Na Salatu ni Veiyalayalati: Na Sala ki na Bula Tawamudu

E dua na tui qaqa e a gadreva me veiulitaki ena dua na nona matanitu na luvena tagane. Sa dodonu me vuli ka tubu ena yalomatua na ravouvou me rawa kina ni dabeca na idabedabe vaka tui. Ena dua na siga, a sotava na ravouvou na tui ka wasea ki vua na nona ituvatuva. Rau a vakadonuya me na gole ki na dua tale na tauni na ravouvou me rawa ni vuli kina. Ena sota kaya o koya na vei bolebole eso mai kea ka vakakina ni na marautaka talega e levu na ka vinaka. Sa qai talai koya ki na tauni oya na tui, na vanua ka namaki me na vakadeitaki koya kina na ravouvou ena yalodina ki vua na tui ka vakaraitaka ni sa tu donu tu me ciqoma na dodonu kei na itavi eso sa vakarautaka tu vua na tui. A soli vua na ravouvou na galala me digitaka me na ciqoma na dodonu kei na itavi eso oqo se sega, ka na vakatau ki na nona gagadre kei na yalodina. Au kila ni o na via kila na cava a qai yaco vua na ravouvou. E a lesu beka li me lai taukena na matanitu?

Kemuni na taciqu kei na ganequ, sai keda yadua na ravouvou se raluve. Eda sa vakau mai ki na vuravura vakayago mai vua na Tamada Vakalomalagi dauloloma me da mai marautaka na veivakalougatataki vakayago ka na tawamate rawa ena vuku ni Veisorovaki kei na Tucaketale i Jisu Karisito. Sa namaki me da na vakarau tu me da na lesu ki vua na Kalou ena noda na vakadinadinataka ni da na “muria na veika kece sa vakarota vei [keda] na Turaga na [noda] Kalou]” (Eparaama 3:25).

Me vukei keda, e a lako mai na iVakabula me mai sereki keda ka vakaraitaka na salatu lesu ki vua na Kalou. Era sa sureti na luve ni Kalou me ra lako mai ki vua na iVakabula ka mai vakataucokotaki ena Vukuna. Ena ivolanikalou, eda raica kina na veisureti me da lako mai ki vua na Turaga ni tukuni vaka 90, ka sivia na veimama e Nona veisureti vakai-Koya na Turaga ki na tamata yadua. Na ciqomi ni veisureti ni iVakabula e kena ibalebale me da na qarava na Nona cakacaka vakalotu eso kei na maroroi ni noda veiyalayalati kei Koya. Sai Jisu Karisito na sala, na vu ni dina, kei na vu ni bula” (John 14:6), ka sa sureti keda me da “lako mai vua ka vakaivotavota ena nona vinaka; ka sa sega ni bureitaka vua e dua sa lako mai vua” (2 Nifai 26:33).

Na noda vulica na kosipeli ka vakatavulica ena vakatitobutaka na noda saumaki ki vua na Tamada Vakalomalagi kei Jisu Karisito ka vukei keda me da vakataki Rau sara. Dina ga ni sa sega ni vakatakilai na veika taucoko me baleta na gauna kei na ivalavala donu ena vakatikori kina na veivakalougatataki ni veivakacerecerei, ia e sa vakadeitaki tu vaka kina. (M. Russell Ballard, “Vakanuinui vei Karisito,” Liahona, May 2021, 55).

Ena nona veivakatavulica o Alama na bete levu ena vanua ko Saraemala, e vakananuma tale mai e dua na veisureti bibi mai vei Jisu Karisito:

“Raica sa kacivi ira na tamata kecega ko Koya, a sa dodoka yani vei ira na ligana dauloloma ka kaya: Dou veivutuni ka’u na qai vakabulai kemudou.

Io, sa kaya ko koya: Lako mai vei au ko na qai kania na vua ni vunikau ni bula” (Alama 5:33–34).

