Kakua ni lecava e dua na madigi mo vakadinadinataki Karisito kina.”

Lima na yabaki sa oti, eda a lave liga ka tokona na noda parofita lomani o Peresitedi Russell M. Nelson, me Peresitedi ni Lotu i Jisu Karisito ni Yalododonu Edaidai―na gusu ni Turaga ena gauna vakasakiti ni tubu kei na vakatakila. Ena vukuna eda sa ciqoma e vuqa na veisureti kei na iyalayala ni veivakalougatataki vakalou kevaka eda vakadodonutaka na noda bula vua na iVakabula, o Jisu Karisito.

Ena 2011, noqu a kaulotu tiko kei watiqu vakaliuliu ni tabana ni kaulotu ena vanua totoka o Curitiba, Brazil, a taqiri na noqu talevoni ena dua na gauna ni bose. Au vatotolo saraga meu vagaluiya, kau raica ni qiri tiko mai o tamaqu. Au biuta totolo sara na bose meu sauma yani, “Bula, Tamaqu!”

Sega niu namaka, me rogo i domona na tagi: “Bula, Bonnie. Au gadreva meu wasea yani e dua na ka. E sa kune vakavuniwai vei au na mate na ALS.”

E cawiri na noqu vakasama ena veilecayaki, “Wawa! Na cava na ALS?”

Sa tekivu me vakamacala mai o Tamaqu, “E vakarorogo tiko na noqu vakasama ia sa tekivu me vakamalua mai na yagoqu.”

Au vakila ni vaka e tavuki na noqu vuravura niu sa tekivu vakasamataka na irevurevu ni veika e vakamosi yalo au sa mai rogoca qo. Ia ena siga au na sega ni guilecava oya, na iotioti ni nona yatu vosa ka kasa dei e lomaqu. E tukuna na tamaqu lomani vei au ena yalo maqusa, “Bonnie, kakua ni lecava e dua na madigi mo vakadinadinataki Karisito kina.”

Au dau vakasamataka ka masulaka na nona vakasala vei au o Tamaqu. Au dau taroga vakawasoma, kevaka au kila deivaki na ibalebale meu kakua ni lecava vakadua e dua na madigi meu vakadinadinataki Jisu Karisito kina.

Me vakataki iko, eso na gauna au dau tucake ena imatai ni Siga Tabu ni vula ka vakadinadinataki Karisito. Ena vuqa na gauna au dau vakadinadinataka na dina ni kosipeli me tiki ni dua na lesoni. Au sega ni vakataratutu ena vakavulici ni dina na kena wasei ni vakalou na Karisito ena gauna ni noqu kaulotu.

Ia, na kerekere oqo sa baleti au saraga! E vaka ga me tukuna tiko mai, Kakua ni vakatara me rawati iko o vuravura, Bonnie! Mo dei ena nomu veiyalayalati kei na iVakabula. Vakasaqara mo vakila na Nona veivakalougatataki ena veisiga, ka mo vakadinadinataka mai na Yalo Tabu na Nona kaukauwa kei na Nona tiko ena nomu bula!

Eda bula tiko ena dua na vuravura veirawai, ena veika e okata tu na matamu kei na yalo e vuki sobu ka sega ni rai cake. Me vakataki ira na Nifaiti 3 Nifai 11, eda gadrevi Jisu Karisito. O raitayaloyalotaki iko e kea, ena kedra maliwa na tamata era lako curuma na veilecayaki kei na veivakarusai? Ena vakacava tu beka mo rogoca na veisureti yadua ni Turaga:

“Mo ni tucake ka lako mai vei au, mo ni daramaka kina na ligamuni ki na sarisariqu, ka tara tale ga na we ni ivako ena ligaqu kei na yavaqu mo ni kila kina ni sai Au na Kalou ni Isireli kei na Kalou ni vuravura taucoko, ka’u a vakamatei ena vuku ni ivalavala ca ni vuravura.

