Bula Vakatisaipeli Qaqa ena iOtioti ni Gauna

Na bula galala ni vakasama sa isolisoli talei ni Kalou vei ira na luvena yadua.¹ Eda sa “galala me ra digitaka na galala kei na bula tawamudu, ena vukui koya na Dauveivakaduavatataki ni tamata kecega, se me ra digitaka na tiko vakavesu kei na mate, me vaka na nona veivesuki kei na nona kaukauwa na tevoro.”² Na Kalou ena sega ni vakasaurarataki keda meda caka vinaka, kei na tevoro ena sega ni vakasaurarataki keda meda cakacaka butobuto.³ Eso era nanuma ni bula oqo sa veiravuti kina na Kalou kei vunimeca, ni vosa ga o Koya “sa na vagalui o Setani ka sa kautani vakadua Ni sa [noda] kaukauwa ga sa vakatovolei—sega ni Kalou.”⁴

Ni sa cava eda sa qai tamusuka na noda digidigi ni bula taucoko eda a teivaka.⁵ Sa qai cava na isoqoni taucoko ni noda vakanananu, gagadre, vosa, kei na cakacaka e tukuna baleta na noda lomana na iVakabula, ira Nona italai digitaki, kei na Nona Lotu vakalesuimai? Na noda veiyalayalati ni papitaiso, matabete, kei na valetabu e vakaibalebale beka cake vei keda mai na lagiti vuravura se na iwiliwili ni “likes” ena itukutuku raraba? Na noda lomana na Turaga kei na Nona ivakaro e kaukauwa cake beka mai noda lomana e dua na ka se tamata ena bula oqo?

O vunimeca kei ira na nona imuri era sa dau saga mera vakarusa na cakacaka i Karisito kei ira na Nona parofita. Na ivakaro ni iVakabula, ke ra sega ni vakawaleni kece, era sa vakabauti ni ra sa sega ni vakaibalebale mai na vuqa eso e vuravura nikua. Ira na italai ni Kalou era vakavulica na dina “sega ni vakaibalebale” era sa sega ni vakabauti. Na iVakabula vakai Koya a vakatokai me “tamata daukana ka daugunu waini,”⁶ ka beitaki ni vakayavalata na nanuma ni vanua ka dauveitawasei. Ira na yalovakatani ka veidabui era sa “bose se ra na coriti koya vakaevei ena nona vosa,”⁷ kei na Nona “lotu tani” Vakarisito taumada “sa vosa vakacacataki … e na veivanua kecega.”⁸

Na iVakabula kei ira na Nona imuri taumada a levu na nodra veileti vakai ira kei na veisaqasaqa mai tuba, ka da sa sotava tiko vakakina. Nikua sa vaka me dredre sara meda bula qaqa ena noda vakabauta me sega kina na veidusi vakaidina eso kei na veivakacacani mai vakavuravura. Na yalonuidei tiko meda muria na iVakabula ena vakavure bula, ia eso na gauna eda na tacori ena veicavilaki maivei ira era vakavuvulitaka “dou kana, ka gunu, ka ia na marau”⁹ ni vakabauti Karisito, talai rawarawa, kei na veivutuni sa sosomitaki ena vakasama ni Kalou ena vakadonuya vakalailai na ivalavala ca baleta ni sa lomani keda sara vakalevu.

Ni vosa “ena [Domona] ga se mai na domodra na [Nona] tamata, ”¹⁰ a kaya beka na iVakabula baleta na noda siga nikua ni “na yaco na gauna era na sega ni vosota kina nai ivakavuvuli dodonu; ia ena vaka na nodra gagadre ca era na vakalewevuqataki ira kina na nodra ivakavuvuli” ka vuqa “na vagolea tani na daligadra mai na ka dina, ka lesu ki na itukutuku wale”?¹¹ A sega beka ni tagicaka ni “sa sega ni yaga na nodra masuti au, ni ra sa vakavuvulitaka na vunau ni tamata”?¹²A sega beka ni vakasalataka “ena tubucake talega eso na tamata vei kemudou, era na vosataka na ka e veivakacalai me muri ira kina era sa lotu”?¹³ A sega beka ni sa raica oti tu ni “ca [ena vakatokai] me vinaka, kei na vinaka me ca,”¹⁴ vakakina “ena nona meca na tamata ko ira na nona lewe ni vale”?¹⁵

