Nindirizzaw is-Saħħa Mentali

Minkejja li fil-familja tagħna aħna gawdejna minn barkiet kbar hekk kif b’ferħ imxejna fit-triq tal-patt, aħna sibna ma’ wiċċna wkoll muntanji mill-aktar għoljin. Nixtieq naqsam magħkom ċerti esperjenzi mill-aktar personali dwar is-saħħa mentali. Dawn jinkludu d-dipressjoni klinika, l-anzjetà severa, id-disturb bipolari, l-ADHD—u, xi kultant, kombinazzjoni tagħhom kollha. Jien se naqsam dawn l-esperjenzi sensittivi bl-approvazzjoni ta’ dawk involuti.

Tul il-ministeru tiegħi, jiena ltqajt ma’ mijiet ta’ individwi u familji b’esperjenzi simili. Xi kultant nistaqsi jekk il-marda qerrieda li laqtet lid-dinja kif deskritta fl-iskrittura setgħetx tinkludi il-mard mentali.¹ Tinsab madwar id-dinja kollha, tolqot kull kontinent u kultura, u taffettwa lil kulħadd—żgħar, xjuħ, sinjuri, u foqra. Il-membri tal-Knisja mhumiex esklużi.

Fl-istess ħin, id-duttrina tagħna tgħallimna biex nagħmlu li tistgħu ħalli nkunu bħal Ġesù Kristu u niġu pperfezzjonati fih. It-tfal tagħna jkantaw, “Nipprova nkun bħal Ġesù.”² Aħna nixtiequ li nkunu perfetti anke kif Missierna fis-Smewwiet u Ġesù Kristu huma perfetti.³ Minħabba li l-mard mentali jista’ jinterferixxi mal-perċezzjoni tagħna tal-perfezzjoni, ħafna drabi għadu jitqies bħala xi tabù. B’riżultat ta’ dan, teżisti wisq injoranza, wisq sofferenza fis-solitudni, u wisq disperazzjoni. Ħafna, peress li jħossuhom iddisprati għaliex ma jilħqux l-istandards perċepiti, b’mod żbaljat jemmnu li m’hemmx posthom fil-Knisja.

Biex nikkumbattu din l-idea żbaljata, hu importanti niftakru li “is-Salvatur iħobb lill-ulied kollha ta’ Missieru. Hu jifhem verament l-uġigħ u d-diffikultajiet li ħafna jesperjenzaw hekk kif jgħixu b’firxa wiesgħa ta’ sfidi relatati ma’ saħħa mentali. Hu bata ‘ kull tip ta’ wġigħ, tbatija u tentazzjoni; … ħa fuqu l-uġigħ u l-mard tal-poplu tiegħu’ (Alma 7:11; enfażi miżjuda; ara wkoll Lhud 4:15–16; 2 Nephi 9:21). Peress li Hu jifhem kull tip ta’ tbatija, Hu jaf kif jista’ ‘jfejjaq lill-imjassrin’ (Luqa 4:18; ara wkoll Isaija 49:13–16).”⁴ L-isfidi ħafna drabi jindikaw il-ħtieġa għal aktar għodda u sapport u mhumiex xi difett fil-karattru.

Ippermettuli naqsam magħkom numru ta’ osservazzjonijiet li għamilt hekk kif il-familja tagħna għaddejna minn ċerti sfidi.

L-ewwel, bosta nies jibku magħna; ma jiġġudikawniex. Minħabba ċerti attakki ta’ paniku sever, anzjetà, u dipressjoni, it-tifel tagħna reġa’ lura d-dar mill-missjoni tiegħu wara biss erba’ ġimgħat. Bħala ġenituri tiegħu, aħna sibnieha diffiċli niffaċċjaw id-diżappunt u d-dieqa għaliex tlabna fuq li tlabna biex hu jirnexxi. Bħall-ġenituri kollha, aħna rridu li t-tfal tagħna jirnexxu u jkunu kuntenti. Missjoni kellha tkun avveniment importanti għat-tifel tagħna. Bdejna ninkwetaw ukoll x’seta’ jaħseb ħaddieħor.

