Tudei ena Cava

Kemuni na taciqu kei na ganequ, eda sa vakalougatataki edai nida rogoci ira nai talai ni Kalou vakauqeti ni vakasalataki ka vakayaloqaqataki keda. O keda yadua, na vanua cavaga eda tiko kina, sa kila ni da bula tu oqo ena dua na gauna dredre sara. Sa noqu masu niu na rawa ni vukea na nomu duri dei ena cava eda sotava, ena yalo vakacegu.¹

Na itekitekivu oya me nanumi ni da sa gone lomani yadua ni Kalou ka ra sa tiko na Nona italai veivakauqeti. Sa raica rawa o ira nai talai ni Kalou oya na veigauna eda bula tu kina. A vola na Apositolo o Paula vei Timoci, “Mo kila talega na ka oqo, ni na yaco eso na gauna ni veivakararawataki ena veisiga mai muri.”²

Dua ga e vakamatana me raica na ivakatakilakila ni gauna kei na daliga me rogoca na nodra vosa na parofita sa kila ni dina tu. Na dredre rerevaki levu duadua e basika mai vei ira na ilawalawa dauvakacaca. Sa tubu cake tikoga na ilawalawa oya. E sa na dredre vakalevu kina, sega ni rawarawa, me dokai na veiyalayalati sa dodonu meda cakava ka maroroya me bulataki kina na kosipeli i Jisu Karisito.

Kivei keda ka veinanumi tu kei ira eda lomana, sa tiko na vakanuinui ena yalayala sa cakava tu na Kalou ena vanua ni tataqomaki ni cava eliu.

Oqo e dua na yaloyalo vakavosa ni vanua oya. E sa dau vakamacalataki tu ga mai vei ira na parofita bula. Eda vulica e dua na lesoni mai vei Ilamani na ivakarau e vakatau kina na yalayala ni tudei vakavatu na noda tara cake noda bula vua na Dauveivueti: “Ia oi kemudrau na luvequ, nanuma, nanuma ni ena uluvatu ni noda iVakabula, sai koya na Karisito, na luve ni Kalou, mo drau tara na nomudrau yavu; ni tevoro sa tala yani nona cagi kaukauwa, io, kei na nona moto ena covulaca, io, ena gauna e na nona uca cevata kei na nona cagi kaukauwa sa yaviti kemudrau, sa na qai sega rawai kemudrau se dreti kemudrau sobu ki na ikeli ni rarawa kei na tawacava, baleta na vatu ka dou sa tara cake, sai koya e dua na yavu dei e dua na yavu e vuravura kevaka me tara cake na tamata era sega ni bale rawa. ”²⁰

Na rarawa kei na yaluma tawacava rawa e a tukuna sai koya na revurevu rerevaki ni valavala ca ke da sega ni veivutunitaki ira vakaoti. Na tubu ni cava sai koya na veitemaki kei na tosocake tikoga ni ravuravu i Setani. E se sega mada ni bibi sara me vakataka oqo na kena kilai deivaki na sala me taracake kina na yavu dei oya. Vei au, sa sega na vanua meu raica vinaka kina me vaka na iotioti ni vunau i Penijamini na Tui, ka volai talega ena iVola i Momani.

Na vosa vakaparofita i Penijamini na Tui sa yaco tu vei keda ena gauna oqo. Sa kila o koya mai na ka a sotava na vakadomobula ni valu. E a taqomaki ira na nona tamata ena vala, ena vakanuinuitaki ni kaukauwa ni Kalou. E a raica matata tu na kaukauwa vakadomobula i Lusefa me temaki, me tovolea ni rawai, ka vakayalolailaitaki ira na luve ni Kalou.

E sa sureti ira na nona tamata kei keda meda taracake ena vatu taqomaki dei duaduaga, oya na iVakabula. E a vakamatatataka ni da sa galala ni digitaka na donu se cala ka na sega ni rawa tu ni da levea na isau ni noda digidigi. E a vosa vakadodonu ka kaukauwa baleta ni sa kila tu na rarawa ena sotavi ira ka na sega ni rogoca ka tugana na nona ivakaro.

