Ma Christ Nyɛ W’Asɛm ne Dzikamfo

Medze nsɛmbisa pii bɛhyɛ ase a, hɛnankasa yɛbɔdwendwen ho:

• Ebɛn woho asɛm na erekyerɛw fa w’abrabɔ ho?

• Ana kwan a ekyerɛɛw ho asɛm wɔ w’asɛm no mu no yɛ tɔɔtseen a?

• Ana w’asɛm no wie wɔ bea a ɔhyɛɛ ase no, wɔ wo sor fie?

• Ana fasusu bi wɔ w’asɛm no mu a—na ana ɔno nye Agyenkwa Jesus Christ a?

Midzi dase dɛ Agyenkwa no nye “hɛn gyedzi ne dzikamfo nye no wiefo.” ¹ Ana ibɛma Ɔayɛ w’asɛm ne dzikamfo nye no wiefo?

Onyim ewiei no fi ahyɛse no. Ɔno nye sor nye asaase Bɔfo. Ɔpɛ dɛ yɛsan ba fie ba Ɔno na hɛn Ɔsor Egya no hɔ. Ɔdze biribiara ama hɛn na Ɔpɛ dɛ yedzi konyim.

Isusu dɛ ebɛnadze na osiw hɛn kwan ma yɛnndan hɛn nsɛm mma No?

Bi a dɛm mfatoho yi bɔboa wo wɔ wankasa woho nhwehwɛmu ho.

Asɛndzii mbranyimfo papa biara nyim dɛ wɔ asɛndzii nsɛmbisa mu no, ɔnnsɛ dɛ ibisa dasefo no asɛm a innyim ho nyiano. Sɛ ibisa asɛm a ɔtse dɛm a erema dasefo no kwan ma ɔakã akyerɛ ɔwo—na ɔtsɛmbuafo na asɛndzii abaguafo no—dza innyim no dada. Ibotum enya nyiano a ɔyɛ ahobow na ɔnye wo nsɛm a ahyehyɛ ama asɛndzii no abɔ ebira.

Iribisa dasefo asɛmbisa a innyim ho nyiano no nnyɛ nyansadze mma asɛndzii mbranyimfo dze, naaso n’ebirabɔ no yɛ nokwar ma hɛn. Yebotum ebisa hɛn dɔfo Egya a Ɔwɔ Sor no nsɛmbisa horow, wɔ hɛn Agyenkwa mbɔbɔrhufo no ne dzin mu, na dasefo a ɔma hɛn nsɛmbisa ho nyiano nye Sunsum Krɔnkrɔn no a, aber nyina odzi nokwar ho dase no. ² Osiandɛ Sunsum Krɔnkrɔn no nye Egya a Ɔwɔ Sor na Jesus Christ yɛ edwuma bɔ mu emudzi pɛpɛɛpɛ mu no ntsi, yenyim dɛ ndzɛmba a Sunsum Krɔnkrɔn no da no edzi no yɛ nokwar. Ebɛnadze ntsi na ɔtɔfabi a yekwetsir dɛ yebebisa ɔsor mboa a ɔtse dɛm, nokwar a Sunsum Krɔnkrɔn no da no edzi kyerɛ hɛn? Ebɛnadze ntsi na yɛdze asɛmbisa a yennyim ho nyiano to nkyɛn ber a dasefo no nnyɛ anyɛnkoyɛ nko, mbom ɔbɛkã nokwar no so aber nyina?

Bia ɔnam dɛ yennyi gyedzi a yɛdze bɛgye nyiano a bia yebenya no ato mu. Bia ɔnam dɛ honammunyi a ɔwɔ hɛn mu no kwetsir dɛ ɔbɛdan ndzɛmba nyinara mu ama Ewuradze na ɔdze no werɛ nyinara ahyɛ No mu. Bia ɔno ntsi na yɛsan mu yi dɛ yɛbɛfa hɛnara hɛn asɛm a yɛakyerɛw ama hɛnho no, dza ɔyɛ ahotɔ a Dzikamfo Panyin no nnsesew mu no. Yɛnnkɛpɛ dɛ yebebisa asɛm bi na yebenya nyiano a ɔnnye hɛn asɛm a yɛrekyerɛw ama hɛnho no mmfa pɛpɛɛpɛ.

Nokwar ara, hɛn mu kumaa bi na bi a yɛbɛkyerɛw nsɔhwɛ a ɔtsew hɛnho no ahyɛ hɛn asɛm no mu. Aso ɔnnyɛ dɛw mma hɛn sɛ yɛkenkan asɛm bi na nyia odzi mu akotsen no tum dzi aperper bi do enyimanyam mu wɔ ewiei no a? Nsɔhwɛ nye asɛnkã n’afã a ɔma nsɛm a yɛpɛ no yɛ dɛw dodoodow, a ɔnntwa mu da, ɔto hɛn gyedzi mu, na ɔfata dɛ yɛkyɛ. Aperdzi afɛɛfɛw a wɔakyerɛw akã hɛn nsɛm ho no nye dza ɔtwe hɛn bɛn Agyenkwa no na ɔtsew hɛnho, ma yɛabɛyɛ dɛ Ɔnoara yie.

