Nya Awerɛhyɛmu Bio

Mber bi, musuar koraa no, minyaa adwen mber kumaa bi dɛ munguan mfi fie. Banyimba-kakraba n’akwan do no, metsee dɛ obiara nndɔ me.

Me maame a ɔhyɛ adze nsew yie no tsiei na ɔhyɛɛ me nkuran. Nna mowɔ ahotɔ mu wɔ fie.

Ana enya atsenkã dɛ iruguan efi fie a? Ɔtaa dɛ iruguan efi fie kyerɛ dɛ awerɛhyɛmu no esuãm anaa ɔapa—awerɛhyɛmu a yɛwɔ ma hɛnankasa hɛnho, ma hɛnho nkorkor, wɔ Nyame mu. Sɛ ekyingye ba awerɛhyɛmu ho a, woana na yebotum atwer no bio.

M’asɛm ndɛ nye dɛ, sɛ yɛreba fie anaa yɛrokɔ fie no, Nyankopɔn reba ebehyia hɛn kwan. ¹ No mu na yebotum enya gyedzi na akokodur, nyansa na nhumu dze enya awerɛhyɛmu bio. Dɛmara so, Ɔse hɛn dɛ yengya kandzea no nwɔ do mma hɛnho nkorkor, yɛmfa bɔn nkyɛ ara yie na mma yɛmmbua hɛnankasa hɛn ho, na hɛnho nkorkor atsɛn, ama N’Asɔr no aabɛyɛ bea a yɛbɛtse dɛ yɛaba fie, sɛ mpɛn a odzi kan a yɛreba anaa yɛresan aba o.

Awerɛhyɛmu yɛ gyedzi ndwuma. Nyankopɔn gye hɛn dzi. Naaso, awerɛhyɛmu wɔ nyimpa mu no wobotum asɛɛ anaa woebu ber a:

• Nyɛnko, edwumayɛnyi, anaa obia hɛn werɛ hyɛ no mu enndzi nokwar, opira hɛn, anaa osisi hɛn. ²

• Awar mu ɔhokafo a ɔtõ awar.

• Bia awerɛfir mu ara, obi a yɛdɔ no hyia owu, opira, anaa ɔyar.

• Yehyia asɛmpa ho asɛmbisa a enyi annda, bia ɔyɛ biribi a ɔfa Asɔr abakɔsɛm anaa nhyehyɛɛ ho no, na obi kã dɛ hɛn asɔr dze biribi siei anaa ɔannkã nokwar no.

Gyinabew binom so nnkɛyɛ pɔkyee naaso ɔbɛgye adwen kor noara.

Bia yennhu hɛnho dɛ yɛkã Asɔr no ho, yennhu dɛ yɛfata kuwbayɛ, yɛtse nkã dɛ binom bua hɛn atsɛn.

Anaa, yɛayɛ biribiara a enyida dɛ yɛbɛyɛ nyina ekyir no, ndzɛmba annkɔ do yie. Yeenya ankorankor sũahu wɔ Sunsum Krɔnkrɔn nyina ekyir no, bia yennnya atsenkã dɛ yenyim dɛ Nyankopɔn tse ase anaa asɛmpa no yɛ nokwar.

Dodowara tse nkã dɛ ɔyɛ ehiadze kɛse dɛ yɛdze awerɛhyɛmu wɔ nyimpa ntamu nkitahodzi na ndɛ ɔmanyɛ san ananmu ba. ³

Ber a yɛdwendwen awerɛhyɛmu ho no, yenyim dɛ Nyankopɔn nye Nyame nokwafo no, na “[o]nntum nndzi ator.” Yenyim dɛ nokwar nye ndzɛmba a nkyɛ ɔwɔ hɔ, nye dza ɔwɔ hɔ seseiara, nye dza ɔbɛba no ho nyimdzee. ⁵ Yenyim dɛ nyikyerɛ a wɔkɔ do nya na nkenyan ma nokwar a ɔnnsesã saa gyinabew a ɔsesã.

Yenyim dɛ ahyɛmudzi a woebu do bubu akoma. Kun no bɛkã dɛ, “Meyɛɛ dza omuo. Ana ibotum edze akyɛ me da?” Kun na yer no botum esuo nsa mu, dze enyidado dɛ wobotum enya awerɛhyɛmu bio. Gyinabew bi a ɔson mu no, daduanyi bi dwendwen dɛ, “Sɛ misiei Enyansasɛm no a, nkyɛ ndɛ nnyɛ me dabew nye yi.”