Sa qai vakacava o keda? Meda sa qai yalolailai se rere? Meda sa qai lotu tiko beka ena veiraiyaki? E sega sara! Ni da vakabauti Karisito, meda kua ni rerevaka na nodra vakalelewa na tamata se rerevaka nodra vosa vakatani.¹⁶ Ni sa veiliutaki tiko na iVakabula kei ira na parofita bula mera veimuataki ka dusimaki keda, “o cei me noda meca?”¹⁷ Meda sa qai nuidei tiko, sega ni vakaulubale, qaqa, sega ni yalolailai, yalodina, sega ni rere ni da dulaka cake na rarama ni Turaga ena otioti ni gauna oqo.¹⁸

A vakamatatataka na iVakabula ni “o koya yadua ena tukuni au ena matadra na tamata, au na tukuni koya talega ena matai Tamaqu. … Ia ko koya yadua ena cakitaki au ena matadra na tamata, au na cakitaki koya talega ena matai Tamaqu sa tiko mai lomalagi.”¹⁹

Sa yaco kina, ni so era na taleitaka na Kalou e sega na nona ivakaro, meda sa qai vakadinadinataka ena qaqa na vosa nei Elder D. Todd Christofferson ni “Kalou e sega na ka e lavaka sa tautauvata kei na cakacaka ni Kalou e sega ni bula.”²⁰

Ni so era taleitaka mera digitaka ga na ivakaro mera muria, meda sa rekitaka ga na veisureti ni iVakabula meda “bula kina ena vosa kecega sa lako mai na gusu ni Kalou.”²¹

E vuqa era vakabauta ni Turaga kei na Nona Lotu e vakadonuya meda vakayacora “na ka e gadreva na [yaloda],”²² ia meda kaburaka ena qaqa ni cala na “muri ira na lewe vuqa me caka ca,”²³ baleta ni “lewevuqa era sega ni vakadodonutaka rawa na ka sa vakacala na Kalou.”²⁴

“Mo nanuma, mo nanuma … na bibi [ka veisereki] na nona ivakaro na Kalou.”²⁵ Na kedra vakavulici vakamatata ena so na gauna ena rairai ivakarau ni tawaveivosoti. Meda sa qai vakaraitaka ena veidokai ni sega walega ni rawati ia sa bibi sara me lomani e dua na luve ni Kalou e duatani na nona vakabauta maivei keda.

Eda rawa ni ciqoma ka dokai ira eso ka sega ni duavata ena nodra vakabauta se ivalavala e sega ni salavata kei na loma ni Turaga. E sega ni gadrevi meda sorovaka na dina ena icabocabo ni lomavata kei na gagadre ni veika vakatamata.

O Saioni kei Papiloni e rau duidui sara. “Sa sega ni dua na tamata me qarava rawa e le rua na turaga.”²⁶ Meda qai nanuma na taro titobu ni iVakabula, “Ia ka vakaevei ni dou sa vakatokai au me Turaga, Turaga, ka sega ni cakava na ka kau sa kaya?”²⁷

Meda sa qai vakaraitaka na noda lomana na Turaga ena talairawarawa ni yaloda taucoko ni sa lomada.

Ke o vesuki ena tadrua ni nomu bula vakatisaipeli vata kei vuravura, yalovinaka mo nanuma ni nomu iVakabula lomani “sa veisureti yani … , ni sa dodo tu yani vei [iko], na liga ni nona loloma cecere, ka kaya: Veivutuni, kau na qai ciqomi kemuni.”²⁸

E vakavulica o Peresitedi Nelson ni o “Jisu Karisito ena cakava eso na Nona cakacaka qaqa ena tadrua ni gauna oqo kei na Nona lesu tale mai.”²⁹ Ia a vakavulica talega ni “o ira era sa muria na sala ni Turaga era na vosota rawa na veivakacacani.”³⁰ Meda “sa yaga meda sa vakacacani e na vuku ni yacana”³¹ sa na yaco me noda ivakarau ni da “vakatara na Domona me vakaliuci mai na ka tale eso.”³²

“A sa kalougata ko koya,” e kaya na iVakabula, “ena sega ni tarabe ena vukuqu.”³³ Ena veivanua eda vulica ni “ka levu na nodra vakacegu era lomana na nomuni vunau: ka sa sega na ka mera bale kina.”³⁴ E sega! Meda qai tarogi keda, “Au sa gumatua tiko beka, ia ni yaco mai na veika dredre se veivakacacani ena vuku ni vosa, au sa qai tarabe sara beka?³⁵ Au sa vakayavutaki dei beka ena vatu i Jisu Karisito kei ira na Nona italai?

