Nyame no Dɔ no

Osiandɛ Nyame no dɔ wɔ hɔ ma obiara no, binom kã ho asɛm dɛ “onngyina hwee do,” na hɔn adwen mu no, wonya adwen bi dɛ Nyankopɔn ne nhyira horow nngyina hwee do,” na dɛ nkwagye nngyina hwee do.” Ɔnntse dɛm. Binom taa kã dɛ, “Agyenkwa No dɔ me dɛ mbrɛ metse yi ara,” na ɔno yɛ nokwar ampara. Mbom Onnkotum nye hɛn mu biara akɔ N’ahenman mu dɛ mbrɛ yɛtse yi ara, “osiandɛ adze biara a noho nntsew no nnkotum atsena hɔ, anaadɛ ɔatsena n’enyim.” ⁷ Otwar dɛ wodzi kan siesie hɛn bɔn.

Ɔbemfo Hugh Nibley kãa no mpɛn bi dɛ Nyankopɔn N’ahenman nnkotum etsim sɛ ɔkɛhyɛ bɔn ketseketse mpo mu a: “Prɔwee kakrabaa a ɔbɛkã ho no kyerɛ dɛ wiadze kor no rennyɛ bea a prɔwee nnyi anaa daapem. Sintɔ ketseketse koraa a ɔwɔ dan mu, edwuma mu, nhyehyɛɛ, anaa suban mu no bɛyɛ mbusudze wɔ onnyiewiei ber mu.” ⁸ Nyankopɔn ne mbrasɛm yɛ “katsee” ⁹ osiandɛ N’ahenman na n’atsefo no botum egyina nko a, gyedɛ wɔpow bɔn ber biara na wɔsan mu yi papa, a wonngyaa da. ¹⁰

Elder Jeffrey R. Holland hyɛɛ no nsew dɛ, Jesus tsee dza ndɛ amambra yɛ dɛ mbrɛ hɔn werɛ efir no ase ara yie: dɛ nsonsonee mapã da mbrasɛm dɛ wɔnfa bɔn nkyɛ (a Otum yɛ no mbordo daa) na kɔkɔbɔ a otsĩa yebofua bɔn (a Ɔannyɛ kor mpo dabiarada).” ¹¹

Sesei hɛn esintɔ horow nyina ekyir no, yebotum enya enyidado dɛ yebenya “dzin na gyinabea,” ¹² beebi wɔ N’Asɔr mu nye celestial wiadze no mu. Ɔmaa ɔdaa edzi yie dɛ Ɔnnkɛma ho kwan anaa Orummbu enyi nngu bɔn do, Ewuradze ma hɛn awerɛhyɛmu:

“Naaso, nyia onu noho na odzi Ewuradze ne mbrasɛm do no, ɔdze no bɔn bɛkyɛ no.” ¹³

“Na mber dodow biara a mo nkorɔfo bonu hɔnho no, medze hɔn mfom a wɔayɛ etsia me no bɛkyɛ hɔn.” ¹⁴

Nnuho na adom krɔnkrɔn na osiesie ɔhaw no.

“Hom nkaa nsɛm so a Amulek kãa kyerɛɛ Zeezrom wɔ Ammonihah kuropɔn mu no; na ɔkãa kyerɛɛ hɔn dɛ Ewuradze bɛba nokwar mu abɔpon no nkorɔfo, na ɔremmba mmbɔpon hɔn wɔ hɔn bɔn mu, na mbom ɔbɔpon hɔn efi hɔn bɔn mu.

“Na Egya no ama no tum, ɔmpon hɔn mfi hɔn bɔn ho osian nnuho ntsi; dɛm ntsi ɔasoma n’abɔfoe dɛ wɔmbɛkã nnuho ho nsɛm, dza ɔma Pomfo no tum dze nkwagye ma hɔn akra.” ¹⁵

Ɔnam nnuhu ngyinado ntsi, Ewuradze botum ama ehumbɔbɔr a Ɔrennsɛɛ pɛrpɛrdzi ndwuma, na “Nyankopɔn nngyaa dɛ ɔyɛ Nyankopɔn.” ¹⁶

Wiadze n’kwan, dɛ mbrɛ hom nyim no, yɛ Christ-otsiafo, anaa “biribiara a mbom ɔnnyɛ Christ.” Hɛn da yi na wɔresan eyi Mormon Nwoma no abakɔsɛm bio a nkorɔfo a wɔagye abɔdzin hwehwɛ ahyɛ binom do a ɔnntsen, ntantan bra, na wofua ahonyadze ne nyae dɛ hɛn abrabɔ no botae. Hɔn nyansapɛ “bu hɔn bem wɔ bɔn nketsenketse a wɔyɛ no ho,” ¹⁷ anaa bɔn pii mpo, mbom obiara runntum mma ɔpon. Ɔno fi Eguamba no mbɔgyaa mu nko ba. Dza “biribiara a mbom ɔnnyɛ Christ,” anaa “biribiara a mbom ɔnnyɛ nnuho” dɔm no botum dze ama ara nye dza wɔkã a ɔnnyɛ nokwar dɛ bɔn biara nnyi hɔ, anaa sɛ ɔwɔ hɔ mpo a, onnyi nsunsuando. Munnhu dɛ dɛm ekyingye yi benya tsenabew biara wɔ Atsɛmbu a Odzi Ewiei no. ¹⁸

