Ni Sa Lomani Keda Na Kalou

“Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu” (Joni 3:16). Nai matai ni gauna au a raica kina na tikina qo, au sega ni tiko ivalenilotu se na lotu vakamatavuvale. Au sara qito tiko ena retio yaloyalo. Se siteseni cava ga au sarava, se na qito cava ga, ena dau dua na tamata ena vakaraitaka tiko e dua nai vakatakilakila ka volai kina na “Joni 3:16

Ka yaco meu taleitaka vakakina na tikina e 17: “Ni sa sega ni tala mai na Luvena ki vuravura na Kalou me cudruvi ira na kai vuravura; me bula ga ko ira na kai vuravura e na vukuna.”

Na Kalou e talai Jisu Karisito mai, Na Luvena E Dua Bau ga ena yago, me mai solia Nona bula ena vukuda kece sara. A vakayacora ena vuku ni nona lomani keda ka tuva kina e dua na ituvatuva me noda yadua meda na bula vata tale kei Koya.

Ia qo e sega ni dua na ituvatuva, me caka tu ga me rawa. E ka ni tamata yadua, virikotori mai vua na Tamada Vakalomalagi dauloloma, e kila na lomada, na yacada, kei na veika e gadreva o Koya vei keda meda cakava. Na cava na vuna eda vakabauta kina o ya? Baleta ni vakavulici vei keda mai na volanikalou tabu.

Dau rogoci Tamada Vakalomalagi vakawasoma o Mosese ni cavuta “I Mosese na luvequ” (raica na Mosese 1:7, 40; raica talega na tikina e 7, 40). E vulica o Eparaama ni o koya e dua na luve ni Kalou, ka digitaki ki na nona itavi ni bera ni sucu (raica na Eparaama 3:12, 23). Ena liga ni Kalou, a biu o Esiteri ena dua na itutu cecere me vakabulai ira kina nona tamata (raica na Esiteri 4). E nuitaka na Kalou e dua na goneyalewa, dauveiqaravi, me vakadinadinataka e dua na parofita bula me rawa ni vakabulai o Neamani (raica na 2 Tui 5

Au taleitaka na tamata vinaka oya, tamata lekaleka, ka kabata e dua na vunikau me raici Jisu. Nai Vakabula e kila ni tiko e kea o koya, a tuvakadua, rai cake kina vei tabanikau, ka cavuta na vosa oqo: “Sakiusa, … kevu sobu mai” (Luke 19:5). Eda na sega ni rawa ni guilecava na gonetagane yabaki 14 ka gole ena loma ni veikau ka vulica vaka ikoya na ituvatuva: “[Josefa,] Oqo na Luvequ Lomani Mo Rogoci Koya!” (Josefa Simici—Ai Tukutuku 1:17).

Kemuni na taciqu kei na ganequ, na ituvatuva ni Tamada Vakalomagi e vakanamata vei keda ka inaki ni nona i lesilesi nai Vakabula. O keda kece, vakayadua, eda Nodrau cakacaka kei na Nodrau lagilagi.

Vei au, e sega ni dua nai vola ni ivolanikalou e vakamatatataki kina oqo me vaka na noqu vulica na Veiyalayalati Makawa. Mai na dua nai wase kina dua tale eda kunea kina nai vakaraitaki ni sala erau kauwai vakavoleka kina ki na noda bula na Tamada Vakalomalagi kei Jiova.

Eda se qai vulica toka ga oqo na veika baleti Josefa, na luvei Jekope lomani. Mai na gauna ni nona gone, sa dau lomani Josefa vakalevu na Turaga, ia a sotava o koya e levu na veivakatovolei mai vei ratou na tuakana. Rua na macawa sa oti, e vuqa vei keda a tarai ena sala a vosoti iratou kina na tacina o Josefa. Ena Lako Mai, Mo Muri Au eda wilika kina: “Ena vuqa na sala, na bula i Josefa e tautauvata kei Jisu Karisito. E dina ga ni vakavuna Vua na rarawa levu, a veivosoti ka sereki keda kece na iVakabula mai na dua na leqa ka ca vakalevu sara mai na dausiga. Se da gadreva me da na ciqoma na veivosoti se solia—ena so na gauna eda gadreva me da cakava ruarua—na ivakaraitaki nei Josefa e dusimaki keda kivua na iVakabula, na ivurevure dina ni veivakabulai kei na veivakaduavatataki.”¹

E dua na lesoni au taleitaka ena i talanoa oya e lako mai vei Juta na taci Josefa, ka vakaitavi ena ituvatuva ni Kalou baleti Josefa. Ni oti nodratou bukiveretaki Josefa na tuakana, o Juta a tukuna me ratou kua ni vakamatei Josefa ia me volitaki vakabobula (raica Nai Vakatekivu 37:26–27).

