L-Akbar Possessjoni

L-iskrittura titkellem dwar raġel għani u żagħżugħ li, ġera lejn Ġesù, inxteħet għarkupptejh quddiemu u, b’sinċerità ġenwina, staqsa lill-Imgħallem, “X’għandi nagħmel biex nikseb il-ħajja ta’ dejjem?” Wara li semma lista sħiħa ta’ kmandamenti li dan il-ġuvni kien ilu jħares b’fedeltà, Ġesù qal lir-raġel biex ibigħ dak kollu li għandu, jagħti ġidu lill-foqra, jerfa’ salibu, u jimxi warajh. Iċ-ċarezza ta’ din id-direttiva wasslet biex dan il-mexxej żagħżugħ biddel il-ħsieb tiegħu, u telaq minn hemm imnikket għaliex, l-iskrittura tgħid, “kien għani ħafna.”¹

Ovvjament, din storja importanti twissina dwar l-użu tal-ġid materjali tagħna u l-bżonnijiet tal-foqra. Iżda din hi ultimament storja dwar devozzjoni sħiħa u bla riserva lejn responsabbiltà divina. Bil-ġid materjali jew le, ilkoll kemm aħna għandna nersqu lejn Kristu bl-istess impenn, bla kompromess, lejn l-evanġelju tiegħu, kif kien mistenni minn dan iż-żagħżugħ. Bil-lingwaġġ taż-żgħażagħ tal-lum, għandna niddikjaraw lilna nfusna “ilkoll ġewwa.”²

Bil-proża karatteristika tant memorabbli tiegħu, C. S. Lewis jimmaġina lill-Mulej jgħidilna xi ħaġa hekk: “Ma rridx … ħinek … [jew] flusek … [jew] ħidmietek [daqs kemm] jien [fil-fatt] irrid lilek. [Dik is-siġra int qed tożbor.] Ma rridx naqta’ fergħa hawn u fergħa hemm, irrid … inqaċċat is-siġra sħiħa. [U dik is-sinna.] Ma rridx nagħmel xi toqba fiha, jew nagħlaqha, jew nimlieha. [Irrid] naqlagħha. Fil-fatt, irridek tagħtini lilek innifsek sħiħ, eżatt kif int. … [U] jien nagħtik lilek innifsek ġdid. Fil-fatt, jien nagħtik lili nnfisi: ir-rieda tiegħi … issir [ir-rieda tiegħek].”³

Dawk kollha li se jitkellmu f’din il-konferenza ġenerali se jkunu lkoll qed jgħidu, b’xi mod jew ieħor, dak li Kristu qal lil dan iż-żagħżugħ għani: “Ejjew għand is-Salvatur tagħkom. Ejjew kompleti u minn qalbkom. Erfgħu salibkom, tqil kemm hu tqil, u imxu warajh.”⁴ Huma jgħidu dan kollu għax jafu li fis-saltna ta’ Alla, ma jistax ikun hemm nofs miżuri, jew li tibda u tieqaf f’nofs triq, jew li terġa’ tmur lura fejn kont. Lil dawk li talbu permess biex jidfnu lil xi ġenitur li ħalla din id-dinja jew biex għallinqas isellmu lil xi membri oħra tal-familja, it-tweġiba ta’ Ġesù kienet waħda mill-aktar ċara. “Ħallu dan f’idejn ħaddieħor,” Huwa qal. “Min iqiegħed idu fuq il-moħriet u jħares lura m’huwiex tajjeb għas-Saltna ta’ Alla.”⁵ Meta aħna nintalbu nwettqu xi ħaġa diffiċli, anke xi ħwejjeġ li huma kontra x-xewqat ta’ qalbna, ftakru li l-lealtà li nwiegħdu lejn il-kawża ta’ Kristu għandha tkun id-devozzjoni suprema ta’ ħajjitna. Minkejja li Isaija jirriassigurana li hi disponibbli “b’xejn u bla ħlas”⁶—u hekk hi—eħtieġ li nkunu preparati, kif jgħidilna T.S Eliot, li l-prezz tagħha “ma jkunx anqas minn kull ħaġa oħra.”⁷

Bla dubju, aħna lkoll għandna ċerti vizzji jew dgħjufijiet jew passat personali li jistgħu jżommuna milli ngħoddsu lilna nfusna spiritwalment f’din il-ħidma. Iżda Alla hu Missierna u hu tajjeb immens biex jaħfer u jinsa d-dnubiet li aħna ndimna minnhom, probabbilment għaliex nagħtuh wisq opportunitajiet jippratikka dan. F’kwalunkwe każ, teżisti mħabba divina għal kull wieħed u waħda minna f’kull mument li nħossu li neħtieġu bidla fl-imġiba tagħna. Alla ta lil Sawl “qalb ġdida.”⁸ Eżekjel talab lin-nies kollha ta’ Iżrael tal-qedem biex iħallu warajhom il-passat tagħhom u “iġeddu… qalbhom u ruħhom.”⁹ Alma qal li hemm bżonn ta’ “bidla setgħana”¹⁰ li twassal biex ir-ruħ tespandi, u Ġesù nnifsu għallem li “jekk wieħed ma jitwelidx mill-ġdid, ma jistax jara s-Saltna ta’ Alla.”¹¹ Hi ħaġa ċara li l-possibbiltà li wieħed jinbidel u jgħix f’livell aktar elevat minn dejjem kienet wieħed mir-rigali ta’ Alla għal dawk li jfittxuh.