Onnyi dɛ yɛbɔ mbɔdzen dɛ yɛyɛ dza wɔyɛ a ɔnnkɛyɛ yie dɛ yɛbɔtow hɛn bɔn egu. Na no kor so no, onnyi dɛ yɛbɔ mbɔdzen dɛ yɛyɛ dza wɔyɛ a ɔnnkɛyɛ yie dɛ yɛdze hɛnara ndwuma pa bɛpepa bɔn no nsunsuando. Hɛn nyamesom nnyɛ adwen mu ara dze anaa aper emudziyɛ nyamesom mbom ɔpon ho nyamesom—ɔpon a ɔnam Jesus Christ mu. Sɛ yɛkã hɔn a woenya nnuhu no ho a, No Werdambɔ no ntsi, wɔabɔ hɛn bɔn horow mprɛgow wɔ Ne mbeamudua no do, na “ne mbaa ano na wɔdze asa hɛn yarba.” ¹⁹

Nyankopɔn no nkɔnhyɛfo hɔn dɔ kɛse no ayɛ me nwanwa mber pii, na maatse ne nkã so wɔ hɔn kɔkɔbɔ a otsia bɔn. Nnyɛ afɔbu nna okenyan hɔn. Hɔn apɛdze no tse dɛ Nyame no dɔ; nokwar, ɔyɛ Nyame no dɔ. Wɔdɔ hɔn a wɔasoma hɔn wɔ hɔn nkyɛn no, mbrɛ wɔyɛ biara na mbrɛ wɔtse biara. Tse dɛ Ewuradze no, N’asomfo no mmpɛ dɛ obiara bohu amandze wɔ bɔn na nsanmuyi a ɔnnyɛ ho. ²⁰

Wɔsomaa Alma dɛ ɔnkɛkã nnuhu na ɔpon ho nsɛm nkyerɛ nkorɔfo a ɔtan ahyɛ hɔn mã a wɔpɛ dɛ wɔtseetsee Christianfo, yɛ hɔn ayakayakadze, na wokum hɔn mpo, a Alma nankasa kã ho. Naaso ɔdɔɔ hɔn na ɔhwehwɛɛ hɔn nkwagye. Ɔkãa Christ No Werdambɔ ho nsɛm kyerɛɛ Ammonihahfo ekyir no, Alma totɔe serɛɛ dɛ: “Na afei, m’enuanom, ɔyɛ me pɛ fi m’akoma mu totɔ serɛ hom dɛ, nyew, medze ahohiahia na yaw kɛse dze serɛ mpo, dɛ hom ntsie me nsɛm yi na hom nyi hom bɔn akwa, na mma hom nntu hom nnuho da nnhyɛ da fofor; … ama wɔaama hom do wɔ da a odzi ewiei no mu na hom ahɛn [Nyankopɔn] n’ahomgye no mu.” ²¹

President Russell M. Nelson ne nsɛmfua mu no, “Osiandɛ yɛdwen Nyankopɔn ne mba nyina ho ara yie ntsi koraa na yɛpaa mu kã, No nokwar no.” ²²

Egya no na Ɔba no Hɔn dɔ no wɔdze ma kwa naaso enyidado na enyida kwan kã ho. Meserɛ kã President Nelson asɛm, bio no, “Nyankopɔn Ne mbrasɛm ho tsirmpɔw no yɛ No dɔ a ɔmmbɔadze da ma hɛn na Ne pɛ dɛ yɛbɛyɛ dza yebotum abɛyɛ nyina.” ²³

Osiandɛ dɛ Wɔdɔ wo no ntsi, Wɔmmpɛ dɛ Wobegya wo “dɛ mbrɛ itse noara.” Osiandɛ dɛ Wɔdɔ wo no ntsi, Wɔpɛ dɛ enya enyigye na konyimdzi. Osiandɛ dɛ Wɔdɔ wo no ntsi, Wɔpɛ dɛ inu woho osiandɛ ɔno nye anamɔn kwan a wɔdze kɔ enyigye mu. Naaso ɔyɛ wo nsanmuyi—Wodzi wo pɛ nyi. Otwar dɛ isan mu yi dɛ ibɔdɔ Hɔn, asom Hɔn, na esie Hɔn mbrasɛm no. Nkyii Wobotum ehyira wo mbordo na Wɔadɔ wo so.