Ira na daulewa vakai ira era kaya ni dina sa dua ga na yavu vakatamata, ka sa sega na ka deivaki. Na ka dina era kaya tiko ni sa sega na ivalavala ca,³⁶ ni “sa sega ni cala kina na tamata ena ka cava ga sa kitaka,”³⁷ e dua na vuku vakatamata sa tukuna tiko o vunimeca ni sa mai vua! Meda sa qai qarauna na olifa sa vakaisulu ena isulu ni sipi era sa dau veivakauqeti ka “dau vakayagataka na nodra kila vakavuku mera ubia na nodra [dui] itovo veitubuyaki.”³⁸

Ke da vinakata dina meda tisaipeli qaqa i Karisito, eda na kunea na kena sala. Ke sega, na vunimeca ena veiuqeti mai ena sala tale eso. Ia ni da sa tisaipeli yalodina, “e sega ni gadrevi meda kere veivosoti ena vuku ni noda vakabauta se lako tani mai na veika eda kila ni dina.”³⁹

Meu tinia, ena dua na vosa baleti ira na 15 na italai ni Kalou era dabe tiko e dakuqu. Era kaya na vakavuravura “vei ira na rairai, Dou kakua ni raica tiko; vei ira talega na parofita, dou kakua ni vunautaka,”⁴⁰ ira na yalodina era na “vakasalataki talega ena veivakalougatataki mai cake, io, kei na ivakaro e vuqa, kei na ivakatakila ena kena gauna.”⁴¹

Sega ni kurabuitaki, o ira oqo era sa dau titoko rarama vei ira sa rarawataka na vosa ni Kalou ni ra vunautaka na propfita. Era sega ni kila ni “sega na parofisai ena ivolatabu [me sa] kilai e liu na kena ibalebale” se na macala ni lewa ni tamata, “ia sa vosa ga ni tamata yalosavasava [o ya] ni Kalou sa [vosa ga] me vaka [sa] vakauti ira na Yalo Tabu.”⁴²

Me vakataki Paula, o ira na tamata oqo ni Kalou era sa “sega … ni maduataka na kena itukutuku na noda Turaga” ka ra sa Nona “sa vesu tu”⁴³ ena kena vakasama ni vunau era vakavulica tiko e sega ni nodra, ia sa Nona sa kacivi ira. Me vakataki Pita, era sa “dredre vei ira mera kakua ni tukuna na veika [era] a raica ka rogoca.”⁴⁴ Au vakadinadinataka ni Mataveiliutaki Taumada kei na Kuoramu ni Le Tinikarua era sa tamata dina era lomana na Kalou kei ira na Luvena ka ra sa lomani mai Vua. Na nodra vosa e dodonu meda ciqoma me vaka sa rogo mai na gusu ni Turaga, “ena yalovosota kei na vakabauta. Na kena vakayacori na veika oqo, ena sega kina ni rawai kemudou na matamata mai eli, ia na Turaga na Kalou ena vakatalabusesetaka na kaukauwa ni butobuto e [matada].”⁴⁵

“Sa sega na liga tawasavasava me tarova rawa na toso ni cakacaka oqo”;⁴⁶ ena gu yani ki liu ena qaqa ke daru tiko kina se sega, mo qai “digitaki koya edaidai kemuni na qarava.”⁴⁷ Mo kakua ni sesewa se vakarerei ena voqa levu ni veika ca mai na valelevu vakaitamera ka levu. Na vadugu ni nodra sasaga e sega ni rawata na veiuqeti malumu ni domo rogo malua ka vinaka ni yalo raramusumusu kei na yalo lokumi.

Au vakadinadinataka ni bula tiko na Karisito, ni sai koya na noda iVakabula ka Dauveivueti, ka sa liutaka na Nona Lotu maivei iratou na Mataveiliutaki Taumada kei na Kuoramu ni iApositolo Le Tinikarua, eda sa vakadeitaki kina ni da sa sega ni “veitosoyaki ka veikauyaki ena cagi kecega ni ivakavuvuli.”⁴⁸

“O ira na tisaipeli dina i Jisu Karisito,” e vakavulica o Peresitedi Nelson, “sa lomadra mera tucake, vosa cake, ka duidui maivei ira na tamata e vuravura. Era sega ni yalolailai, era yalodina, ka yaloqaqa.”⁴⁹

Taciqu kei na ganequ, sa siga vinaka dina nikua meda sa vinaka! Ena yaca tabu i Jisu Karisito, emeni.