Na iVakabula vakataki Koya sa sureti keda me da lako mai ki Vua ka ciqoma na Nona icolacola ki vei keda me da ciqoma na vakacegu ena vuravura veilecayaki oqo (raica na Maciu 11:28–29). Eda lako mai vei Karisito ena noda cakacakataka na noda “vakabauti Koya, veivutuni e veisiga, vakayaco veiyalayalati kei na Kalou ni da ciqoma na cakacaka vakalotu ni veivakabulai kei na veivakacerecerei, ka vosota tu me yacova na ivakataotioti ena maroroi ni veiyalayalati oqori ” (iVola Dusidusi Raraba: Veiqaravi ena Lotu i Jisu Karisito ni Yalododonu Edaidai, 1.2.1, ChurchofJesusChrist.org). Na salatu ki na veivakataucokotaki sa ikoya na sala ni veiyalayalati, ka sa usutu taucoko ni cakacaka vakalotu kei na veiyalayalati o Jisu Karisito.

A vakatavulica o Penijamini na Tui ni mai na veiyalayalati eda vakayacora, sa yaco me da luvei Karisito, ka sa vakatuburi keda vakayalo, ka da sa vagalalataki ena Vukuna, ni “sa sega tale na yaca e soli me rawa kina na veivakabulai” (raica na Mosaia 5:7–8). Eda sa vakabulai ni da sa vosota me yacova na ivakataotioti ena “muri ni ivakaraitaki ni Luve ni Kalou bula” (2 Nifai 31:16). A vakasalataka o Nifai ni sega ni se oti na itavi ena noda tiko ena sala dodonu ka qiqo walega; me da sa “toso ki liu ka tudei vei Karisito, ena taucoko ni nomudou vakanuinui, ka mo dou lomana na Kalou kei ira na tamata kecega” (raica na 2 Nifai 31:19–20).

Sa vukei keda na vunau i Karisito me da raica ka tiko ena salatu ni veiyalayalati, ka sa tuvalaki tu na kosipeli me da ciqomi kina na veivakalougatataki yalataki ni Turaga ena cakacaka vakalotu kei na veiyalayalati tabu. A vakadreti keda ena walesi na parofita ni Kalou, o Peresitedi Russell M. Nelson ena 16 ni Janueri, 2018, me da “tiko ga ena salatu ni veiyalayalati. Na nomu vakadeitaka na nomu muria na iVakabula ena nomu caka veiyalayalati kei Koya ka qai maroroya na veiyalayalati oqori ena dolava na katuba ki na veivakalougatataki vakayalo kecega kei na dodonu ka soli tu vei ira na turaga, marama, kei na gone ena veivanua kecega. Na icavacava eda sa sasagataka yadua tu sa ikoya me da vakataubeni ena kaukauwa ena vale ni Kalou, vauci vakamatavuvale, yalodina tu ki na veiyalayalati e vakayacori ena valetabu ka na vakatarai keda me da ciqoma na isolisoli levu duadua ni Kalou, oya na bula tawamudu” (”Ni Da Toso Vata ki Liu,” Liaona, Epe. 2018).

Ena sega ni guilecava na Nona veimaliwai vatakei ira, se vakasuka ena Nona veivakalougatataki yalataki ni bula tawamudu mai vei ira na veiyalayalati yalodina na Kalou. Ni da rokova na veiyalayalati tabu, eda sa toso volekata tiko na iVakabula. Vakavulici keda ena noa o Elder David A. Bednar ni na veiyalayalati kei na cakacaka vakalotu ni kosipeli e cakacaka ena noda bula me vaka e dua na veidusimaki ni kabasi me da lako vua na iVakabula ka vakataki Koya.

Na veiyalayalati sa dusia na salatu lesu vua na Kalou. Na cakacaka vakalotu ni papitaiso kei na ciqomi ni isolisoli ni Yalo Tabu, veitabaki ni matabete, kei na sakaramede, sa muataki keda ki na valetabu ni Turaga me qaravi na Nona cakacaka vakalotu ni veivakacerecerei.

Au via vakaraitaka e rua na ka e a vakadreta na iVakabula me vukei keda me da maroroya kina ena yalodina na veiyalayalati:

1. Na Yalo Tabu sa rawa ni vakavulici keda, vakananumi keda ena ivakavuvuli ni iVakabula, ka tiko vata tu ga kei keda (raica na Joni 14:16, 26). Sa rawa ni noda itokani tudei o Koya me tuberi keda ena salatu ni veiyalayalati. A vakatavulica o Peresitedi Russell M. Nelson “ena veisiga mai oqo, ena sega ni rawa ni da bula vakayalo voli ke sega na veituberi, veidusimaki, veivakacegui, kei na veivakauqeti tudei ni Yalo Tabu” (“iVakatakila ki na Lotu, iVakatakila ki na Noda Bula,” Liaona, Me 2018, 96).