Ama David eetum eedzi Goliath do nyim no, nna banyimba no wɔ dɛ ohyia ɔkrabran no. David n’ahotɔ asɛm no bɛyɛ dɛ nnkyɛ ɔbɛsan akɔhwɛ nguan no. Mbom ɔdween no sũahu ho ber a ɔgyee nguambaa fii gyata na osisi hɔn nsamu no. Na ogyina dɛm okunyin nkonyimdzi yinom do no, ɔfaa gyedzi na akokodur dɛ ɔbɛma Nyankopɔn akyerɛw n’asɛm a, ɔkãa dɛ, “Ewuradze a oyii me fii gyata na osisi nsamu no, ɔnoara obeyi me efi Philistianyi yi nsamu.” ³ Ɔdze pɛ dɛ Nyankopɔn ndzi nyim, ɔdze asowa ama Sunsum Krɔnkrɔn no, nna pɛ dɛ Agyenkwa no nyɛ n’asɛm no dzikamfo nye wiefo no, banyimba David dzii Goliath do konyim na ɔgyee no nkorɔfo.

Fapem kɛse a ɔyɛ nyimpa ne pɛ no, nokwar ara, ma hɛn kwan ma yɛkyerɛw hɛnankasa hɛn nsɛm—nkyɛ David botum akɔ fie, ɔasan ɔakɔhwɛ nguan. Naaso Jesus Christ gyina a Ɔayɛ krado dɛ Ɔdze hɛn bɛyɛ edwuma dɛ ɔsor edwindadze, akyerɛwndua a wɔasensen ano wɔ Ne nsamu, dze akyerɛw dwuma nwanwasõn bi! Ɔayɛ krado mbɔbɔrhumu ara dɛ ɔdze emi, akyerɛwdua fẽaa yi, bɛyɛ edwindadze wɔ Ne nsamu, sɛ mowɔ gyedzi a medze bɛma No, sɛ mebɛma Ɔakyerɛw m’asɛm no a.

Esther yɛ mfatoho pa kor so a ɔkyerɛ erema Nyankpɔn edzi nyim. Nkyɛ ɔbɛfa ahobambɔ asɛm a ɔdze bɛgye noho no, mbom ɔdze gyedzi dzii dwuma a, ɔdan noho maa Ewuradze koraa. Nna Haman robɔ adwenpɔw dze asɛɛ Jewfo nyina a wɔwɔ Persia. Mordecai a, ɔyɛ Esther no busuanyi, bohun adwenpɔw no na ɔkyerɛwee kɛmaa no, a ɔrehyɛ dɛ ɔnye ɔhen no nkɛkasa mma no nkorɔfo. Ɔkyerɛɛ no dɛ obiara a ɔkɔ ɔhen no n’enyim ber a wɔnntoo nsa nnfrɛɛ no no wokum no. Naaso wɔ gyedzi ho dwuma kɛse mu no, ɔkãa kyerɛ Mordecai dɛ ɔmboa Jewfo no ano na wondzi mbuada wɔ ɔno ntsi. Ɔkãa dɛ, “Emi so na me mbabaawa so bedzi mbuada dɛmara, na medze no dɛm makɔ ɔhen nkyɛn a ɔnnam mbra kwan do: na sɛ mehera a, mahera.” ⁴

Nna Esther wɔ pɛ dɛ ɔbɛma Agyenkwa no akyerɛw n’asɛm a, mpo wɔ honam enyi do no, nkyɛ n’ewiei botum ayɛ awerɛhowsɛm. Nhyira mu ara, ɔhen no gyee Esther, na Jewfo a wɔwɔ Persia nyina nyaa nkwa.

Nyew, wɔnntaa dɛ wobisa Esther n’akokodur no bi wɔ hɛn hɔ. Naaso yɛrema Nyankopɔn edzi nyim, yɛrema Ɔayɛ hɛn nsɛm ne dzikamfo na wiefo no, hia ma hɛn dɛ yedzi Ne mbrasɛm na ahyɛmudzi a yɛayɛ no do. Ɔyɛ mbrasɛm na ahyɛmudzi ne nsiei na obobue nkitahodzi ahoma no ma yenya nyikyerɛ a odua Sunsum Krɔnkrɔn no do. Na ɔnam Sunsum no ne nyɛe horow do na yɛbɛtse Owura no ne nsa dɛ Ɔnye hɛn rekyerɛw hɛn nsɛm.

