“Ana Edɔ Me Sen Yinom?”

Ɔberɛfɛw 2019 mu no, menye me nyɛnko bi kɔree kɛseraa Asaase Krɔnkrɔn no. Yɛwɔ hɔ no, yɛhwehwɛɛ kyerɛwsɛm ahorow mu a ɔkã Jesus Christ noho asɛm na N’abrabɔ na yesũae. Anapa bi yegyina Galilee Po no mpoana a ɔwɔ etsifi boka afamu no, wɔ beebi a bia Jesus hyiaa N’esuafo wɔ No Wusoɛr ekyir no.

Jesus No Wusoɛr ekyir, dɛ mbrɛ yɛkenkaan wɔ John tsir 21 no, Peter na esuafo binom konuu anago ne nyina a woenya hwee. ¹ Adze rekye no, wohun ɔbarimba bi a ogyina mpoano a ɔsee hɔn dɛ wɔmfa asawu no ngu hɛamba n’afã noho. Hɔn ahobow mu no, na nwanwa mu ara no asawu no hyɛɛ mã. ²

Hɔ noara wohun dɛ ɔbarimba no yɛ Ewuradze, na wɔbaa ntsɛm bekyiaa no.

Ber a wɔrotwe asawu no aba mpoana a nam ahyɛ no mã no, Jesus see dɛ, “Hom mbɛkã hom ano.” ³ John kyerɛw dɛ “wɔkãa hɔn ano wiei no, Jesus see Simon Peter dɛ, Simon, Jonas ba, ana edɔ me sen yinom?” ⁴

Ber a nna migyinaa mpoano kor noara no, muhun dɛ Agyenkwa no n’asɛmbisa no yɛ nsɛmbisa a ohia papaapa a dabi bia Obebisa me. Nna ɔyɛ dɛ ma meretse Ne ndze a Oribisa dɛ, “Russell, ana edɔ me sen yinom?”

Ana adwen dza nna Jesus rekyerɛ ber a Obisaa Peter dɛ, “Ana edɔ me sen yinom?”

Yɛdze asɛmbisa yi roto hɛnho ndɛ no a, ebia Ewuradze ribisa mbrɛ yeesi hɛnho akyer hɛn wɔ ndzɛmba pii ho, papa na bɔn nhyɛdo horow a wɔnye hɛn asokyɛn na mber redzi aper ho asɛm. Bia Oribisa hɛn mu kor biara dɛ sɛ yɛdɔ no kyɛn wiadze ndzɛmba a. Iyi botum ayɛ asɛmbisa a ɔfa dza ɔsom hɛn bo ankasa wɔ abrabɔ yi mu, nyia ɔyɛ hɛn kandzifo, na mbrɛ yɛhwɛ hɛn ebusua mu ba na fipamfo ntamu nkitahodzi. Anaa bia, Oribisa hɛn dza ɔdze dɛwdzi na enyigye brɛ hɛn.

Ana wiadze yi mu ndzɛmba dze dɛwdzi, enyigye, na asomdwee a Agyenkwa no dze maa N’esuafo no na ɔdze bɛma hɛn? Ɔno nko na Obotum dze nokwar dɛwdzi, enyigye, na asomdwee a odua yɛrodɔ No na yeridzi Ne nkyerɛkyerɛ do no ba.

Yebesi dɛn bobua asɛmbisa no “Ana edɔ me sen yinom?”

Sɛ yebopue asɛmbisa yi ne ntseasee a ɔdɔ bun mu no do a, yebotum abɛyɛ ebusua mu mba yie, fipamfo yie, ɔmamba, na Asɔrmba yie na Nyame mbabanyin na mbabaa.

Me mfe a meedzi yi, maakɔ funsie som pii. Megye dzi dɛ hom mu dodowara ahyɛ dza mahyɛ no nsew no. Ber a yɛrehyɛ ebusua mu ba anaa nyɛnko a oefi mu enyimnyam no, ɔnntɔ kã dɛ nyia ɔrekasa no bɛkasa afa ne fie ne kɛse, kaar dodow a ɔwɔ, anaa ne sika a ɔda sikakorabea no ho nsɛm. Wɔnntaa nnkasa mmfa social media nkyerɛwee ho. Funsie som mu dodowara a makɔ ase no, wotsim wɔ hɔn dɔfo no nkitahodzi, som a ɔsoom binom, abrabɔ mu adzesũadze na sũahu horow, na hɔn dɔ ma Jesus Christ.

