Au Sa Vosoti Beka Vakaidina?

Ena vica na yabaki sa oti, keirau a toki kei Sister Nattress ki Idaho, ka dolava kina e dua na bisinisi vou. E a levu sara na veisiga kei na veibogi balavu e valenivolavola. A ka ni marau, ni keirau tiko voleka ga ki na vanua ni cakacaka. E veimacawa, o Shawna kei iratou na luvei keirau yalewa e tolu—ka lailai mai na ono na nodratou yabaki—eratou daulako mai ki valenivolavola me keitou vakasigalevu vata.

Ena dua na siga vakaoya, ni oti neitou vakasigalevu vakavuvale, au raica ni o luvei keirau yalewa yabaki lima, o Michelle, a biuta toka e dua na itukutuku vei au, ka volai ena dua na tikinipepa ka kabi toka ena noqu talevoni e valenivolavola.

A vakatoka oqo, “Tata, nanuma mo lomani au. Loloma, Michelle.” Oqo e a dua na ivakananumi kaukauwa vua e dua na tama gone me baleta na veika era bibi duadua.

Taciqu kei na ganequ, au vakadinadinataka ni o Tamada Vakalomalagi e dau nanumi keda ka lomani keda vakataucoko sara o Koya. Oqo na noqu taro: Eda dau nanumi koya beka? Ka da lomani Koya beka?

Vica na yabaki sa oti, au a veiqaravi vaka dua na iliuliu ni lotu ena vanua au a tiko kina. Edua vei ira na neimami cauravou, o Danny, e a totoka ena vei ituvaki ni bula kece sara. E dau talairawarawa, yalovinaka, vinaka, ka dau yalololoma. Ia, ni taurivola oti mai na koronivuli torocake, e a tekivu me vakailawalawa kei na dua na ilawalawa ca. E a vakayagataka na wai gaga, na kena mataqali na methamphetamine, ka sisi sobu ena baba ni veivakatotogani kei na veivakarusai. Sega ni dede, sa veisau sara ga na kena irairai. E a dredre sara ga me kilai. Na veisau levu duadua a kunei e matana—sa buawawa mai na rarama ni matana. Au a dolele yani vua vakavicavata, ia a sega na betena. E a sega ni malele mai.

Sa dredre me raici na cauravou vakasakiti oqo ni rarawa ka bula tiko e dua na bula ka sega ni vinakata! E a tu vua na igu me cakava e levu sara na ka.

Ia e na dua na siga, sa qai tekivu na nona cakacaka mana.

E a tiko ena dua na lotu ni sakaramede ka a wasea kina o tacina gone na nona ivakadinadina ni bera ni gole ki kaulotu. Ena gauna ni soqoni, a vakila o Danny e dua na ka a sega tu ni vakila me dua na gauna balavu. A vakila o koya na loloma ni Turaga. Sa qai rawata o koya na inuinui.

Dina ni a tu vua na gagadre me veisau, sa dredre dina vei Danny. Na nona vakatotogani kei na veibeitaki ni yalona ka salavata kaya e a sivia na kena a rawa ni taqea.

Ena dua gona na yakavi, niu a koti co tiko, e a sega ni namaki na kele mai nei Danny ena nona motoka. Sa dua na ka na nona rarawa. Au a muduka na ikoti ni co, ka keirau dabe vata ena rurugu ni ikabakaba ni matanivale. Ena gauna oya sa tekivu me wasea o koya na veika e vakila tu e lomana. E vinakata dina o koya me lesu tale mai. Ia, a dredre vua me vakanadakuya na nona vakatotogani kei na ivalavala ni bula. Me kena ikuri, a vakila dina na nona cala, ka maduataka vakalevu na yawa ni vanua sa lutu kina. E a taroga, “E rawa beka meu vosoti vakaidina? E tiko dina beka e dua na sala lesu mai?”

Ni oti nona sovaraka na lomana ena vei kauwai eso oqo, keirau a wilika vata na Alama wase e 36:

“Io, au a nanuma mai na noqui valavala ca kei na noqu caka cala kecega. …

“Io, … ka a kurelaki na yaloqu ena rere e sega ni vakamacalataki rawa ni’u vakasamataka na gauna au na tu kina ena mata ni Kalou” (tikina e 13–14).

