Lesoni mai na Tobu ni Wai

Mai vei Susan H. Porter

iMatai ni Daunivakasala ena Mataveiliutaki Raraba ni Lalai

Eda rawa ni gole vua na iVakabula meda kaukauwa ka vakabulai ka rawa kina meda vakacavara kece na veika eda talai mai kina eke meda cakava.

Sa ka rekitaki dina meu tiko kei kemuni yadua ena soqoni ni marama oqo ni koniferedi raraba!

Au tubu cake mai ena ra kei Niu Yoka kau a lewena e dua na tabana lailai ni Lotu e 20 na maile (32km) mai neitou vale. Niu dabe toka ena kalasi ni Matawilivola ni Siga Tabu ena vale e ra ni neimami valenilotu makawa redetaki kei noqu itokani o Patti Jo, au sega ni vakasamataka rawa niu sa tiki ni milioni na matamarama e vuravura.

Lima na yabaki sa oti, o Bruce na watiqu, a tauvimate bibi sara ni keirau veiqaravi tiko vei ira na Yalododonu vakatabui ena Wasewase ena Tokalau kei Iurope. Keirau sa lesu mai vale ka mai takali yani oti toka ga e vica na macawa. Sa veisau vakasauri na noqu bula. Au a lolosi tiko kau malumalumu ka vakadrukai. Au a masuta na Turaga me dusimaka na noqu sala: “Na cava ko ni vinakata meu cakava?”

Ni oti e vica na macawa, au a vakaraica tiko na noqu meli kau raica sara e dua na iyaloyalo lailai. Niu raica vakavoleka, au raica sara ni dua a droinitaka toka na yalewa ni Samaria vata kei Jisu ena tobu ni wai. Ena gauna o ya, a vosa matata vei au na Yalo: “Oqori na ka dodonu mo na cakava.” E sureti au na Tamada Vakalomalagi dau loloma meu lako mai vua na iVakabula ka vuli vua.

Au gadreva meu na wasea vei kemuni e tolu na lesoni au sa vulica tiko niu tomana noqu gunu mai na Nona tobu ni “wai bula.”¹

iMatai: Na Noda Gauna sa Oti kei na Siga Nikua e Sega ni Lewa na Noda Mataka

Kemuni na marama, au kila ni vuqa vei kemuni vakataki au, o sega ni kila mo sotava vakacava na ibolebole dredre kei na yaluma—yaluma baleta nomu bula e sega ni yacova na sala o nuitaka tiko, masulaka, ka tuvai kina.

Se cava na keda ituvaki, na noda bula sa vakatabui ka vakaibalebale ka vakainaki. Oi keda yadua eda sa luvena yalewa lomani na Kalou, sucu mai vakalou ki na yaloda.

Na noda iVakabula o Jisu Karisito, ena Nona solibula veisorovaki, sa rawa meda vakasavasavataki ka vakabulai, me rawa ni da vakacavara na keda inaki e vuravura se cava nodra lewa na noda vuvale, noda tiko vakawati, bula vakayago se vakasama, se dua tale na ituvaki.

Raica mada na yalewa ena tobu ni wai A vakacava beka na nona bula? Sa kila tu o Jisu ni sa lima oti na watina ka sega ni vakamau kei koya na tagane rau bula vata tiko nikua. Ia, e dina ga ni a sotava na yalewa oqo na veika dredre ena nona bula, na imatai ni Nona vakatakila raraba na iVakabula ni sai Koya na Mesaia e vakaraitaki vei koya. E kaya o Koya, “Sai au ga sa qai vosa tiko vei iko.”²

A qai yaco me ivakadinadina kaukauwa, ka kaya vei ira e nona koro ni o Jisu na Karisito. “A ra sa lewevuqa na kai Samaria ena koro ko ya era sa vakabauti koya ena vuku ni nona vosa na yalewa.”³

Nona ituvaki sa sivi kei na siga nikua a sega ni lewa na nona mataka. Me vakataki koya, eda sa rawa ni gole vua na iVakabula meda kaukauwa ka vakabulai ka rawa kina meda vakacavara kece na veika eda talai mai kina eke meda cakava.

iKarua: Sa Tu vei [Keda] na Kaukauwa

Ena dua na tikina tautau vata ena Vunau kei na Veiyalayalati, e veivakauqeti na Turaga vei ira na marama kei na turaga me ra “gumatua ena cakacaka vinaka, io me ra vakayacora e levu na ka mai na nodra kila ga vakataki ira na ka e dodonu; sa tu vei ira na kaukauwa.”⁴

Kemuni na marama, sa tu vei keda na kaukauwa meda kauta mai kina e levu na ivalavala dodonu!

Sa vakadinata o Presitedi Russell M. Nelson, “Na yalewa kei na tagane kece sara e veiyalayalati kei na Kalou ka rokova na veiyalayalati oqori, ka vakaitavi kilikili ena veicakacaka vakalotu ni matabete, ena lutuki koya mai vakadodonu na mana ni Kalou.”⁵

Au sa mai kila ni gauna eda rokova kina na veiyalayalati tabu a caka ena papitaiso kei na valetabu savasava, na Turaga ena vakalougatataki keda “ena Nona kaukauwa ni veivakabulai, veivakaukauwataki” kei na “rarama vakayalo kei na veivakayadrati [eda] se bera mada ni sotava.”⁶

iKatolu: “Ena Tubu Mai ena Veika Lalai na Veika Cecere”⁷

Ena Vunau ena Ulunivanua, o Jisu a vakavulici ira kina na Nona tisaipeli, “Oi kemudou na masima kei vuravura”⁸ ka “Oi kemudou na rarama kei vuravura.”⁹ E muri a vakatauvatana na matanitu vakalomalagi ki na leveni “sa taura e dua na yalewa ka vunia e loma ni madrai droka e tolu na ivakarau me sa vakalevenitaki kece mada.”¹⁰

Masima
Leveni
Rarama

Ena veitikina lalai mada ga, ena vakayaco-ka ki na veika kece sa tu kina. Sa sureti keda na iVakabula meda vakayagataka na Nona kaukauwa meda sa vakataka na masima, leveni, kei na rarama.

