Curu mai ki na Lomanibai ni Kalou

Na veisureti ni veiyalayalati ni papitaiso i Alama vei ira na soqoni ena Wai o Momani e tekivu ena malanivosa oqo: “Ia oqo, me vaka ni dou sa gadreva mo dou curu kina lomanibai ni Kalou.”⁵

iVakatakilakila

Flock of sheep in the country side standing next to a rock fence.

Na lomanibai se bai ni sipi e dua na rara levu ka lalaga vatu, ka dau taqomaki ira na sipi ena bogi. E dua ga na kena katuba. Ni cava e dua na siga, sa dau kacivi ira na sipi nai vakatawa. Era kila na domona, ka ra curu ena matamata ni bai me ra taqomaki.

Ira na tamata i Alama era kila tu nio ira nai vakatawa era tu ena matamata qiqo ni lomanibai ka ni gauna era curu kina na sipi, era wiliki⁶ ka laurai na nodra mavoa kei na baca ka qaravi vakayadudua. Nodra taqomaki kei na nodra tiko vinaka na sipi e vakatautaki kina nodra yalorawarawa mera curu ka tiko ena lomanibai.

Ena keda maliwa ena tiko beka eso era vakila nira tiko e sauka ni qelenisipi, ka rairai nanuma nira gadrevi se vakamareqeti vakalailai se sega ni okati ena lomanibai. Ia, ena lomanibai ni sipi, ena lomanibai ni Kalou eda dau veibutuyava ena so na gauna ka na gadrevi meda veivutuni se veivosoti.

Ia nai Vakatawa Vinaka⁷—na nodai vakatawa dina—e vinaka tu ga ena veigauna. Ena lomanibai ni Kalou, eda sotava kina na Nona veiwanonovi, veisusu veimaroroi ka vakalougatataki nida vakila na Nona loloma veivueti. E tukuna o Koya, “Raica, kau sa ceuti iko ena qeteqete ni ligaqu; a nomu bai sa tikotiko ga e mataqu.”⁸ Na noda iVakabula e kila ka kauwai kina noda ivalavala ca, mosi kei na rarawa;⁹ kei na veika tawadodonu kece ni bula.¹⁰ Era sureti na tamata kece mera ciqoma na veivakalougatataki oqo, me vaka ni ra “sa gadreva mera curu”¹¹ ka digitaka me tiko ena lomanibai. Na isolisoli ni digidigi e sega walega ni dodonu ni digidigi, e madigi me digitaka na dodonu. Kei na lalaga ni lomanibai era sega ni veivesuki ia e ivurevure ni veitaqomaki vakayalo.

O Jisu e vakavulica ni “sa dua bau na qele ni sipi ka dua bau nai vakatawa.”¹² A kaya o Koya:

“Ia ko koya sa curu e katuba, ko koya oqo nai vakatawa ni sipi. …

“A sa vakarogoca na domona ko ira na sipi … ,

“… a sa muri koya ko ira na sipi: ni ra sa kila na domona.”¹³

A qai cavuta tale o Jisu, “Oi au na katuba: kevaka sa curu kina e dua na tamata ena vukuqu, ena vakabulai,”¹⁴ ka vakavulica vakamatata ni dua ga na sala ki na lomanibai ni Kalou ka dua ga na sala meda vakabulai kina. Ena vukui Jisu Karisito.¹⁵

Eda vulica mai na vosa ni Kalou na sala meda curu kina lomanibai, sai koya nai vunau a vakavulica o Jisu Karisito kei ira na Nona parofita.¹⁶ Nida muria na ivunau i Karisito ka curu kina lomanibai ka vakabauti Jisu Karisito, veivutuni, papitaiso ka vakadeitaki, ka yalodina tiko ga,¹⁷ e yalataka o Alama e va na veivakalougatataki, ka vakatabakidua kina tamata yadua. Ko na rawa ni (1) “sereki mai vua na Kalou,” (2) “okati vata kei ira ena imatai ni tucaketale,” (3) “rawata na bula tawamudu,” kei na (4) na Turaga ena qai “sovaraka mai kina vakalevu sara veikemudou na Yalona.”¹⁸

Ni oti nona vakatavulica o Alama na veivakalougatataki oqo, era vakasausau ena marau o ira na tamata. Oqo na vuna:

iMatai: Me vueti e kena ibalebale me saumi e dua na dinau se icolacola se vagalalataki mai na ka e veivakararawataki se veivakamavoataki.¹⁹ E sega ni dua noda sasaga vakai keda meda vinaka e rawa ni vakasavasavataki keda mai nai valavala ca eda sa cakava oti se vakabulai keda mai na noda mavoa ke sega na Veisorovaki i Jisu Karisito. O Koya na noda Dauveivueti.²⁰

iKarua: Ena vuku ni Tucake tale i Karisito, eda na tucake kece tale na tamata.²¹ Ni oti na nona biuta na yagoda na yaloda, e sega ni vakabekataki na noda nanamaki kina gauna eda na rawa ni mokoti ira tale kina na noda daulomani ena dua na yago vakaturi cake tale. Eda nanamaki meda na maliwai ira ena iMatai ni Tucaketale.