Hom ntse me ase. Merennkã dɛ enya fie fɛɛfɛ anaa kaar fɛɛfɛ a ɔnnyɛ anaa dɛ ekyerɛw kɔ social media a ɔyɛ adze bɔn. Dza merekã nye dɛ ewiei no, dɛm ndzɛmba no ho nnhia kɛse koraa sɛ edze to Agyenkwa dɔfo No ho a.

Sɛ yɛdɔ No na yɛka No do a, nna yɛwɔ gyedzi wɔ No mu. Yenu hɛnho. Yedzi Ne fasusu do na wonuma hɛn na yɛgye Sunsum Krɔnkrɔn no. Yetsim kodu ewiei na yɛnantsew ahyɛmu anamɔn kwan no do. Yɛdze ebusua mu mba na fipamfo hɔn bɔn kyɛ hɔn na yegyaa ayawdzi a yɛwɔ no mu. Yɛbɔ mbɔdzen ara yie dɛ yebedzi Nyankopɔn ne mbrasɛm no do. Yɛbɔ mbɔdzen dɛ yɛbɛyɛ setsie. Yɛyɛ ahyɛmu na yedzi do. Yedzi hɛn egyanom na enãnom nyi. Yɛdze wiadze nhyɛdo a omuo no to nkyɛn. Yɛyɛ ahosiesie ma Ne Mbae a Otsĩa Ebien.

“Christ Ɔtseasefo No: Asomafo no hɔn Dasegye no” yɛkenkan dɛ: “Dabi [Jesus] bɛsan aba asaase do. … Ɔbɔhwɛ asaase do dɛ ahemfo Hen na Oedzi adze dɛ Ewuranom Ewuradze, na anankroma nyina bɔkotow na tɛkyerɛma nyina bɛkasa wɔ ayeyi mu wɔ N’enyim. Hɛn mu kor biara begyina N’enyim ma Oebu hɛn atsɛn dɛ mbrɛ hɛn ndwuma na akoma n’apɛdze tse.” ⁵

Dɛ meyɛ Asomafo no mu kor a medze me nsa hyɛɛ “Christ Ɔtseasefo” nwoma no ase no, mubotum akã dɛ minyim dɛ Jesus nye wiadze kan, nkwa na enyidado no” ⁶ dze ɔpɛ kɛse ma me dɛ mondɔ no mbordo dabiara.

Megye dase dɛ Ɔsor Egya na Jesus Christ wɔtse ase. Megye dase dɛ Wɔdɔ hɛn. Kyerɛwsɛm no kyerɛkyerɛ hɛn dɛ “Na mbrɛ Nyankopɔn dɔɔ wiadze nye yi, dɛ ɔdze ne Ba a ɔwoo no kor no mae, ama obiara a ɔgye no dzi no ɔaannhera, na oeenya onyiewiei nkwa.’’ ⁷ Kyerɛwsɛm no so kyerɛkyerɛ dɛ Jesus “dɔɔ wiadze no a ɔdze nankasa no nkwa too hɔ, ama dodowara a wɔbɛgye no edzi no abɛyɛ Nyame ne mba mbanyin [na mbaa]” ⁸

Ɔsor Egya dɔɔ hɛn ma Osiesiee No nkwagye ho nhyehyɛɛ a Agyenkwa no nye no kutuw-do bo tsitsir. Na Jesus dɔɔ hɛn ma wɔ Ɔsor Bagua kɛse mu no, ber a Ɔsor Egya bisaa dɛ, “Woana na mobɔsoma no?” Jesus a, Ɔyɛ Ɔsor Egya no sunsum mu mba mu abakan no, buaa dɛ, “Emi nye yi soma me.” ⁹ Ɔsee Egya no dɛ, “Egya, wo pɛ nyɛ hɔ, na enyimnyam no nyɛ wodze afebɔɔ.’’ ¹⁰ Jesus tuu Noho kyɛe dɛ Ɔbɛyɛ hɛn Agyenkwa na Pomfo ama yeetum abɛyɛ tse dɛ Hɔn na yɛasan akɔ Hɔn enyim.

Kyerɛwsɛm ebien yinom so kyerɛ dɛ ama yɛaasan akɔ Hɔn enyim no ohia dɛ yɛgye dzi. Ohia dɛ yɛbɛgye Jesus Christ na Nyankopɔn ne enyigye ho nhyehyɛɛ no edzi. Ebɛgye edzi nye ebɔdɔ na aka hɛn Agyenkwa no do na esie mbrasɛm no, wɔ nsɔhwɛ ber na aperperdzi mpo mu.

