Wɔdze Enyimnyam nye Nyankopɔn no Tum Kɛse

Enyido-adzehu a Odzi Kan ekyir bɛyɛ mfe ebiasa no, Fankwa 21, 1823 anafua no, nna akɔkowaba Joseph Smith robɔ mpaa dze agye bɔnfakyɛ na oehu ne gyinabew wɔ Nyame enyim. ¹ Nyimpa-su bi puee ne mpa ne nkyɛn, ɔdze Joseph ne dzin frɛɛ no, na ɔsee dɛ “ɔyɛ ɔbɔfo a wɔsomaa no fii Nyame nkyɛn … na wɔfrɛ no Moroni.” Ɔkyerɛkyerɛɛ mu dɛ “Nyame wɔ dwumadzi bi dze ma [Joseph]” ² na nkyii ɔkyerɛkyerɛɛ no faa Mormon Nwoma no no mpuei ho. Tsitsir ara, Mormon Nwoma no yɛɛ nsɛngyinado a odzi kan a Moroni kãa ho asɛm.

Mormon Nwoma no yɛ Jesus Christ n’ahyɛmu kor so na nsakyeree ho edwindadze kɛse wɔ nda a odzi ekyir yi mu. Hɛn botae a yɛdze kyɛ asɛmpa no nye yɛbɔto nsa afrɛ obiara ma ɔaba Jesus Christ hɔ, ³ ɔagye asɛmpa nsan-ananmu ne nhyira, na oedua gyedzi wɔ Agyenkwa no mu asɔw ekodu ewiei. ⁴ Yɛroboa ankorankor ma woenya akoma mu nsakyer kɛse ho sũahu ⁵ na wodua ahyɛmudzi na ayɛdze krɔnkrɔn do nye Ewuradze hyɛ bɔw yɛ asɛmpakã no fapem botae no.

Mormon Nwoma ne nyienyim a Moroni dze maa Joseph Smith no na ɔhyɛɛ nkwagye na nkwagye ntowdo ho edwuma ma ankorankor wɔ ntwamutam n’afã ha yi wɔ mberano mãhyɛ mu.

Ɔrosɔw ne nkyerɛkyerɛ a ɔdze maa Joseph do no, Moroni toaa do serɛe kãa Malachi nwoma a ɔwɔ Ahyɛmu Dadaw mu nsɛm, a ɔasesã kasa no kakra fi Ɔhen James nwoma mu no:

“Hwɛ, mubodua Elijah nkɔnhyɛnyi no ne nsa do ada Asɔfodzi no edzi akyerɛ hom, ansaana Ewuradze ne da kɛse no a ɔyɛ hu no aba.

“… Na ɔdze anohoba a wɔdze bɔɔ egyanom no bɛhyɛ mba no hɔn akoma mu, na mba no hɔn akoma bɛdan akɔ hɔn egyanom do. Sɛ ɔnntse dɛm a, ber a ɔbɛba no wɔbɛsɛɛ asaase nyina koraa.” ⁶

Hɛn botae a yɛdze sisi temple pii nye yebenya mbea krɔnkrɔn a wobotum ayɛ ahyɛmudzi na ayɛdze krɔnkrɔn horow a ohia ma adasa ebusua hɔn nkwagye na nkwagye ntowdo, ama atseasefo nye ewufo nyina. Moroni ne nkyerɛkyerɛ a ɔdze maa Joseph Smith a ɔfa Elijah na asɔfodzi tumdzi hɔn asɛdze tsitsir nye woebue nkwagye na nkwagye ntowdo edwuma mu wɔ ntwamutam n’afã ha yi na wɔahyɛ ewufo ho edwuma ase wɔ hɛn berano mu wɔ ntwamutam n’afã no ho.

Yetwa no tsia a, Moroni ne nkyerɛkyerɛ wɔ Fankwa afe 1823 mu a ɔfa Mormon Nwoma na Elijah no ndwuma a tahyee kyerɛwsɛm fapem nkyerɛkyerɛ wɔ nkwagye na nkwagye ntowdo edwuma ho wɔ ntwamutam n’afã ebien nyina.

Adzesũadze horow a Joseph Smith sũaa fi Moroni hɔ no nyaa nhyɛdo wɔ no somdwuma ne nyina mu. Mfatoho, awɔse nhyiamu a wɔyɛɛ no wɔ Kirtland Temple wɔ Ebɔbira 6, 1837 no, Nkɔnhyɛnyi no paa mu kãa dɛ: “Wɔakã nsɛm nyina ewie no, asodzi kɛse a ohia tsitsir nye yɛbɛkã Asɛmpa no.” ⁷

Bɛyɛ mfe esuon pɛpɛɛpɛ ekyir no, wɔ Ebɔbira 7, 1844 no, Joseph Smith kãa nsɛm a ndɛ wɔfrɛ no King Follet Asɛnkã no. Ɔkãa wɔ dɛm asɛnkã no mu dɛ, “Asodzi kɛse a Nyankopɔn dze ato hɛn do wɔ wiadze yi mu nye dɛ yɛbɔhwehwɛ hɛn ewufo.” ⁸

