Nyankopɔn no Dɔ: Dza Ɔma Ɔkra Enyigye Mbordo
Yennhu Nyankopɔn No Dɔ wɔ hɛn abrabɔ ne gyinabew horow mu, mbom wɔ mbrɛ Ɔwɔ hɛn abrabɔ mu.
Enuanom na nkyerɛbaa, ana hom nyim mbrɛ Nyankopɔn, hɛn Ɔsor Egya, si dɔ hom imu mu? Hom aatse No dɔ nkã wɔ hom ɔkra no bun mu?
Sɛ hom hu na hom tse mbrɛ osi dɔ wo koraa dɛ eyɛ Nyankopɔn ne ba ase a, ɔsesã biribiara. Sɛ ifom a ɔsesã kwan a edze hu woho. Sɛ nsɛmansɛm a ɔyɛ dzen sisi a ɔsesã kwan a edze hu woho. Ɔsesã mbrɛ isi hu Nyankopɔn ne mbrasɛm. Ɔsesã mbrɛ isi hu binom, na w’ahom dɛ edze bɛyɛ adze soronko.
Elder Jeffrey R. Holland kãa dɛ: “Mfesantsen nyina mu mbrasɛm kɛse a odzi kan nye yɛdze hɛn akoma, ahom, na ahoɔdzen nyinara bɔdɔ Nyankopɔn—ɔno nye mbrasɛm kɛse a odzi kan no. Naaso, nokwar kɛse a odzi kan wɔ daapem nyina mu no nye dɛ Nyankopɔn dze N’ akoma, ahom, adwen, na ahoɔdzen nyina dze dɔ hɛn 1
Hɛn mu kor biara besi dɛn botum ehu dɛm daapem nokwar kɛse no wɔ hɛn akra no bun mu?
Woyii tum dodow a ɔkyerɛ Nyankopɔn no dɔ no kyerɛɛ Nkɔnhyɛnyi Nephi wɔ enyido-adzehu mu. Ɔhwɛɛ nkwa dua no, Nephi serɛɛ dɛ obohu ne nkyerɛase. Mbuae no, sor ɔbɔfo bi kyerɛɛ Nephi kurowpɔn, enã, na abɔdomaba bi. Mber a Nephi hwɛe Nazareth kuropɔn na Mary enã tseneneenyi a, otur abɔdomaba Jesus wɔ n’abaw mu no, sor ɔbɔfo no paa mu kãa dɛ, “Hwɛ Nyame Eguambaa, nyew, Onnyiewiei Egya ne ba no!’’ 2
Wɔ dɛm mber krɔnkrɔn mu no, Nephi tsee ase dɛ Agyenkwa n’awoe mu no, nna Nyankopɔn reda No dɔ mapã na odzi mu no edzi. Nephi gyee Nyankopɔn no dɔ ho, dase dɛ, “ɔhɛnhɛn adasa mba akoma mu.’’ 3
Yebotum esusu Nyankopɔn no dɔ dɛ kan a opue fi nkwa dua no mu a, ɔhɛnhɛn asaase nyina do kɔ adasamba hɔn akoma mu. Nyankopɔn ne kan na ɔdɔ henhɛn N’abɔdze nyina mu. 4
Ɔtɔfabi a mfomdo mu ara yɛdwen dɛ yebotum atse Nyankopɔn no dɔ ne nkã ber a yeedzi dadze poma n’ekyir na yeekedzi eduaba no nko . Naaso, nnyɛ hɔn a wɔba nkwa dua no ho nko na wonya Nyankopɔn no dɔ mbom ɔyɛ tum ankasa a okenyan hɛn ma yɛhwehwɛ dɛm dua no.
“Dɛm ntsi, ɔyɛ adze pa a ɔsom bo kyɛn adze nyinara,’’ Nephi kyerɛkyerɛɛ dɛ, na sor ɔbɔfo no tsẽaa mu dɛ, “Nyew ɔma ɔkra enyigye mbordo.’’ 5
Mfe eduonu a abɛsen kɔ no, mo busuanyi bi fii Asɔr no mu. Nna ɔwɔ nsɛmbisa beberee a wonnyii ano. Ne yer a, nna ɔyɛ nsakyereenyi, annyew ne gyedzi. Wɔyɛɛ edwuma dzen dze kãa hɔn awar bɔɔ mu wɔ nsonsonee a ɔbae no mu.
