E Dua na Veisau Levu ni Yalo

Ena Siga Vakaraubuka, nai ka 28 ni Okotova, 1588, ni a vakayalia na kena iuli ka sa ulivaki vakatabakidua sara tu ga ena ivoce, na waqa na La Gironaka lewe ni Mataivalu Levu‑e–Wai ni Sipeni na Armada, a voca ena veivatu ena Poidi e Lacada ena Vualiku kei Ailadi.¹

A tavuki na waqa. E dua vei ira na ciritani mai kina ka sasaga voli me bula a dara toka e dua na mama koula ka a solia vua na watina ena vica ga na vula e liu ka volai toka kina, “E sega tale ni dua na ka me’u solia vei iko.”²

“E sega tale ni dua na ka me’u solia vei iko,” e dua na malanivosa, kei na dua na mama kei na droini ni dua na liga e taura tiko e dua na uto, ai vakaraitaki ni loloma mai vua e dua na marama vei watina.

Ni’u wilika na italanoa oqo, e a vakauqeti au vakatitobu sara, ka’u vakasamataka na kerekere a vakayacora na iVakabula: “Ia mo ni na cabora ga me isoro vei au na yalo raramusumusu kei na yalo bibivoro.”³

Au a vakananuma talega na nodra sauma yani na tamata na vosa i Penijamini na Tui: “Io, keimami sa vakabauta na vosa kece ko ni sa vosataka vei keimami …, ni sa vakayacora … e dua na veisau levu vei keimami, se ki na lomai keimami, ka sa sega tale kina ni tiko vei keimami e dua na gagadre me kitaka na ka ca, ia me keimami kitaka tikoga na veika vinaka.”⁴

Me’u wasea mada vei kemuni e dua na ka au a sotava ni’u se qai yabaki 12, ka sa yacova tu mai ni kua na kena revurevu.

O tinaqu a kaya mai, “Eduardo, vakatotolo, daru sa bera tiko ki na soqoni ni lotu. O tinaqu a kaya mai daru sa bera tiko ki na soqoni ni lotu.”

Au a sauma yani “I Na, au na tiko ga mai vata kei Ta nikua”.

“O dina? E dodonu mo tiko ena nomu soqoni ni kuoramu ni matabete,” a kaya o koya.

Au a sauma yani, “Isa o Ta! Sa na tu duadua ga mai o koya. Au sa na tiko ga mai vata kei koya nikua”.

O Ta a sega ni lewe ni Lotu i Jisu Karisito ni Yalododonu Edaidai

Eratou a gole yani na tinaqu kei na ganequ ki lotu. Au a mani laki sotavi Ta ena nona volau ni cakacaka, na vanua e dau taleitaka me tiko kina ena vei Sigatabu, ka me vaka ga au a tukuna vei tinaqu, au a tiko vakalailai, oya me, vica na miniti kei koya, ka’u mani taroga sara, “I Ta, e vinaka tiko beka na veika kece?”

A tomana tikoga o koya nona cakacaka taleitaki ni vakavinakataki retio kei na kaloko, ka matadredredre ga mai vei au.

Au a qai tukuna yani vua, “Au sa lai qito mada kei ira noqu itokani.”

A kaya vei au o Ta, ka sega ni rai cake mai, “Nikua na Sigatabu. E sega li ni dodonu mo lako i lotu?”

“Io, ia nikua au a tukuna vei Na ni’u na sega ni lako,” au sauma yani. A tomana tikoga o Ta nona cakacaka, ka vei au, e sa veivakadonui oya me’u lako yani.

Ena mataka oya me vakayacori kina e dua na qito soka bibi, ka ra a tukuna vei au noqu itokani ni’u na sega ni rawa ni calata baleta e dodonu me keimami na qaqa ena qito oya.

Ia na noqu bolebole oya me’u na lako sivita na mata ni valenilotu me’u yacova na rara ni soka.

