Na Keda iSema ni Veiwekani kei na Kalou

Me vakataki Jope ena Veiyalayalati Makawa, ena gauna era kune rarawa kina eso beka era na nanuma ni sa biuti ira na Kalou. Baleta ni da sa kila tiko ni tu vua na Kalou na kaukauwa me tarova se kauta laivi na veika rarawa, eda na temaki beka me da kudru ni sega ni cakava o Koya, se, eda na taro beka, “Kevaka e sega ni solia na Kalou na veivuke au kerea, meu na vakabauti Koya vakacava?” Ena dua na gauna ena loma ni nona vakatovolei vakaukauwa, a kaya na dau buladodonu o Jope:

“Dou kila oqo ni sai koya na Kalou sa vakabalei au, ka sa lawavaki au ena nona lawa.

”Raica kau sa qoqolou ena vuku ni ivalavala kaukauwa!’ Ia ka sega e rogo mai; au sa kaci ena domoilevu, ia sa sega ni yaco na lewa.”¹

Ena nona vosa vei Jope, a vinakata kina me kila na Kalou, “Ko sa via vakacalai au mo dodonu kina ko iko?”² Se ena dua tale na kena itukutukuni, “Ko na vakacalai au beka? Ko na vakacacani au beka mo vakadonui kina?”³ A vakananuma vakasaurara vei Jope ko Jiova me baleta na nona kaukauwa tawayalani kei na vuku cecere, ka vakadinata ko Jope ena yalomalumalumu titobu ni sega ni tu vua e dua na ka me bau volekata yani na vuku, kaukauwa, kei na buladodonu ni Kalou ka na sega ni tu rawa ena nona itutu ni veilewai o Koya sa Cecere Sara:

“Au sa kila ni kemuni sa rawata na ka kecega,” e kaya o koya, “a sa sega ni tarovi rawa e dua na ka ko ni sa nanuma.

Na ka e veivakurabuitaki vei au, kau a sega ni kila.

“O koya oqo kau sa beci au sara kina, ka veivutuni, e na kuvu ni soso kei na dravusa.”⁴

Kena itinitini, a ka dokai vei Jope me raica na Turaga, ka “vakalougatataka vakalevu ko Jiova na veiyabaki nei Jope sa muri, ka vakalailai e liu.”⁵

Sa ka lialia dina vei keda ena noda dau rai lekaleka vakatamata me da via lewa na Kalou, me da vakasamataka, kena ivakaraitaki, “Au sega ni marau tiko, e dua beka na ka cala e cakava tiko na Kalou.” Vei keda, na Luvena vakayago ena dua na vuravura lutu tani, ka lailai sara na ka eda kila me baleta na gauna sa oti, na gauna oqo, kei na gauna sa bera mai, sa tukuna ko Koya, “Niu sa kila ka raica na ka kecega.”⁶ A veivakasalataki vakavinaka o Jekope: “Dou kakua kina ni segata mo dou vakasalataka na Turaga, ia mo dou taura ga na ivakasala mai na ligana. Ia raica, dou sa kila vakai kemudou ni sa veivakasalataki ko koya ena yalomatua, kei na lewa dodonu, kei na loloma cecere levu, ena nona ibulibuli kecega.”⁷

Eso era dau taura cala na yalayala ni Kalou me kena ibalebale ni talairawarawa Vua ena tauci na vuana ena dua na ivakarau tudei. Era na nanuma beka, “Kevaka au veiqaravi vagumatua vaka kaulotu tudei, ena vakalougatataki au na Kalou ena bula vakawati marautaki kei na vakaluveni,” se “Kevaka au vakuwai au mai na cakava na noqu ka ni vuli ena Siga ni Vakacecegu, ena vakalougatataki au na Kalou ena maka vinaka ena gauna ni veitarogi,” se “Kevaka au saumi ikatini, ena vakalougatataki au na Kalou ena cakacaka au gadreva tiko oya.” Kevaka e mani sega sara ni vakakina na bula se ena gauna e namaki kina, era na nanuma beka ni sa biuti ira na Kalou. Ia e sega soti ni vaka sara tu kina na bula ena ituvatuva vakalou. Meda kua ni taura vakatani na ituvatuva ni Kalou me vaka e dua na misini ni volivoli ka rawa nida (i) digia na veivakalougatataki eda gadreva, (ii) vakacuruma na levu ni cakacaka vinaka e gadrevi kina, ka (iii) soli mai ena kena gauna totolo.⁸

