Hom Mma Hom Kandzea Do
Me nsato ndɛ da famu koraa: kyɛ asɛmpa no. Ma ɔwoara wo su nda edzi na ma wo kandzea no do.
Mfe kakra abɛsen no, yɛdze wimuhɛn akwantu rokɔ Peru no, nna metsena obi a ɔnoara se ɔnngye nyamesom nndzi no nkyɛn. Obisaa me saintsir a megye Nyame dzi. Nkɔmbɔ dɛɛdɛw a yɛtwetwee mu no, mekãa kyerɛɛ no dɛ megye Nyankopɔn dzi osiandɛ Joseph Smith hun No—na nkyii medze Nyankopɔn ho nyimdzee a meenya fi sunsum sũahu ampara a mankasa meenya kãa ho. Mekyɛɛ me gyedzi dɛ “ndzɛmba nyina so kyerɛ dɛ Nyame wɔ hɔ” 1 na mibisaa no dza ɔgye dzi wɔ mbrɛ asaase no—nkwa nsubura a ɔda wimu pan mu no—bɔbɔɔ adze. Obuae, kãa dɛ, mfe petsepeepee mu no, obotum “efir aworɔw.” Ber a mekyerɛkyerɛ mu dɛ mbrɛ onnsi nnkɛyɛ dɛ dza “ofir aworɔw” no bɛyɛ fɛɛfɛw na esiado esiado dɛm no, ɔyɛ komm mber kakra na nkyii anyɛnkoyɛ mu ara ɔkãa dɛ, “Enya me.” Mibisaa no sɛ ɔbɛkenkan Mormon Nwoma no a. Ɔkãa dɛ ɔbɛyɛ, ntsi mekɛmaa no nwoma no kor.
Mfe kakra ekyir no menyaa nyɛnko fofor bi ber a mowɔ Lagos, Nigeria wimuhɛn gyinabea bi. Yɛbɛyɛɛ anyɛnkofo ber a ɔrohwɛ me passport mu no. Mibisaa no faa ne gyedzi wɔ nyamesom ho, na ɔkyerɛɛ dɛ ɔwɔ gyedzi a ɔyɛ dzen wɔ Nyame mu. Mekyɛɛ Jesus Christ n’asɛmpa mu enyigye na nkenyan na mibisaa no sɛ ɔpɛ dɛ osũa bi kã ho fi asɛmpasomafo hɔ a. Ɔkãa nyew, wɔkyerɛkyerɛɛ no, na wonumaa no. Afe kor anaa ebien ekyir no, ber a menam Liberia wimuhɛn gyinabea no, metsee ndze bi a ɔrobɔ me dzin. Medan moho, na aberantsɛba kor noara bɛnee a ɔayerɛw n’ano kɛse noara. Yefua hɛnho enyigye mu ara na ɔmaa muhun dɛ ɔbɔ hyew wɔ Asɔr no mu na ɔnye asɛmpasomafo no reyɛ edwuma akyerɛkyerɛ n’akataasia adamfo.
Sesei, minnyim sɛ me nyɛnko no a ɔnngye nyamesom nndzi no kenkaan Mormon Nwoma no anaa ɔbɔdɔɔm Asɔr no a. Me nyɛnko a otsĩa ebien no yɛe. Hɔn beenu nyina no, m’asodzii 2 —kwan a menyae—no yɛ kor: ma asɛmpa kandzea no do—dɛ ekyerɛ dɔ, ekyɛ, na eto nsa frɛ hɔn mu kor biara wɔ ɔwoara wo su do. 3
Enuanom na nkyerɛbaa, meenya nhyira a ɔwɔ asɛmpa ne nkyɛe mu ho sũahu, na ɔyɛ nwanwa. Kakra ara nye yi:
Erekyɛ Asɛmpa no dze Enyigye na Enyidado Ba
Hom ehu, emi na hom nyim dɛ yɛtsenaa dɛ hɛn Ɔsor Egya ne mba ansaana yɛreba asaase yi do 4 na dɛ wɔbɔɔ asaase yi wɔ tsirmpɔw dɛ ɔbɛma nyimpa kor biara kwan ma oenya honandua, oenya sũahu, oesũa adze, na oenyin ama oeetum eenya onnyiewiei nkwa—a ɔyɛ Nyankopɔn no nkwa. 5 Nna Ɔsor Egya nyim dɛ yebohu amandze na yɛayɛ bɔn wɔ asaase do, ntsi Ɔsomaa Ne Ba no, a “N’abrabɔ onnyi kabea” 6 na werdam afɔrbɔ a ɔmmbɔadze da 7 ma woetum dze akyɛ hɛn, aasã hɛn yarba na wɔama yeedzi mu. 8
Iruhu nokwar yinom sesã abrabɔ! Sɛ nyimpa bi hu abrabɔ n’enyimnyam botae a, ɔba benya ntseasee dɛ Christ dze kyɛ na Ɔboa hɔn a wɔka No do, na nkyii ɔsan mu yi dɛ ɔbɛka Christ do akɔ enuma nsubura no mu a, abrabɔ sesã yɛ yie—sɛ abrabɔ mu gyinabew nnsesãa mpo a.
