Vakavulici ni Bula Rawati-Koya vei Ira na Gonelalai kei na iTabagone

Au na vosa tiko me baleta na bula rawati-koya kei na sala me vakavulici kina vei ira na gonelalai kei na itabagone. Ena rawa me nanumi tiko ni bula rawati-koya e nodra ulutaga ga na qase. Au sa mai kila oqo o ira na qase ena vinaka sara me ra tiko ena salatu ki na bula rawati-koya ni ra sa vakavulici oti ena kosipeli i Jisu Karisito ka sa bulataka na kena ivunau kei na ivakavuvuli ni ra se gone ka itabagone mai na nodra vale.

Na ivakaraitaki vinaka duadua o ya na ivakarau cecere ni kena bulataki dina. O Wilfried Vanie, kei na vitu na tacina, kei tinana a lewena na Lotu mai Abidjan, e Ivory Coast, ni se qai yabaki ono. E papitaiso o koya ni sa yabaki walu. O tamana, a vurevure tiko ni bula ni vuvale, a mate ni se qai yabaki tinikadua o Wilfried.

Dina ni a rarawa ena ituvaki o ya ni vuvale, sa tomana ga o Wilfried na nona vuli ena veivakayaloqaqataki nei tinana kei na veitokoni ni Lotu. A taurivola mai na vuli torocake ka laki kaulotu tudei ena Tabana ni Kaulotu e Ghana Cape Coast, ka a vulica kina na vosa Vakavalagi. Ni oti nona kaulotu, a gole ki univesiti ka taura kina na nona dipiloma ena akaude kei na veika vakailavo. Dina ga ni dredre me rawati na cakacaka ena koroi oqo, a kune cakacaka ena tabana ni saravanua kei na veiqaravi.

A tekivu ena weita ena dua na otela cecere sara, ia na gagadre me torocake a uqeti koya me vuli vakalevu ka yaco sara me laki kena dauveiqaravi ena rua na vosa. Ni sa dola e dua na otela vou, a laki cakacaka kina me daudikevifika ena bogi. E muri a lewena sara na BYU-Pathway Connect ka sa vuli tiko nikua me rawata nona setivikiti ni Saravanua kei na Otela. E nona gagadre me dua na siga me manidia ni dua na otela levu. Sa rawa vei Wilfried me qaravi nona itokani tawamudu kei na rua na luvena, vakakina me vukei tinana kei ira na tacina. E veiqaravi tiko ena gauna oqo ena Lotu ena matabose e cake ni iteki.

Na bula rawati-koya sai koya “na noda rawata, noda yalataki keda, kei na noda sasaga me da vakarautaka na veika ni bula vakayalo kei na bula vakayago me baleti keda kei na matavuvale.”¹ Noda sasaga meda bula rawati keda e tiko ni noda cakacaka ena salatu ni veiyalayalati ka muataki keda vei Tamada Vakalomalagi kei na Luvena, o Jisu Karisito. Ena vaqaqacotaka na noda vakabauti Jisu Karisito ka vauci keda vata ena marau vei Koya ena veiyalayalati kei na cakacaka vakalotu ni veivakabulai kei na bula vakacerecerei. Na bula rawati-koya sa dua na ivunau ni kosipeli i Jisu Karisito, ka sega ni dua na parokaramu. Sa dua na ivakarau ni bula taucoko, sega ni dua ga na gauna.

Eda yaco meda bula rawati-keda ena noda bula taucoko ni da tubu tiko ena qaqaco vakayalo, ena tiko bulabula vakayago kei na bula ni vakasama, sasagataki ni vuli kei na cakacaka, ka vakavakarau tiko vakayago.² Na cakacaka oqo ena oti beka ni da bula tiko? Sega, e vakarau ni bula taucoko ni vuli, tubu, kei na cakacaka. E ivakarau sega ni mudu, e tomani tikoga, ena veisiga.

Eda na vakavulica vakacava na ivunau kei na ivakavuvuli ni bula rawati-koya vei ira na luveda kei na itabagone. Dua na sala bibi na kena vakayagataki wasoma na ivakavuvuli ni parokaramu ni torocake ni Gonelalai kei na iTabagone. Na itubutubu kei ira na veitacini era vulica na kosipeli i Jisu Karisito, vakaitavi ena veiqaravi kei na itaviqaravi, ka cakacaka vata ena va na iwase ni torocake ni tamata yadua era cecere ki na gone yadua. Sa sega tale ni parokaramu eda kilakece vata ga ni lalai.

Na iDusidusi ni Gonelalai e kaya, “Ni se yabaki vata kei iko o Jisu, a vuli ka tubucake. Ko sa vuli ka tubu cake tale tikoga. E kaya na ivolanikalou: ‘A sa tubu cake ko Jisu e na vuku kei na yagona talega, a sa vinakati koya vakalevu cake tikoga na Kalou kei ira talega na tamata.’ (Luke 2:52).”³ Na ivolanikalou e tukuna tiko na tubu kei na vuli ena vakasama vakayalo, taleitaki vua na Kalou; na vakasama raraba, taleitaki vei ira na tamata, na vakasama vakayago, ituvaki; kei na vakasama vakavuli, na vuku. Na veitiki ni torocake oqo sa noda kece talega ena yabaki ni bula cava ga. Eda na vakavulica ena gauna cava? Ena Vakarua 6:6-7 eda wilika kina:

“Ia na vosa oqo, kau sa vakarota vei kemuni ena siga oqo, me tiko ga ena lomamuni:

“Mo ni gumatua ni vakavulica vei ira na luvemuni, ka dau vosataka ni kemuni sa tiko ena nomuni vale, ni kemuni sa lako voli talega ena sala, ka ni kemuni sa koto sobu, ni kemuni sa duri cake talega.”