Mbom osi dɛn na yɛrekã asɛmpa no na yɛrohwehwɛ hɛn ewufo ebien nyina yɛ dwuma kɛse na asodzi kor a Nyankopɔn dze ato hɛn do? Megye dzi dɛ nna nsɛm ebien nyina mu no, nna Nkɔnhyɛnyi Joseph Smith ritsĩ fapem nokwar mu dɛ ahyɛmudzi horow a, wodua asɔfodzi tumdzi ayɛdze do yɛ no, botum nye hɛn akyekyer Ewuradze Jesus Christ na wɔyɛ nkwagye na nkwagye ntowdo edwuma ho ehiadze tsitsir wɔ ntwamutam n’afã ebien nyina.

Asɛmpakã na temple na ebusua abakɔsɛm edwuma saa na wɔyɛ edwuma kɛse kor n’afã a wotsim wɔ ahyɛmudzi na ayɛdze krɔnkrɔn do a ɔboa hɛn ma yegye nyamesu wɔ hɛn abrabɔ mu na, ewiei no yɛasan akɔ Ɔsor Egya n’enyim. Dɛm ntsi, nsɛm ebien nyina a Nkɔnhyɛnyi no kãa no a ahyɛse no ɔyɛ dɛ ma wɔbɔ ebira no, nokwar, wɔda nda kɛse a odzi ekyir yi no botae no edzi.

Agyenkwa no see dɛ:

“Hom mfa mo kɔndua no nto hom do, na hom nsũa me; osiandɛ modwe na mebrɛ moho adze wɔ akoma mu: na hom benya ahomgye ama hom akra.

“Na mo kɔndua yɛ mberɛw, na m’adzesoa yɛ har.” ⁹

Yɛfa Agyenkwa no kɔndua no to hɛn do ber a yesũa ahyɛmudzi na ayɛdze krɔnkrɔn ho nsɛm, yegye no emudzi mu, na yedzi no nyi. Yɛnye Agyenkwa no kyekyer ara yie ber a yɛkaa nokwar mu na ahyɛdze a yɛagye ato mu no yɛbɔ hɛn mbɔdzen ara yie dze bɔ bra. Na dɛm nkyekyeree yi a yɛnye No yɛ no nye hɛn abrabɔ ne gyinabew nyina mu no sunsum mu ahoɔdzen ne farbaa.

Moto nsa frɛ hom dɛ hom nsusu nhyira anohoba horow a wɔdze abɔ Jesus Christ esuafo a wosie ahyɛmudzi no. Mfatoho, Nephi “hun Nyame Eguambaa n’asɔr no [wɔ nda a odzi ekyir no], na no dodow suar, … Nyankopɔn n’ahotseweefo no wɔ asaase nyina enyi do, na hɔn tum … no suar.” ¹⁰

Na ohun so dɛ “Nyame Eguambaa no no tum, dɛ oesian aba Eguambaa no n’asɔrmba a wɔyɛ ahotseweefo no do, nye Ewuradze n’ahyɛmu mba no, … na wɔdze ndzeyɛtsenenee na enyimnyam nye Nyankopɔn no tum kɛse ayɛ akontar.” ¹¹

Kasasin “wɔdze ndzeyɛtsenenee na enyimnyam nye Nyankopɔn no tum kɛse ayɛ akontar” no nnyɛ adwenkyerɛ dɛɛdɛw tsiabaa ara anaa kyerɛwsɛm kasa fɛɛfɛw mfatoho. Mbom, nhyira yinom da edzi pefee wɔ Ewuradze ne nda a odzi ekyir esuafo piinara hɔn abrabɔ mu.

M’edwuma dɛ Duebien no kuwba no dze me tu kwan kɔ wiadze nyina mu. Na wɔayɛ nhyira ama me dɛ mihyia na musũa adzesũadze nwanwa horow fi hom mu dodow hɔ. Megye dase dɛ ndɛ Ewuradze n’ahyɛmu nkorɔfo no wɔdze ndzeyɛtsenenee na enyimnyam nye Nyankopɔn no tum kɛse ayɛ akontar ampaara. Maayɛ dasefo wɔ gyedzi, akokodur, nhumu, ntsimii na dɛwdzi a ɔbor honandua mbɔdzembɔ do koraa—na dɛ Nyankopɔn nko na Obotum dze ama.

Meyɛɛ dasefo wɔ ndzeyɛtsenenee na enyimnyam nye Nyankopɔn no tum kɛse ho a wodua ahyɛmudzi ho nokwardzi na ayɛdze mu gye wɔ Asɔrba aberantsɛba n’abrabɔ mu a ɔnam akwanhyia huhu mu a n’afã dwedwee no n’abrabɔ mu. Abosoom yaayaw pii ekyir a onyia yi dze renya apɔwmudzen na abrabɔ fofor a n’akɔnaaba do atsew no, mihyiaa ɔkra nokwafo ɔkwabran yi na menye no kasae. Hɛn nkɔmbɔdzi mu no mibisaa dɛ, “Ebɛnadze na sũahu yi aboa wo ma esũa?” Mbuae ntsɛmara no nye, “Minndzi awerɛhow. Mobo mmfuwii. Na biribiara bɛyɛ YIE.”

