Yɛreyɛ Yie wɔ Christ mu: Ntaae Abɛbusɛm no.

Meyɛ aberantsɛba no, nna mowɔ enyidado horow akɛse. Da kor bi a mopon skuul no mibisaa me maame dɛ: “Maame, sɛ minyin a ebɛnadze na menyɛ: baskɛtbɔl agordzinyi a ɔawea anaa ɔdwontownyi a ɔagye dzin?’’ Ɔyɛ yaw dɛ, Clark a “onnyi ahom a wɔdze yɛ biribi soronko’’ no annkyerɛ nsɛnkyerɛdze nwanwa bi dɛ ɔwɔ ndaamba mbirikatunyi anaa adwontow ho enyimyam biara. Na mbɔdzembɔ ahorow mpo no, wosisii do amma mo kwan ma mannkɔ mo skuul mpontu adzesũa nhyehyɛɛ no. Ekyir no m’akyerɛkyerɛfo susuii dɛ mingyina adzesũa dan mu adzesũa hɔ ara. Mber resen no, menyaa adzesũasu dze hyɛɛ ananmu. Mbom m’asɛmpakã dwuma wɔ Japan na ɔmaa metsee dɛ me nyimdzee na sunsum mu akwanhorow ahyɛ ase rifir edzi. Mokɔɔr do yɛɛ edwuma dzen. Na mbom wɔ mber a odzi kan wɔ m’abrabɔ mu no, meyɛɛ nhyehyɛɛ pɛpɛɛpɛ dze Ewuradze kãa mo mpontu ho, na ɔdze nsesã bae.

Enuanom na nkyerɛbaa, wɔ Asɔr yi mu no, yɛgye Nyankopɔn ne mba nyina hɔn nkrabea krɔnkrɔn no dzi na hɛn ahom dɛ yɛbɛyɛ yie wɔ Christ mu. Ewuradze ne mber mu no, ɔnnyɛ bea a yɛhyɛ ase, mbom bea a yɛrokɔ na ohia kɛse. ¹

Mibegyina nkontaabu ahyɛsedze bi do, dze akyerɛ fapem yi. Afei, mma hom mmbɔ hu dɛ hom bɛtse kasafua nkontaabu wɔ wiadze mfɛndzanan ehyiadzi mu. Hɛn BYU–Idaho nkontaabu akyerɛkyerɛfo no ma me awerɛhyɛmu dɛ ahyɛasenyi no mpo bosuo adwen tsitsir yi mu dzen. Ɔdze kyerɛpɛn ne nhyehyɛɛ hyɛ ase. Hɛn botae horow no ntsi, bea a wohyia, no nye hɛn kyerɛpɛn n’ahyɛse. Bea a wohyia no botum enya sor anaa ase ahyɛse bea. Nkyii kyerɛpɛn ne ntaae, a obotum ataae akɔ sor anaa woesian.

Hɛn nyina yɛwɔ nhyiae asorɔtow wɔ hɛn abrabɔ mu—yɛhyɛ ase wɔ mbeambea ahorow a yɛdze akyɛdze horow. Binom wɔdze nhyiae ahorow a ɔkrɔn, na akwan nya beberee woo hɔn. Binom so hyia ahyɛse gyinabew horow a ɔyɛ nsɔhwɛ na ɔyɛ dɛ ma ɔyɛ nsisi. ² Afei yɛkɔ kan wɔ ankorankor kankɔ ntaae do. Hɛn ntaae na ɔbɛkyerɛ hɛn ndaamba koraa akyɛn hɛn ahyɛse bea. Jesus Christ hu nkrabea krɔnkrɔn a, bea a yɛhyɛ ase mmfa ho. Ohun no wɔ adzeserɛnyi, dzebɔnyɛnyi na ayarfo no mu. Ohun no wɔ nam enufo, towgyenyi, na mpo zealotnyi no mu. Bea a yɛhyɛ ase mmfa ho no, Christ susu dza yɛdze dza wɔdze ama hɛn no yɛ. ³ Ber a wiadze tsim wɔ hɛn nhyiae do no, Nyankopɔn tsim wɔ hɛn ntaae do. Ewuradze no nkontaabu mu no, Ɔbɛyɛ adzebiara a Obotum no dze aboa hɛn ma yɛadan hɛn ntaae no dze ahwɛ sor.

