Na Veika Kece mai Vuniyaloda

Ni vo e vica na siga me solia na Nona bula ena vukuda, a tiko voli o Jisu Karisito ena valetabu e Jerusalemi, saravi ira na tamata ena nodra solia tiko nodra cau ki na kato ni iyau ni valetabu. “E levu era vutuniyau era solia vakalevu,” ia a qai gole mai e dua na yada dravudravua, “ka viritaka yani e rua na ilavo lalai.” E lailai sara, ka sega mada ga ni yaga me volai.

iVakatakilakila

Na yada ka solia e rua nona tiki ni siliva

Ia na cau lailai sara oqo a tara na yalona na iVakabula. A tarai Koya vakalevu sara ka “sa kacivi ira kina na nona tisaipeli ko koya, ka kaya vei ira, Au sa kaya vakaidina vei kemudou, na yada dravudravua oqo sa biuta vakalevu ki na kato ni ilavo, ko ira kecega era sa biuta vakalailai ga:

“Ni ra biuta kina eso ko ira kecega mai na nodra ka e vuqa; ia ko koya oqo sa dravudravua, ka sa biuta na nona ka kecega, io na nona ka kece e bula kina.”¹

Ena vakadidike rawarawa oqo, e vakavulica vei keda na iVakabula na kena vakarautaki na cau ena Nona matanitu—ka duidui toka mai na noda vakarautaka o keda e dua na ka. Vua na Turaga, na levu ni cau e vakarautaki sega ena kena vakilai ena kato ni iyau ia ena veika e vakila kina e yalona o koya e cau.

Ena nona vakacaucautaka na yada yalodina oqo, sa solia vei keda na iVakabula e dua na ivakatagedegede me da vakarautaka kina na noda dui bula vakatisaipeli ena kena ivakaraitaki kece sara. E vakavuvulitaka o Jisu ni noda cau e rawa ni levu se rawa ni lailai, se o cei ga vei rau, sa dodonu me nodaveika kece mai vuniyaloda.

E vakavoqataki na ivakavuvuli oqo ena nona vakatakekere na parofita ni iVola i Momani o Amelekai: “dou lako mai vua na Karisito, o koya na Yalo Savasava ni Isireli, mo dou vakaivotavota ena nona veivakabulai, kei na kaukauwa ni nona veivueti. “Ia dou lako mai ka cabora na yalomudou taucoko me isoro ki vua.”²

Ia e rawa vakacava oqori? E vuqa vei keda na itagede vakaoqo ni yalodina mai vuniyaloda e vaka me sega sara ga ni rawa. Sa sega sara beka ga vei keda na gauna se na ilavo. Me da na vakatautauvatataka beka vakacava na levu ni osooso ni bula kei na noda gagadre me da solia kece na yagoda kei na yaloda vua na Turaga?

De rairai na noda bolebole beka ni da nanuma tiko ni vakatautauvatataki sai koya na noda wasea vakatautauvata na noda gauna vei ira na veika eso e tu e matada. Ni laurai ena ivakarau oqo, na noda yalodina vei Jisu Karisito e dua vei ira na vuqa na ka me da vakacuruma ki na noda ituvatuva osooso. E rairai tiko tale beka e dua na sala me da raica kina.

O au kei na watiqu o Harriet, keirau dau taleitaka me keirau vodi baisikeli vata. E sala vakasakiti ni vakaukauwa yago kei na veitalanoa vakaveiwatini. Ni keirau vodo baisikeli wavoki voli ka sega ni vakere tiko vakalevu na noqu icegu, keirau dau marautaka na vuravura totoka e wavoliti keirau ka keirau dau veitalanoa vakavinaka. Keirau sega soti ni dau lomaleqataka me keirau dabe vakadodonu toka ena neirau baisikeli. Sa balavu mai na neirau dau vodo tiko ka keirau sega ni dau vakasamataka soti oqori—sa vaka tu ga na gunu wai vei keirau.

Ia ena veigauna au dau sarava kina ni se qai vuli vodo baisikeli vakadua e dua, au dau nanuma ni sega soti ni rawarawa mo dabe vakadodonu toka ena rua na taya lalai qori. E taura na gauna. E ka ni vakatovotovo. E ka ni vosota. Eda na lutu vakadua se vakarua.

Vakauasivi, o ira era dau rawata me ra dabe vakadodonu toka ena baisikeli era sa vulica na ivakasala bibi oqo.

Kakua ni raica sobu na yavamu.

Rai ki liu

Raica toka ga na gaunisala e matamu, Vakanamata ki na vanua o gole tiko kina. Ka qaqi yani. Na dabe vakadodonu e ka ga ni toso ki liu.