Mfeda no ɔkyerɛɛw nsɛmbisa ebiasa wɔ Asɔr no ho a nna ɔyɛ dzen ma no dɛ ɔbɛgye no na ɔdze kɛmaa awarfo beenu bi a wɔnye no ayɛ anyɛnkofo mfe pii no. Ɔserɛɛ hɔn dɛ wɔndwendwen nsɛmbisa noho na sɛ wɔba ewimbir edzidzi ase a wɔakyɛ hɔn adwendwen.
Anyɛnkofo no hɔn nsera ekyir no, ɔkɔɔr ne pia mu na ɔhyɛɛ ase dɛ ɔreyɛ dwumadzi bi ho edwuma. Ewimbir nkɔmbɔdzi na ɔdɔ a n’anyɛnkofo dze kyerɛɛ no dzii kan bɛdaa n’adwen do. Ɔkyerɛɛw no ekyir dɛ ɔhyɛɛ no do ma ogyae edwuma no yɛ. Ɔkãa dɛ: “Ekan hyerɛɛn bi hyɛɛ me kra mã. … Nna minyim nhumu nkã a no mu dɔ no, na iyi dze, ɔkɔɔr do yɛɛ dzen mbordo kyɛn birbiara na ɔkyɛree pii. Medze nkã a metsee no tsenaa ase dzinn a, metsee ase dɛ ɔyɛ Nyankopɔn no dɔ ma me na ɔada edzi. … Metsee sunsum mu nkenyan a ɔkãa kyerɛɛ me dɛ mubotum asan akɔ asɔr na makyerɛ Nyankopɔn no dɔ yi wɔ dza meyɛ no wɔ hɔ mu.’’
Nkyii ɔdwendwenn ne nsɛmbisa no ho. Nkã-tse a onyae no nye dɛ Nyankopɔn n’enyi gyee dɛ oribisa nsɛm, na dɛ orinnya nyiano pefee no nnyi dɛ osiw no kwan ma ɔnnkɔkɔ kan. 6 Ɔwɔ dɛ ɔnye obiara kyɛ Nyankopɔn no dɔ ber a ɔkɔ do dwendwen ho. Ber a ɔdze dɛm nkenyan no yɛɛ edwuma no, ɔtsee dɛ ɔnye Joseph Smith ayɛ ebusua, ɔno a ɔkãa no n’Enyido-Adzehu a Odzi kan ekyir no dɛ, “Ɔdɔ hyɛɛ me kra mu mã, na nda pii no nna mutum dze enyigye kɛse dzi ehurusi.’’ 7
Anwanwadze mu ara, abosoom tsĩabaa ekyir no, onyaa ɔfrɛ kor noara a odzii kan kitsaa no mfe 20 abasen kɔ no. Mber a odzi kan a okitsaa ɔfrɛ no, ɔyɛɛ n’asodzii enyidzi mu ara dɛ Asɔr mu asɔrba. Afei n’asɛmbisa no ammbɛyɛ “Mibesi dɛn ayɛ ɔfrɛ yi yie?’’ mbom “Mibesi dɛn botum edua mosom do dze akyerɛ Nyankopɔn no dɔ?’’ Ɔdze kwan fofor yi no ɔtsee enyigye, mfaso, na botae wɔ ne ɔfrɛ n’afã nyina mu.
Enuanom na nkyerɛbaa, yebesi dɛn botum enya Nyankopɔn no dɔ tum a ɔdze nsesã ba no? Nkɔnhyɛnyi Mormon to nsa frɛ hɛn dɛ, “hom mfa hom akoma mu ahoɔdzen nyina mbɔ mpaa mma Egya no, ama ɔdze dɛm ɔdɔ yi aahyɛ hom mã, dza ɔdze egu hɔn a wɔyɛ ne Ba Jesus Christ, n’akãdofo nokwafo do no.” 8 Mormon ronnto nsa mmfrɛ hɛn nko dɛ yɛmbɔ mpaa ama No dɔ aahyɛ hɛn mã ama binom mbom yɛmbɔ mpaa ama yeehu Nyankopɔn no dɔ mapã dze ama hɛnho. 9
Sɛ yɛnya No dɔ no a, yenya dɛwdzi kɛsenara wɔ yɛreper dɛ yɛbɔdɔ na yɛasom dɛ mbrɛ Ɔno yɛe no mu, yɛrebɛyɛ “ne Ba, Jesus Christ no nokwafo akãdofo.’’ 10
Yennhu Nyankopɔn No Dɔ wɔ hɛn abrabɔ ne gyinabew horow mu, mbom wɔ mbrɛ Ɔwɔ hɛn abrabɔ mu. Yehu No dɔ sɛ yenya ahoɔdzen tra hɛnara hɛn dze na ber a No Sunsum dze asomdwee, awerɛkyekyer, na akwankyerɛ ba. Ɔtɔ mber bi a nna ɔyɛ dzen dɛ yɛbɛtse No dɔ nkã. Yebotum abɔ mpaa ma Oebue hɛn enyiwa dze ehu Ne nsa wɔ hɛn abrabɔ mu na yeehu No dɔ wɔ N’abɔdze ne fɛw mu.