Ena inaki dei, au a cici yani ki na rara ni soka ka tu vakadua e mata ni buloko veivakatarabetaki levu, na valenilotu. Au a cici ki na salatu e veibasai ka ra tu kina eso na vunikau lelevu, ka’u a nanuma me’u cici maliwai ira me kua kina ni raici au e dua me vaka ni sa gauna era yacoyaco tiko mai kina na lewenilotu ki na soqoni ni lotu.

Au a yaco donuya yani na tekivu ni qito. Ka’u a qito rawa sara ka lesu i vale ni bera ni yaco yani o tinaqu i vale.

A toso vinaka na veika kece; a qaqa neitou timi, ka’u a marau sara. Ia na cici tuvai-matau oya ki na raraniqito a sega ni calata me raica na daunivakasala ni kuoramu ni dikoni.

O Baraca Félix Espinoza a raici au ni’u cici totolo mai na vunikau ki na vunikau, ni’u tovolea tiko me kua ni laurai.

Ena itekivu ni macawa, a lako mai noqu vale o baraca Espinoza ka kerea me vosa vei au. A sega ni kaya o koya e dua na ka me baleta na ka a raica o koya ena Sigatabu, se taroga se cava au a calata kina na noqu soqoni.

A solia vei au na ivolavakarau ka kaya, “Au vinakati iko mo vakatavulica na kalasi ni matabete ena Sigatabu. Au sa makataka tu vei iko na lesoni. E sega so ni dredre sara. Au vinakati iko mo wilika, ka’u na lako mai ena rua na siga mai qo me vukei iko ena vakavakarau me baleta na lesoni.” Ni sa tukuna oti na veika oqo, a solia o koya vei au na ivolavakarau ka gole yani.

Au a sega ni vinakata me’u vakatavulica na kalasi, ia au sega ga ni rawa ni tukuna vua na sega. Au a navuca toka ena Sigatabu oya, me’u tiko vata tale kei tamaqu—kena ibalebale, ni na dua tale tiko na qito soka bibi.

O baraca Espinoza e dua na tamata era dau qoroya na itabagone.⁵ O koya sa mai kunea na kosipeli vakalesuimai ka veisautaka nona bula se, ena vosa tale eso, na yalona.

Ni yaco mai na yakavi ni Vakarauwai, au a nanuma, “Ia, ni mataka au na yadra cake beka ena tauvimate, ka’u na sega kina ni lako i lotu.” A sega tale ni qai lomaleqataki au na qito soka; ka sa ikoya na kalasi me’u vakatavulica, vakabibi na lesoni baleta na Siga ni Vakacecegu.

A yaco mai na Sigatabu, ka’u a yadra cake ka bulabula vinaka cake sara. A sega noqu iulubale—sega na dro bula.

Oqo a imatai ni gauna me’u na vakatavulica kina e dua na lesoni, ia a tu e yasaqu o Baraca Espinoza, ka sa ikoya oya na siga ni veisau levu ni lomaqu.

Mai na gauna oya me lako yani, a tekivu me’u vakatabuya na Siga ni Vakacecegu, ka ena toso ni gauna, ena vosa i Peresitedi Nelson, sa yaco me ka rekitaki na Siga ni Vakacecegu.⁶

“Turaga, au solia vei Iko na ka kecega; E sega tale ni dua na ka me’u solia vei Iko.”

Eda na rawata vakacava na veisau levu ni yalo oya? E dau tekivutaki taumada ka na qai yaco ga

1. Ni da vulica na ivolanikalou meda rawata na kila‑ka ena vaqaqacotaka noda vakabauti Jisu Karisito ka na vakavuna na gagadre meda veisau.⁷

2. Ni da vakabulabulataka na gagadre oqori ena masu kei na lolo.⁸

3. Ni da cakacakataka, me vaka na vosa vulici se ciqomi, ka da cakava e dua na veiyalayalati meda sorovaka na yaloda ki Vua, me vakataki ira ga na tamata i Penijamini na Tui.⁹