Ena rokova vakaidina na Kalou na Nona veiyalayalati kei na yalayala vei keda yadua. Me da kua ni leqataka oqori.⁹ Na mana ni veisorovakii i Jisu Karisito—o koya a siro sobu mai ki ra sara oti sa qai lako cake¹⁰ ka sai koya sa tu vua na kaukauwa ni ka kecega e vuravura¹¹—ka vakadeitaka ni rawa vua na Kalou me vakayacora taucoko na Nona yalayala. Sa bibi sara meda rokova ka doka na Nona lawa, Ia e sega ni veivakalougatataki kece e yalataki ena talairawarawa ki na lawa¹² e buli, tuvai, ka vagaunataki me vaka na noda nanamaki. Eda na cakava na noda vinaka duadua ia sa dodonu meda laiva Vua na lewa ni noda veivakalougatataki, ruarua vakayago ka vakayalo.

E vakamacalataka o Peresitedi Brigham Young ni nona vakabauta e sega ni tara cake mai na macala ni dua na ka se veivakalougatataki, ia mai na nona veiwekani kei Jisu Karisito. E kaya o koya: “Na noqu vakabauta e sega ni yavutaki mai na cakacaka ni Turaga ena veiyanuyanu ni wasawasa, se na nona kauti ira mai na tamata ike, se na veika vinaka e vakayacora vei ira na tamata oqo se tamata oya, se kevaka eda vakalougatataki se sega, ia na noqu vakabauta e tiko vua na Turaga o Jisu Karisito, kei na veika au sa mai ciqoma ka kila mai vei koya.¹³

Na noda veivutuni kei na talairawarawa, na noda solibula kei na caka vinaka e ka bibi Eda vinakata me da wili vata kei ira a vakamacalataka o Ica ni ra sa “tawayavalati rawa ena cakacaka vinaka kecega.”¹⁴ Ia e sega soti ni baleta na kena isoqoni ka volai tu ena ivola ni noda akaude vakaselesitieli. Era vakaibalebale na veika oqo baleta nira vakaitavitaki keda ena cakacaka ni Kalou ka ra idewadewa ni noda veitata vata Kaya ena noda dui veisautaki mai na tamata vakayago kina yalododonu.¹⁵ Na veika e solia vei keda na Tamada Vakalomalagi, o Koya sara ga vakataki Koya kei na Luvena, e dua na isema voleka ka tudei vata kei Koya ena vuku ni Nona loloma soliwale kei na dautataro, ko Jisu Karisito, na noda Dauveivueti.

Sai keda na luve ni Kalou, ka vakatikitikitaki kina tawamate rawa kei na bula tawamudu. Na keda icavacava sai koya meda itaukei vata kei Koya, ka, “itaukei vata talega kei Karisito.”¹⁶ Sa tuvakarau na Tamada me tuberi keda yadua ena Nona salatu ni veiyalayalati ena kena veikalawa ka ta me sotava noda dui gagadre yadua ka cula me vaka na Nona inaki me baleta na noda bula marau vata kei Koya. E rawa nida namaka me tubu tiko na vakanuinui kei na veivakabauti vua na Tamada kei na Luvena, me tubu tiko noda vakila Nodrau loloma, kei na vakacegu tudei kei na veituberi ni Yalo Tabu.

Ke vaqori sara mada ga, ena sega ni rawa ni rawarawa vua e dua vei keda na sala oqo. Sa rui levu na veivakasavasavataki e gadrevi kina me qai rawarawa. E kaya o Jisu:

“Koi au na vaini dina, ka sa ivakatawa ni were ko Tamaqu.

