Na Veiqaravi ni Kaulotu e Vakalougatataka Tawamudu na Noqu Bula.

Vinaka vakalevu, Peresitedi Nelson, na nomuni wasea tale na ivakasala oya baleta na veiqaravi ni kaulotu.

Kemuni na taciqu kei na ganequ, ena vica na yabaki sa oti niu vosa tiko ena koniferedi raraba, e a vakaleqai na mataqu imawi ena dua na ka e vakatokai na lutusobu ni yaloka ni mata, ka lutu sobu tiko ga ka yacova me sa sega ni yaga sara na rai ena mata oya.

Niu sotava tiko na bolebole oya, au na vakavinavinaka tu ga me baleta na so tale na mataqali rai, wili kina na rai ki gauna eliu. Niu raica lesu na noqu bula, au rawa ni raica na veika sotavi eso ka a caka veisau vakasakiti. E dua vei ira na ka au sotava oya na kena vakalougatataka na noqu bula ka viria na noqu icavacava vakayalo na noqu kaulotu vaka cauravou ki Igiladi.

Au dau vakananuma na bolebole vakailavo ka sema ki na Leqa Levu Vakailavo ni 1930 ka muataka na noqu itubutubu kei na noqu matavuvale ki na veisau kalouca. Ea ogaoga vakalevu ko tamaqu ni tovolea me vueta na nona kabani ni volitaki motoka ka qarava nona matavuvale ena gauna dredre oqori ka rau sega kina ni laki lotu na noqu itubutubu ena dua na gauna.

E dina ga ni keitou sega ni laki lotu vaka vuvale, e a sega ni tarovi au oya meu laki lotu vagauna kei ira na noqu itokani.

Ena gauna oya, e a tu na kaulotu ena daku ni noqu vakasama, ia e dua na ka au sega ni veivosakitaka kei rau na noqu itubutubu.

Niu laki vuli torocake, keitou vakatulewa kei na so na noqu itokani me keimami laki kaulotu. Ni keirau veitalanoa kei bisopi, au a vakalewena na noqu fomu ni kaulotu ni rau a tiko tani na noqu itubutubu. Ni rau suka mai na noqu itubutubu, au vakidacalataki rau ena itukutuku niu sa kacivi meu veiqaravi ki Peritania. Au vakavinavinakataka na nodrau veitokoni marau ena vakatulewa oya, kei na itokani vivinaka ka ra vukei au ena vakatulewa meu kaulotu.

Na noqu veiqaravi ni kaulotu e vakarautaki au meu dua na tagane vakawati vinkaka ka tama ka gumatua ena bisinisi. E vakarautaki au talega ki na veiqaravi ena bula taucoko vua na Turaga ena Nona Lotu.

Ena koniferedi raraba ni Epereli 1985, au a lesi meu vosa ena soqoni ni matabete. Au vukica na noqu vosa vei ira na cauravou. Au vosa me baleta na vakavakarau ki na veiqaravi vakadaukaulotu. Au a kaya, “Ena vuli kecega kau sa ciqoma ena noqu ilesilesi ena Lotu e sega ni dua e bibi cake vei au mai na vuli kau ciqoma niu a kaulotu yabaki tini-ka-ciwa kau veiqaravi tudei vakaulotu.” ¹

Sa kilai iko na Turaga. … Ni ko sa qarava tiko nomu kaulotu, ena yaco vei iko na veikasotavi ka na vukei iko mo kilai Koya vakavinaka cake. Ko na tubu vakayalo ena nomu qaravi Koya. Ena Yacana, o na talai mo qaravi ira na tani. Ena solia vei iko oKoya na veikasotavi ena veivakauqeti ni Yalo Tabu. Ena vakadonuya na Turaga mo veivakavulici ena Yacana. E rawa ni o vakaraitaka Vua ni rawa me vakabauti iko ka rawa ni vakararavi vei iko.