Masima

E veivakurabuitaki na duidui levu e cakava ni miriki na masima me isaluwaki ni keda kakana. Ia, na masima e sau lailai sara ka isaluwaki rawarawa tu ga.

Ena i ka 2 ni vola ni Tui, eda wilika kina “na gone yalewa lailai,”¹¹ a vesuki koya ira na kai Siria ka laki dauveiqaravi vei wati Neamani, na kavetani ni mataivalu ni Siria. Sa vaka na masima; o koya, e goneyalewa, sega ni bibi vei vuravura, ni nona bula vakabobula ena vanua tani a matata sara ni ka a sega ni nuitaka tiko.

Ia, e tukuna na kaukauwa ni Kalou ena rua na iyatu vosa, ni vakadinadinataka tiko vei wati Nemani: “Na Kalou, ke sa tiko mada na noqu turaga vei koya na parofita mai Samaria! ena qai vakabulai koya mai na nona vukavuka.”¹²

Na nona vosa ena vakabauta a tukuni vei Neamani, ka muria na nona vosa, ka yaco me laki vakabulai kina vakayago ka vakayalo.

Eda sa dau raitiko vei ira na italai era uqeti Neamani me sili ena uciwai o Joritani, ka a lewa o Ilaisa na parofita, ia o Nemani a sega ni yaco rawa ena katuba nei Ilaisa ke a sega “na gone yalewa lailai.”

O rairai gone ga se nanuma ni ko sega ni bibi, ia sa rawa mo masimaena nomu vuvale kei na itikotiko raraba.

Leveni.

O sa bau kania na madrai e sega ni vakaleveni? Eda na vakamacalataka vakacava? Vavaku? Bibi? Kaukauwa? Ena dua ga na tiki lailai ni leveni, e tubu na madrai, ka rabailevu me mamada ka malumu.

Ni da sureta na kaukauwa ni Kalou ki na noda bula, sa rawa meda sosomitaka na “lomabibi”¹³ ena ivalavala veivakauqeti e laveti ira eso me galala na yalo me vakabulai.

Wale tikoga oqo, e dua na noqu itokani a davo tu ga ena mataka ni Siganisucu, ni bikai tu ena lolosi. Era a vakauqeti koya na luvena me duri; ia, a solegi tu ena rarawa ni sa vakarau sere. A davo toka ga ka tagi, a sova na yalona ena masu vua na Tamana Vakalomalagi, ka kaya Vua na nona yaluma.

Ni mai vakacavara nona masu, sa vakasolokakanataka vua na Yalotabu ni kila na Kalou na nona mosi. Sa vakasinaiti ena Nona yalololoma baleta koya. Na veika vakatabui e sotava o koya sa vakadeitaki na lomana ka solia vua na inuinui ni a sega ni tagi duadua tiko. A gole i tuba ka bulia kei ira na luvena e dua na tamata ucacevata, ka sosomitaki na lomabibi ni mataka ena veidredrevaki kei na reki.

Rarama

Ena vica beka na rarama me basikata rawa na butobuto ni rumu? Dua na serau lailai. Na serau ni rarama o ya ena vanua buto e rawa ni vure mai na kaukauwa ni Kalou e tiko vei iko.

Dina beka ni ko rairai galili ni sa veiravuti mai na cava ni bula, sa rawa mo caudreva yani na rarama ena butobuto ni veilecayaki, sesewa, kei na tawavakabauta. Na nomu rarama ni vakabauti Karisito me na tudei ka dina, mo muataki ira era voliti iko mera taqomaki ka tiko vakacegu.

Kemuni na marama, ena veisau na yalo kei na bula me kalougata ni da vakamirika na masima, dua na sevuni leveni, dua na serau ni rarama.

Au vakadinadinataka ni iVakabula sa masima ki na noda bula, sa sureti keda meda tovolea na Nona reki kei na loloma.¹⁴ Sai Koya na leveni ni dau dredre na noda bula, me kauta mai vei kedana inuinui¹⁵ ka kauta laivi noda icolacola ¹⁶ ena Nona kaukauwa cecere duadua kei na loloma veivueti.¹⁷O Koya na noda rarama,¹⁸ e serauna noda sala lesu i vale.

Sa noqu masu ni rawa meda gole vua na iVakabula, me vaka na yalewa ena tobu ni wai, ka gunuva na Nona wai ni bula. Vata kei ira na kai Samaria, eda qai rawa ni kaya, “Oqo keimami sa vakabauta, … ni keimami sa rogoca koi keimami, ka kila ni sai koya dina oqo na Karisito, na nodrai iVakabula na kai vuravura.”¹⁹ Ena yaca i Jisu Karisito, emeni.