“A tabaqu kecega sa sega ni vua, sa kauta laivi ko [Tamaqu]: ia na tabaqu kecega sa vua, sa samaka ko koya, me vua vakalevu sara.”¹⁷

Na iwalewale ni sasamaki kei na veivakasavasavataki e dusimaka na Kalou ena, baleta ni ganita, dredre ka mosimosi ena so na gauna. Ni da nanuma lesu na ivakamacala nei Paula, ni da sa “itaukei vata kei Karisito; me da na kune rarawa vata kina kei koyame rawa ni da vakalagilagi vata talega kina.”¹⁸

O koya, ena loma ni nona bukawaqa oqo na dausava koula, kakua ni cudruva na Kalou, voleka cake vua na Kalou. Masuta na Tamada ena yaca ni Luvena. Lako vata kei Rau ena Yalo, e veisiga yadua kei na ikalawa yadudua. Vakatarai Rau ena so na gauna me rau vakaraitaka vei iko na Nodrau dinati iko tiko e veigauna. Yaco vakaidina mo kilai Rau ka kilai iko.¹⁹ Me qaqa tikoga na Kalou.²⁰ Sa vakadeitaki keda na iVakabula:

Dou vakarorogo vei koya na dautataro vei Tamana, io ki vua sa vakamamasu tiko vei koya ena vukumudou—

“A sa kaya: Tamaqu, mo ni nanuma na nona rarawa ka vakamatei ko Koya sa tawacala; io ko ni sa dau lomani Koya vakalevu; mo ni nanuma ni sa mai dave na nona dra na Luvemuni; io ko ni sa lewa me mai dave na nona dra, mo ni vakarokorokotaki kina;

Ia Tamaqu, mo ni lomani ira na wekaqu oqo ka ra sa vakabauta na yacaqu; io me ra lako mai vei au ka rawata na bula tawamudu.”²¹

Vakasamataka mada eso na ivakaraitaki ni marama kei na turaga yalodina era nuitaka tu na Kalou, era nuidei tu ni na tiko vata kei ira na yalayala ni Nona veivakalougatataki ena bula kei na mate. E sega ni yavutaki na nodra vakabauta ena veika e cakava se sega ni cakava na Kalou ena dua ituvaki se gauna, ia ena nodra kila ni sai Koya na Tamadra yalololoma ka sai Jisu Karisito e nodra Dauveivueti yalodina.

Ni sa vakarau me cabori Eparaama na bete ni Ijipita ko Ilikena, a qolou vua na Kalou me vakabulai Koya, ka mani yaco me vakakina.²² E mai bula o Eparama ka yaco me tamadra na vakabauta ka na vua mai vua na matavuvale kece e vuravura ka vakalougatataki.²³ Ia taumada, ena icabocabo ni soro vata sara ga oqo, a cabori iratou kina e tolu na goneyalewa savasava “ni ratou sa ivalavala savasava eratou sega ni via cuva sobu me qarava na kalou kau kei na kalou vatu.”²⁴ Eratou qai vakamatei baleta nodratou vakabauta.

Eratou a volitaki o Josefa na tuakana, me bobula ni se cauravou, ena nona cudru a vuki yani kina vua na Kalou. Vakamalua, ka yacova ni sa veiliutani ena vale i nona iliuliu ia ka kau tani kece mai vua ni mai beitaki vakailasu vei wati Potifa. E rawa ni nanuma o Josefa, “Na valeniveivesu e isau ni noqu maroroya na lawa ni tiko savasava.” Ia, e toman tiko ga nona vakararavi vua na Kalou ka qai qaqa ena valeniveivesu. E lako curuma tale na veivakadrukai o Josefa, ena gauna e mai guilecava na nona yalayala e dua ka mai veitokani kaya e valenivesu, ni sa mai soli vua e dua na itutu nuitaki ena vale i Fero. E qai mai yaco, me vaka eda kila, ni curu mai na Turaga me biuti Josefa kina dua na itutu nuitaki kaukauwa e yasai Fero, ka mai rawa kina vei Josefa me vakabula na kawa i Isireli kei ira e vuqa tale. e rawa ni vakadinadinataka o Josefa ni “sa veivuke na ka kecega mera vinaka kina era sa lomana na Kalou.”²⁵

Sa nakita o Nifai me rawata vakavinaka na nona ilesilesi vakalou. “Ia au sa na vakaotia mada ga na noqu itukutuku,” e kaya o koya, “ka qai veitalia na vanua au lako kina [na ka ena yaco vei au], ka meu vakabulai ga.”²⁶ A sega ni vakuwai o koya mai na mate vakaloloma, ia sa vakadeitaki ni sa vakabulai kina matanitu ni Kalou, kei na nona saumaki vakamareqeti, o Alama, a veisautaka na kedra itukutuku makawa na Nifaiti kina nona lako mai na Karisito.

