Na iSau ni taro e Veigauna o Jisu Karisito

Kemuni na taciqu kei na ganequ, eda sa mai vakani vakayalo ena rua na siga veitaravi sa oti. E vakasakiti na sereivakatagi mai na matasere. Era sa vosa vei keda era iyaragi ni Turaga. Sa noqu masu ni ko na vakasaqara na Yalo Tabu me dusimaki iko ena nomu vulica tiko kei na nomu vakasamataka na dina sa mai vakavulici ena itutu ni vunau oqo. Era sa talai dina mai lagi.

Na macawa mai qo na Sigatabu ni Siganimate. E ivakananumi bibi duadua vei ira na dauvakamuri Jisu Karisito. Na inaki levu eda marautaka kina na Siganisucu sai koya ni baleta na Siganimate. Na lesoni ni Lako Mai Mo Muri Au ni macawa oqo ena vakavuna mo vulica na iotioti ni curu qaqa ki Jerusalemi na iVakabula, Nona vakasavasavataka na valetabu, Nona rarawa ena Were o Kecisemani, Nona Vakoti, Nona Vakaturicake tale ena lagilagi, kena na Nona rairai mai vei ira na dauvakamuri Koya.¹

Vakamareqeta na veitikina tabu oqo ka vakasaqara na sala kece sara mo vakavinavinakataka na Tamada Vakalomalagi ni tala mai na Luvena Duabau ga.² Ena vuku i Jisu Karisito, sa rawa nida veivutuni ka vosoti na noda ivalavala ca. Ena vukuna, eda na tucaketale mai na mate o keda vakayadua.

Au sureti kemuni tale mo ni vulica tale na itukutuku ni Nona rairai mai na iVakabula vei ira na Nifaiti e Amerika, me vaka e volaitukutukutaki tiko ena 3 Nifai. Sega ni balavu mai na gauna e qai rairai mai kina, a rogo na Domona vei ira na tamata, oka kina na vosa ni vakatakekere oqo:

“Dou na sega li ni veivutunitaka na nomudou ivalavala ca ka saumaki ka lesu mai vei au meu vakabulai kemudou?

“Raica, sa dodo tu yani vei kemuni na liga ni noqu loloma cecere, ia ko koya yadua sa lako mai, au na ciqomi koya.”³

Kemuni na taciqu kei na ganequ, na veisureti vata oqori e cakava tiko o Jisu Karisito vei iko nikua. Au vakamasuti kemuni mo ni lako mai Vua me rawa ni vakabulai iko! Ena vakabulai iko mai na ivalavala ca kevaka o sa veivutuni o Koya. Ena vakabulai iko mai na rarawa kei na rere o Koya. Ena vakabulai iko mai na mavoa ni vuravura oqo o Koya.

Na vakatataro se leqa cava ga o sotava, na kena isau e veigauna kece e kune ena bula kei na ivakavuvuli i Jisu Karisito. Vulica vakalevu cake me baleta na Nona Veisorovaki, Nona loloma, Nona loloma soliwale, Nona ivanua, kei na Nona kosipeli vakalesui mai me veivakabulai ka veimuataki ki liu. Vuki mai Vua! Muri Koya mai!

Sai Jisu Karisito na inaki ni noda tara tiko na valetabu. Era sa Nona vale vakatabui yadua. Na vakayacori ni veiyalayalati kei na ciqomi ni cakacaka vakalotu bibi ni valetabu, kei na kena vakasaqarai meda toro voleka yani Vua ekea, ena vakalougatataka na nomu bula ena sala e sega tale ni rawa ena dua tale na mataqali sokalou. Ena inaki oqo, keitou sa cakava tiko na veika kece keitou rawata ena kaukauwa e tiko me vakarautaka na veivakalougatataki ni valetabu ki vei ira na noda lewenilotu e vuravura taucoko. Nikua, au vakavinavinakataka niu rawa ni kacivaka na neitou ituvatuva me tara na valetabu vou ena veivanua eso oqo:

• Retalhuleu, Guatemala

• Iquitos, Peru

• Teresina, Brazil

• Natal, Brazil

• Tuguegarao City, Filipaini

• Iloilo, Filipaini

• Jakata, Idonisia

• Hamburg, Jamani

• Lethbridge, Alberta, Canada

• San Jose, California

• Bakersfield, California

• Springfield, Missouri

• Charlotte, North Carolina

• Winchester, Virginia

• Harrisburg, Pennsylvania

Kemuni na taciqu kei na ganequ, au vakadinadinataka ni o Jisu Karisito e dusimaka tiko na veigacagaca kece ni Nona Lotu. Au vakadinadinataka na noda muri Koya sai sala duadua ga ki na marau tawayalani. Au kila ni Nona kaukauwa mana esa sobuti ira tiko na Nona tamata daumaroroi veiyalayalati, “ka sa vakaiyaragi tu ena ivalavala dodonu kei na kaukauwa ni Kalou ena lagilagi cecere.”⁴ Au vakadinadinataka na veika oqo, kei na noqu loloma kei na veivakalougatataki baleti kemuni yadua, ena yaca tabu i Jisu Karisito, emeni.