Oqo na sala a vakamacalataka kina na isau e salamuria na noda digidigi se da muria na veivakauqeti ni Yalotabu se da muria na itukutuku veivakacalai i Setani, ka sa nona inaki me temaki ka vakarusai keda:

“Ia raica, sa yalataki tu e dua na ca vua sa digitaka me talairawarawa ki na yalo [ca] ko ya; ni kevaka sa digitaka me talairawarawa vua, ka tu ga kina ka mate ena nona ivalavala ca, sa na gunuva ko koya na cudruvi ki yalona; ni sa taura ko koya me kena isau na itotogi tawavakaiyalayala, ni sa talaidredre ki na lawa ni Kalou ka sa saqata kina na ka sa kila. …

“Ia kevaka sa sega ni veivutuni na tamata ko ya, ka meca tu ga ni Kalou, ka mate vata kaya, ena vakayadrata na yalona tawamate rawa na gagadre ni lewa dodonu vakalou me kila vinaka sara na nona cala, ka na vakavuna me kino kina mai na nona iserau na Turaga, ka vakasinaita na lomana na nona cala, kei na rarawa, kei na yaluma, ka sa vaka na bukawaqa tawaboko rawa, ka sa tubu cake tiko ga na kena yameyame ka sega ni mudu ka sega ni mudu.”

A tomana o Penijamini na Tui: “Io, oi kemuni kece na qase, kei kemuni na cauravou, kei kemuni na gone lalai ka rawa mo ni kila na ibalebale ni noqu vosa, ni’u a vosa vakamacala sara vei kemuni mo ni kila, au sa masuta mo ni yadra ka nanuma na rerevaki ni kedra ituvaki ko ira era sa lutu ki na talaidredre.”³

Vei au, na kaukauwa ni vakaro oya meda veivutuni sa vakatakila vei au e dua na yaloyalo ni gauna dei daru na duri tu kina ena mata ni iVakabula ni cava na bula oqo. Eda vinakata ena lomada taucoko meda kakua ni rere ia meda rai cake ki Vua, raica Nona matadredredre, ka rogoca ni kaya, “E vinaka, a tamata vinaka ka dina: … curu [iloma].”⁵

A vakamatatataka o Penijamini na Tui na sala eda rawa ni ciqoma kina na inuinui ni rogoca na veivosa oya ke da raica na sala ena bula oqo me veisautaka na keda ituvaki mai na Veisorovaki i Jisu Karisito. Oya na sala duadua ga eda rawa ni taracake kina ena yavu dei ka duri kaukauwa tu ena gauna ni cava ni veitemaki kei na veivakatovolei eliu. E vakamacalataka o Penijamini na Tui na veisau oya ena keda ituvaki ena dua na vakasama totoka e tara tu na utoqu. Era a vakayagataka na parofita ni gauna eliu kei na Turaga vakai-Koya. O koya oqo: sa dodonu meda vaka tu na gone—dua na gone lailai.

Ki na so, e sega ni rawarawa ni ciqomi oya. E levu vei keda e via kaukauwa. Eda na rairai raica na vaka tu na gone me ka beci. Levu na itubutubu e raica tu na gauna mera sega ni vogonegonea kina na luvedra. Ia o Penijamini na Tui, ka kila dei tu vaka e dua na tamata na ibalebale ni tamata kaukauwa ka qaqa, sa vakadeitaka ni vaka tu na gone e sega ni mai vagonegonea. Me sa na vaka tu na iVakabula, ka masuta na kaukauwa kivua na Tamana me cakava rawa kina na lomai Tamana ka sorovaka na valavala ca taucoko ni luvei Tamana ka qai kitaka. Sa dodonu me veisau na keda ituvaki meda vaka tu na gone ka rawata na kaukauwa me tiko vei keda meda duri dei ka tiko vakacegu ena gauna dredre eso.