Ħbieb, bħalissa qed niffaċċjaw madwarna kull tip ta’ diviżjonijiet u sottodiviżjonijiet, gruppi u sottogruppi, tribujiet diġitali u identitajiet politiċi, b’ostilità kbira ma’ dan kollu. Tgħid għandna nistaqsu lilna nfusna jekk ħajja “ogħla u aktar qaddisa,”¹² biex nuża frażi li uża l-President Russell M. Nelson, għandhiex tkun xi ħaġa li għandna nittamaw għaliha? Meta nagħmlu dan, ikun tajjeb li niftakru f’dak iż-żmien meraviljuż fil-Ktieb ta’ Mormon li fih in-nies ta’ dak iż-żmien staqsew u wieġbu dik il-mistoqsija fl-affermattiv:

“U ġara li ma kien hemm l-ebda tilwim fil-pajjiż … minħabba l-imħabba ta’ Alla li kienet tgħammar f’qalb il-poplu.

“U ma kien hemm l-ebda għira, l-ebda ġlied, … jew xi tip ta’ nuqqas ta’ rażan; u bla dubju ma kienx hawn poplu aktar kuntent fost il-popli kollha li ġew maħluqa minn id Alla.

“La kien hemm ħallelin, la qattiela, lanqas ma kien hemm Lamaniti, jew xi forma ta’ -iti; iżda kienu kollha ħaġa waħda, ulied Kristu, u werrieta tas-saltna ta’ Alla.

“U O, kemm kienu mberkin!”¹³

X’inhu s-sigriet għal din l-iskopertà biex ngħixu ħajja kuntenta u ferħana? Tinsab inkorporata fil-kliem li nsibu f’sentenza waħda: “L-imħabba ta’ Alla … kienet tgħammar f’qalb il-poplu.”¹⁴ Meta l-imħabba ta’ Alla tibda tiddomina ħajjitna, ir-relazzjonijiet tagħna bejnietna u ultimament is-sentimenti tagħna lejn l-umanità, imbagħad id-distinzjonijiet tal-passat, it-tikketti li jillimitawna, u d-diviżjonijiet artifiċjali jibdew jogħsfru, u l-paċi tagħna tikber. Dan hu preċiżament dak li ġara fl-eżempju li rajna mill-Ktieb ta’ Mormon. Ma kienx għad baqa’ Lamaniti, jew Ġakobbin, jew Ġużeppin, jew Żoramiti. Ma kien baqa’ l-ebda “-iti jew -in”. In-nies bdew iħarsu lejhom infushom biss permezz ta’ identità traxxendenti. Hemm miktub li lkoll kellhom ikunu magħrufa bħala “ulied Kristu.”¹⁵

Bla dubju, aħna hawn qed nitkellmu dwar l-ewwel kmandament kbir mogħti lill-familja umana—li tħobb lil Alla b’qalbek kollha, mingħajr riserva jew kompromess, jiġifieri b’qalbna kollha, bil-qawwa tagħna kollha u b’moħħna kollu.¹⁶ Din l-mħabba ta’ Alla hija l-ewwel kmandament kbir fl-univers. Iżda l-ewwel verità kbira fl-univers hi li Alla jħobbna sewwasew b’dak il-mod—b’qalbu kollha, mingħajr kompromess, b’ qalbu kollha, b’ moħħu kollu u bil-qawwa u s-setgħa tiegħu kollha. U meta dawk il-forzi maestużi minn qalbu u minn qalbna jiltaqgħu flimkien mingħajr trażżin, ikun hemm splużjoni vera ta’ qawwa spiritwali u morali. Imbagħad, kif kiteb Teilhard de Chardin, “għat-tieni darba fl-istorja tad-dinja, il-bniedem ikun skopra n-nar.”¹⁷

Ikun sewwasew f’dak il-mument, u f’dak il-mument biss li aħna nkunu nistgħu b’mod effettiv inħarsu t-tieni kmandament kbir b’mod li mhuwiex superfiċjali jew trivjali. Jekk inħobbu lil Alla biżżejjed li nippruvaw inkunu kompletament fidili lejh, Hu jagħtina l-abbiltà, il-kapaċità, ir-rieda, u l-mezz kif nistgħu nħobbu lil għajrna u lilna nfusna. Jista’ jkun li mbagħad inkunu nistgħu nerġgħu ngħidu, “Verament ma setax kien hemm nies aktar henjin fost il-popli kollha li qatt ġew maħluqin minn id Alla.”¹⁸

Ħuti, nitlob li aħna nirnexxu fejn ma rnexxiex dak ir-raġel żagħżugħ u għani, li nerfgħu s-salib ta’ Kristu, minkejja li jaf jistenna ħafna minna, minkejja l-konsegwenza u minkejja l-prezz. Jiena nixhed li meta aħna nwiegħdu li se nimxu warajh, il-triq, b’xi mod jew ieħor, se tgħaddi minn ħden kuruna tax-xewk u salib Ruman mill-aktar kiefer. Irrispettivament kemm kien sinjur dak il-mexxej żagħżugħ, hu ma kienx sinjur biżżejjed biex jixtri t-triq tiegħu lura permezz ta’ dawk is-simboli, u lanqas aħna. Għall-barka li nirċievu l-akbar fost kull ħaġa li nistgħu nipposedu—ir-rigal tal-ħajja eterna—hi ħaġa naħseb ġustifikata li niġu mitlubin li nibqgħu fit-triq mexjin wara l-Qassis il-Kbir tal-Professjoni tagħna, il-Kewkba ta’ Filgħodu, l-Avukat, u s-Sultan tagħna. Jiena nixhed flimkien ma’ Għamaleki tal-qedem li lkoll kemm aħna għandna “noffru ruħna kollha bħala offerta lilu.”¹⁹ Dwar din it-tip ta’ devozzjoni determinata u kostanti aħna nkantaw:

Fl-isem sagru ta’ Ġesù Kistu, amen.