau tohu a Iosepha Semita, e mau parau tā’u e fa’a’ite pāpū nei ē, e parau mau te reira : « ’Aore roa e rima vi’ivi’i e nehenehe e tāpe’a i te ’ohipa ’ia haere i mua ; e ’ū’ana paha te mau hāmani-’ino-ra’a, e ’āmui paha te mau ta’ata ’ī’ino, e ’āmui paha te mau nu’u, e fa’ahitihia paha te mau parau ha’avare, e haere noa rā te parau mau a te Atua i mua ma te mata’u ’ore, ma te hanahana, ’e ma te ti’amā, ’e tae roa atu e tomo te reira i roto i te mau fenua ato’a, e fārerei i te mau pu’e tau ato’a, e pārare nā te mau fenua ato’a, ’e e hāruru i roto i te mau tari’a ato’a, e tae roa atu e tupu te mau ’ōpuara’a a te Atua, ’ei reira ’o Iehova Rahi e parau mai ai ē, ’ua oti te ’ohipa ».26 Tē fa’a’ite pāpū nei au ē, tē tupu nei teie mau parau tohu a Iosepha Semita.
Tē fafau atu nei au ē, mai te mea e pe’e ’outou i te a’ora’a fa’auruhia a tō tātou peropheta here, te peresideni Russell M. Nelson, tōna nā tauturu, te mau ’āpōsetolo, ’e te tahi atu mau feiā fa’atere o te ’Ēkālesia, ’e mai te mea ē, e ha’apa’o ’outou i te mau peropheta tahito tei tohu nō tō tātou nei ’anotau, e fa’a’īhia ’outou, i roto i te hōhonura’a o tō ’outou ’ā’au ’e te vārua, i te vārua ’e te ’ohipa o te fa’aho’ira’a mai. Tē fafau atu nei au ia ’outou ē, e ’ite ’outou i te rima o te Atua i roto i tō ’outou orara’a, e fa’aro’o ’outou i tāna mau muhumuhu, ’e e ’ite ’outou i tōna here. I te i’oa o Iesu Mesia, ma te māuruuru nō te fa’aho’i-fa’ahou-ra’a-hia mai tāna ’evanelia ’e tāna ’Ēkālesia, i roto i tōna here pāpū fāito ’ore, ’āmene.