Ena lima ga na vula sa oti, erau a tomani au o Elder Jeffrey R. Holland kei Elder Quentin L. Cook, ka rau a veiqaravi talega vakadaukaulotu mai na Yatu Peritania, me keitou sikovi ira na lewenilotu kei na daukaulotu ena vanua totoka oya. Niu a tiko voli e kea, au a vakananuma lesu na veikasotavi niu se daukaulotu gone. Au vakadinadinataka ni noqu ilesilesi sa ikoya na vanua au sa mai kila kina ni Rau sa kilai au ka lomani au na Tamaqu Vakalomalagi kei na noqu iVakabula o Jisu Karisito.

Au a kalougata ni rau a mai noqu peresitedi ni kaulotu e rua na tamata talei, o Selvoy J Boyer kei Stayner Richards, kei rau na dui watidrau yalodina o Glady Boyer kei Jane Richards. Niu railesu, au raica vakamatata cake ni rau vakabauti au ka lomani au. E rau vakavulici au ena kosipeli. E rau nanamaki vakalevu mai vei au. E rau solia vei au e vuqa na ilesilesi dredre kei na itavi ni veiliutaki me vukei au meu tubu ka vakavakarau ki na dua na bula ni veiqaravi.

Au sa vakasamataka talega na nona kacivi au o Peresitedi Spencer W. Kimball me laki vakatulewa ena Tabana ni Kaulotu na Canada Toronto vata kei watiqu lomani, o Barbara, kei iratou na luvei keirau. A kacivi keirau o Peresitedi Kimball me keirau veiqaravi ena Epereli ni 1974, ni oti ga vakalailai na nona solia na nona itukutuku veivakauqeti ni kaulotu ka kena ulutaga “Ni sa na Veisautaki na Vuravura.”² Ena itukutuku o ya a vakamacalataka kina o Peresitedi Kimball na nona raivotu ena kena kau yani na kosipeli ki vuravura taucoko. A kaciva e vuqa tale na daukaulotu mai na veiyasai vuravura. E dau vakananuma o koya vei keimami na veika e namaka na Turaga “na tamata yadua me tabalaka cake na domo ni veivunauci vei ira na lewei vuravura.”³ Na ivakavuvuli nei Peresitedi Kimball me baleta na kena namaki vei ira na cauravou me ra kaulotu e yaco me iulutaga ni veitalanoa ena vei itikotiko e vuravura raraba. Na nanamaki o ya e se sega ni veisau. Au vakavinavinaka ni vakadeitaka tale tikoga o Peresitedi Russell M. Nelson na veika e namaka na Turaga ena mataka nikua.

Sa voleka oqo ni 10 na yabaki mai na gauna a vakaraitaka kina o Peresitedi Thomas S. Monson na kena vakalutumi sobu na yabaki ni veiqaravi vakadaukaulotu vei ira na cauravou kei na goneyalewa.⁴ Ena noqu rai, e dua na vuna taumada ni veisau oqo o ya me soli vei ira na noda itabagone e levu cake na madigi ni veisau ni bula me ra veiqaravi vakadaukaulotu.

Me vaka niu dua na iApositolo ni Turaga o Jisu Karisito, au sa kacivi kemuni kina na cauravou—kei ira na goneyalewa era gadreva tu me ra laki kaulotu—mo ni tekivu veitalanoa kei rau na nomuni itubutubu me baleta na kaulotu. Au sureti kemuni talega mo ni veitalanoa kei ira na nomuni itokani me baleta na kaulotu, kevaka e dua vei ira na nomuni itokani e sega ni vakadeitaka me baleta na veiqaravi, vakayaloqaqataki ira me ra veitalanoa vata kei na nodra bisopi.

Yalataka vei iko kei na Tamamu Vakalomalagi ni ko na laki kaulotu ka mai na gauna oqo ka lako yani ko ni na segata mo ni maroroya tiko na yalomuni, ligamuni, kei na nomuni vakasama me savasava ka kilikili. Au sureti kemuni mo ni rawata e dua na ivakadinadina ni kosipeli vakalesui mai kei Jisu Karisito.