Li ma konniex nafu kien li r-ritorn tat-tifel tagħna kien infinitament aktar devastanti għalih. Innutaw li hu kien iħobb lill-Mulej u ried iservi, u madankollu, għal raġunijiet li sabha diffiċli jifhimhom, ma setax. Ma damx ma sab lilu nnifsu f’sitwazzjoni ta’ nuqqas ta’ tama totali u jitqabad ma’ sens kbir ta’ ħtija. Hu ma baqax iħossu aktar aċċettat u spiritwalment sensittiv. F’moħħu bdew ġejjin diversi ħsibijiet dwar il-mewt.

Waqt li kien f’dan l-istat irrazzjonali, it-tifel tagħna beda jemmen li l-unika ħaġa li kien baqa’ jagħmel kienet li jneħħi ħajtu. Kien hemm bżonn tal-għajnuna tal-Ispirtu s-Santu u ta’ leġjun ta’ anġli fuq iż-żewġ naħat tal-velu biex isalvawh.

Waqt li kien qed jiġġieled għal ħajtu u waqt dan iż-żmien mill-aktar diffiċli, il-familja tagħna, il-mexxejja tal-qasam, il-membri, u l-ħbieb tagħna għamlu minn kollox biex jissapportjawna u jgħinuna.

Qatt ma ħassejt daqshekk imħabba kollettiva. Qatt ma ħassejt b’daqstant qawwa u b’mod daqshekk personali xi tfisser li tfarraġ lil dawk li jeħtieġu l-faraġ. Il-familja tagħna se nibqgħu għal dejjem grati għal dan is-sapport.

Ma nistax niddeskrivi l-għadd kbir ta’ mirakli li esperjenzajna f’dan il-perjodu. Aħna grati li t-tifel tagħna sab il-fejqan, iżda dan seħħ wara żmien twil u wara tant kura medika, terapewtika, u spiritwali biex fieq u aċċetta li hu maħbub, apprezzat, u bżonnjuż.

Jiena nagħraf li mhux is-sitwazzjonijiet kollha jispiċċaw bħal tagħna. Nitnikket ma’ dawk li tilfu lil xi maħbubin kmieni wisq u issa spiċċaw b’sentimenti ta’ dieqa kif ukoll b’ċerti mistoqsijiet mhux imwieġba.

L-osservazzjoni li jmiss hi li jista’ jkun diffiċli għall-ġenituri li jidentifikaw it-taqbid li jkunu għaddejjin minnu wliedhom, iżda għandna nedukaw lilna nfusna. Kif nistgħu nkunu nafu d-differenza bejn id-diffikultajiet marbuta mal-iżvilupp normali u s-sinjali ta’ mard? Bħala ġenituri, għandna r-responsabbiltà sagra li ngħinu lit-tfal tagħna jinnavigaw l-isfidi tal-ħajja; madankollu, ftit fostna huma speċjalisti tas-saħħa mentali. Aħna, madankollu, jeħtieġ nieħdu ħsieb ta’ wliedna billi ngħinuhom jitgħallmu jkunu kuntenti bl-isforzi sinċiera tagħhom hekk kif jagħmlu li jistgħu biex jilħqu ċerti aspettattivi xierqa. Ilkoll kemm aħna nafu min-nuqqasijiet personali tagħna li t-tkabbir spiritwali huwa proċess kontinwu.

Issa aħna nifhmu li “ma teżisti l-ebda kura waħdanija sempliċi li hi tajba għal kull tip ta’ benesseri emozzjonali u mentali. Aħna nesperjenzaw l-istress u l-inkwiet għaliex ninsabu ngħixu f’dinja mitlufa b’ġisem mitluf. Barra minn hekk, bosta fatturi kontributorji jistgħu jwasslu għad-dijanjosi tal-mard mentali. Minkejja l-benesseri mentali u emozzjonali tagħna, li niffokaw fuq it-tkabbir tagħna jagħmel aktar ġid milli nossessjonaw ruħna bin-nuqqasijiet tagħna.”⁵

Għalija u għal marti, l-unika ħaġa li dejjem għenitna kienet li nibqgħu viċin kemm nistgħu tal-Mulej. Meta nħarsu lura, nistgħu naraw kif il-Mulej bil-paċenzja kollha ħa ħsiebna fi żminijiet ta’ inċertezza kbira. Id-dawl tiegħu ggwidana pass pass fis-sigħat l-aktar mudlama. Il-Mulej għenna naraw li l-valur ta’ ruħ individwali hi ferm aktar importanti fl-iskema eterna minn kwalunkwe ħidma jew kisba tad-dinja.