Ni oti e vica na yabaki, e gadrevi vei Juta kei iratou na tuakana me ratou kauta na tacidratou gone duadua, o Penijamini, ki Ijipita. A sega ni vakadonuya taumada o tamadratou. Ia o Juta a qai yalataka vei Jekope—ni na kauti Penijamini lesu mai i vale.

E Ijipita, a vakatovolei kina na yalayala i Juta. Na gone o Penijamini a qai beitaki vakailasu ena dua na cala. O Juta, a dinata nona yalayala, ka soli koya me vesu me isosomi kei Penijamini. “Niu,” a kaya, “na lako vakacava vei tamaqu ni sa sega ni tiko kei au na gone?” (raica Nai Vakatekivu 44:33–34). O Juta a segata me maroroya na nona yalayala me vakalesui Penijamini ena bula vinaka. O bau kauwaitaki ira beka na tani me vaka a vakila o Juta baleti Penijamini?

E sega beka ni vakaoqo nai valavala ni nodra nanumi ira na luvedra o ira nai tubutubu? Na nodra nanumi ira era veiqaravi kina o ira na daukaulotu? Na nodra nanumi ira era vakavulica ka lomana o ira nai liuliu ni Lalai kei na itabagone?

Se o cei o iko se nai tuvaki cava o sotava sara tiko ga oqo, e dua e nanumi iko tiko ena sala vata oqo. E dua e via lesu tale vua na Tamada Vakalomalagi vata kei iko.

Au vakavinavinaka vei ira era sega ni soro ena vukuda, o ira era tomana mera sovaraka na yalodra ena masulaki keda, ka tomana me veivakavulici ka vukei keda meda rawa ni lesu ivale vua na Tamada mai Lomalagi.

Wale ga oqo e dua na itokani lomani a curu e valenibula me 233 na siga ena vuku ni COVID-19. Ena loma ni gauna o ya, a sikovi kina mai vua na tamana, ka sa takali ka kerea me soli e dua nai tukutuku vei ira na makubuna. Mai na daku mada ga ni ilati, na tukanigone vinaka oqo a gadreva me vukei ira na makubuna mera lesu tale kina nodra itikotiko mai lomalagi.

E vuqa na tisaipeli i Karisito era nanumi ira tiko na “Penijamini” ni nodra bula. E veiyasai vuravura era sa rogoca na kaci matata ni parofita bula ni Kalou, o Peresitedi Russell M. Nelson. Era sa vakaitavi na cauravou kei na goneyalewa ena mataivalu itabagone ni Turaga. Na tamata yadua kei na vei matavuvale era dodoliga yani ena yalo ni veiqaravi—loloma, veiwasei, ka veisureti vei ira nai tokani kei ira era tiko veitikivi mera lako mai vei Karisito. O ira na itabagone kei na qase era nanuma tiko ka sasaga me maroroya na nodra veiyalayalati—vakasinaita na valetabu ni Kalou, vaqarai na yaca ni lewe ni vuvale era sa takali, ka ciqoma na cakacaka vakalotu ena vukudra.

Na cava na vuna e okati kina ena ituvatuva ni Tamada Vakalomalagi vei keda yadua meda vukei ira na tani mera lesu tale vei Koya? Baleta oqori na sala eda yaco kina meda vakataki Jisu Karisito. Na kena i soqoni, na italanoa kei Juta vata kei Penijamini e vakavulici keda me baleta na solibula ni iVakabula ena vukuda. Ena vuku ni Nona Veisorovaki, a solia kina o Koya na Nona bula me kauti keda lesu. Na vosa i Juta e vakaraitaka na loloma ni iVakabula: “Meu na lako cake vakacava vei tamaqu, ni sa sega ni tiko kei au [o iko]?” Ni da vakasoqoni Isireli tiko, oqori e rawa tale ga ni noda vosa.

Na iVolatabu Makawa e vutucoqa ena cakacaka mana kei na loloma uasivi ka sa ivakatakilakila ni ituvatuva ni Tamada Vakalomalagi. Ena 2 Tui wase e 4na malanivosa “a sa dua na siga” e vakayagataki vaka tolu me vakabibitaka ni veika yaco ka bibi e vakayacori ena gauna ni Kalou, ka sega na ka somidi e sega ni lecava o Koya.