E yaga na ivakavuvuli vata oqo ena gauna eda saga kina me vakatautauvatataki na veika ni noda bula ni da tisaipeli i Jisu Karisito. Me wasewasei na nomu gauna kei na igu ena nomu itavi bibi e vuqa ena duidui mai vua e dua ki vua e dua tale vakakina mai na dua na draki ni bula ki na dua tale. Ia na noda inaki tautauvata ka raraba sai koya me da muria na Sala ni noda iVakavuvuli, o Jisu Karisito, ka lesu tale ki na iserau ni Tamada daulomani mai Lomalagi. Na inaki me ka ni veigauna ka tudei, se o cei o keda kei na cava tale e yaco tiko ena noda bula.³

Ia, vei kemuni na kenadau ena vodo baisikeli, na vakatauvatani ni bula vakatisaipeli kei na vodo baisikeli e rawa ni dua na ivakatautauvata yaga vakalevu. Vei kemuni e sega, kua ni leqa. E dua tale na vakasama au vakabauta, ni rawa ni ra ciqoma vinaka na turaga, marama kei na gone yadua.

Na bula vakatisaipeli me vaka ga e vuqa tale na ka ena bula oqo, e rawa talega ni vakatauvatani ki na kena vukataki e dua na waqavuka.

O sa bau vakasamataka mada ena dua na gauna na kena rawa ni biuta na dela ni qele e dua na waqavuka ni usapasidia vakaitamera me vuka? Na cava beka e vakavuna na kena rawa ni vakatubutubu tu i lomalagi na misini dauvuka oqo, ka kosova yani na veiwasawasa kei na vanua mamaca rabailevu?

Me vakarawarawataki, e rawa ni vuka duadua ga e dua na waqavuka ni yavavala tiko na cagi e tabana. Na yavavala oqo e vakavuna na duidui ni idre ni cagi ka rawa kina ni talave na waqavuka. Mo na cakava vakacava me veirauti na cagi e yavavala tiko e tabana me rawa kina na talave? Na kena isau na tacoka ki liu.

Ena sega ni rawa ni vuka tubu na waqavuka ni dabe toka ga ena rara ni waqavuka. Ni mudremudre sara tu mada ga na cagi, ena sega ni rawa ni vakavuna na talave vakavo kevaka e toso tiko ki liu na waqavuka, ena totolo e veirauti me vorata na kaukauwa e dreti koya tiko i muri.

Me vaka na tudonu ni baisikeli ni toso tiko ki liu, nii toso tiko ki liu ena vukea e dua na waqavuka me vakamalumalumutaka na idre ni vuravura kei na idre i muri.

A cava na kena ibalebale oqo vei keda ni da tisaipeli i Jisu Karisito? Na kena ibalebale ni kevaka eda vinakata na tautauvata ena noda veiyasa ni bula kece, kevaka eda vinakata me laveti keda cake vaka ki lomalagi na iVakabula, e sega ni dodonu me tauri vakamama se vagauna ga na noda yalodina ki Vua kei na Nona kosipeli. Me vaka na yada mai Jerusalemi, sa dodonu me da cabora Vua na yagoda kei na yaloda taucoko. E rawa ni lailai wale na noda ivakacacabo, ia sa dodonu me lako mai na vuniyaloda.

Me da tisaipeli i Jisu Karisito e sega ni dua ga vei ira na ka eda na cakava. Na iVakabula sai koya na kaukauwa veivakauqeti ena veika kece sara eda cakava. O Koya e sega ni vanua ni vakacegu ena noda ilakolako. O Koya e sega ni vanua ni sarasara se dua na ivakatakilakila levu ena yasa ni sala. Sai Koya “na sala, kei na vu-ni-dina, kei na vu-ni-bula, sa sega ni torovi Tamana walega e dua na tamata, ena vukui [Jisu Karisito] ga.”⁴ Sai koya oqori na Sala ka noda icavacava.

Na tautauvata kei na talave ena yaco ni da, sa toso ki liu ka tudei vei Karisito, ena taucoko ni nomudou vakanuinui, ka mo dou lomana na Kalou kei ira na tamata kecega.”⁵

Ia vakacava mada na levu ni cakacaka kei na itavi ka sa vakaosoosotaka vakalevu tu na noda bula? Veisotari ka veitalanoa kei ira na daulomani, lako i vuli se vakavakarau me baleta e dua na cakacaka, rawata e dua na ka mo bula tiko kina, qarava na matavuvale, veiqaravi ena itikotiko—evei na vanua era curu kina? Sa vakadeitaka vei keda na iVakabula:

“Raica sa kila na Tamamudou Vakalomalagi ni sa yaga vei kemudou na ka kecega oqo.

“Ia mo dou vakasaqara taumada na matanitu ni Kalou kei na nona ivalavala dodonu, ia ena soli me kena ikuri vei kemudou na ka kecega oqo.”⁶

E sega ni kena ibalebale oqori ni na rawarawa.⁷ E gadrevi ruarua kina na solibula kei na sorovaki ka.