Eda na kila vakacava ni sa veisau tiko na yaloda?¹⁰

1. Ni da vinakata meda vakalomavinakataka na Kalou ena veika kecega.¹¹

2. Ni da qaravi ira na tani ena loloma, veidokai, kei na veikauwaitaki.¹²

3. Ni da raica ni sa yaco tiko me tiki ni noda itovo ni bula na ivakarau eso i Karisito.¹³

4. Ni da vakila vakawasoma cake na veidusimaki ni Yalo Tabu.¹⁴

5. Ni da muria e dua na ivakaro ka dau dredre tu vei keda meda talairawarawa kina ka qai tomana tiko meda bulataka.¹⁵

Ni da vakarorogo vakavinaka ki na nodra ivakasala na noda iliuliu ka lewa ena yalomamarau meda muria, e sega beka ni da vakila e dua na veisau levu ni lomada?

“Turaga, au solia vei Iko na ka kecega; E sega tale ni dua na ka me’u solia vei Iko.”

Eda na maroroya tikoga vakacava na veisau levu oqo?

1. Ni da vakaivotavota ena sakaramede e veimacawa ka vakavouia na veiyalayalati me da taura vei keda na yaca i Karisito, ka dau nanumi Koya tikoga, ka muria na Nona ivakaro.¹⁶

2. Ni da vagolea na noda bula ki na valetabu.¹⁷ Na dau lako wasoma ki na valetabu ena vukei keda meda maroroya e dua na yalo vou ka vakavoui ni da vakaitavi ena cakacaka vakalotu eso.

3. Ni da lomana ka veiqaravi vei ira era wavoliti keda ena itaviqaravi kei na cakacaka vakaulotu.¹⁸

Ia ena noda reki cecere, na veisau e loma oya e vaqaqacotaki ka tete yani me yacova ni sa sinai ena cakacaka vinaka.¹⁹

Na veisau levu ni yalo oqo e kauta mai vei keda e dua na yalo ni galala, veivakabauti, kei na vakacegu.²⁰

Na veisau ni yalo oqo e sega ni ka e yaco walega; e dau taura na vakabauta, veivutuni, kei na vakawasoma ni cakacaka vakayalo me yaco kina. E dau tekivu ni da gadreva meda solia na lomada kivua na Turaga, ka dau vakamatanataki ni da curuma yani ka maroroya na veiyalayalati vata kei Koya.

Na cakacaka ni tamata yadua oqori e dau mana ruarua vei keda kei ira era tu wavoliti keda.

Ena vosa i Peresitedi Russell M. Nelson, “Raitayalotaka na totolo ni yaco na veisaqasaqa levu e vuravura taucoko—kei na kena ena noda dui bula—ena wali rawa kevaka meda digitaka kece meda muri Jisu Karisito ka rogoca Nona ivakavuvuli.”²¹ Na cakacaka oqo ni vakamuri ni ivakavuvuli ni iVakabula e dau veimuataki ki na dua na veisau levu ni yalo.

Taciqu kei na ganequ lomani, itabagone, kei na gone, ni da vakaitavi ena koniferedi ni mua ni macawa oqo, meda laiva na veivosa ni noda parofita, ka na lako mai vua na Turaga, me curuma na yaloda meda vakila e dua na veisau levu.

Vei ira era se bera ni lewena na Lotu vakalesuimai ni Turaga, au sureti kemuni mo ni vakarorogo vei ira na daukaulotu ena gagadre dina m0 kila na ka e namaka vei iko na Kalou ka vakila na veisau e loma oya.²²

Nikua sa ikoya na siga meda vakatulewataka meda muria na Turaga o Jisu Karisito. “Turaga, au solia vei Iko, na yaloqu; E sega tale ni dua na ka me’u solia vei Iko.”

Me vaka ga na mama a soqovi mai na waqa voca oya, ni da solia na yaloda kivua na Kalou, eda sa vakabulai mai na wasawasa voravora ni bula oqo, ka ena ivakarau oqori, eda sa vakamakaretaki ka vakasavasavataki ena Veisorovaki i Karisito ka yaco meda “luve i Karisito” ni da sa “sucu vei Koya” vakayalo.²³ Au vakadinadinataka na ka oqo ena yaca i Jisu Karisito, emeni.