Meyɛɛ dasefo wɔ ndzeyɛtsenenee na enyimnyam nye Nyankopɔn no tum kɛse ho a wodua ahyɛmudzi ho nokwardzi na ayɛdze mu gye wɔ Asɔrmba afoforfo a woenuma na woesi hɔn pi no hɔn abrabɔ mu. Hɔn a wɔasakyer yinom ayɛ krado dɛ wobosũa adze na wɔasom, woenya pɛ na mbom wɔtaa dɛ wonnyim mbrɛ wɔdze hɔn abrabɔ dadaw na amambra woetsim bɔto nkyɛn na enyigye mu ara wɔabɛyɛ “ahotsewfo no kuromanfo nye Nyankɔpon fifo.” ¹²

Meyɛɛ dasefo wɔ ndzeyɛtsenenee na enyimnyam nye Nyankopɔn no tum kɛse ho a wodua ahyɛmudzi ho nokwardzi na ayɛdze mu gye wɔ ebusua a ɔdɔ mu ara wɔhwɛɛ hokãfo na ɔwofo a wɔwɔ kõannkɔ yarba. Esuafo akokodurfo yinom kãa mber a hɔn ebusua no tsee dɛ wɔayɛ ankonam—nye mber a nna wonyim dɛ Ewuradze ne nsa repegya hɔn na ɔrehyɛ hɔn dzen ho asɛm. Ebusua yi kãa hɔn enyisɔ nokwar mu ma honandua mu sũahu horow a ɔma hɛn kwan ma yenyin na yɛbɛyɛ tse dɛ hɛn Ɔsor Egya na hɛn Pomfo, Jesus Christ ara yie ho asɛm. Nyankopɔn dze Sunsum Krɔnkrɔn n’anyɛnkoyɛ boaa ebusua yi na Ohyiraa hɔn na Ɔmaa hɔn fie yɛɛ guandɔbea krɔnkrɔn dɛ temple.

Meyɛɛ dasefo wɔ ndzeyɛtsenenee na enyimnyam nye Nyankopɔn no tum kɛse ho a wodua ahyɛmudzi ho nokwardzi na ayɛdze mu gye wɔ Asɔrba a onyaa awargyaa mu akomayaw n’abrabɔ mu. Akyerɛbaa yi no sunsum mu na nkã-tse atseetsee yɛɛ kɛse ber a ohun nsisi wɔ no hokãfo a obuu ahyɛmudzi do na hɔn awargu no. Nna ɔrohwehwɛ pɛrpɛrdzi na nkontaabu.

Ber a ɔbaa nokwafo yi dze dza ɔato no ridzi aper no, osũaa na ɔdwendween Agyenkwa No Werdambɔ ho ara yie kyɛn n’abrabɔ mu mber biara besi dɛm ber no. Nkakrankakra no, Christ no ɔpon ho dwuma ho ntseasee a ɔdɔ bun mu no sosɔɔ ne kra do—N’amandzehu ma hɛn bɔn, na ma hɛn yaw, mbrɛwyɛ, abagura, na ahohiahia so. Na wokenyaan no ma obisaa noho asɛmbisa a ohwira akoma mu ara yie: Oetua dɛm bɔn ho kaw ewiei dadaw no, ana ibɔhwehwɛ dɛ wotua ho kaw mpɛn ebien? Ohun dɛ ahwehwɛdze a ɔtse dɛm no nntsen nna ɔnnkyɛrɛ ehumbɔbɔr so.

Ɔbaa yi hun dɛ sɛ odua ahyɛmudzi na ayɛdze do dze noho kyekyer Agyenkwa no a obotum asa pirakur a obi a ɔammfa ne pɛ annyɛ dza ɔtsen na ɔama oeetum dze bɔn akyɛ na oenya asomdwee, mbɔbɔrhu na ɔdɔ.

Ahyɛmu anohoba na nhyira horow tum ba osian hɛn Agyenkwa, Jesus Christ nko do. Ɔto nsa ma hɛn dɛ yendua ahyɛmudzi na N’asɛmpa nsan-ananmu ayɛdze horow do nhwɛ No, ¹³ mbra No hɔ, ¹⁴ nsũa No, ¹⁵ na yɛnhyɛ bɔw mma No. ¹⁶ Megye dase dɛ yeridzi ahyɛmudzi do dze ndzeyɛtsenenee na enyimnyam nye Nyankopɔn no tum kɛse no hyɛ hɛn akontar. Na megye dase dɛ Ewuradze tseasefo Jesus Christ nye hɛn Agyenkwa. Nokwar yinom ho na megye dase enyigye mu ara wɔ Jesus Christ ne dzin krɔnkrɔn no mu, amen.