Ni oti na veitikina oya, e a kaya o Danny, “Oqo sara ga na ka au vakila tiko!”

Keirau tomana:

“Ena noqu sa cukiraki tu ena vakasamataki ni levu ni noqu ivalavala ca, raica, au sa nanuma talega niu sa rogoci tamaqu ni sa parofisaitaka vei ira na tamata me baleta na nona lako mai e dua ka yacana ko Jisu Karisito, edua na Luve ni Kalou, me mai sorovaka na ivalavala ca ni vuravura. …

“Ia oqo, sa dua na ka na marau, kei na kena totoka na rarama au sa raica” (tikina e 17, 20).

Ni keirau wilika na veitikina oqo, sa tekivu me drodro na wainimatana. Na reki nei Alama e a sai koya sara ga na reki a vakasaqara tiko o koya!

Keirau veitalanoataka ni o Alama e a dua dina na tamata ca. Ia, ena gauna ga a veivutuni kina, e a sega tale ni rai ki muri. A yaco me dua na tisaipeli yalodina i Jisu Karisito. A yaco o koya me dua na parofita! A waqa na matai Danny. “E dua na parofita?” a kaya.

Au kaya yani, “Io, e dua na parofita. Sega ni namaki mo na vakakina!”

Keirau veitalanoataka ni dina ga a sega ni tautauvata na nona ivalavala ca kei na nei Alama, ia na yalayala vata ni veivosoti vakataucoko ka vakaoti, e yalataki vei keda kece—ena vuku ni Veisorovaki tawayalani i Jisu Karisito.

E sa qai matata sara vei Danny. Sa kila o koya na ka e gadrevi me cakava: e gadrevi me tekivutaka na nona ilakolako ena nona vakararavi vua na Turaga ka vosoti koya vakai koya!

Na veisau levu ni lomai Danny e a vaka e dua na caka mana. Ni toso tiko na gauna, sa veisau mai na kena irairai, ka tekivu me lesu tale mai na rarama ni matana. A yaco me kilikili kaya e dua na ivolatara ni valetabu! A sa lesu tale mai o koya!

Ni oti e vica na vula, au a tarogi Danny se via volakerekere me veiqaravi vaka daukaulotu tudei. Nona isaunitaro a veivakayadrati ka qoroi.

A kaya, “Au taleitaka meu veiqaravi vakadaukaulotu, ia o kila na noqu bula kei na veika au a cakava! Au nanuma niu na sega ni vakadonui.”

Au sauma yani, “E rawa ni o dina. Ia, e sega ni dua na ka e tarovi kedaru me daru cakava e dua na kerekere. Kevaka o na vakasukai, edaru sa na kila mada ga ni o vakaraitaka e dua na gagadre dina mo veiqaravi vua na Turaga.” E a ramase mai na matana. A talei vua na vakasama oya. A sega ni namaka o koya me vakadonui, ia e sega ni dua na kena leqa me vakatovolea mada ga.

Ena vica na macawa ki muri, kei na nona kurabui, a yaco tale e dua na cakamana. A ciqoma o Danny e dua na kaci me veiqaravi vaka daukaulotu tudei.

Ni oti e vica na vula ni nona yaco o Danny ki na buturara ni kaulotu, au a ciqoma e dua na qiri. E a kaya ga vakaoqo o nona peresitedi ni kaulotu, “E mataqali cauravou vakacava o koya qo? O Koya e daukaulotu vakasakiti duadua au se qai bau raica!” Ni raica, na peresitedi oqo a ciqoma edua na Alama Lailai ni gauna-oqo.

Ni oti e rua na yabaki, e a lesu mai ki vale o Danny ena lagilagi, ni oti nona qarava na Turaga ena yalona , igu, vakasama, kei na nona kaukauwa taucoko.

Ni oti nona ripote ni kaulotu ena soqoni ni sakaramede, au a lesu ki vale, ka rogoca e dua na tukituki ena mata ni katuba e liu. A duri tu kina o Danny ka tonawanawa tu na wainimatana. A kaya mai, “E rawa ni daru veitalanoa me dua na miniti?” Keirau a gole ki tautuba ki na ikabakaba ni poji vata oya.