Eda vakavulica na ka oqo vei ira na luveda ena ivakaraitaki vinaka, cakacaka ka veiqaravi vata kei ira, vulica na ivolanikalou, ka muria na ivakavuvuli i Jisu Karisito era a vakavulica na parofita.

Au a tukuna oqo ena parokaramu ni torocake ni Gonelalai kei na iTabagone, era na digitaka na gonelalai na lalawa duidui ena dua vei ira na tikina e va ni vakatorocaketaki. Sa ka bibi mera bulia na nodra dui lalawa ena tikina yadua. Sa rawa vei ira na itubutubu kei na iliuliu mera veivakavulici, vakasala, ka veitokoni.

Me vakataki makubui keirau yalewa o Miranda sa uqeti sara me tubu vakayalo ena vakaitavi e veisiga ena kalasi ni mataka lailai ni semineri. A taleitaka ena nona rogoca na veivosaki savasava mai vei ira eso na lewe ni semineri ena nona tabanalevu. A sega ni gadrevi vei tinana me vakayadrati koya me laki kalasi A yadra ga vakai koya ka sema ki na koniferedi ena vidio ena gauna lokuci ena 6:20 ena mataka baleta ni sa tauyavutaka na itovo vinaka ka vukei koya me cakava vakakina. Rau noqu itubutubu a kaya vei au ni sa vosa tiko vakalevu o Miranda ni sikovi rau yani, ka sa tubu cake ena nuidei. Oqo na veilesoni ni bula kei na tubu ena revurevu vinaka e kilai levu.

O ira na itubutubu, tubudra, iliuliu, kei na itokani era veivuke ena nodra tubu ka torocaketaki na gonelalai. O ira na tagane kei na yalewa veiqaravi vakailesilesi, vata kei ira na iliuliu ni soqosoqo kei na matabete ni tabanalevu era na veitokoni kina. “Na Matavuvale: Ai Vakaro ki Vuravura Raraba” e kaya: “Sa lewa vakalou, me ra veiliutaki ena yalololoma na tama ena nodra dui matavuvale, ena loloma kei na ivalavala dodonu ka sa nodra itavi talega na kena vakarautaki na veika me ra bula ka ra taqomaki kina na nodra matavuvale. Sa nodra itavi taumada na tina me ra susugi ira cake na luvedra. Ena vuku ni itavi vakalou oqo, era sa vakacolati kina na tama kei na tina me ra veivukei vakatautauvata. Mera qai dau veivukei o ira na wekadra.⁴ Na iotioti ni laini e tukuni ira tiko na tubudra, ena kena eso tale.

Ena neirau veiqaravi ena Ra kei Aferika, a totoka sara na veiqaravi nei watiqu o Nuria ka sema tikoga ki na neirau matavuvale kei na makubui keirau e takosova na wasawasa. E cakava oqo ena nona vakayagataka na tekinolaji. A wilivola vei ira na makubuna gone lailai sara. E vakavulici ira na makubuna yalewa qase cake ena ulutaga me vaka na italanoa ni neitou vuvale, sainisi, tukutuku makawa kei Puerto Rico, na Yavu ni Vakabauta, kei na kosipeli i Jisu Karisito. Na yawa ni vanua ena sega ni yalana na veisemati, veitaukeni, veiqaravi yani, ka vakavulici ira na itabatamata tubu cake tiko mai ni neitou vuvale. Au dau tomani Nuria talega niu rawa ni vakavulici ira na makubui keirau talei, mera lomani, ka mareqeti ira ka vakadredrei ira.

E dodonu mo kila rawa na veika tautauvata veivakauqeti maliwai ira na torocake ni Gonelalai kei na iTabagone kei na tauyavutaki na bula rawati-koya. Na va na tiki ni torocake ena kena yadua era sa tautauvata ga. Na qaqaco vakayalo ena bula rawati-koya sai koya na kedra ituvaki vakayalo na Gonelalai kei na iTabagone. Na tiko bulabula vakayago kei na vakasama ena bula rawati-koya e sema ki na ituvaki vakayago kei na nodra bula raraba na Gonelalai kei na iTabagone. Na vuli, cakacaka, kei na vakavakarau vakayago ni bula rawati-koya sa sema ki na ituvaki ni kila-ka ena nodra parokaramu na Gonelalai kei na itabagone.

Meu tinia, meda sa muria ga na noda iVakabula o Jisu Karisito kei na Nona kosipeli meda sa bula rawati-keda ena noda bula taucoko, ka vakavulica oqo vei ira na noda gonelalai kei na itabagone. Eda rawa ni cakava vinaka sara oqo ni da

1. ivakaraitaki vinaka ena veiqaravi vei ira eso.

2. Bula voli ka vakavulica na ivunau kei na ivakavuvuli ni bula rawati-koya.

3. Talairawarawa ki na ivakaro me tauyavutaki na bula rawati-koya me sa tiki ni kosipeli i Jisu Karisito.

NaVunau kei na Veiyalayalati 104:15-16 e kaya:

“Ka sa noqu inaki meu vakarautaka me yaga vei ira na noqu yalododonu, ni sa noqu na ka kecega.

“Ia sa dodonu me caka ena noqu sala ga; ka raica sai koya oqo na sala au sa lewa koi Au na Turaga me’u vakarautaka kina vei ira na noqu yalododonu na veika eso, me ra vakalevulevui na dravudravua, ka ra vakalolovirataki ko ira na vutuniyau.”

Oqo na Lotu i Jisu Karisito. Na Nona kosipeli sa vakalougatataki ira na matavuvale eke e vuravura kei na veigauna tawamudu. E dusimaki keda ena noda bula ni da sasaga meda sa matavuvale tawamudu. Au kila ni dina oqo. Ena yacai Jisu Karisito, emeni.