Mowɔ Enyidado Dɛ Ɔdze Hɛn Bedzi Dwuma

Jesus Christ N’Asɔr wɔ asodzi krɔnkrɔn dɛ ɔnhwɛ abɔbɔfo. ² Ɔyɛ nkwagye na ntowdo edwuma n’adze tsitsir mu kor. ³ Dza nna ɔyɛ nokwar wɔ Alma n’aber do yɛ nokwar ampaara ma hɛn: “Na hɔn prɔmprɔmyɛ mber yi mu no, woennyi hɔn a wɔda adagyaw, anaa ɔkɔm dze hɔn, anaa nsukɔm dze hɔn, anaa wɔyaryar, anaa wɔyɛ abɔbɔfo edzi; na wɔammfa hɔn akoma anntaa ahonya do; na wɔyɛɛ ayamuyie maa obiara, mpanyimfo na mbofra, nkowaa na adehye, mbanyin nye mbaa, dɛ wonnyi asɔr no mu anaa wɔwɔ asɔr no mu, wɔannhwɛ nyimpa enyim na wɔyɛɛ obiara n’ehiadze maa no.” ⁴

Asɔr no gye asɛdze yi do wɔ akwan asorɔtow pii mu a, dza ɔkã ho:

• som a yedua Relief Society, asɔfodzi quorum horow, na adzesũa horow do yɛ;

• akɔnkye na akɔnkye afɔrbɔdze a wɔdze dzi dwuma;

• eyiedzi nhaban na mbea a yɛdze edziban gu nkyɛnse mu dze sie kyɛr;

• akwaaba asõe horow ma tukɔrfo;

• wɔrehwɛ hɔn a wɔda efiadze;

• Asɔr nyimpa ho mboa mbɔdzembɔ;

• na JustServe app a, sɛ bi wɔ bea hɔ a, wɔhyehyɛ ahofamafo ma som akwan ahorow.

Akwan ahorow yinom nyina a, wɔnam asɔfodzi do yɛ nhyehyɛɛ no, a mbɔdzembɔ nketsenketse wɔyɛ no wɔkã bɔ mu ma no nsunsuando yɛ kɛse, a ɔkrɔn ankorankor ndzɛmba pii a yɛyɛ no dɛ Jesus Christ n’esuafo no.

Nkɔnhyɛfo wɔ asodzi ma asaase nyina, nnyɛ ma Asɔr mu mba nko. Mutum bɔ amandzeɛ fi mara mo sũahu mu mbrɛ marankasa na President a Odzi kan na n’Apamfo si dze ɔdɔ yɛ dɛm asodzi no. Mbrɛ ehiadze si kɔ sor no, President a Odzi Kan na n’Apamfo no ama hɛn asodzi dɛ yɛmma hɛn nyimpa ho mboa mboa a yɛdze ma no nkɔ sor wɔ kwan tsitsir bi mu. Hɔn enyi gye ndzɛmba akɛse a ɔrokɔ do no na mu ndzɛmba etsitsir ketseketse no.

Ɔnnkyɛree na, yɛdze nduryɛ ahobambɔ ntar atsentsen no kor a Beehive Clothing pamee ma asopitsifo dɛ wɔnhyɛ wɔ wiadze nsan yarba ber no mu, brɛɛ hɔn. Dɛ eduryɛ datser no, President Nelson n’enyi gyee ho papaapa. Wɔammpɛ dɛ obohu ara. Nna ɔpɛ dɛ ɔhyɛ hwɛ—ɔhwɛ ne nsa kɔn na ne tsentsen na kwan a wɔkyekyer no wɔ ekyir. Ɔkãa kyerɛɛ hɛn ekyir no a, nna ne ndze mu esiw dɛ, “Sɛ hom hyia nkorɔfo wɔ hom dwumadzi mu a, wɔnda hɔn ase wɔ hɔn akɔnkye, afɔrbɔdze, na hɔn som wɔ Ewuradze ne dzin mu.’’