2. A vakatavulica na Turaga na cakacaka vakalotu ni sakaramede, me rawa kina ni da dau nanumi Koya ka me tiko ga kei keda na Nona Yalotabu. Na papitaiso sa dolava na matamata ki na bula tawamudu, ka sa vukei keda na sakaramede me da toso tu ga ki liu ena salatu ni veiyalayalati. Ni da taura na sakaramede e sa na ivakadinadina tu ki vua na Tamada ni da na nanuma tu ga na Luvena. Ni da na nanumi Koya tu ga ka muria na Nona ivunau, e na tiko vata kei keda na Nona Yalotabu. Me vakuri ki na yalayala oqo, sa vakavoutaka na Turaga na savai ni valavala ca yalataki ni da veivutunitaka ena yalomalumalumu na noda ivalavala ca.

Ni da yalodina tu ki na noda veiyalayalati, sa dodonu me da tovolea me dau vakarautaki keda tikoga na Yalotabu me da taura ena yalo kilikili na sakaramede, ka, vakakina, me da taura e veigauna na sakaramede me dau tiko kina kei keda na Yalotabu.

Ni sa yabaki lima na luvei keirau yalewa, a dua tu na nona motoka lailai vakabatiri ka dau taleitaka me draiva wavokita na vale. Ena dua na bogi, a lako mai vei au ka kaya, “Ta, sa sega ni yavala na noqu motoka. Rawa ni daru taura mai eso na waiwai mai na nomu motoka me biu kina me rawa ni yavala tale? De na rairai e gadreva na waiwai vaka na nomu motoka me yavala.”

Au dikeva e muri ni sa lailai na kaukauwa ni bateri, au kaya sara ni na rawa ni yavala ni oti e dua na aua. Ena levu ni yalomarau, a kaya o koya, “Io! Daru na kauta ki na siteseni ni tawa waiwai.” Au a semata ga na bateri ki na dua na ivurevure ni livaliva me lavetaki, ka oti e dua na aua sa rawa ni draivataka na motoka, vakaukauwataki ena bateri lavetaki. Sa vulica kina o koya ni sa ka bibi me dau lavetaki tu ga na bateri ena kena semati ki na dua na ivurevure ni livaliva.

Ni vulica tu na luvei keirau yalewa na veiwekani ni bateri kei na kaukauwa me draivataka na nona motoka buli, eda sa vulica talega kina me baleti Jisu Karisito, na sakaramede, kei na Yalotabu. Eda gadreva na Yalotabu me vukei keda ni da lako curuma na bula oqo ni da vakayacora na veiyalayalati ena vakabauta, kei na sakaramede me vakabulabulataka na noda bula vakayalo. Na vakavoutaki ni noda veiyalayalati ni papitaiso kei na tauri ni sakaramede sa vaqaqacotaka na yalodina ki na veiyalayalati kece tale eso. Sa vakadeitaki na icavacava marau ni da vulica ka doka ena masumasu na veisureti ni iVakabula ka marautaka na Nona veivakalougatataki yalataki. A kaya o Koya, “Ka mo qarauni iko vakavinaka me kakua ni tauvi iko na duka ni ka vakavuravura, ia mo lako ki na vale ni masumasu ka cabora na nomu sakaramede ena noqu siga tabu” (Vunau kei na Veiyalayalati 59:9).

Au vakadinadinataka vei ira na ivalavala dodonu ni ra na rawata na vakacegu ena vuravura oqo kei na bula tawamudu ena vuravura sa bera mai” (Vunau kei na Veiyalayalati 59:23). Au vakadinata ni ko taura wasoma na vakatakarakara ni iVakabula ena sakaramede, ena tiko vata kei iko na Nona Yalotabu me tuberi iko ena salatu ni veiyalayalati ka dinata tu na nomu veiyalayalati, ena yaca i Jisu Karisito, emeni. Ena yacai Jisu Karisito, emeni.