Hɔn enyidado tsitsir a Wɔwɔ ma hɛn nye hɛn so yɛbɔdɔ. “Nyia ɔnndɔ no, onnyim Nyankopɔn, na Nyankopɔn nye dɔ.” ²⁴ Dɛ ma John kyerɛwee no, “Adɔfo, sɛ Nyankopɔn dɔɔ hɛn dɛm a, ɔsɛ dɛ hɛn so yɛdodɔ hɛnho.” ²⁵

Nkaano Wiadze Mfɛndzanan Primary President Joy D. Jones kaa dɛ wɔyɛ awarfo fofor no, wɔfrɛɛ ɔno na no kun dɛ wɔnkɛsera na wɔnsom ebusua bi a wɔmmbaa asɔr mfe pii. Hɔn nsera odzi kan mu no, ɔdaa edzi pefee dɛ wɔronnhwehwɛ hɔn. Hɔn mbɔdzembɔ dɛ wɔbɔkɔ bio wiei abagura nkogu mu ekyir no, na nokwar mpaabɔ na ndwendwenho pii ekyir no, Onuabanyin na Akyerɛbaa Jones nyaa mbuae wɔ hɔn som ne siantsir ho fi Nkyerɛkyerɛ na Ahyɛmudzi ne nyiyimu yi: “Hom mfa hom akoma nyina, nye hom ahom, hom adwen, nye hom ahoɔdzen nyina ndɔ Ewuradze hom Nyankopɔn, na hom nsom no wɔ Jesus Christ ne dzin mu.” ²⁶ Akyerɛbaa Jones see dɛ:

“Yehun dɛ yɛrobɔ mbɔdzen nokwar mu dɛ yɛbɔsom ebusua yi na yɛasom hɛn bishop mbom nna ɔwɔ dɛ yebisa hɛnho dɛ sɛ yɛrosom wɔ ɔdɔ mu ama Ewuradze a. …

“… Yɛhyɛɛ ase dɛ yɛrehwɛ hɛn nsera ma ebusua yi kwan wɔ a osian hɛn dɔ ma Ewuradze ntsi [hwɛ 1 Nephi 11:22]. Nna yɛreyɛ ama No. Ɔmaa hɛn aperdzi annyɛ aperdzi bio. Abosoom pii ekyir a yegyinaa abowano no, ebusua no hyɛɛ ase dɛ wɔrema yɛahɛn mu. Ewiei no, nna yɛtaa bɔmu bɔ mpaa na yɛyɛ asɛmpa mpɛnsapɛnsamu a ɔkã akoma. Anyɛnkoyɛ a otsim tahyee. Nna yɛrodɔ Ne mba dze asom na yɛadɔ No.” ²⁷

Yerɛkyerɛ hɛn nyimdzii dɛ Nyankopɔn dɔ hɛn emudzi mu no, hɛn mu kor biara botum ebisa dɛ, “Misi dɛn dɔ Nyame yie? Ana Obutum atwer mo dɔ dɛ mbrɛ motwer Ne dze” Ana ɔbɛyɛ botae pa dɛ yɛbɔbɔ hɛn bra ama Nyankopɔn etum adɔ hɛn nnyɛ hɛn esintɔ ho ntsi mbom osian mbrɛ yɛrebɛyɛ? O, nkyɛ dɛ, Obotum akã afa emi na ɔwo ho dɛ mbrɛ Ɔkãa fa Hyrum Smith no ho no, “Emi, Ewuradze, modɔ no osian n’akoma n’emudzi ntsi.” ²⁸ Hom mma yɛnkaa John n’anyankoyɛ afotu no: “Na Nyankopɔn dɔ nye yi, dɛ yebedzi n’ahyɛdze do: na n’ahyɛdze no nnyɛ dzen.” ²⁹

Nokwar, Ne mbrasɛm no nnyɛ dzen—ɔyɛ mberɛw. Wɔkyerɛ ayarsã, enyigye, asomdwee, na dɛwdzi anamɔn kwan no. Hɛn Egya na hɛn Pomfo dze mbrasɛm ehyira hɛn, na yeridzi Hɔn mbrasɛm do no, yɛtse Hɔn dɔ mapã no emudzi mu na nwanwa mu ara yie. ³⁰

Ha nye hɛn ekyingye na wentwiwentwi mber ne nyiano—Nyame no dɔ. Mormon Nwoma abakɔsɛm enyimnyam mber mu no a odzii Agyenkwa no somdwuma ekyir no, wɔkãa dɛ “ wentwiwentwi biara ammba asaase no do, osian Nyankopɔn no ho dɔ a ɔtse nkorɔfo no hɔn akoma mu no ntsi.” ³⁰ Ber a yedzi aper kɔ Zion no, hom nkaa anohoba no a ɔwɔ Nyikyerɛ mu no: “Nhyira nye hɔn a [wodzi ne mbrasɛm do], na woeenya nkwadua no ho kwan, na wɔaahɛn mbobow no mu akɔ kurow [krɔnkrɔn] no mu.” ³²