Yenyim dɛm dɛwdzi no a ɔwɔ Ewuradze n’ahyɛmu anamɔn kwan no do, na ɔfrɛ horow dɛ yɛnsom wɔ N’Asɔr mu no yɛ nsato dɛ yɛbɛtse Nyankopɔn n’awerɛhyɛmu na ɔdɔ ma hɛnankasa hɛnho na ma hɛn ho nkorkor. Asɔrmba a, single adultfo kã ho, kɔ do ara som wɔ Asɔr ne nyina mu na wɔ hɛn sɔn ahorow mu.

Wɔdze nkenyan no, bishop na n’apamfo frɛ awarfo aberantsɛba na akataasia bi dɛ wɔnsom wɔ ward nursery. Ahyɛse no, kun no tsena dodoomu a, ɔatsew noho na n’adwen wɔ ekyirekyir. Nkakrankakra, ɔhyɛase nye mbofra no yerɛw hɔn ano. Ekyir no, awarfo no kã hɔn enyisɔ kyerɛ. Wɔkã dɛ, kan no, nna ɔyer no na ɔrohwehwɛ mba; kun no ronnhwehwɛ. Sesei, wɔrosom no asesã hɔn na wɔakã hɔn abɔ mu. Ɔdze mbofra ho enyigye aba hɔn awar na fie mu.

Kuropɔn bi so mu no, enã kumaa na ne mba nkakraba na no hokãfo ayɛ hɔn ahobow na abor hɔn do naaso ɔgye to mu ber a wɔfrɛɛ no dɛ ɔnsom dɛ ward no ne Relief Society president no. Annkyer, esukwankyɛaba ehum twa enyinam ahoɔdzen mu a, ogya fiadze a wɔatotɔ pan na efiefi a wɔayɛ nwin dɛ ice ndakaba. Osiandɛ wɔwɔ enyinam ahoɔdzen na hyew ntsi, ebusua kumabaa yi bue hɔn fie ayamuyie mu ara ma ebusua ebusua pii na ankorankor dɛ wɔbɔsɔw ehum no.

Awerɛhyɛmu tahye yie ber a yɛdze gyedzi yɛ ndzɛmba dzen. Som na afɔrbɔ tow hɛn mbɔdzembɔ mu na ɔtsew akoma ho. Yetwer Nyankopɔn na hɛnho nkorkor a ɔdze ɔsor nhyira horow ba.

Onuabanyin nokwafo bi onyaa apɔwmudzen wɔ kokoram yarba ekyir no, na kaar bɔɔ no. Nkyɛ ɔbɛma awerɛhowdzi ahyɛ no do no, mpaabɔ mu ara obisaa dɛ, “Ebɛnadze na mubotum esũa efi dza wɔato me yi ho?” Ɔda asopitsi ayarfo nhwɛdo bea kɛse hɔ no, onya nkenyan dze hu nees bi a ɔrehaw wɔ kun na ne mba ho. Ɔyarfo a ɔwɔ yaw mu no nya mbuae fi Nyame hɔ ber a ɔtsen hwɛ binom do.

Ber a onuabanyin bi a ehuhu mfonyin rehaw no tweɔn wɔ ne stake president ɔfese abow ano no, stake president no bɔ mpaa dze ehu mbrɛ obesi bɔboa. Nkenyan pefee bi ba, “Bue abow no na ma onuabanyin no mbra mu.” Ɔdze gyedzi na awerɛhyɛmu dɛ Nyame bɔboa no, asɔfodzi baanodzinyi no bue abow no na ofua onuabanyin no. Kor biara tse ɔdɔ a ɔsakyer na awerɛhyɛmu wɔ Nyame mu na ma hɔnho nkorkor ho nkã. Ɔahyɛ no dzen no, onuabanyin no botum ahyɛ nnuho ase na ɔasesã.

Ber a hɛn mu biara ne gyinabew yɛ ankorankor no, asɛmpa fapem na Sunsum Krɔnkrɔn no botum ama yeehu sɛ yebenya awerɛhyɛmu wɔ binom mu bio a, mbrɛ yebesi bɛyɛ, na ber no. Sɛ awerɛhyɛmu pa, anaa woyi wo maa, abagura ba na enyidado yew ampara, dɛmara na ohia dɛ yenya nhumu dze ehu ber a gyedzi na akokodur ho hia dɛ ɔfata dɛ yɛtwer nyimpa ntamu nkitahodzi bio.