“Ka ra qai lako yani na lewevuqa … yadudua … era sa raica e matadra ka tara ena ligadra … ka era vakadinadinataka¹

Era maqusa na Nifaiti oqo mera lako mai ka daramaka na ligadra e sarisarina ka tara na we ni ivako e ligana kei na yavana mera vakadinadinataka vakai ira ni sai Koya dina na Karisito. Vakakina, e vuqa na tamata vakabauta eda vulica ena Veiyalayalati Vou ena yabaki oqo era waraka na nona lako mai na Karisito. Era biuta mai na nodra iteitei, teveli ni cakacaka, kei na teveli ni kana ka muri Koya, mera okati kei Koya, veidrigiti yani vei Koya, ka dabe vata kei Koya. Eda maqusa li vakaoqo me da vakadinadinataka vei keda me vakataki ira na lewevuqa ena volanikalou? E lailai beka na veivakalougatataki eda gadreva ni vakatauvatani kei ira oqo?

Nona lako na iVakabula me sikovi ira na Nifaiti ena valetabu, na Nona veisureti me ra kua ni tucake tu vakayawa ka raici Koya tiko mai, ia me ra mai tarai Koya, ka vakila vakaidina na iVakabula na kawa tamata. E rawa vakacava meda mua voleka me da ciqoma kina na vakaidinadina yadua i Jisu Karisito? Oqo beka e tiki ni veika e via vakavulica tiko vei au o tamaqu. Dina ga ni da sega ni bula mai kei ira era a taubale volekati Karisto ena Nona veiqaravi e vuravura, ia na Yalo Tabu e vakatara meda vakila na Nona kaukauwa e veisiga! Na kena levu ga eda gadreva!

O ira na goneyalewa e vuravura era vakavulici au meu vakasaqarai Karisito ka ciqoma e veisiga e dua na iVakadinadina me baleti Koya. Meu wasea e rua na kila vuku mai vei ira oqo:

Livvy e dau sarava na koniferedi raraba na nona bula taucoko. Na kena dina, nodratou ivakarau e vale, eratou dau sarava kece na lima na soqoni vakavuvale. E liu, na koniferedi vei Livvy e dau droini kina se dau lutu nona moce sega ni nakiti. Ia na koniferedi se qai oti qo ni Okotova a duidui sara. E lauti koya.

Na gauna oqo, sa nanuma o Livvy me yadrava vinaka kece. A vakagaluiya na nona talevoni ka vola na cava ga e vakauqeti kina mai na Yalotabu. E kurabui o koya ena veika e vinakata na Kalou me kila ka cakava. Na digidigi oqo e kauta mai na veisau ena nona bula ena gauna saraga oya.

Vica na siga ni oti oya, era sureti koya na nona itokani me laki sarava e dua na iyaloyalo tawa kilikili. Wasea o koya, “Au vakila na vosa kei na yalo ni koniferedi e lesu mai ki na utoqu, kau rogoci au sara niu sa vakadarodaro.” A qai wasea na nona vakadinadina baleta na iVakabula ena nona tabanalevu.

Ni oti na veika a yaco oqo, a qai kaya, “Na veivakurabuitaki ni ka e qai yaco, noqu a wasea na noqu vakadinadina ni Karisito o Jisu, au vakila tale na nona veivakadeitaki na Yalo Tabu vei au.”

E sega ni veisisiyaki o Livvy e dela ni wai o Livvy ena macawa ni koniferedi; e lade yani ki loma na nona vakasama kei na yalona, ka qai kunea kina na iVakabula.

Sa qai tiko o Maddy Na gauna e sa sega kina ni laki lotu na nona vuvale, a veilecayaki o Maddy ka sega ni kila na cava me cakava. E vakila o koya ni dua na ka bibi sa calata tiko o koya. Mai na yabaki 13, e sa tekivu me lako duadua ki lotu o Maddy. E dina ga nida tu duadua e dau dredre ka sega ni logalogavinaka, e kila ni rawa me kunea na iVakabula e valenilotu ka vinakata me tiko ena vanua e tiko kina o Koya. Tukuna o koya, “Ena lotu, e vakila na yaloqu ni vaka ga e vale.”

Tautauri matua o Maddy ni sa vauci ena valetabu me tawamudu na nona vuvale. Sa tekivu me kauti ratou mai na tacina tagane ki valenilotu ka dau vulica na ivolanikalou kei ratou e vale. Qai yaco me dau tomani ratou na tinadratou. Wasea o Maddy vei nona Na, nona gagadre me lako i kaulotu ka kerea kevaka e rawa ni vakarautaki koya me na tiko kei koya e valetabu.