President Nelson n’akwankyerɛ ase wɔ ha no, meresan abɔ hom amandzeɛ wɔ mbrɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no esi rohwɛ ehum, asaase wosow, tukɔrfo—na mpo wiadze nsan yarba no—ndaase nkã Latter-day Saintfo na anyɛnkofo beberee hɔn ayamuyie. Ber a COVID-19 dwumadzi horow bɔbor 1,500 nye Asɔr no no mboa kɛse a woetsim do bɔbor abosoom 18 a wɔabɛsen kɔ no, Asɔr no san so hwɛɛ 933 ɔdomankoma esian na tukɔrfo ho nsɛm akɛse wɔ amanaman 108 mu. Naaso nkontaabu nnkã asɛm ne nyina. Hom ma menye hom nkyɛ mfatoho tsiabaa anan mfa nkyerɛ ma wonhu dza wɔreyɛ no ho kakrabaabi.

South Africanyi COVID Mboa

Mfe duesia Dieke Mphuti a ofi Welkom, South Africa, n’awofo wui mfe pii a abasen kɔ no, a wogyaa enuanom nkakraba baasa a nna nankasa rohwɛ hɔn. Aber nyina no nna ɔyɛ haw kɛse ma no dɛ obenya edziban a ɔbɔsõ, na COVID edziban a noho yɛɛ nã na danmuhyɛ no maa ɔyɛɛ dzen maa no. Nna ɔkɔm taa dze hɔn a, nna wɔdan fipamfo hɔn papayɛ kakra nko do dze nya kakra dzi.

Mfonyin

Dieke Mphuti

Ewiaber bi wɔ Dzifuu 2020 mu no, kɔkɔɔkɔ bi wɔ n’abow do maa Dieke no ho boow no. Obuei hun ahɔho beenu—kor yɛ Asɔr ne ngyina-ananmunyi bi fi apaamu ɔfese wɔ Johannesburg na kor no edwumayɛnyi fi South Africa’s Department of Social Development hɔ.

Nna ekuwekuw ebien no abɔ mu dze edziban rekɛma fiduamufo a wɔwɔ ahokyer mu. Ahomgye tɔɔ Dieke no do ber a n’enyi bɔɔ eburow dwewee a wɔahyehyɛ na edziban a ohia hɔn tsitsir bi so no do, a wɔdze Asɔr ne nyimpa ho mboa fotow no tɔe. Iyinom bɔboa no ma ɔahwɛ n’ebusua adapɛn pii kɛpem ber a aban no mboa ndzɛmba botum ahyɛ ase asõ no do.

Dieke n’asɛm no yɛ sũahu horow mpempem a ɔtsetse dɛm no mu kor a ɔrokɔ do wɔ wiadze nyina mu wɔ wiadze nsan yarba COVID ber mu, ndaase nka hom wɔ hom ntoboa a wɔatsew ho dze ama.

Afghan Mboa wɔ Ramstein

Hɛn nyina yeehu mfonyin a ɔnnkyɛree wɔ amandzɛɛ bɔ mu: nyimpa mpempem a woeyi hɔn efi esian mu a woyii hɔn fii Afghanistan. Pii na wɔnye hɔn kɔɔr nsordaafo asoɛe anaa mbea a wɔrenntsena hɔ nnkyɛr wɔ Qatar, United States, Germany, na Spain ansaana wɔrotoa do akɔ hɔn akwantu n’ewiei. Nna hɔn ehiadze yɛ mprɛmprɛ, na Asɔr no dze ndzɛmba na ahofamafo kɔboae. Ramstein Air Force Base wɔ Germany hɔ no, Asɔr no dze diaper, mbofra edziban, edziban, na nsopaatser akyɛdze piigyan kɛmaa hɔn.