Fapem yi wɔdɛ ɔma hɔn a wodzi aper no awerɛkyekyer na ɔhomee ma hɔn a ɔyɛ dɛ wɔwɔ mfaso biara no. Hom mma menhyɛ ase nkasa nkyerɛ ankorankor a wɔwɔ ahyɛse nkõdzen gyinabew horow a, ohia, wonnya nwomasũa ho kwan, na ebusua gyinabew horow a ɔyɛ dzen mu ka ho no. Binom so wɔ honandua mu nsɔhwɛ, adwen mu yarba esintɔ, anaa ebusua mu yarba a wɔdze woo hɔn. ⁴ Obiara a ɔdze ahyɛse bea a ɔyɛ dzen ridzi aper no, meserɛ hu dɛ Agyenkwa no nyim hɛn aperdzi. Na “Ɔfaa [hɛn] mberɛwyɛ too no do, ama ehumbɔbɔr [eetum] aahyɛ n’abadaa mã …ma [oetum] ehu … mbrɛ obesi aboa [hɛn] dɛ mbrɛ [hɛn] mberɛwyɛ tse no.” ⁵

Hom mma me nkã nkuranhyɛ n’afã ebien mma hɔn a woehyia ahyɛse nkõdzen gyinabew horow no. Odzi Kan, tsim wɔ bea a erokɔ no do na nnyɛ bea a ehyɛɛ ase no do. Ɔbɛyɛ mfom dɛ ebobu w’enyiwa egu wo gyinabew horow no do—wɔwɔ hɔ na ohia dɛ wodzi ho dwuma. Mbom iritsim dodow wɔ nkõdzen ahyɛse bea do no botum ama wɔaakyerɛ na mpo woeesianka w’ahom a edze bɛsan mu eyi no do. ⁶

Mfe pii a wɔabɛsen kɔ no, menye mbabun bi a wofi Boston, Massachusetts kuropɔn n’afa a ɔkyer, a nna wohun asɛmpa no nnkyɛree na wɔwɔ enyidoadze wɔ Asɔr no ho somee. Nna ɔyɛ dzen dɛ mennkɛfa me tsema na hɔn tsebea ne haw no, enya pɛ dɛ mebɛbrɛ Nyankopɔn ne gyinapɛn no adze. ⁷ Ekyir no muhun dɛ tum dodoodow kwan a nna mebɛkyerɛ modɔ nye dɛ mennkɛbrɛ m’enyidoadze ase dabiarada. Medze biribiara a minyim na meyɛ no, yɛbɔmu tsimii wɔ hɔn hyɛbea do, na hɔn mu kor biara hyɛɛ ase maa hɔn ntaae no do sor. Hɔn nyin wɔ asɛmpa mu no yɛɛ nkakrakakra na mbom ɔyɛɛ nkɔr do. Ndɛ, wɔasom asɛmpakã dwuma ewie, woewiewie esũpɔn, wɔawarwar wɔ temple, na wɔrobɔ hɔnankasa hɔn abra nwanwa mu na wɔreyɛ hɔn edwuma.

Otsĩa Ebien, enye Ewuradze nkã wo kankɔ mu wɔ kwan a opegya wo ntaae. Ber a nna morosom dɛ BYU–Pathway Wiadze mfɛndzanan president no, mekaa dɛ nna metsena mpaabɔsom kɛsenara bi ase wɔ Lima, Peru, a nna Elder Carlos A. Godoy na ɔbɛkasa. Ber a ɔhwɛɛ mboanofo no, ɔtɔɔ no do dɛ ɔrohwɛ ebusuasantsen a odzi kan esũapɔn adzesũafo anokwafo. Ebia nna ɔrodwendwen ɔnoara n’anamɔn kwan a ɔdze duaa nkõdzen gyinabew horow a ɔtse dɛm mu no, Elder Godoy kãa no awɔse mu dɛ: “Ewuradze bɔboa wo akyɛn ma ɔwoara botum aboa woho. [Ntsi no], enye Ewuradze nkã wo kankɔ kwan a no ho.” ⁸ Nkɔnhyɛnyi Nephi kyerɛkyerɛɛ dɛ “yenyim dɛ dza yebotum ayɛ nyinara ekyir no wɔnam adom do na wɔbɛgye hɛn nkwa.” ⁹ Otwar dɛ yɛyɛ dza oye koraa, ¹⁰ a nnuhu ka ho, naaso wɔnam N’adom nko do na yebotum dze ehu hɛn nkrabea krɔnkrɔn. ¹¹