Ebɔbira 2021 mu, hɛn nkɔnhyɛnyi, Russell M. Nelson, bisaa dɛ yensusu dza yebotum ayɛ ho sɛ yɛwɔ gyedzi mbordo wɔ Jesus Christ mu a. Yɛdze gyedzi mbordo wɔ Jesus Christ mu, yebotum ebisa asɛmbisa a yennyim ho nyiano—yeebisa hɛn Egya a Ɔwɔ Sor, wɔ Jesus Christ ne dzin mu, dɛ ɔmfa nyiano no ndua Sunsum Krɔnkrɔn no do, ɔno a odzi nokwar ho dase. Sɛ yɛwɔ gyedzi mbordo a, yebotum ebisa asɛmbisa na yɛayɛ krado dɛ yɛbɛgye nyiano a hɛn nsa bɛka no ato mu, mpo sɛ ɔnnye hɛn ahotɔ nsɛm no mmfa a. Na anohoba nhyira a ɔbɛba efi dwumdazi wɔ gyedzi mu wɔ Jesus Christ mu no nye gyedzi mbordo wɔ No mu dɛ hɛn dzikamfo nye wiefo. President Nelson kãa dɛ yenya gyedzi “mbordo ber a yɛreyɛ biribi a ohia gyedzi mbordo no.” ⁵

Ntsi, awarfo a wonnyi mba na wonnkotum awo no bebisa wɔ gyedzi mu sɛ wɔntsew mbofra a na wonya pɛ dɛ wɔbɛgye nyiano no ato mu, mpo bi a nsɛm a wɔakyerɛw ama hɔnho no anwanwadze awoo kã ho.

Awarfo mpanyin bi bebisa sɛ mber asõ dɛ wɔbɔkɔ asɛmpasomafo edwuma mu a na wɔyɛ krado dɛ wɔbɔkɔ, mpo bi a hɔn nsɛm a wɔakyerɛw ama hɔnho no mber pii wɔ edwuma mu kã ho. Anaa nyiano no bɛyɛ “nnyɛ seiseiara,” na ekyir yi wɔ hɔn nsɛm mu no wobohu siantsir a nna wohia hɔn wɔ fie mber tsentsen kakra.

Akataasiaba anaa banyimba bi bebisa wɔ gyedzi mu sɛ ondzi n’agodzi akansi ekyir anaa adzesũa anaa ndwom tow ma ho hia mapã a, na ɔwɔ dɛ ɔyɛ krado dɛ obedzi dasefo emudzinyi, Sunsum Krɔnkrɔn no ne nkenyan do.

Ebɛnadze ntsi na yɛpɛ dɛ Agyenkwa no yɛ hɛn nsɛm no ne dzikamfo nye no wiefo? Ɔnam dɛ onyim dza yebotum abɛyɛ emudzi mu ara, na Ɔdze hɛn bɔkɔ mbeambea a yennsusui mmaa hɛnho da. Ɔbɛyɛ hɛn tse dɛ David anaa Esther bi. Ɔbɔtwe hɛn mu na Ɔatsew hɛnho ma yɛabɛyɛ dɛ Ɔnoara yie. Ndzɛmba a yebenya ber a yɛdze gyedzi mbordo dzi dwuma bɛma hɛn gyedzi wɔ Jesus Christ mu ayɛ mbordo.

Enuanom mbanyin na nkyerɛbaa, afe kor a etwa mu yi hɛn nkɔnhyɛnyi dɔfo bisaa dɛ: “Ana epɛ dɛ ema Nyankopɔn dzi nyim wɔ w’abrabɔ mu? … Ana epɛ dɛ biribiara a Ohia ɔwo ma ayɛ no bor ɔahwehwɛdze biara do a?” ⁶ Ahobrɛadze mu ara medze bi kã nkɔnhyɛ nsɛmbisa no ho: “Ana ebɛma Nyankopɔn ayɛ w’asɛm ne dzikamfo nye no wiefo?”

Nyikyerɛ nwoma mu no, yesũa dɛ yebegyina Nyankopɔn n’enyim na woebu hɛn atsɛn efi nkwa nwoma no mu, dɛ mbrɛ hɛn ndwuma tse. ⁷

Wɔdze hɛn nkwa nwoma no bobua hɛn atsɛn. Yebotum asanmu afa dɛ yɛbɛkyerɛw ahotɔ nsɛm ama hɛnho. Anaa dɛ yɛbɛma Dzikamfo nye Wiefo Wura no kwan ma ɔnye hɛn akyerɛw hɛn nsɛm, a yɛrema dwuma a Ɔpɛ dɛ yedzi no bor hɛn ahwehwɛdze biara do.

Ma Christ nyɛ w’asɛm ne dzikamfo nye no wiefo!

Ma Sunsum Kɔnkrɔn no nyɛ wo dasefo!

Kyerɛw asɛm a kwan a enam do wɔ mu no yɛ tɔɔtseen, wɔ kwan a ɔdze wo resan akɔ wo sor fie akɛtsena Nyankopɔn nkyɛn.

Ma abɛbrɛsɛ na ahohiahia a ɔkã asɛm papa biara ho no nyɛ kwan a edze bɔtwe abɛn, na abɛyɛ dɛ, Jesus Christ yie.

Kyerɛw asɛm a no mu no, ihu dɛ ɔsor ebuei. Bisa asɛmbisa a nnyim ho nyiano, a inyim dɛ Nyankopɔn ayɛ krado dɛ Ɔbɛda Ne pɛ ma wo no edzi a odua Sunsum Krɔnkrɔn no do.

Ma wo asɛm no nyɛ gyedzi dze, nyia ɔyɛ wo Fasusu a edzi n’ekyir, Agyenkwa Jesus Christ no. Jesus Christ ne dzin mu, amen.