Naaso, ɔfa Nyankopɔn na ankorankor nyikyerɛ ho no, President Russell M. Nelson si hɛn tadua dɛ, “Onnhia dɛ ɔbɛyɛ wo adwendwen nyia ibotum atwer no ahotɔ mu.” Yebotum yɛatwer Nyankopɔn daa. Ewuradze nyim hɛn yie na Ɔdɔ hɛn kyɛn ma yɛnyim anaa yɛdze dɔ hɛnho. No dɔ a ɔmmbɔadze na Ne nyimdzee a odzi mu wɔ dza wɔabɛsen, ndɛ dze na ndaamba no ma N’ahyɛmu na anohoba nnsesã na otsim hɔ.

Awerɛhyɛmu nye dza kyerɛwsɛm frɛ no “aber no mu ara no.” ⁷ Yɛdze Nyankopɔn ne nhyira no, aber no mu ara no, na yɛrokɔ do wɔ gyedzi na setsie mu no, yebenya ho nyiano na asomdwee.

Ewuradze kyekye werɛ dɛ:

“Osũ ba bɔsoe anago, na enyigye ba anapa.” ⁸

“Tow w’adzesoa kyen Ewuradze [do] na twer no nhwɛdo aber biara.” ⁹

“Asaase nnyi awerɛhow biara a ɔsor nnkotum apepa.” ¹⁰

Fa wo werɛ twer Nyame ¹¹ na N’anwanwadze. Hɛn na hɛn nkorɔfo ntamu nkitahodzi botum asesã. Ɔnam Ewuradze Christ no werdambɔ no no do, yebotum apɔr hɛn pɛsɛankonya nyimpa su na yɛabɛyɛ Nyame ne ba, yɛadwe, enya ahobrɛadze, ¹² gyedzi ahyɛ [hɛn] mã nye awerɛhyɛmu a ɔfata. Sɛ yenu hɛnho, sɛ yɛkã hɛn bɔn kyerɛ na yɛpoow hɛn bɔn a, Ewuradze kã dɛ Ɔrennkaa no bio. ¹³ Ɔnnyɛ dɛ No werɛ fir; mbom, wɔ kwan soronko bi do no, ɔyɛ dɛ Ɔsan mu yi dɛ Ɔrennkaa, nna onnhia dɛ yɛkaa.

Nya awerɛhyɛmu wɔ Nyame ne nkenyan a edze nya nhumu nyansa mu. Yebotum yɛdze binom bɔn akyɛ hɔn wɔ mber na kwan pa mu, dɛ mbrɛ Ewuradze ase dɛ otwar dɛ yɛyɛ no, ¹⁴ a yɛnyɛ enyansafo dɛ nwɔ, na [yɛn]yɛ krɔɔn dɛ mbubur.” ¹⁵

Ɔtɔfabi a ber a hɛn akoma abobɔ na abotow no, yebue kwan ara yie ma Sunsum Krɔnkrɔn no n’awerɛkyekye na kwankyerɛ. ¹⁶ Afɔbu na bɔnfakyɛ nyina hyɛ ase ber a yehu dɛ yɛafom. Ɔtaa dɛ afɔbu tsim wɔ dza abɛsen kɔ do. Bɔnfakyɛ dze fahodzi hwɛ ndaamba. “Na Nyankopɔn annsoma ne Ba wɔ wiadze dɛ ombobu wiadze atsɛn, na dɛ wondua no do ngye wiadze nkwa.” ¹⁷

Ɔsomafo Paul bisa dɛ, “Woana bɛtsew hɛn efi Christ dɔ no ho?” Obua dɛ, “Nnyɛ owu, anaa nkwa, … anaa krɔnkrɔnn, anaa bun … runntum nntsew hɛn [mm]fi Nyankopɔn dɔ no a ɔwɔ hɛn Ewuradze Christ Jesus mu no ho.” ¹⁸ Naaso, obi wɔ hɔ a obotum atsew hɛn efi Nyame na Jesus ho—na dɛm obi no nye hɛn, hɛnankasa. Dɛ mbrɛ Isaiah se no, “Na hom bɔn na apaa hom nye hom Nyankopɔn ntamu.” ¹⁹

Ɔnam ɔsor dɔ na ɔsor mbra do, yɛwɔ asodzi wɔ hɛn nsanmuyi horow na hɔn nsunsuando. Mbom hɛn Agyenkwa no ɔpon ho dɔ no yɛ onnyiewiei na ɔmmbɔadze da.” ²⁰ Ber a yɛayɛ krado dɛ yɛba fie no, ber a “yɛda ho wɔ ekyirekyir” ²¹ mpo no Nyankopɔn ayɛ krado dze ayamuhyehye kɛse bɛyɛ hɛn akwaaba, na enyigye mu ara Ɔama hɛn dza ɔsom bo kɛse a Ɔwɔ. ²²