Ndɛ wiadze no ayɛ basaa. Abagura, adwen a ɔnnsaa, atseetsee, na ndan enyi wɔ mu.

President Dallin H. Oaks, ɔrekasa wɔ afe 2017 mu no, hyɛɛ dza odzi do yinom nsew: “Mber yinom yɛ ɔhaw akɛse mber a, adwendwen: akõkoekõ na akõsɛm nkã, ɔyardom a obotum aba, nsukɔm na nsuyirii na wimu hyew ahyɛ mu mã.” ¹¹

Hɛn dɔ na enyidado a ɔwɔ Jesus mu no nnkotum apa, sɛ mpo yehyia ɔhaw a ɔyɛ dɛ ma ɔbor hɛn do a. Ɔsor Egya na Jesus Hɔn werɛ remmfir hɛn da. Wɔdɔ hɛn.

Mfeda Ɔbɛsɛ no, President Russell M. Nelson kyerɛɛ hɛn hia a ohia tsitsir dɛ yɛma Ɔsor Egya na Jesus Christ dzi kan wɔ hɛn abrabɔ mu. President Nelson kyerɛɛ hɛn nsɛmfua Israel ne nkyerɛase kor nye “ma Nyankopɔn ndzi nyim.” ¹²

Obisaa hɛn mu kor biara nsɛmbisa yinom: “Ana ipɛ dɛ ema Nyankopɔn dzi nyim wɔ w’abrabɔ mu? Ana ipɛ dɛ ema Nyankopɔn yɛ nhyɛdo tum abɔso wɔ w’abrabɔ mu? Ipɛ dɛ ema Ne nsɛm, Ne mbrasɛm, na N’ahyɛmu nya nhyɛdo wɔ wo do da biara? Ipɛ dɛ ema Ne ndze kwan ma ɔbɔ biribiara do? Ana ipɛ dɛ biribiara Ohia ɔwo ma ayɛ no, bor w’ahwehwɛ dze biara a? Ana ipɛ dɛ ema wo pɛ kɛhyɛ Ne dze mu?’’ ¹³

Otwar dɛ ber biara yɛkaa dɛ hɛn enyigye nokwar no gyina hɛn nkitahodzi a yɛnye Nyame, na Jesus Christ, na hɛn ho nkorkor nya.

Kwan kor a yebotum akyerɛ hɛn dɔ nye dɛ yɛbɛkã ebusua, anyɛnkofo, na fipamfo ho ma yɛayɛ biribi kakraba biara a yɛdze bɔsom hɛn ho nkorkor ara yie. Hom nyɛ ndzɛmba a ɔbɛma wiadze yi mu ayɛ bea pa.

Ebɛn ndzɛmba na ɔwɔ wankasa w’abrabɔ mu a ibotum dze akyerɛ dɛ Ewuradze na edzi kan dɔ No?

Ber a yɛgyen hɛn enyi dɔ hɛn fipamfo dɛ mbrɛ Ɔdɔ hɔn a, yɛhyɛ ase dɔ hɔn no a woetwa ehyia hɛnho no nokwar mu. ¹⁴

Mibisa bio, ibesi dɛn bobua Agyenkwa no ne nsɛmbisa no “Ana edɔ me sen yinom?’

Ber a hom susu asɛmbisa yi dɛ ma maayɛ no, mobɔ mpaa dɛ hom bobua dɛ mbrɛ Peter yɛe mber pii a abɛsen no, “Nyew, Ewuradze, woara inyim dɛ modɔ wo,” ¹⁵ na nkyii fa kyerɛ ber a erodɔ na erosom Nyame na hɔn a woetwa woho ehyia no nyina.

Megye dase dɛ wɔayɛ hɛn adom dɛ yeenya Jesus Christ n’asɛmpa a ɔbɛma hɛn kwankyerɛ wɔ hɛn abrabɔ mu ma mbrɛ yebesi ahwɛ hɛnho do yie. No mu no, yebohu dɛ Nyame ne babanyin na babaa biara som No bo ara yie.

Megye dase dɛ Jesus Christ nye Agyenkwa dɔfo. Ɔyɛ Nyame ne Ba a Ɔwoo no Kortoo. Na megye dase yi ahobrɛadze mu wɔ Jesus Christ Ne dzin mu, amen.