A kaya, “Peresitedi, o nanuma beka niu sa vosoti vakaidina?”

Oqo au sa qai tagi vata kei koya. E tu e mataqu e dua na tisaipeli yalodina i Jisu Karisito ka a soli bula me vakavulica ka vakadinadinataka na veika me baleta na iVakabula. O koya a ivakadinadina ni veivakabulai kei na kaukauwa veivaqaqacotaki ni Veisorovaki ni iVakabula.

Au a kaya, “Danny! O sa bau raici iko mada ena iloilo? O sa bau raica mada na matamu? Erau sinai ena rarama, ka o serauni tu ena Yalo ni Turaga. Io o sa vosoti oti! O sa vakasakiti dina! Na ka o gadreva mo cakava oqo ena nomu bula sai koya mo toso ki liu. Kakua ni rai lesu! Rai ki liu ena vakabauta ki na cakacaka vakalotu ka tarava.”

E sa tomani tiko nikua na cakamana nei Danny. A vakamau ena valetabu ka lesu tale ki vuli, ka rawata mai kina e dua na koroi cecere. E tomana tiko nona qarava na Turaga ena lagilagi kei na dokai ena nona veikacivi. Ka vakabibi, ni sa mai yaco me dua na tagane-vakawati vakasakiti ka tama yalodina. O koya e dua na tisaipeli yalodina i Jisu Karisito.

O Presitedi Russell M. Nelson a vakavulica, “Kevaka a sega na Veisorovaki tawayalani ni [iVakabula], ke a yali vakadua na kawatamata.”¹ O Danny, se o keda eda sega ni yali mai na mata ni Turaga. E duri tu e katuba me laveti keda, me vaqaqacotaki keda, ka vosoti keda. E dau nanuma o Koya me lomani keda tikoga!

E dua na ivakaraitaki vakasakiti ni loloma ni iVakabula e volai tiko ena iVola i Momani: “Ka sa yaco ni sa cavuta oti na vosa oqo ko Jisu, sa vakararai yani vei ira na lewevuqa ka raica ni ra sa tagi ka raici koya vakamatua yani ka vaka era sa vakamasuti koya me tiko vata mada vakalailai tale kei ira” (3 Nifai 17:5).

Sa vakayagataka oti na iVakabula e dua taucoko na siga me qaravi ira na tamata. Ia, a se levu tu na ka me cakava o Koya—me sikovi ira na Nona sipi tale eso; me lesu tale vei Tamana.

E dina ni tu na vei itavi oqo, a kila rawa o Koya ni ra gadrevi Koya na tamata me tiko tale mada vakalailai kei ira. Oti oya, ni sinai na yalo ni iVakabula ena yalololoma, a qai yaco e dua na cakacakamana levu ena itukutuku kei vuravura:

E a tiko mai o Koya.

A vakalougatataki ira o Koya.

A qaravi ira vakayadudua na luvedra o Koya.

A masulaki ira, ka tagicaki ira o Koya.

Ka vakabulai ira o Koya. (Raica na 3 Nifai 17.)

Na Nona yalayala e tawamudu: ena vakabulai keda o Koya.

Kivei ira era sa lakosese mai na salatu ni veiyalayalati, yalovinaka mo kila ni se tiko na inuinui, e se tiko na veivakabulai, ka se tikoga na gaunisala lesu tale.

Na Nona itukutuku tawamudu ni inuinui e ilumu ni veivakabulai vei ira kece na bula tiko ena vuravura ni leqa oqo. E kaya na iVakabula, “Koi au na sala, kei na vu ni dina, kei na vu ni bula” (Joni 14:6).

Kemuni na taciqu kei na ganequ, meda nanuma meda vakasaqarai Koya, lomani Koya, ka daunanumi Koya tikoga.

Au vakadinadinataka ni bula na Kalou ka dau lomani keda o Koya. Au vakadinadinataka talega ni o Jisu Karisito na iVakabula kei na dauveivueti ni vuravura. Sai koya na vuniwai levu. Au kila ni bula tiko na noqu Dauniveivueti! Ena yacai Jisu Karisito, emeni.