Nikua o Maddy e sa tiko ena MTC. E sa kaulotu tiko o koya. E ivakadinadina i Karisito. Na nona ivakaraitaki e vukea me liutaki rau nona itubutubu me lesu ki na valetabu ka lesu vei Karisito.

Me vakai Livvy kei Maddy, ni da digia me da vakasaqarai Karisito, na Yalotabu ena vakadinadinataki Koya ena vuqa na ituvaki duidui. Na ivakadinadina ni Yalotabu oqo e dau yaco ni da lolo, masu, waraka ka toso tikoga ki liu. Na noda volekati Karisito e tubu ni da sokalou vakawasoma ena valetabu, veivutuni e veisiga, vulica na ivolanikalou, tiko ena gauna ni lotu kei na semineri, na vakasamataki titobu ni veivakalougatataki vakapeteriaki, ciqoma ena yalo dina na cakacaka vakalotu, ka dinata na noda veiyalayalati tabu. Na veika kece oqo e sureta na Yalo me vakararamataka na noda vakasama, ka vakalevutaka na itataqomaki vei keda. Ia eda rokova tiko li ni oqo na imadigi tabu me vakadinadinataka na Karisito?

Au dau tiko ena valetabu e vuqa na gauna, ia niu sokalou ena vale ni Turaga, e dau veisautaki au. Eso na gauna niu dau lolo, au dau raica niu vakalala tikoga na ketequ, ia eso tale na gauna, au kana magiti ena Yalotabu vaka inakinaki. Eso na gauna na noqu qaqanimasu dau sega soti ni vakaibalebale, ia eso talega na gauna au dau lako mai ena nanamaki meu vakasalataki mai vua na Turaga ena masu

E dua na kaukauwa e tiko ni da vakayacora na ivakarau tabu oqo me sega soti ni veika eda rawa ni toqa tani mai na lisi, ia me ivakadinadina. Na cakacaka oqo ena mua tiko vakamalua ka na tubu cake kevaka me veisiga, na noda vakaitavitaki keda vakawasoma kei na inakinaki eda lako curuma kei Karisito. Ni da vakaitavitaki keda vakawasoma ka vakayacora na Nona ivakavuvuli, eda na ciqoma kina na ivakadinadina me baleti Koya, eda na taracake na veiwekani kei Koya kei na Tamada Vakalomalagi. Eda tekivu meda vakataki Koya.

Na vunica ena vakatubura mai na kosakosa koya e dau dredre kina na rogoca na domo ni Turaga. Na noda vuravura, na noda ibolebole, kei na ituvaki ena sega ni lailai mai, ia e rawa ni da via kania ka via gunuva na veika vaKarisito me rawa ni matata cake na noda “rogoci Koya.”² E gadrevi meda tauyavutaka e dua na kila ka ni bulataki wasoma na bula vakatisaipeli kei na ivakadinadina ena vakanamatataka na noda vakanuinui vua na iVakabula e veisiga.

Sa oti e 11 na yabaki na nona takali o Tamaqu, ia e bula tu na nona vosa vei au. “Bonnie, kakua ni lecava e dua na madigi mo vakadinadinataki Karisito kina.” Au sureti kemuni mo ni tomani au mai ena ciqomi na veisureti. Vakasaqarai Karisito e veivanua―au yalataka ni tiko ikea o Koya!³ Na marau dina e tiko ena noda makututaka na vakavolekati keda vei Karisito ka vakadinadinataka tiko vei keda yadua.

Eda kila ena vakataotioti ni gauna, “ena tekiduru na duru kecega, ka vakatusa na yame kecega ni o Jisu na Karisito.”⁴ Au masulaka na vakadinadina oqo ena yaco me dua na ka eda lakocuruma ena veigauna nikua—ka eda na taura na madigi kece me da vakadinadinataka ena yalo marau: e bula tiko na Karisito!

Sa ka levu na noqu lomani Koya. Au vakavinavinakataka na Nona Veisorovaki tawamudu sa yaco kina me rawa na bula tawamudu kei na bula tawamate rawa me rawa vei [keda] kece.”⁵ Au vakadinadinataka na vinaka ni noda iVakabula kei na lagilagi cecere ena Yacana tabu, o Jisu Karisito, emeni.