Erau a sereki mai valeniveivesu mai Amonaia ko Alama kei Amuleki me isau ni nodrau vakatakekere, ka ra vakamatei na dauvakacacani rau.²⁷ Ni bera oya, o ira vata ga na dauvakacaca oqo era a biuti ira na yalewa ke na gonelalai vakabauta ki na dua na bukawaqa. Vakadinadinataka o Alama na mosi vutugu na ka vakadomobula oqo a tarovi koya na Yalo me kakua ni vakayagataka na kaukauwa ni Kalou me “vakabulai ira mai na yameyame,”²⁸ me ra na ciqomi kina vua na Kalou ena lagilagi.²⁹

Sa malumalumu sobu tiko ga ena valeniveivesu mai Liberty, e Misuri na Parofita o Josefa Simici, sa sega vua na kaukauwa me vukei ira na Yalododonu ni ra sa butakoci ka vakasavi tani mai na nodra veivale ena batabata warumisa ni vulaililiwa. “Oi kemuni na Kalou, ko ni sa tiko evei?” A qolouvaka o Josefa. A cava na kena dede ko ni na tarova tiko kina na ligamuni?”³⁰ Sauma mai, a yalataka na Turaga: “Sa lekaleka walega na nomu gauna ni rarawa kei na vutugu; ia kevaka ko sa vosota rawa ena vakacerecerei iko na Kalou. … Ia ko sa sega ni vakataki Jope sara.”³¹

E muri, sa na rawa vei Josefa me cavuta vata kei Jope, “Kevaka sa vakamatei au [na Kalou] , kau na vakararavi ga vua.”³²

A tukuna o Elder Brook P. Hales na italanoa kei Sister Patricia Parkinson ka a sucu mai a vinaka tu na matana ia ni qai yabaki 11 sa mataboko vakadua.

A talanoataka o Elder Hales: “Au sa kilai Pat ena vuqa na yabaki kau tukuna vua ena gauna lekaleka sa oti niu dau qoroya ni dau yalodei ka marau tu ga. E a sauma mai, “Io, ko sega mada ni tiko vata kei au mai vale, seu cala? E dau tu na noqu gauna eso. E dau yaco eso na gauna ni noqu yaluma titobu, kau dau tagi vakalevu.” Duatale, e kuria, “Mai na gauna sa tekivu yali tiko kina noqu rai, e kurabuitaki, ia au kila ni tiko kei na noqu matavuvale kei au na Tamada Vakalomalagi kei na iVakabula. Vei ira ka taroga seu a cudru voli baleta niu mataboko, au sauma: ‘Meu cudruvaki cei? Ko Tamaqu Vakalomalagi e tu vata kei au; e sega niu tu taudua. E tu vata kei au e veigauna kece o Koya.’”³³

Kena itinitini, sai koya na veivakalougatataki ni dua na isema voleka ka veivakaduavatataki kei na Tamada kei na Luvena keitou vakasaqara. Sai koya e vakavuna na duatani ka veirauti vinaka kei na kena isau. Eda na vakadinadina vata kei Paula “sa sega ni yaga me rau vakatauvatani na ka ca sa vosoti ena bula oqo kei na kalougata ena vakaraitaka vei keda e muri.”³⁴ Au vakadinadinataka vei kemuni se vakacava sara na veika eda sotava ena bula oqo, eda rawa ni nuitaka na Kalou ka kune reki Vua.

“Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua.

Mo vakarogotaka vua na nomu sala kecega, ia ena vakadodonutaka na nomui lakolako ko koya.”³⁵

Ena yacai Jisu Karisito, emeni.