Ewiei no, hom mma me nkã afotusɛm n’afã ebien mma hɔn a wɔwɔ ahyɛse mbea horow a ɔkrɔn no. Odzi Kan, yebotum akyerɛ ahobrɛadze ama gyinabew horow a hɛnara yɛannyɛ amma hɛnho no? Dɛ nkaano BYU President Rex E. Lee serɛɛ kãa kyerɛɛ n’adzesũafo no, “Hɛn nyinara anom efi nsu bura a yenntu mu na yɛakã hɛnho hyew efi ogya a yennkõa ho.’’ ¹² Afei ɔserɛɛ n’adzesũafo no dɛ wɔnnsan mmfa mma na ɔnhyɛ adzesũa nsubura a abɔase edzikamfo no tuii no mã. Yɛannsan enndua nduadzewa wɔ nsaase a binom duaa adze wɔ do no a ɔtse dɛ eresan dze talent a ɔanndɔr rokɔ.

Otsĩa Ebien, yeritsim wɔ ahyɛse bea a ɔkrɔn do no botum atɔ dɛ osũa hɛn efir ma yɛatse dɛ yeridzi yie, ber a nokwar, ebia hɛn mu ntaae no etsii. Harvard ɔbemfo Clayton M. Christensen kyerɛkyerɛɛ dɛ hɔn a woedzi yie ankasa no yɛ ahobrɛadzefo dodow, osiandɛ wɔwɔ awerɛhyɛmu ara dɛ obi bɛtsen hɔn na woesũa efi obiara hɔ. ¹³ Elder D. Todd Christofferson tuu hɛn fo dɛ “ɔpɛ mu ara [yɛnhwehwɛ akwanhorow] a yɛdze bɛgye atsentsen ato mu na mpo yɛahwehwɛ.’’ ¹⁴ Sɛ ndzɛmba mpo yɛ dɛ ɔrokɔ yie a, otwar dɛ yɛhwehwɛ akwan horow dze dua ntotɔserɛ mpaabɔ do tu mpon.

Ɔmmfa ho dɛ sɛ yɛhyɛ ase wɔ prɔmprɔmyɛ mu anaa nkõdzen gyinabew horow mu o, yebenya hɛn ewiei hyɛbea no nko sɛ yɛma Nyankopɔn yɛ hɛn adamfo a. Ɔnnkyɛree na menye ɔman mu nwomasũa nyimdzeefo bi a nna ɔrohwehwɛ BYU–Pathway hɔn konyimdzi mu ho asɛm dzii nkɔmbɔ. Ɔyɛ ɔbemfo na no nhwehwɛmu no yɛ nokwar, naaso nna ɔda edzi dɛ ɔpɛ wiadzesɛm mbuae. Menye no kyɛɛ hɛn atsenase nhyehyɛɛ na ntsetsee mbɔdzembɔ. Mbom me kãa dze wiei dɛ, “Iyinom nyina yɛ ndzeyɛɛ apapa, mbom siantsir ankasa a hɛn adzesũafo no rokɔ kan nye osiandɛ yɛkyerɛkyerɛ hɔn hɔn nkrabea krɔnkrɔn ntsi a. Susu dɛ sɛ w’abrabɔ mu nyina no, wɔkãe kyerɛɛ wo dɛ nnkotum edzi konyim da. Afei hwɛ dɛ wɔrekyerɛkyerɛ wo dɛ ɔyɛ nokwar dɛ eyɛ Nyankopɔn ne babanyin anaa ne babaa a ɔwɔ hyɛbea krɔnkrɔn no nsunsuando.’’ Ɔhomee, na afei obuae ara dɛ, “Tum wɔ mu ankasa.’’

Enuanom na nkyerɛbaa, anwanwadze horow a ɔwɔ Ewuradze N’Asɔr yi mu, kor nye dɛ, hɛn mu kor biara botum abɛyɛ biribi yie wɔ Christ mu. Minnyim kuw biara so a ɔma ne mba akwan horow ma wɔsom, wɔsan dze ma, wonu hɔnho, na wɔbɛyɛ nkorɔfo apapa. Sɛ yɛhyɛ ase wɔ prɔmprɔmyɛ anaa nkõdzen gyinabew horow mu o, hom mma yɛmma hɛn adzehwɛ na hɛn ntaae ntsen nkɔ sor. Sɛ yɛyɛ a, Christ bepegya hɛn akɔ bea a ɔkrɔn. Jesus Christ ne dzin mu, amen.