Sɛ yɛdwendwen Agyenkwa n’abrabɔ na Ne onnyiewiei afɔrbɔ a ɔmmbɔadze da ho no, yebotum ahyɛ ase atse No dɔ ma hɛn no ase. Obu mu ara yɛtow Eliza R. Snow ne nsɛmfua no dɛ: “No bɔgyaa a ɔsom bo a okyii gui kwa: Ɔdze no nkwa maa kwa.’’ 11 Jesus n’ahobrɛadze wɔ amandzehu mu ma hɛn no sosɔ hɛn akra do, obue hɛn akoma mu ma yɛhwehwɛ bɔnfakyɛ wɔ Ne nsamu na Ɔdze pɛ hyɛ hɛn mã ma yɛabɔ bra tse dɛ mbrɛ Ɔno yɛe. 12
President Nelson kyerɛɛw dɛ, “Mber dodow a yenya enyimpi dɛ yɛdze N’abrabɔ bɛyɛ nhwɛdo ama hɛn abrabɔ no, mber dodow a hɛn dɔ bɛyɛ mapã ara yie na krɔnkrɔn mbordo a.’’ 13
Hɛn babanyin kã dɛ: “Mber a medzii mfe 11 menye m’anyɛnkofo bɔɔ hɛn adwenpɔw dɛ yebosuma hɛn kyerɛkyerɛnyi na yɛronnkɔ hɛn Primary adzesua ɔfã a odzi kan no. Ekyir no yekodur hɔ no, hɛn ahobow mu no, kyerɛkyerɛnyi no kyiaa hɛn ahomka mu ara. Nkyii no ɔbɔɔ nokwar mpaabɔ a ɔkã akoma a ɔdze ndaase maa Ewuradze dɛ yɛayɛ adwen na hɛnara yɛdze hɛn pɛ pa aba adzesua dɛm da no. Munntum nkaa dza nna adzesuadze no yɛ anaa mpo kyerɛkyerɛnyi no ne dzin, naaso sesei dze, bɛyɛ mfe 30 ekyir no, ɔdɔ mapã a ɔkyerɛɛ maa me dɛm da no da ho kenyan me.’’
Mfe enum a ɔabasen kɔ no muhun ɔsor ɔdɔ mfatoho ber a mokɔɔr Primary wɔ bi mu wɔ Russia. Muhun akyerɛbaa nokwafo bi a oebu ntwɛr wɔ mbofra beenu bi enyim na ɔgye dase kyerɛ hɔn dɛ sɛ hɔn nko mpo na wɔtse asaase no do a, nkyɛ Jesus bohu amandze na Oewu ama hɔn ara.
Megye dase dɛ nokwar hɛn Ewuradze na Agyenkwa wui dze ma hɛn mu kor biara. Ɔdze kyerɛɛ No dɔ a ɔmmbɔadze da ma hɛn na ma N’Egya.
“Minyim dɛ me Gyefo Tse Ase. Awerɛkyekyer asɛm bɛn nye yi! … Ɔtse ase dze No dɔ hyira [hɛn].” 14
Hom mma yembue hɛn akoma mu ngye Nyankopɔn no dɔ mapã a ɔwɔ ma hɛn no na nkyii yɛntserɛw dɛm dɔ no mu wɔ dza yɛyɛ na ma yɛtse nyina mu Jesus Christ ne dzin krɔnkrɔn no mu, amen.