Mfonyin

Nyimpa ho mboa akyɛdze ma tukɔrfo

Mfonyin

Mbaa repam adze ama Afghan tukɔrfo

Relief Society nkyerɛbaa mu bi hun dɛ Afghan mbaa beberee dze hɔn kunom hɔn sor atar ahata hɔn etsir ho osiandɛ hɔn amambra tsir ahatar no fii do wɔ basabasayɛ no mu wɔ Kabul wimuhɛn gyinabea hɔ. Anyɛnkofa nyɛe mu a ɔtra nyamesom anaa kusum biara ne he no, nkyerɛbaa a wɔwɔ Ramstein First Ward no boaa hɔn ano dze paam Muslim efuradze maa Afghan mbaa no. Akyerɛbaa Bethani Halls kãa dɛ, “Yɛtsee dɛ nna mbaa no hia asɔryɛ ntar, na yɛrepam ama woeetum enya asɔryɛ ho [ahomka].’’ ⁵

Haitinyi Asaase Wosow Mboa

Mfatoho yi a ɔtoa do no kyerɛ hom dɛ onnhia dɛ ebɛyɛ ɔhonyanyi anaa panyin ama aayɛ papa ho edwindadze. Mfe duawɔtwe Marie “Djadjou’’ Jacques fi Cavaillon Branch wɔ Haiti. Mber a asaase wosow a ɔsɛɛe adze sii bɛn no kurow mu wɔ Dzifuu mu no, nna n’ebusua fie yɛ adan mpempem no mu kor a odwuruwii guu famu no ho. Nnkotum esusu mbrɛ osi yɛ abagura dɛ wo fie bodwuruuw. Na kyɛn dɛ n’enyidado bɛsa no, Djadjou—ahobow mu ara—ammbotow.

Mfonyin

Marie Jacques

Mfonyin

Haiti Asaase Wosow

Associated Dawurbɔ Edwuma

Ohun fipamfo bi a n’enyi efir na oridzi aper na ɔhyɛɛ ase dɛ ɔrohwɛ no. Ɔboaa binom ma wotuu fĩ ase. Ne brɛ ammfa ho no, ɔkãa Asɔrmba binom ho ma wɔkyekyɛɛ edziban na ahosiesie ndzɛmba dze maa binom. Djadjou n’asɛm no yɛ ɔsom a tum wɔ mu mfatoho pii no mu kor a mbabun na young adultfo yɛe ber a wɔper dɛ wobedzi Jesus Christ ne fasusu ekyir.

German Nsuyirii ho Mboa

Adapɛn kakra ansaana asaase wosow besi no, nna young adultfo binom so rosom dɛmara wɔ Atlantic po ekyir no ho. Nsuyirii no a ɔfaa Europe atɔɔe nyina no nye dza ɔayɛ dzen dodoodow wɔ mfe du mfe du mu.

Mfonyin

Nsuyirii wɔ Germany

Mber a nsu no wewee koraa no, fiadze wura bi a ɔwɔ Ahrwiler mansin mu esunkyɛn, Germany, kɔhwehwɛɛ ɔsɛɛe no, na ɔhyɛɛ no do korakoraa. Ɔbarimba ahobrɛadzenyi, Catholicnyi mapã, wɔsaa mpaabɔ bi dɛ Nyankopɔn nsoma obi ma ɔmbɔboa no. Adzekyee anapa no, President Dan Hammon a ɔwɔ Germany Frankfurt Asɛmpakã Dwuma nye asɛmpasomafo kuw kakraabi a nna wɔhyehyɛ Helping Hands sor ntar koduu stiitsi mu hɔ. Nna nsu no edu ananmu du wɔ fiadze wura no n’afasu ho, a oegya dɛtse a nu mu dɔ yie. Ahofamafo no dze sofi tsitsii dɛtse no fii hɔ, yii kapɛt no na bɔɔd a wɔdze fenfam ban no, na wɔboaa biribiara ano wɔ stiitsi no mu ma woeyi efi hɔ. Fiadzewura no a enyigye mbordo ahyɛ no mã no nye hɔn yɛɛ edwuma dɔnhwer pii, a ɔyɛɛ no ahobow dɛ Ewuradze asoma No nkowaa kuw bi ma woeyi ne mpaabɔ ano—na wɔ dɔnhwer 24 ntamu! ⁶