President J. Reuben Clark kãa dɛ, “Megye dzi dɛ hɛn Ɔsor Egya pɛ dɛ Ɔgye ne mba nyina nkwa, … na wɔ ne pɛrpɛrdzi na ehumbɔbɔr mu no Ɔbɛma hɛn akatua kɛse a Ɔwɔ no ama hɛn ndwuma, Ɔama hɛn dza Obotum ama nyina, na n’afã no, megye dzi dɛ Ɔdze ntsẽa ketseaba koraa a Obotum no dze bɛma hɛn.” ²³

Mbeamudua no do no, hɛn Agyenkwa n’ehumbɔbɔr ntotɔserɛ ma N’Egya annyɛ dza onngyina hwee do “Egya, fakyɛ hɔn” mbom ɔyɛ “Egya, fakyɛ hɔn; na wonnyim dza wɔreyɛ.” ²⁴ Hɛn pɛ na fahodzi wɔ asekyerɛ osiandɛ yɛwɔ nkontaabu wɔ Nyankopɔn enyim na hɛnho wɔ hɛn nyimpa ban, wɔ dza yenyim na yɛyɛ ho. Ndaase mu ara, yebotum enya awerɛhyɛmu wɔ Nyankopɔn ne pɛrpɛrdzi na ehumbɔbɔr emudzi mu dze ebua atsɛn emudzi mu wɔ hɛn nsusui na ndzeyɛɛ ho.

Yebowie dɛ mbrɛ yɛhyɛɛ ase no—yɛdze Nyankopɔn n’ayamuhyehye ber a hɛn mu kor biara ba fie ba No hɔ na hɛnho nkorkor.

Ana hom kaa Jesus Christ abɛbu a ɔfa ɔbanyin bi a ɔwɔ mba beenu ho no? ²⁵ Babanyin kor fii fie na ɔhweer n’egyapadze. Ber a n’enyi baa noho do no, babanyin hwehwɛɛ dɛ ɔsan ba fie. Ba kor no, nyaa atsenkã dɛ oesie mbrasɛm no “mfe pii yi,” ²⁶ na ɔammpɛ dɛ ɔyɛ no nua no akwaaba ba fie.

Enuanom na nkyerɛbaa, ana hom bosusu dɛ Jesus rese hɛn dɛ yembue hɛn akoma mu, hɛn ntseasee mu, ayamuhyehye na ahobrɛadze, na yɛnhwɛ hɛnho wɔ enuanom beenu no nyina mu?

Tse dɛ babanyin anaa babaa a odzi kan no, yebotum ekyinkyin na ekyir no yɛahwehwɛ asan aba fie. Nyankopɔn rotweɔn ayɛ hɛn akwaaba.

Na tse dɛ babanyin anaa babaa kor no, Nyankopɔn totɔserɛ hɛn ɔdwe mu ara dɛ yembɔ mu ndzi dɛw ber a kor biara ba No hɔ wɔ fie. Ɔto nsa frɛ hɛn dɛ yɛma hɛn mboanofo, quorumfo, adzesũabea horow na dwumadzi horow nda hɔ, ɔnyɛ papa, bambɔ—nyɛ fie mma hɛnho nkorkor. Yɛdze ayamuyie, ntseasee, na obu ma hɛnho nkorkor no, hɛn nyina yɛnhwehwɛ Ewuradze ahobrɛadze mu na yɛmbɔ mpaa na yɛnfua N’asɛmpa a wɔdze asan ananmu aba ne nhyira mma obiara.

Hɛn abrabɔ akwantu no yɛ ankorankor, naaso yebotum edua awerɛhyɛmu wɔ Nyankopɔn mu, hɛn ho nkorkor, na hɛnankasa ho asan aba Nyame Egya na No Dɔba Jesus Christ hɔ bio. ²⁷ Jesus frɛ, “Mma nnsuro, gye dzi ara.” ²⁸ Tse dɛ mbrɛ Nkɔnhyɛnyi Joseph yɛe, yerunnsuro dɛ yɛbɔtwer Ɔsor Egya dɛ Ɔhwɛ hɛn do. ²⁹ Onua dɔfo, akyerɛbaa dɔfo, nyɛnko dɔfo, meserɛ, hwehwɛ gyedzi na awerɛhyɛmu bio—anwanwadze a Ɔdze bɔ wo anohoba ndɛ. Jesus Christ ne dzin krɔnkrɔn no mu, amen.