Vidio: “Sai Kemuni na Marama a Raica Taumada ko Koya”
Ena 1979 a curu tu i valenibula o Peresitedi Spencer W. Kimball ka mani kerea na watina o Camilla, me wilika na nona vosa ena dua na soqoni raraba ni marama.
Sister Camilla Kimball: “E vuqa na veivakatorocaketaki lelevu sa na yaco tiko mai ki na Lotu ena iotioti ni gauna baleta ni vuqa vei ira na marama vivinaka e vuravura (e titobu na nodra bula vakayalo) era na gole mai vakalewe levu ki na Lotu. Oqo ena yaco baleta ni o ira na marama ena Lotu era na vakaraitaka na yalododonu kei na digidigi vakavuku ena nodra bula, vakakina ena loma ni Lotu era laurai na marama ni ra duatani ka duidui—era mamarau—mai vei ira na marama e vuravura.”1
Peresitedi Russell M. Nelson: “Kemuni na marama o kemuni ko ni neimami ilawalawa ena gauna sa vakarau mai cava tiko oqo, na siga e kaya o Peresitedi Kimball sa tu sara ga oqo nikua. Oi kemuni na marama a raica taumada o koya! Na nomuni yalodina, rarama, loloma, kila-ka gugumatua, ivakarau-kilikili, vakabauta, kei na buladodonu ena kauti ira mai na yalewa vinaka mai vuravura kei ira na nodra matavuvale kina loma ni Lotu ena dua na wiliwili levu sara!
“Keimami gadreva na nomuni kaukauwa, na nomuni ivakadinadina, na nomuni rawa ni veiliutaki, na nomuni yalomatua kei na domomuni. “Na matanitu ni Kalou ena sega ni taucoko, ka na sega ni rawa ni taucoko kevaka e sega na marama era cakava nodra veiyalayalati ka bulataka, na marama era na rawa ni vosa ena kaukauwa kei na veivakadonui ni Kalou!
“… Se cava ga na nomuni veikacivi, se cava beka na kemuni ituvaki ni bula, keimami gadreva nomuni ivakatakila, nomuni rai kei na nomuni veivakauqeti. Keimami gadrevi kemuni mo ni vosa mai ena bose ni tabanalevu kei na iteki. Keimami gadreva na marama vakawati yadua mera vosa ni ra ‘sa cau ka taucoko nomuni veitokani’ ni ko ni duavata tiko kei watimuni ena tuberi cake ni nomuni matavuvale. Ko vakawati se dawai, e tiko vei kemuni na marama na rawa-ka duatani kei kilakila talei ko ni a ciqoma me isolisoli mai vua na Kalou. Ena sega ni rawa vei keimami na turaga me keimami na tokaruataka na nomuni rawa-ka na marama.
Eda kila ni a iotioti ni ka me buli sa ikoya na yalewa! Keimami gadreva na nomuni kaukauwa!
“…Au vakavinavinaka vei kemuni na marama ka vakalougatataki kemuni mo ni rawa ka ena kena ivakatagedegede e cake sara, ka vakataucokotaka na inaki ni nomuni a buli, ni da lakova vata tu na cakacaka tabu oqo. Me da duavata ena vakarautaki ni vuravura me baleta na Lesu tale mai ni Turaga.”2