Kemuni na tama kei na tina ni itabagone totoka oqo, sa tiko na nomuni itavi bibi ena iwalewale ni vakavakarau oqo. Tekivu nikua mo veivosaki kei ira na luvemuni me baleta na veiqaravi vakadaukaulotu. Eda kila ni matavuvale sai koya na veivakayarayarataki bibi duadua ena nodra vukei na noda cauravou kei na goneyalewa me ra vakavakarau.

Kevaka o se tiko ga ena yabaki ni veiqaravi vakadaukaulotu ia o se bera ni veiqaravi ena vuku ni matedewa se so tale na vuna, au sureti kemuni mo ni veiqaravi ena gauna oqo. Veitalanoa kei na nomu bisopi, ka vakavakarau mo qarava na Turaga.

Au vakauqeti kemuni na bisopi mo ni vukei ira kece na cauravou kei na goneyalewa era sa voleka ni yacova na yabaki ni kaulotu me ra vakavakarau ki na veiqaravi, kau vakauqeti kemuni talega na bisopi mo ni kilai ira era sa qase cake ia era se bera ni veiqaravi. Sureti ira yadua na cauravou me ra daukaulotu, ka vakakina o ira yadua na goneyalewa era gadreva me ra veiqaravi.

Vei kemuni na daukaulotu o ni veiqaravi tiko, vinaka vakalevu. Sa yaco tiko na nomu kaulotu ena dua na matedewa e vuravura raraba. Ena vuku ni ka oqori, ena sega ni tautauvata kina na veikasotavi ena nomu kaulotu se na veikasotavi ni dua tale na daukaulotu ni bera na 2020. Au kila ni a sega ni rawarawa. Ia ena veigauna dredre sara mada ga oqo, sa tu na cakacaka ni Turaga mo ni cakava, ka sa totoka sara na nomuni cakava. Me kena ivakaraitaki, o sa vakayagataka na tekinolaji ena veisala vovou mo raici ira kina era sa vakarau tu me ra vulica na Vakalesuimai ni kosipeli i Jisu Karisito. Ni ko veiqaravi vagumatua ka vakatau ki na veika o rawa ni cakava, au kila ni sa marautaka na Turaga na nomuni igu. Au kila ni nomu veiqaravi ena vakalougatataka na nomu bula.

Ni o sa vagalalataki mai na nomu kaulotu, nanuma ni o sega ni vagalalataki mai na itaviqaravi ena Lotu. Tara cake ena itovo vinaka o vulica ena nomu kaulotu, tomana na nomu vaqaqacotaka na nomu ivakadinadina, cakacaka vakaukauwa, masu, ka talairawarawa vua na Turaga. Vakarokorokotaka na veiyalayalati ko a vakayacora. Tomana na veivakalougatataki kei na qaravi ira na tani.

Sa noqu masu ni oi kemuni na cauravou kei na goneyalewa kei na nomuni itubutubu o ni na raica ka kila na sala ena vakalougatataka kina na nomuni bula na veiqaravi vakadaukaulotu. Mo ni kila ena nomuni vakasama ka vakila e yalomuni na kaukauwa ni veisureti a solia na Turaga vei iratou na luvei Mosaia tagane daukaulotu cecere. E kaya o koya, “Dou lako yani … ka vakataudeitaka na noqu vosa; ia mo dou vosota vakadede na veika rarawa ka dredre, mo dou na ivakaraitaki… vinaka vei ira ena vukuqu, ia au na qisi kemudou mo dou iyaya ni cakacaka e ligaqu me ra vakabulai kina e lewevuqa na yalo.”⁵

Me vakalougatataki ira na itabagone ena Lotu na Kalou me ra gadreva me vakavakarau ka qaravi Koya sa noqu masu malumalumu, au cabora ena mataka oqo ena yacana tabu na Turaga o Jisu Karisito, emeni.