Akyerɛbaa bi a n’enyi kã noho ahomkã mu ara a mihyiaa no wɔ Onitsha, Nigeria, kãa kyerɛɛ me dɛ fitsi ber a osũaa asɛmpa no na wonumaa no no (na afei mekã n’anomu asɛm), “birabiara ayɛ yie ama me. Menya ahomkã. Mowɔ heaven.” 9 Yɛrekyɛ asɛmpa no ma enyigye na enyidado dzɛw wɔ onyia ɔma na onyia ɔgye no beenu nyina akra mu. Nokwar ara, “mbrɛ hom bodua edzi dɛw kɛse” 10 ber a hom kyɛ asɛmpa no! Erekyɛ asɛmpa no yɛ enyigye mu enyigye, enyidado mu enyidado. 11
Erekyɛ Asɛmpa no Dze Nyankopɔn No Tum Ba Hɛn Abrabɔ mu
Wonumaa hɛn no, hɛn mu kor biara yɛnye Nyankopɔn hɛɛn daapem 12 ahyɛmudzi mu dɛ “[yɛ]bɔsom no na [ye]edzi ne mbrasɛm do,” 13 a “yebegyina dɛ N’adasefo aber nyina wɔ adze nyina mu, wɔ gyinabew biara” 14 no kã ho. Sɛ yesie ahyɛmudzi no dze “tsena” No mu a, nyamesu mu tum a okenyan, ɔma abamba na ɔtsew ho no pem fi Christ hɔ ba hɛn abrabɔ mu, tse dɛ ma abaw nya edziban fi dua no mu no. 15
Erekyɛ Asɛmpa no Ma Hɛn Bambɔ fi Nsɔhwɛ ho
Ewuradze hyɛ dɛ:
“Hom mma hom kandzea do ama ɔaahyerɛn ama wiadzemba. Hwɛ Emi nye kandzea a hom bɛma do no—dza hom hun me dɛ meyɛɛ no. …
“… Mahyɛ hom dɛ hom mbra mo hɔ, ama hom eetum dze hom nsa aakã me na hom aatse na hom eehu; dɛmara so na hom nyɛ mma wiadze; na obiara a obu mbrasɛm yi do no ma noho kwan ma wɔdze no kɔ nsɔhwɛ mu.” 16
Yɛrennsan mu nnyi dɛ yɛbɛma asɛmpa ne kandzea no do no pia hɛn kɔ sum mu, bea a nsɔhwɛ botum ato hɛn. Tsitsir ara, n’afã no yɛ nokwar: yɛresan mu ama asɛmpa kandzea no do no nye hɛn nkakrakakra bɛn dɛm kandzea no emudzi mu na bambɔ a ɔma dze tsĩa nsɔhwɛ. Nhyira nwanwa kɛse a ɔwɔ ndɛ wiadze yi mu a!
Erekyɛ asɛmpa no Dze Ayarsa Ba
Akyerɛbaa Tiffany Myloan gyee nsato no dɛ ɔgye asɛmpasomafo no abamba ber a nankasa ɔnye ndzɛmba pii ridzi aper, a nna ne gyedzi ho nsɛmbisa kã ho. Ndaansa yi ɔkãa kyerɛɛ me dɛ ɔmaa asɛmpasomafo no abamba no kenyaan ne gyedze na n’apɔwmudzen. Ɔkãa dɛ, “Asɛmpasomafo edwuma yɛ ayarsã dodow.” 17
Dɛwdzi. Enyidado. Nyankopɔn no tum a ɔgye hɛn abamba. Bambɔ fi nsɔhwɛ mu. Ayarsa. Iyinom nyina—na binom so (a bɔnfakyɛ kã ho) 18 —sosɔ hɛn akra do dɛ nhyira a ofi sor, ber a yɛkyɛ asɛmpa no.