Oqo na vakamacala momona i Penijamini na Tui ena sala e yaco kina na veisau oya: “Ni sa meca ni Kalou na tamata vakavuravura, ka sa vaka tu mai kina me tekivu sara mai na lutu i Atama, ka na vaka tu kina me sega ni mudu ka sega ni mudu, ka vakavo ke sa talairawarawa ki na veivakayarayarataki ni Yalo Tabu, ka biuta tani na tamata vakavuravura ka yaco me yalododonu ena vuku ni veisorovaki i Karisito na Turaga, ka yaco me vaka na gone lailai, me talairawarawa, yalomalua, yalomalumalumu, dauvosota, sinai ena loloma, ka ciqoma na veika kece sa raica na Turaga ni dodonu me sotava, me vaka na gone sa talairawarawa vua na tamana.”⁶

Eda ciqoma na veisau oya ni da cakava ka vakavoutaki veiyalayalati kei na Kalou. E kauta mai oya na kaukauwa ni Veisorovaki i Karisito me vakatara na veisau ki na lomada. Eda rawa ni vakila ena veigauna eda taura kina na sakaramede, qarava na cakacaka vakalotu ni valetabu ena vukuna na tubuda sa yali, vakadinadinataka vaka e dua na vakadinadina ni iVakabula, se vukea e dua ka vakaleqai tu vaka na tisaipeli i Karisito.

Ena veika sotavi oya, eda sa vaka tu kina na gone ena kena sagai meda loloma ka talairawarawa. Sa yaco meda duri tu ena yavu dei. Na noda vakabauti Jisu Karisito sa vakavuna meda veivutuni ka muria na Nona vunau. Eda talairawarawa, ka rawata na kaukauwa meda vorata na veitemaki, ka da rawata na veitokani ni Yalo Tabu yalataki.

Sa veisau na keda ituvaki me vaka na gone lailai, talairawarawa vua na Kalou ka loloma vakalevu cake. Na veisau oya ena vakatarai keda ni marautaka na veisolisoli e vakavurea na Yalo Tabu. Na tikori ni veitokani ni Yalotabu ena vakacegui, tuberi, ka vaqaqacotaki keda.

Au sa mai kila tu eso na ka a vakaibalebaletaka o Penijamini na Tui ni a kaya ni da sa rawa ni vaka tu e dua na gone lailai ena mata ni Kalou. Au sa vulica mai na ka e sotavi ni sa dau vosa wasoma na Yalo Tabu ena domo malua, rogoci rawarawa tu ni sa yalomalua ka talairawarawa e dua, vaka e dua na gone. Na kena dina, na masu koya na cakacaka sa ikoya na “Au vinakataka duadua ga na veika Iko vinakata. Vakaraitaka vei au na cava oya. “Au na cakava.”

Ni sa basika na cava ni bula, sa rawa ni o dei tu baleta ni o sa duri tiko ena vatu ni nomu vakabauti Jisu Karisito. Na vakabauta oqori ena muataki iko ki na veivutuni kei na maroroi tu ni veiyalayalati e veisiga. O na qai dau nanumi Koya tikoga. Ia mai na cava ni veicacati kei na cakaca, ko na tudei tu ka vakanuinui.

Me kena ikuri, o na raici iko ni sudra tu yani mo laveti ira na tani kivei iko ena vatu ni tataqomaki. Na vakabauti Jisu Karisito sa dau muataki tu ki na vakanuinui levu kei na vakilai ni loloma cecere vei ira na tani, ka sa loloma dina i Karisito.

Au wasea vei kemuni na noqu vakadinadina momona ni sa sureti iko tu na Turaga o Jisu Karisito “Lako mai vei au.”⁷ Sa sureti iko o Koya, ena nona lomani iko kei ira o lomana, mo ni lako mai vei Koya ena vakacegu ni bula oqo kei na bula tawamudu ena vuravura mai muri. E kila vinaka sara tu ga o Koya na cava o na sotava ena nomu vakatovotovo me tiki ni tuvatuva ni bula marau.

Au vakamasuti iko mo vakadonuya na veisureti ni iVakabula. Me vaka na gone yalomalua ka dauloloma, vakadonuya na Nona veivuke. Cakava ka maroroya na veiyalayalati e dolea tu e Na Lotu i Jisu Karisito ni Yalododonu Edaidai. Era na vaqaqacotaki iko. Sa kila tu na iVakabula na cava kei na vanua eso ni tataqomaki ena sala lesu i vale ki Vua kei na Tamada Vakalomalagi. Sa kila o Koya na sala. Sai Koya na sala. Au sa vakadinadinataka ena yaca tabu i Jisu Karisito, emeni.