Na noqui tokani vou o Paula e vakadinadinataka na dina oqo. O Paula a tubu cake ena dua nai tikotiko ka so na gauna e dau veivakacacani ka sega ni dau taleitaka na veika vaka lotu. Ena nona vuli tiko ena dua nai tikotiko ni mataivalu e Jamani, a raici rau e rua na sisita ka vaka me tiko vei rau e dua na rarama vakayalo. Ni tarogi se cava e rau duatani kina, a kena isau mai ni rau lewena na Lotu i Jisu Karisito ni Yalododonu Edaidai.

Sega ni dede sa tekivu me sota kei rau na daukaulotu o Paula ka sureti sara i lotu. Ena Sigatabu ka tarava ni sobu mai na basi, a raica sara e rua na tagane ni rau vakasote vulavula kei na tai. A taroga se rau italatala qase ni Lotu. Erau sauma ena io, ka mani muri rau o Paula.

Ena gauna ni lotu, ena dusia e dua na lewe ni ivavakoso o dauvunau ka sureti ira mera soli i vakadinadina. Ni oti na vei ivakadinadina yadua, ena qiria o dauqiri dramu na nona dramu ka ra na qai kailavaka mai nai vavakoso, “Emeni.”

Ena gauna a dusi Paula kina na dauvunau, a duri cake o koya ka kaya, “Au kila ni o Josefa Simici a parofita kei na iVola i Momani e dina.” E sega na qiri dramu se vaka emeni. Sa qai kila e muri o Paula ni gole kina vanua cala. Sega ni dede, sa qai kunea o Paula na vanua donu ka papitaiso sara.

Ena siga e papitaiso kina o Paula, e dua na lewenilotu ka sega ni kila a tukuna vua , “O iko o vakabulai au” Ena vica na macawa yani eliu, na tagane oqo a digitaka me vaqara e dua tale na lotu ka mani tiko kina ena lotu ni qiri dramu kei na vaka emeni. Ni rogoca na tagane o ya nai vakadinadina i Paula baleti Josefa Simici kei na iVola i Momani, a kila o koya ni Kalou e kilai koya, kila na nona sasaga, ka tiko e dua na Nona ituvatuva baleti koya. Vei rau o Paula kei na tamata o ya, “a sa dua na siga,” vakaidina!

Oi keda tale ga eda kila ni tiko na ituvatuva ni marau yadua ni Tamada Vakalomalagi vei keda vakayadua. Baleta ni a solia na Kalou na Luvena Lomani ena vukuda, na caka mana eda gadreva ena “[yaco] ena siga [sara ga]” me na vakayacori kina na Nona ituvatuva.

Au tusanaka ena yabaki oqo eda na rawa ni vulica e levu cake na ka baleta na ituvatuva ni Kalou vei keda ena Veiyalayalati Makawa. Na ivola tabu e vakavulica na nodra itavi na parofita ena veigauna tawamacala kei na liga ni Kalou ena dua na vuravura e veilecayaki ka veileti. E baleti ira tale ga na tamata vakabauta yalomalumalumu ka ra nanamaki ena yalodina ki na tadu mai ni iVakabula, me vaka ga na noda nanamaki ka vakavakarau kina iKarua ni Nona Lesu Talemai—Nona lesu talemai ena lagilagi, ka yalataki tu mai vakabalavu.

Me yacova na siga oya, eda na sega beka ni raica, ena matada vakayago nai tuvatuva ni Kalou ki na veitiki kece ni noda bula (raica na Vunau kei na Veiyalayalati 58:3.). Ia e rawa meda nanuma na ka e cakava o Nifai ni sotava e dua na ka a sega ni matata vua: dina ni sega ni kila na ibalebale ni veika kece, ia a kila o koya ni Kalou e lomani ira na Luvena (raica na 1 Nifai 11:17).

Oqo na noqui vakadinadina ena mataka totoka ni Sigatabu oqo. Meda qai vola e lomada ka vakatara me vakasinaita na yaloda ena vakacegu, inuinui, kei na reki tawamudu: Ni sa lomani keda na Kalou me solia kina na Luvena e Dua Bauga sa Vakatubura sega ni mai cudruvi keda ia me vakabulai keda. Ena yacai Jisu Karisito, emeni.