Ɔrekã Asɔr no ne nyimpa ho mboa mbɔdzembɔ ho asɛm no, Elder Jeffrey R. Holland kãa no ber bi dɛ: “Mber dodow nara … Nyankopɔn dze nkorɔfo bi dzi dwuma … dze yi mpaabɔ ano. Oye, mowɔ enyidado dɛ Ɔdze hɛn bedzi dwuma. Mowɔ enyidado dɛ yɛbɛyɛ nkorɔfo hɔn mpaabɔ ne nyiano.’’ ⁷

Enuanom na nkyerɛbaa, ɔnam hom som, ntoboa, mber, na ɔdɔ do no, hom ayɛ nyiano ama mpaabɔ pii nara. Na mbom dodow so wɔ hɔ a ɔwɔ dɛ yɛyɛ. Dɛ yɛyɛ Asɔrmba woenuma hɛn no, yɛwɔ ahyɛmudzi ase dɛ yɛhwɛ hɔn a wɔwɔ hia mu. Hɛn ankorankor mbɔdzembɔ nnhia sika anaa mbea a kwan wowar; ⁸ wohia Sunsum Krɔnkrɔn n’akwankyerɛ na ɔpɛ akoma a ɔbɛkã akyerɛ Ewuradze dɛ, “Emi nye yi, soma me ɛ.’’ ⁹

Luke 4 kyerɛw dɛ Jesus fii Nazareth bae, bea a wɔnyɛɛn no, na ɔsoeree gyinaa ntamadan mu dɛ ɔrebɛkenkan. Nna iyi bɛn No ɔnnkyebo somdwuma n’ahyɛse, na Ɔserae kãa asɛm fii Isaiah nwoma no mu dɛ:

“Ewuradze no Sunsum wɔ mo do, osiandɛ ɔasera me dɛ membɛkã nsɛmpa nkyerɛ ehiafo; Ɔasoma me dɛ membɛpaa ɔgye mma ndɔmmum, nye adzehu mma enyifurafo, na membɛgye hɔn a woepirapira hɔn

“Na membɛkã Ewuradze n’enyisɔ afrenhyia. …

“… Ndɛ na kyerɛwsɛm yi aba mu wɔ hom asowa mu.’’ ¹⁰

Megye dase dɛ kyerɛwsɛm no reba mu wɔ hɛnara hɛn mber mu dɛmara. Megye dase dɛ Jesus Christ aba rebɛsa akoma a odzi yaw no yar. N’asɛmpa nye dɛ ɔma enyifurafo adzehu. N’Asɔr ne nhyehyɛɛ nye dɛ ɔpaa ɔgye ma ndɔmmum, na N’esuafo wɔ wiadze nyina no reper dze ɔgye ama hɔn a woepirapira.

Hom mma monwie ber a mirisi asɛmbisa a Jesus bisaa No Ɔsomafo Simon Peter do dɛ: “Ana edɔ me a?’’ ¹¹ Asɛmpa ne hia tsitsir no hyɛ mbrɛ yebesi eyi dɛm asɛmbisa ano ama hɛnho na “yɛanyɛn [No] nguan.” ¹² Medze obu kɛse na ɔdɔ ma Jesus Christ, hɛn Wura no, moto nsa frɛ hɛn mu kor biara dɛ ɔmfa noho nhyɛ No somdwuma nwanwa mu, na mowɔ enyidado dɛ Ɔdze hɛn bedzi dwuma. Jesus Christ ne dzin krɔnkrɔn no mu, amen.