Għal darb’oħra, li nedukaw lilna nfusna dwar il-mard mentali jħejjina biex ngħinu lilna nfusna u lil ħaddieħor li jaf għaddej minn żmien diffiċli. Diskussjoni sinċiera u onesta bejnietna tgħinna biex dan is-suġġett importanti jirċievi l-attenzjoni li jixraqlu. Wara kollox, l-informazzjoni tiġi qabel l-ispirazzjoni u r-rivelazzjoni. Dawn l-isfidi, li ħafna drabi ma jidhrux, jistgħu jaffettwaw lil kulħadd, u meta niffaċċjawhom, jidhru enormi.

Waħda mill-ewwel affarijiet li jeħtieġ nitgħallmu hi li aħna ċertament ma ninsabux weħidna. Nistedinkom tistudjaw is-suġġett tas-saħħa mentali fis-sezzjoni tal-Għajnuna tal-Ħajja fil-Gospel Library app. It-tagħlim iwassal għal aktar għarfien, aktar aċċettazzjoni, aktar kompassjoni, aktar imħabba. Jaf inaqqas iċ-ċans ta’ xi traġedja, filwaqt li jgħinna niżviluppaw u nimmaniġjaw l-aspettattivi u l-interazzjonijiet relatati mas-saħħa.

L-aħħar osservazzjoni tiegħi: jeħtieġ li l-ħin kollu nieħdu ħsieb xulxin. Jeħtieġ inħobbu lil xulxin u niġġudikaw anqas lil xulxin—speċjalment meta l-aspettattivi tagħna ma nilħquhomx b’mod immedjat. Għandna ngħinu lit-tfal u ż-żgħażagħ tagħna jħossu l-imħabba ta’ Ġesù Kristu f’ħajjithom, anke meta jibdew isibuha diffiċli li personalment iħobbu lilhom infushom. Il-Presbiteru Orson F. Whitney, li serva bħala membru tal-Kworum tat-Tnax-il Appostlu, ta parir lill-ġenituri kif jistgħu jgħinu lit-tfal tagħhom li jkunu għaddejjin minn żmien diffiċli: “Itolbu għal … uliedkom; Ibqgħu ittamaw fihom bil-fidi.”⁶

Jiena spiss nistaqsi xi tfisser li nittamaw fihom bil-fidi. Jien nemmen li dan jinkludi ċerti għemejjel żgħar ta’ mħabba, ħlewwa, tjubija, u rispett. Tfisser li nagħtuhom iċ-ċans jiżviluppaw bir-ritmu tagħhom u naqsmu magħhom it-testimonjanza tagħna biex ngħinuhom iħossu l-imħabba tas-Salvatur. Jeħtieġ li naħsbu aktar dwarhom u anqas dwarna nfusna u dwar ħaddieħor. Dan normalment ifisser li nitkellmu anqas u nisimgħu ferm, ferm aktar. Jeħtieġ inħobbuhom, inħeġġuhom, u nfaħħruhom ta’ spiss fl-isforzi tagħhom biex jirnexxu u jkunu fidili lejn Alla. U finalment, jeħtieġ nagħmlu dak kollu li nistgħu biex nibqgħu viċin tagħhom—l-istess kif nibqgħu viċin ta’ Alla.

Għal dawk kollha li huma affettwati personalment bil-mard mentali, ibqgħu leali lejn il-patti tagħkom, anke jekk bħalissa ma tistgħux tħossu l-imħabba ta’ Alla lejkom. Għamlu dak kollu li tistgħu u mbagħad “ieqfu … biex taraw is-salvazzjoni ta’ Alla, u driegħu tiġi żvelata lilkom.”⁷

Jiena nixhed li Ġesù Kristu huwa s-Salvatur tagħna. Huwa jafna. Huwa jħobbna u Hu jibqa’ jistenniena. Waqt l-isfidi fil-familja tagħna, jiena sirt naf kemm Hu jinsab viċin. Il-wegħdiet tiegħu huma vera:

Għax nafu kemm huma sodi s-sisien, jalla aħna għal dejjem niddikjaraw b’ferħ:

F’isem Ġesù Kristu, amen.