iKatolu: Na bula tawamudu e kena ibalebale me bula vata kei na Kalou ka bula me vakataka na Nona bula. Sai koya “nai solisoli uasivi duadua vei ira nai solisoli uasivi ni Kalou”²² ka na vuabale na nodra marau.²³ Sai koya na inaki taumada kei na lalawa ni noda bula.

iKava: Na veitokani ni ikatolu ni Lewetolu va-Kalou, sai koya na Yalo Tabu, e vakarautaka na veidusimaki e gadrevi-vakalevu kei na veivakacegui ena bula vakayago oqo.²⁴

Vakananuma mada eso na vu ni tawamarau: na vei vakararawataki e vu mai na valavala ca,²⁵ na rarawa kei na galili mai na nona mate e dua na daulomani, kei na rere kei na tawakilai ni ka ena yaco nida mate. Ia ni da curu kina lomanibai ni Kalou ka maroroya na noda veiyalayalati kei Koya, eda na vakila na vakacegu ena noda kila ka nuitaki Karisito mena vueti keda mai na noda ivalavala ca, ni veitawasei ni yagoda kei na yaloda ena sega ni dede, ka da na bula tawamudu vata kei na Kalou ena dua na sala lagilagi.

Taciqu kei na ganequ, na ivolanikalou e sinai ena ivakaraitaki ni kaukauwa lagilagi ni iVakabula kei na Nona loloma uasivi ka soliwale. Ena Nona veiqaravi voli e vuravura, na Nona veivakalougatataki ni veivakabulai a gole vei ira era vakararavi vei Koya ka cakacaka ena vakabauta. Me vaka, na tamata tauvimate ena isilisili mai Pecisaita a lako rawa ena gauna, a muria kina ena vakabauta, na ivakaro ni iVakabula me “tucake, taura cake na nomui mocemoce ka lako.”²⁶ Ko ira era tauvimate ka rarawa tu ena veimataqali mate cava ga e vanua Sautu era vakabulai ena gauna era “sa lako yani” kina o ira na lewevuqa “ena dua vata na gauna.”²⁷

Vakakina, me ciqomi na veivakalougatataki veivakurabuitaki e yalataki vei ira era curu kina lomanibai ni Kalou e gadrevi kina mo—digitaka mo lako mai. O Alama Lailai e vakavulica, “Ia oqo au sa kaya vei kemuni sa kacivi kemuni na ivakatawa vinaka; ia kevaka oni na rogoca na domona ena kauti kemuni o koya kina nona lomanibai.”²⁸

Ena vica na yabaki sa oti e dua na itokani lomani e mate ena kenisa. Na watina, Sharon, a vola taumada me baleta na ivakatakilakila ni nona tauvimate, a kaya, “Keirau Digitaka na Vakabauta. Vakabauta na neirau iVakabula, o Jisu Karisito. Na Vakabauta na ituvatuva ni Tamada Vakalomalagi, kei na vakabauta ni kila o Koya na noda gagadre ka na vakayacora na Nona yalayala.”²⁹

Au sotavi ira oti e vuqa na Yalododonu Edaidai me vakataki Sharon ka ra vakila na vakacegu ni lomadra nira tiko taqomaki ena lomanibai ni Kalou, vakabibi ni yaco mai na veitemaki, veisaqasaqa, se veika dredre.³⁰ Era digitaka mera vakabauti Jisu Karisito ka muria na Nona parofita. Na noda parofita lomani, o Peresitedi Russell M. Nelson, e vakavulica, “Na veika vinaka kece ni bula—na veivakalougatataki sa vakarautaki tu ka tawamudu na kena bibi—e tekivu ena vakabauta.”³¹

O tukaqu vakatolu o James Sawyer Holman a lako mai i Utah ena 1847, ia e sega ni maliwai ira na yaco mai ena vula o Julai vata kei Brigham Young. E qai lako mai ena mua ni yabaki, ka nona itavi me kauti ira mai na sipi, me vaka e volai ena ivolatukutuku ni matavuvale. E sega ni yaco kina Buca e Salt Lake me yacova na vula o Okotova, ia o koya kei ira na sipi era yaco bula yani.³²

Ena vosa vakatautauvata, eso vei keda e se tiko ga ena vanua tautavata. E sega nio keda kece eda na yaco mai kei ira ena imatai ni ilawalawa. Kemuni noqu itokani lomani, yalovinaka tomana tiko na ilakolako—ka vukei ira na tani—mera lako vakataucoko mai kina lomanibai ni Kalou. Na veivakalougatataki ni kosipeli i Jisu Karisito e sega ni vakarautaki rawa baleta ni sa tawamudu.

Au vakavinavinaka vakatitobu niu lewena na Lotu i Jisu Karisito ni Yalododonu Edaidai. Au vakadinadinataka na loloma ni Tamada Vakalomalagi kei na noda Dauniveivueti, o Jisu Karisito, kei na vakacegu e lako duadua ga mai vei Rau—na vakacegu ni lomada kei na veivakalougatataki e kunei ena lomanibai ni Kalou. Ena yaca i Jisu Karisito, emeni.