E gadrevi kina me biu eso na ka ka vakatuburieso tale.

Na solibula kei na sorosorovaki e rua na lawa vakalomalagi eda sa yalataka me da talairawarawa kina ena loma ni valetabu. Oi rau na lawa e rua oqo erau mataqali vata ia erau sega ni tautauvata. Na solibula e kena ibalebale mo biuta e dua na ka ena vuku ni dua na ka e yaga vakalevu cake. Ena veigauna makawa, o ira na tamata ni Kalou era solia na ulumatua ni nodra qele ni manumanu ena vukuna na Mesaia sa vakarau me lako mai. Ena veigauna taucoko ni itukutuku makawa, era sa dau solibulataka na Yalododonu yalodina na nodra gagadre yadua, na logaloga vinaka ni bula me baleta na iVakabula.

E dui tu kece na noda veika, lelevu ka lalai, eda gadreva me da solibulataka me rawa kina ni taucoko noda muri Jisu Karisito.⁸ Na noda solibula e vakaraitaka na veika e bibi ddina sara vei keda. Na solibula sa ka bibi sara ka dau rokova na Turaga.⁹

Na sorosorovaki e duatani mai na solibula ena dua na ivakarau bibi. Ni da sorovaka e dua na ka, eda sega ni biuta tu me kama ena icabocabo ni soro. Ia, eda biuta me vakayagataki ena veiqaravi ni Turaga. Eda vakatabuya Vua kei na Nona inaki Savasava.¹⁰ Eda ciqoma na taledi e solia vei keda na Turaga ka segata me da vakatubura me levu cake, me da yaga vakalevu cake kina ena tarai cake ni matanitu ni Turaga.¹¹

E vica wale vei keda ena kerei ena dua na gauna me solia nona bula ena vukuna na iVakabula. Ia eda sa sureti taucoko me da sorovaka na noda bula Vua.

Ni da segata me da vakasavasavataka na noda bula ka rai vei Karisito ena vakasama kece,¹² sa tekivu me taudonu mai na veika kece tale. Sa sega tale ni qai vaka me dua na ituvatuva balavu ni veisasaga duidui ka tauri vata toka ena tautauvata malumu na bula.

Ni toso na gauna, sa yaco me dua ga na cakacaka.

Dua na reki.

Dua na inaki savasava.

Oqo na cakacaka ni lomana ka qarava na Kalou. Sai koya na lomana ka qarava na luvena na Kalou.¹³

Ni da raica na noda bula ka kunea ni drau tu na ka me caka, eda sa vakadrukai. Ni da raica ga e dua na ka—na sala duidui ni nodra lomani kei na qaravi na Kalou kei ira na Luvena, ena tubu me drau na sala duidui—eda na qai rawa ni cakacakataka na veika oqori ena reki.

Oqo na ivakarau eda na solia taucoko kina na yaloda kei na yagoda—ena noda solibulataka na cava ga e dreti keda lesu tiko ka sorovaka na kena vo vua na Turaga kei na Nona inaki.

Kemuni na taciqu, kemuni na noqu itokani, ena tiko na gauna ko ni na rawa ni cakava eso tale na ka. E kila na yalomu na Tamamu Vakalomalagi. E kila tu o Koya ni sega ni rawa ni o cakava kece na veika e vinakata na yalomu mo cakava. Ia e rawa ni o lomana ka qarava na Kalou. E rawa ni o solia nomu vinaka duadua mo vakamuria na Nona ivakaro. E rawa ni o lomani ira ka qaravi ira na Luvena. Na nomu sasaga sa vakasavasavataka tiko na yalomu ka vakarautaki iko tiko ki na dua na mataka vou lagilagi.

Oqo na ka a vaka me vakila na yada ena kato ni iyau ni valetabu. E kila vakaidina o koya ni nona ivakacacabo ena sega ni veisautaka na iyau kei Isireli, ia e rawa ni veisautaki koyaka vakalougatataki koya—baleta, oqori na veika kece saraga e tu vua.

Koya gona, kemuni na itokani tisaipeli lomani i Jisu Karisito, me da kakua ni “oca ena cakacaka vinaka,” ni da sa “tura tiko na yavu ni dua na cakacaka cecere.” Ia ena tubu mai ena veika lalai na “veika cecere.”¹⁴

Au vakadinadinataka ni dina oqo, me vaka niu vakadinadinataka talega ni o Jisu Karisito na noda iVakavuvuli, na noda Dauveivueti, ka noda Sala duaduua ga ni lesu tale vei Tamada Vakalomalagi lomani, emeni. Ena yaca tabu i Jisu Karisito, emeni.