Afei, Yɛredan akɔ Hɛn Kwan Kɛse a Yenya no
Enuanom na nkyerɛbaa, dodowara … wɔ … ekuw horow, [gyedzi horow,] na som horow mu a … wɔdze nokwar no ehuntsa hɔn osiandɛ wonnyim bea a wobohu efi.” 19 Hia ohia dɛ yɛma hɛn kandzea do nnyɛɛ kɛse dɛm wɔ adasa abakɔsɛm nyina mu da. Na nokwar no nnyɛɛ ma obiara nsa botum akã akyɛn dɛm ber yi.
Jimmy Ton, a onyinii dɛ Buddasomnyi no, n’enyi gyee ebusua bi ho a wɔkyɛɛ hɔn abrabɔ wɔ YouTube do. Ber a ohun dɛ wɔyɛ Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo asɔrmba no, nankasa sũaa asɛmpa no wɔ online, ɔkenkaan Mormon Nwoma a ɔdze app, na ohyiaa asɛmpasomafo wɔ esũapɔn ekyir no, wonumaa no. 20 Sesei Elder Ton nankasa yɛ etuhoakyɛ asɛmpasomanyi.
Ɔno na ne mfɛfo asɛmpasomafo a wɔwɔ wiadze nyina mu no nye Ewuradze no nsordaafokuw no—meserɛ kã nkɔnhyɛnyi n’asɛm no. 21 Ɔson asɛmpasomafo yinom hɔn ndzeyɛɛ na wiadzefo dze: ber a nhwehwɛmu kyerɛ dɛ wiadze mberantsekwa redan efi Nyame nkyɛn no, 22 hɛn mberantsɛ akõfo 23 elderfo na nkyerɛbaa no redan nkorɔfo akɔ Nyame hɔ. Na Asɔrmba dodowara nye asɛmpasomafo bɔmu wɔ asɛmpa ne nkyɛe ho, a wɔroboa anyɛnkofo pii ma wɔaba Christ hɔ na N’Asɔr mu.
Hɛn Latter-day Saintfo a ɔwɔ Liberia boaa anyɛnkofo 507 ma wɔhɛɛn enuma esubura mu abosoom 10 no a nna asɛmpasomafo biara ronnsom wɔ hɔn ɔman mu no. Ber a hɛn stake presidentfo anwanwafo no mu ɔbaako tsee dɛ bi a etuhoakyɛ asɛmpasomafo bɛsan aba no, ɔkãa dɛ, “O oye, afei wobotum aboa hɛn wɔ hɛn edwuma ne nyɛe mu.”
Ɔnoara nye no: Israel mboano—dwuma kɛse a ɔkɔ do wɔ wiadze 24 —nye hɛn ahyɛmu asodzii. Na hɛn mber nye iyi! Me nsato ndɛ da famu koraa: kyɛ asɛmpa no. Ma ɔwoara wo su nda edzi na ma wo kandzea no do. Bɔ mpaa nya ɔsor mboa na dzi sunsum mu nkenyan do. Kyɛ w’abrabɔ dɛ mbrɛ ɔwoara wo su tse, na to nsa frɛ obi so ma ɔaba na ɔabɔhwɛ, ɔaba na ɔabɔboa, na ɔaba na ɔabɛka ho. 25 Na nkyii dzi dɛw ber a ɔwo na hɔn a edɔ hɔn no nya nhyira horow a wɔabɔ ho anohoba no.
Minyim dɛ wɔ Christ mu no nsɛm pa yinom wɔkã kyerɛ abɔbɔfo; wɔ Christ mu no wɔbɛkyekyer hɔn a hɔn akoma ebubu; wɔ Christ mu no wɔbɔbɔ fahodzi ho dawur akyerɛ ndɔmmumfo; na wɔ Christ mu no, Christ mu nko no, na hɔn a wodzi awerɛhow no, wɔma hɔn abɔtsir hyɛ nsõ ananmu. 26 Dɛm ntsi, mbrɛ osi hia dɛ wɔda dɛm ndzɛmba yinom edzi! 27
Megye dase dɛ Jesus Christ nye hɛn gyedzi ne farbaa nye n’ewiei no. 28 Obowie, Ɔbɛhyɛ hɛn gyedzi a yɛdze dzi dwuma no mã—onndzi mu mpo a—dɛ yɛbɛma asɛmpa kandzea no do. Ɔbɛyɛ anwanwadze wɔ hɛn abrabɔ mu na hɔn a Ɔboa hɔn ano nyina hɔn abrabɔ mu, osiandɛ Ɔyɛ Nyankopɔn a ɔyɛ anwanwadze. 29 Jesus Christ ne dzin nwanwa no mu, amen.